دوافع الحب ♥

22

#دوافع_حب22
#نون_علي

مجرد ما طلعت من ناس حبوبه كدا فجأه لقيت في زول بيجرني ناحيتو وتاني ما حسيت بي نفسي الا وأنا واقفه قصاد حسان في الزقاق الفاصل بينهم وبيت بيت ناس حبوبه .. وبكل نفس فاتحه قال لي وأخيرا إجتمعنا تاني .. إتصدمت شدديد من تصرفو العملو ومن الكلام القالو لي وبقيت مخلوعه ومنططه عيوني .. يعني هو ما ناوي يخلي حركاتو دي ويبطل يعمل فيها بحبني وعايزني؟ طيب يا حسان الليله ح أحسمها معاك وأخت ليك النقاط فوق الحروف .. أول حاجة عملتها هي إني دفرتو سريع مني وأديتو كف بكل قوتي وقلت ليهو أوعى تاني مرة تفكر تلمسني بي يدك أو تجرني بي الطريقه فاهم ولا لا؟ .. عاين لي بي ملامح وش ما بتتفسر وقال لي رنااا؟ ، قلت ليهو ما رنا ولا أي حاجة يا حسان وأتاكد إنك تاني كل ما تعترض طريقي ح أوقفك عند حدك لانو كفايه الحصل بي سببك قبل المره دي ،، حسان أنا نفسي أعرفك حقيقي يعني نفسي أعرف أنت شنووو بالظبط؟ لا بالجد وريني أنت مخلوق من شنو؟ أحساسك إنعدم لدرجة أنك تلعب بي مشاعري بي الطريقة السيئه دي؟ هنا تقول لي بحبك وعايزك وما عايزك غيرك وقدام الناس هناك تعمل فيها ولا بتعرف حبي تجاهك وتحدد عقدك من بسمه وتجي تاني وبكل بساطه تجرني وتقول لي وأخيرا إتلاقينا تاني بي البساااطه دي هيي؟ قايلني لعبه بين يدينك ح تفضل تحبك دايما ومتى ما تلقى نفسك فاضي وزهجان تجي تبين ليها إنك بتحبها وعايزها بس الظروف واقفه بينكم وبعديها بي كم ثواني بس تمشي لي غيرها وتحاول بقدر الاماكن أنك تعجل موعد عرسك منها؟ خليك من دا لا دقيقه أنت فاكرك إنك يعني لمن تجرني في زقاق زي ده ح أحضنك مثلاً وأقول ليك والله وأنا كمان مبسوطة لاننا وأخير إنلاقينا تاني؟؟ قايل كده؟؟ هههه حسان أوعى على نفسك أفضل ليك ،، قرب مني وقال لي رنا أنا بحبك... عاينت ليهو بي زهول ورجعت خطوتين لي ورا وقلت ليهو بالله بتحبني؟ حسان بتغش في نفسك ولا بتغشني أنا؟ لانو أنت لو بالجد بتحبني ما كان أخدت خطوة زي وحددت عقدك من بسمه وكان من البدايه نهيت البحصل ده وفسخت خطوبتك منها وجيت إتقدمت لي أنا لكن معليش أنت لسه بتوهم في نفسك إني ح أصدقك منى ما تجيني وتقول لي بحبك .. سكتا شوية وإتنهدت تنهيده طويله وبعدها قلت ليهو رجاءً لحدي هنا وكفاية يا حسان أنا بالجد تعبت والله العظيم تعبت عارف كم مرة أمي فهمتني غلط بي سببك وسبب تصرفاتك؟ المهم إذا أنت ما خاتي لي ولا خاتي لي مشاعري أعتبار ومفتكرني ح أرضى أجيك تاني وأنت بعد أسبوع بس ح تعقد على واحده تانيه غيري وأتقبل فكرة أنك تقرب مني وتقول لي بحبك عااادي تبقى وااهم نفسك يا حسان وأعرف أنو بعد الليلة أنا لا يمكن أسمح لي واحد زيك يلعب بي أو يقرب مني حتى، وبعدين خليني أنا ما مشكلة على الاقل حاول إحترم بت عمك العاوز تعرسها وبطل تجرر في بنات الناس التانيين وتوهمهم بي حبك وإحترم فكرة إنها بعد كم يوم ح تبقى مرتك وأهلها ختواها أمان بين يديك ما عشان أنت تمشي تجر بت عمها وتقعد توهم فيها بي حبك، حسان لو لي مره واحده أبقى قدر كلمتك وتم عرسك منها، وإذا تميتو وعد مني لمن تجي تبارك ليها يوم العقد ح أقيف في نص الصيوان وأزغرد ليك بي أعلى صوت عني وما يدق ليك زول دلوكة عرسك إلا أنا....
ما إنتظرتو يرد وإتحركت طوالي من جنبو وأنا خاليه تماماً من أي مشاعر حب وأحساسيس تجاهو ،، ولحظتها ما كان في شي في بالي غير إني لازم أرمي حسان وذكرياتو وحبو ورااي وما أعاين ليهو تاني غير أنو هو ولد عمي وراجل بت عمي وبسس غير كدا لا ،، لانو إذا بسمه ما راعت لي القرابه البينا أنا ح أراعي ليها لانو أهلي ما ربوني على أني أتمسك في حاجة حقت زول غيري وما أراعي لي الطرف التاني، أنا رنا ما إتعودت على الأنانيه ولا هي بتشبهني.....