دوافع الحب ♥

6

#دوافع_حب6
#نون_علي

ما كنت قادره اصدق اني كدا خلاص مدام عمار ،،ده حلم كان صعب المنال  او كان بالنسبه لي مستحيل خاصه انو الظروف و الزمن و اي حاجه كانت ضدنا فما كنت مصدقه يعني معاناة انا عشتها لا يعلمها إلا الله اصعب شعور لمن تكون بتحب زول من طرف واحد ،،يكون هو عايش حياتو بطولها و بعرضها وانت بس متابعو ،، رفعت راسي لقيت عمار لسه نايم ،، ما عارفه جاتني الجرأة من وين ورفعت رأسي ليهو وبستو على خدو ،،كانت روحي محرقاني  عليهو ،، يا جمالويا جمالو ياخوانا ❤↖️ يا بختي يا بختي ❤،،، اتأملت في ملامحو مسافه ،،بعديها قومت براحه ومشيت الحمام  ،، بعد ما طلعت لبست التوب ،،شوفت الساعه لقيت العصر اتهجمته  والله ،،اترددت اصحيهو ولا لاا ،،عندو حبوب لازم ياخدها  قلت اخليهو امشي اجهز الاكل واجي اصحيهو ،،، طبعا  مبسوطه قال ليك اي نعم ما اعترف بحبو لي بس كفايه على التعامل  المتعاملو معاي كلو بجي بالمهل   صبرت السنين دي كلها مافضل لي حاجه  ،،،  بعد ما خصلت وجهزت اي حاجه و عملت عصير ،،،مشيت  عشان اصحيهو  ،،لقيتو طالع من الحمام ،،، اول ما شافني ابتسم  مسكني من يدي قال لي قومتي من جنبي ليه ،،،!!!  بقيت اخد في نفسي ودقات قلبي قويه لمن تكون بتحب زول مهما  حصل بيناتكم اول ما يقرب عليك قلبك بشتغل زي الدلوكه،،، رفع لي رأسي بيدو قال لي ساكته ليه ؟؟؟ قلت  ليهو لااا بس عندك ادوية مفروض تاخدها ومشيت عملت الاكل ،،، ابتسم لي ،،، لمن عايز يقرب علي ،،،زحيت منو قلت ليهو الاكل ح يبرد ،،وجريت جري ،،،سامعه صوت ضحكتو وراي ،،،  انتظرتو لحدي ما جاء،،قعد جنبي وبدينا  ناكل ،،قال لي انتي لسه بتخجلي مني يعني !!!! ده انا باخد جهد عظيم معاك ،،، طبعا طيرت عيوني والاكل غلبني ابلعو ،،،، ضحك ،،وزح التوب من راسي قال لي وبعدين التوب لزومو شنو تاني !!!!،،، كنت مغسله شعري وراخياهو  ،،فك لي شعري ومسكو بيدو عاين ليهو مسافه وعاين لي وفي لمعة في عيونو قال لي شعرك ده طبيعي صح ؟؟؟ عاينت ليهو باستغرب  ،،قال لي لااا طبيعي مستحيل يكون بالجمال  ده كل و ما يكون طبيعي ❤،،،قلت ليهو  على فكره هو ما علي قدر كدا ،،،  قال لي لااا ما انتي ما شايفاهو  في عيوني زي ما انا ما شايفك  بعيوني !!! سكتت، ،، قلت ليهو طيب اكل !! قال لي الواحد زاتو ما عارف ياكل كيف وانتي  قدامو، ،،، هنا بالجد غلبني البسويهو عمار ده ما طبيعي ،،اكيد الضريب الاخدو جاء في راسو ،،ومن غير تردد  قلت ليهو انت شكلو الضرب طار ليك في راسك ،،،قال لي اريتو كان جاء من زمان ،،،يخوانا ده كلام شنو  لااا بالجد عمار جناااا وين الشخصيه الكان برسمها من زمان الحصل شنو الغيرو كدا شنو  ،،عاين لي قال لي زمان كان في ولد بوصلك البيت ،، استغربت قلت ليهو ولد يوصلني البيت ،،،قال لي اي ،،بقيت بفكر ولد بيوصلني!! اااا اذكرته