Back To Deaquerld [Completed]

☄️16☄️

(Unicode)

ဂျောင်ဂု၏ ပတ်ပတ်လည်တွင် ရုတ်ချည်းဆိုသလို အမှောင်ဖုံးသွားသည်။ ဘာဆိုဘာမှ မမြင်ရတော့သလို ဘာသံမှလည်း မကြားရတော့သည်မို့ ဂျောင်ဂုမှာ ခေါင်းကို ဘယ်လှည့်ညာလှည့်လုပ်မိ၏။

ထိုအချိန်ရှေ့တည့်တည့်မှာ ပေါ်လာသော တစ်လက်မခန့်ရှိ အဖြူရောင် သေးသေးလေး၊ ထိုအဖြူရောင်လေးက တဖြည်းဖြည်း ခေါင်းခြေလက် သဏ္ဍာန်တွေပေါက်လာကာ လူလုံးပေါ်လာသည်။ ဒါက ‌ဘယ်သူလဲစဉ်းစားစရာမလိုအောင် ထယ်ယောင်း၏ ပုံရိပ်မှန်း ဂျောင်ဂုတန်းသိသည်။

လူလုံးအတိအကျမပေါ်ဘဲ အခိုးအငွေ့အဖြူရောင်လေးများသက်သက်မို့ ဘာလုပ်နေလဲဆိုတာကိုတော့ သဲသဲကွဲကွဲမမြင်ရ။

ထိုအဖြူရောင်လေးဟာ အလောတကြီး ပြေးလွှားနေသည့်ဟန်၊ လက်ထဲတွင်လည်း ဂျင်ဂျူအား ကိုင်ထားသယောင်၊ မသဲကွဲလှ။

ထိုအချိန်မှာပဲ အဖြူရောင်လေးနောက်မှ အနီရောင်အခိုးအငွေ့တွေ အများကြီးလိုက်လာတာကို မြင်လိုက်ရသည်မို့ ဂျောင်ဂုပင် လန့်သွားမိသည်။ ဒါတွေက ထယ်ယောင်း ပြောနေကျ အကောင်အထည်မရှိသော ဝိဉာဉ်တွေပဲ ဖြစ်ရမည်ဟု ကောက်ချက်ချမိသည်။

အရှေ့က အဖြူရောင်လေးက ပြေး၊ အနောက်က အနီရောင်များက လိုက်နဲ့ အတော့်ကို ရုန်းရင်းဆန်ခတ်ဖြစ်နေသည်။ ပြေးရင်းလွှားရင်း ခပ်လှမ်းလှမ်းရှိ အဖြူနဲ့အဝါရောစပ်ထားသော အခိုးအငွေ့များဟာ နန်းတော်ပုံစံလေးဖြစ်သွားပြီး ထိုနန်းတော်ထဲမှ လူပုံရိပ်နှစ်ခုထွက်လာသည်။ ဆံပင်များက အနက်ရောင်ဖြစ်ပြီး ထိုဆံပင်နက်နက်များပေါ်တွင် ရွှေရောင်သရဖူပုံစံငယ်လေးများရှိနေသည်မို့ ဒါက ဘုရင်နဲ့ ဘုရင်မပင်။

ဘုရင်နဲ့ ဘုရင်မကြီးဟာလည်း ကိုယ်စီလက်နက်များဆွဲထုတ်ပြီး အဖြူရောင်လေးရှေ့မှ ရပ်လိုက်ကြကာ အနီရောင်အခိုးအငွေ့များကို သူတို့၏ လက်နက်များနှင့် တိုက်ခိုက်လေ၏။ အငွေ့ချည်းသက်သက်မို့ ဂျောင်ဂုမှာ သဲကွဲစွာ မမြင်ရတော့။ အနက်ရောင်ရောစွပ်နေသော ပုံရိပ်နှစ်ခုဟာ အနီရောင်အခိုး‌အငွေ့တွေကြား ပျောက်လုလုဖြစ်နေသည်။