#وجوه_مستعاره ❤ حلقه اظافيه 27 ✍🏻
بعد اسبوعين اسراء تخرجت وكانت فرحانه فرحه لا توصف حتى خطيبها عمران كان حاضر وباتها وخواتها وخوها ميلاد كلهم فرحولها وباركولها دارولها حفله في الحوش وعزمو فيها عدد كبير من الناس حتى فرح جات قربت منها وهي تبتسم : الف الف مبروك تخرجك
اسراء بأبتسامه : الله يبارك فيكي وشكرا علي جيتك
فرح : ولو مش بينا وهمستلها مبروك عالموضوع التاني
اسراء وجها احمر قعد وماقدرتش تبحت فيها خاصة ان حمزه يكون ولد عمها وهي اخر من يعلم بيه
حنان تسكت في ولدها وسام ورقيتلها : اسكت حرام عليك شنو صايرلك ياربي كنه العيل مابش يسكت
خلود : عطيه ليا توا نحاول معاه وهوت عليه وبرمت بيه بالايش سكت في حضنها ورقد كلما اتحاول اتحطه في فراشه يفتح أعيونه ويبكي لكن يسكت بعد ترفعه خلود مره تانيه وتحضنه : لا ياعمري خلاص اشششش
حنان : بجديات تعبني ماعرفتش كنه يبي الشيل وخلاص وانا تعبت من امبدري وانا نبرم بيه
خلود : وسعي بالك توا يهدأ ويسكت هو حايس بس
الحاجه سميه جاتهم : كنكم يا بنات قاعدات هنا
حنان : ولدي متعبني وانا حيلي انهد باته علمه الشيل
الحاجه : لا حول ولا قوة الا بالله توا يرقد وتتريحي
حنان : ان شاء الله يرقد راسي خلاص حاينفجر
رهف بحتت في نجوى : وين حنان مش باينه
نجوى : تسكت في ولدها حايس تعبها من امبدري
رهف : كنه شنو صايرله العيل بسم الله
نور : وليد يشيل فيه وخلاص عوده عالشيل
رهف : توا نعدي نشوفها وعدت ادور عليها ولقتها في غرفة المعيشه راقيتلها وخلود تسكت في وسام قربت من عند خلود وخدت منها العيل وقعدت تهوي عليه بحنان وتقرا في نفسها البعض من الايات بكاء وبعدها هداه وتريح في حضن رهف وغمض اعيونه ورقد
حنان : ريتيه سكت ورقد قهرني وحق الله
رهف : اشششش الاطفال يبو الحنان يا نوني
حنان : والله تعبت مابش يسكت وعصبني
رهف حطت وسام علي فراشه بهدوء بدون اي حركه وطلقاته وغطاته وهي تبتسم : بالشويه بس حايلين معاكي صدقيني وحايسكت لكن تكوني معصبه مش حايسكت انا كنت هكي بس عرفت كيف نتعامل مع بناتي والحمدلله متريحه توا ونرجا في التالث هههه
خلود : ربي يعطيك الصحه ههه وتجيبي بالسلامه
رهف : ان شاء الله تسلمي وردت علي اتصال نجاح رنت : الو وينك لعند توا يا حنه هيا تعالي نراجو فيك
نجاح : توا نجي وعندهم عرب واجد قصدك
رهف : اها في عرب تعالي ما اطوليش
نجاح : نراجي في منير مزال ما جاه انا لابسه
رهف : اتصلي بيه ولا عنده مستشفى وشغل
نجاح : اها في الشغل قاعد بس مش مطول
رهف : تمام نراجو فيكي هيا باي
نعيمه تساعد في الطباخه وجاتها خلود باست ساره يلي مخليتها معاها خايفه تتعارك مع بنات خوهاا
خلود : كنها الاموره قاعده معاك خليها تطلع تلعب
نعيمه بحتت فيها : لا فكيني بنات خويا ما يحبوها وقالتها بصوت تسمعه خلود بس لان حساسه ساره
خلود : يا ناري عليها مسكينه بس ممكن تخليني نخش صلح بينهم هههه حايتصالحو ويحبوها اكيد اطمني
نعيمه : لو مافيش امل رديها هنا خير حاتبكي اصلا
خلود : ما تخافيش ومسكت يد ساره وطلعت هي وياها للسور متع الحوش وكلمت بنات حسام : زهره وياسمين تعالو هنا اشويه وهما بحتو فيها وجوهااا
خلود : ساره بنت من عمركم صغيره وطيوبه وحليوه معقوله يا بنات تزعلو فيها مش عيب عليكم ردو ليش ساكتين يلي درتوه غلط كبير هيا سلمو علي بعضكم توا قدامي وما تخلوش بعضهم انتو ال3 خليكم مع بعضكم وبعد تكبرن اقعدن مع بعضكم تمام يا حلوات
ياسمين ابتسمت : حاضر وسلمت علي ساره يلي خايفه منهم هي وزهره وباسو خدها وعدت معاهم بالايش وقعدن يلعبن وامورهم تمام واحسن من قبل
ابتسمت خلود وقبل ماتخش جات عينها علي عين وليد يلي مصبي ويبحت من بعيد اول ما شافها عدا سقمت حجابها وخشت جوا وهي مصدومه وهمست وليد معقوله وعدت لعند نعيمه وعقلها مش معاها بكل
نعيمه : ها شنو صار معاك صالحتيهم لبعضهم او لا ؟
خلود في عالم اخر ومصدومه بحتت في نعيمه وعدت بدون ما اتقول حرف لها وخشت للحمام : لو مافيش شي غلط كان قعد ماهربش علي الاقل قال يلي عنده او يبي يشوف وسام ولده او اي شي بس يهرب بعد يشوفني ليش وانا بنت عمته اخت زوجته ليش 💔