قلت ليهو قصدك خالد !!!! ،، عاين لي قال لي بصوت غريب ماشاءالله  بتنطقي اسمو عادي كدا ولا كاني راجلك ،،قلت ليهو لاا ما قصدي ده ولد عمي عادي ،،، قال لي بس انا ما عندي عادي وتاني ما تنطقي اسمو عشان لو نتقطيهو ما بيحصل خير ،،، بقيت مستغربه  ومهجومه فيهو ،،،،،قال لي هو بيمسك يدي تصدقي  انا مرات كتيره كان بفكر اجي اوصلك بدلو،،، وبصل الجامعه حقتك بس تاني برجع ،،،هنا بالجد غلبني قلت ليهو انت كنت شايفني  اصلا، ،، عاين لي بنظرات زي بيقول لي انا ما كنت شايف  غيرك   بس قبل ما يرد  الباب دق ماشه افتح ،،قال لي وين وين ماشه !!!! قلت ليهو باب قال لي ادخلي بفتح انا ووااا صحي  شعرك لميهو ،،قلت ليهو طيب ،،،  فعليا دخلت الغرفه  ولميت شعري، ،انتظرت مسافه ما جاء قلت اطلع اشوف  اول ما طلعت لقيت هند قدامي  واقفة جنب عمار،، ،،
______________________
رنا
  الحاجه البقيت مقتنعة بيها انو قراراتي كلها متهورة ما بفكر بعقلي دايما مستعجله  وجاريه ورا كلام قلبي ،،،  موافقتي جايه من حبي ليهو الكبير، ،بعد ما قال كلامو داك خجلت ودخلت جوة ،،، بذكر اليوم داك شلنا الليل كل نتكلم بالتلفون ،،، لا انا سألتو من الحصل شنو لا هو  جاب لي سيره وبقينا كدا نتكلم ،،،قلت ليهو انا بكره راجعه البيت ،،قال لي اخيرا ح نرجع !!!،، قلت ليهو انت ما كنت مجبر تجي ،،قال لي يا سلااام عايزاني اخليك ليوسف وافضي ليكم الجوا كدا !!!!،، ضحكت قلت ليهو انت مشكلتك شنو مع يوسف !!! قال لي ما هو طول ما بتنطقي في اسمو كدا  اكيد ما ح احبو ،،، اليوم ده بالذات اكتشفت جانب شديد في حسان ،،، يعني بعرف يتونس ويضحك  ،،،، ما عارفه هل الخطوه دي صح ولا غلط نسيت بسمه فكرت في نفسي بس ونسيتها مهما كان دي بت عمي كيف ح ارضى بحاجه زي دي ،،،بس تاني قلت هي زاتها معقوله ما كانت عارفه انها اني عايزاهو!!!! ،،،،الحاجه السمحه حسان قال لي في نهايه المكالمه بكره نرجع بيتنا ،،،قلت ليهو قصدك البيت الكبير ،،قال لي المهم حاجه تلمنا لحدي ما نتلم بعدلها ↖️💕،، قلت ليهو حسان انا عايزه أسألك ،،قال لي انا عارف الفي راسك كل و،،، اجاوب علي كل اسألتك في الوقت المناسب طيب  ،،وهسي يا ستي الساعه بقت 2 انتي بعد كدا مفروض تنومي ،،قلت ليهو طيب بس ارسل رساله لزوبه ،،قال لي لااا الصباح رباح هسي أرقدي نومي  ،،يعني انا حارم  نفسك منك عشان ترتاحي انتي تقول لي دايره ارسل ل زوبه رساله ،،، سكتت، قال لي طيب ،،قال لي طيب تصبحي علي واقع اجمل وفيهو  انا 💕،،ضحكت قلت  ليهو وانت من اهلو ،،،سكت شكلو ما كان متوقع الرد ده ،،بعد ما قفلنا جاء تاني يوم لميت هدومي وحاجاتي كلها ،،،خالتو فاطمه قالت لي خلاص!!!قلت ليها اي ،،،حبوبتي قالت لي امشي بجي وراك يا بتي ،،،قلت ليها طيب ،،بسمه تعاين لي قلت ليها ما ماشه انتي ؟؟؟ قالت لي لااا بجي وراك ،،حبوبه قالت لي مالك عليها يابت وقت ما تكون جايه تجي.. زاتي دايره تجي معاي ،،قالت لي اي انا بجي مع حبوبه ،،قلت ليها سمح مالي انا ،،،جاء حسان قال لي جاهزه!!!!،، عاينت بطرف عيني لقيت بسمه اتهجمت  هي قايله اني ماشه وحسان قاعد لكن يا السمحه هو ماشي معاي ،،،خالتو فاطمه قالت ليهو حتى انت يا حسان ،،، قال ليها اي والله نمشي بعد كدا ،،حبوبه  قالت ما هو اصلا كان  ما رنا ما كان قعد هسي بعد ماماشه يقعد ليه ،،،والله دخلت في ضفوري ليه ليه كدا يا حبوبه ،،، بسمه واضح انها زعلت من كلامها ،،عاينت لحسان قالت ليهو انا ماشه انتظروني  ،،،، حبوبه قالت ليها تمشي وين هسي مش سألتك البت دي قولتي قاعده ؟؟؟ اقعدي معاي يلااا، ،،، ،،اكذب اقول ما شمتانه لااا شمتانه لانو هي من النوعيه ما بتخلي فيني فرصه وياما كنت بسكت ليها،، بس  حسان قال ليها هي لو عايزه تمشي تمشي يا حبوبه ،، عاينت ليهو بمعني الحاصل !!!!!!،، قالت ليهو لااا  خليها معاي ،،، بعد كلام ده طلعنا ما صدفنا يوسف ما عارفه كان وين بس لحدي ما ودعنا عم احمد ما كان متواجد قالو طلع الدكان ،،حسان قال احسن زاتو ،،بقى مستعجل على إننا نطلع قبل ما يجي ،،،،
________________
هديل
اخر توقعاتي اني اشوف هند قدامي الدنيا دي حسيتها دائرة بي مية مرة معقوله ،،الجابها شنو !! واضح انها كانت قاعده تبكي اول ما شافتني كانت جايه علي الا مسكها عمار قالت لي انتي السبب !! اتهجمت يعني ما عرفت انا علاقتي بالموضوع شنو ،، ،،بقت تحاول تتفك من عمار قالت ليهو خليني اربيها الوسخه يا خرابة بيوت يا سجمانه انتي اذا اهلك ما ربوك انا بربيك، ، ما كنت عارفه هي ليه واقعه فيني شتيمه يعني انا اصلا ما عندي عداوة معاها ،،بس يمكن عشان بقيت مرت عمار فهي الموضوع حارقهاا، ،المشكله ما هنا المشكله في إني كنت منتظره عمار يرد ليها ما غلبني ارد بس دايره اشوف ردة فعلو شنو ما هو يا وقف معاها يا وقف معاي ،،، قبل عليها و قال ليها اقعدي هنا انبسطت وحسيت انو داير ينصفني  بس قبل علي قال لي ادخلي جوة ،،،  والله كلامو ده زي الزول الكفتني  ،،طيب رد لي حقي منها ،،عاينت ليها تتبسم ساي نظام مش عمار ده بحبني واصلو ما بشاكلني  ودي انا زاتها مرتو الاولى ،،،، سكت قال لي  بصوت جهور ما بتسمعي انتي ادخلي جوة،،، خوفت من نبرتو زاتو بس برضو وقفت ،،،حسيت وقتها اني لازم ارد حقي براي ما هو مستحيل اخلي عمار او الما بتتسمى هند دي يهينوني بالشكل ده واسكت ،،، هو قبل عليها على حس اني ح امشي، ،،ف اول ما قلت ليهو داخله ،،، اتلفت علي بسرعه قربت اجري من نظراتو بس ثبتت.. انا عندي ممكن اخلي تمشي فوقي بس اي حاجه ولا اهلي   ،،، قال لي نعم وهو بتقدم  قلت ليهو انا ما داخله لازم ارد اهانتي ليها ،،، لمن قرب مني صوت انفاسو كان مسموع  قال لي وح ترديها كيف يا هان !!!!!!!!! قلت لي بطريقتي ،،ودايرة  امشي  اتشاكل مسكني من يدي وجراني بقوة على الغرفه وقفل الباب قال لي حسابي معاك بعدين ،،،،،
بعد ما قفل الباب  زعلت وقلبي وجعني  كل حاجه اتوقعتها الا انو يتعامل معاي كدا ،،،، دخلت الحمام وبقيت ببكي هناك ما كنت دايره ابكي بس غلبني ،،،بعد مسافه  سمعت صوتو وهو بنادي هي واضح من نبرة صوتو انو ملهوف ،،بس حلفت ما ارد قال لي هديل الله يرضى  عليك ردي  ،،طيب اسمعيني  ولا اكسر الباب ،،،ما رديت فعليا بعد اكتر من محاوله معاي حاول يكسر الباب ،،، هو شغال لي الباب ده بكسرو ليك في راسك، ،صوتو اتغير  تمام شكلي وصلت معاه الحد ،،فبقيت شغاله لي نفسي الليله الحل الحل شنو  ايوة ايوة  لقيتها  عملت فيها غمرانه  وكذا ،، وانا كذابه يا رابحه
____________
"عمار "
الحاجه البقيت عارفها انو هديل دي جزء مني مع اني ما عارف طبيعة العلاقة بيناتنا بس بطالحاجه العارفها اني ما برضى فيها ،،العالم ده كل كوم و هديل دي كوم براهو ،،، بعد ما رجعنا البيت اتذكرت في ناس تحت لاحظت ليهم من قبيل مراقبننا، ،ممكن اقول حركه غبية مني نزلت ليهم بس كان لازم انزل ما هو يا نزلت ليهم يا طلعوا لي واهون علي  انهم ما يطلعوا لي فوق وهديل قاعده  ،،، ما كنت متوقع فكره انهم مممكن يكون ماجرين ضدي لانو حاليا مافي حاجه في السوق الزول ممكن يقول انو لو قتلوني يستفيدو من الحاجه دي ،،، فاول ما طلعت قبل ما اشوفهم ،،اشتبكنا مع بعض، ،في الاول  كنت بدافع عن نفسي  بس الشجاعه وين قصاد اكتر من خمسه انفار ومسلحين، ،،،  بعد مسافه ما حسيت الا بالناس بساعدوني  ،،الحاجه العرفتها انو الناس ديل ما دايرين يقتلوني ديل تهويشه من زول  داير يحذرني  المشكله يحذرني من شنو !!!!،،، ما كنت داير اطلع لي هديل كدا لانو متاكد انها ح تقلق وتبكي ،،فعليا ده الحصل اول ما طلعنا ،،بس على قدر ما الحاجه دي اذتني جسديا على قدر ما خلتني اقرب من هديل 💕،، اكذب لو قلت اني ما مبسوط بالحاجه دي بس مافي حاجه بتدوم قبل ما افرح بيها كويس جات هند ما عارف الجابها شنو اول ما فتحت الباب لقيتها قدامي تبكي قالت لي ده شنو الحصل معاك !!!! بتقول في الكلام ده وهي بتدخل لي جوة متاكد انها ما جات عشان خايفه علي جايه عشان تشوف هديل ،،،،فجيت عشان اطردها  لانو بالذت الوقت دا ما وقتها ،،خوفت هديل تجي طالعه وتشوفها ،،، انا ما بخاف من هند بس بخاف على زعل هديل ،،هند وبعرفها  وبعرف لسانها ،،وطلع الحصل اول ما شافت هديل قدامها ،،،هند عندها مرض اسمو مافي زول احسن مني شايفه نفسها ولا البت ديك... فلمن شافت هديل وجمالها ورقتها 💕،،النار شكلها ولعت فيها فبقت تشتم  من طرف ،،،  عشان اسكتها قلت لهديل ادخلي جوة ما كان قصدي انها تدخل خوف من هند لاااا والله بس زي هند دي يستخدمو معاهم اسلوب بعنف لانهم بالاتي هي احسن ما بنفع فما كنت داير هديل  تشوف شخصيتي العنيفة، ،، لكن هي ما سكتت عارضت كلامي ،،، فكيت هند وقبلت عليها لااا هي من متين بترد كلامي ولا عشان رخيت ليها مفتكره نفسها خلاص !!!! دخلتها بالقوة ،،قبلت على هند قالت لي عمار اسمعني قلت ليها بتهينيي مرتي وفي بيتها !!!!!!!! مسكتها من يدها قلت ليها حسابي ما معاك مع اخوك ،،،قالت لي لاااا  اي حاجه ولا اخوي عليك الله بروح فيها قلت ليها تروح فيك ان شاء الله  هي لسه ما راحت ،،،جريتها من طرحتها وطردتها بره ،،ما بحب استخدم الاساليب دي بس  مرات الواحد يطلعو من طور  فببقى  شخصيه صعب تتفاهم معاها ،،، ما مشيت لهديل، ،، قلت لو مشيت ليها ح افضي زعلي كل فيها، ، احسن اصبر شويه بس فجأة قلقت عليها ودخلت لقيت الغرفة فاضيه  خوفت ما تكون حصلت ليها حاجه مشيت على الحمام لقيتها ما بترد بقيت بتكلم معاها على حس انها سامعني بس لمن ما ردت خوفي زاد  واوريك اكسر الباب وزي ما كنت متوقع ..
________________
هند بعد ما طردها عمار قالت ل نفسها ماشي يا عمار تطردني انا ماشي  اتصلت بوليد قبل ما يرد قالت ليهو نحنا مفروض نعرس في اسرع وقت وياريت لو كان الاسابيع دي ...
_________________
هاجر
ولدها بتكلم معاها قال ليها انتي يا ماما  ح نرجع لي بابا متين قالت ليهو نرجع ليهو الليله  دي ،،فرح قال ليها اخيرا ،،،،امها سمعتها قالت ليها عاين القعل الراجل مشغول يا بتي امسحيها ليهو في وشو ،،قالت ليها يا امي السنة كلها مشغول !!!  هسي انا معاك اربعه ايام ما اتصل ولا جاب خبري ،،قعدت تبكي قالت ليها نفسي اعرف انا عملت ليهو شنو ليه بتعامل معاي كدا ،،، اي نعم  زول كويس وتعاملو كويس بس الاهمال ده كلو ليه وعشان  شنو ،،طيب ما لاحظ إني بحبو ما لاحظ اني بكون متوتره كيف لمن اكون معاه ،، طيب انا ذنبي شنو !!ذنبي اني حبيتو !!! غلطه يعني ،،،، ليه ما يعمل لي اعتبار مرة ويشوف الحاصل معاي   امها دايره تتكلم قالت ليها يا امي فترته والله فترته ما تقولي اصبري  كل مرة اصبر لمتين  ياااخ انا لو كنت شغاله عندو كان ركز معاي اكتر من كدا خليني انا اولادو ديل  ما اولاد ما بيسأل منهم ليه ،،،هو مفتكر الحكايه كلها قروش وخلاص !!! اخير زمان كان كويس معانا ،،هسي بقى يا امي متغير وشديد كمان وجودنا وعدموو واحد ،،،💔 لمن غلبها  امها مسكت وبقت تبكي ،،،الحياة دي بالنسبه ليها شالت منها كتير ،،والزاد عليها وليد استهلكت فيهو مشاعرها على حس في يوم يحبها ما كانت منتظره منو غير انو يحبها ،،وصلت مرحلة لو قال ليها صباح الخير هي بتفرح بالحاجه البسيطه البقدمها ليها بتفرح بس هسي حتي الحاجه البسيطه دي بقى ما بقدمها ليها ،  وهي بقت تفكر في اولادها خافت زي ما هو هاملها يهمل اولادها معاها وقتها ما ح تقدر ما ح تقدر  ،،،

"شدي حيلك شويه انتي ما عارفه الجايك جايك داهيه يا ستي "
__________________

يتبببع