كفي والمنجمه "
leo Alfatlaw بقلمي
شخط سيارته ومشى بسرعه قوية اباوع ماما صارت بعيده عني ضليت اتوسل وابجي بس ولاكأنما ديسمع احد ايتوسل بي جان يسوق هو وساكت
الطريق طويل وكلبي تعب لان صار وقت علاجي حسيت روحي خلصت بعد ماعندي اي طاقه اترجى ولااكو فايده لان ابتعدنا هواي ومبين مصرين على رايهم مارح يفيد وياهم لاتوسل ولابجي
سكتت وخليت راسي على الكشن مااعرف وين رايحه لو منو ذوله على ساعة طلعوا وصاروا اهلي
من التعب والتفكير عيوني لارادياً بدت تغمض رحت بالنوم
فتحت عيوني شفت الصبح يريد يطلع اباوع من الجامة واصلين منطقة زراعية بساتين كبار كلهن خضار فرگت عيوني وكلته -اشكد بعد نوصل
-مارد
-انت وين ماخذني
-هم ماسمعت جواب
-لويش مدترد مودحجي وياك
باوعلي بالمرايه خفت من نظرته ماعرفت افسرها شنو سكتت وهو رد عينه بالطريق ماعبرني اصلاً
رجعت انداريت على الجامة حسيت روحي اختنكت فتحتها ردت اتنفس دخل الهوى بارد وريحته جانت اتخبل تدخل الكلب سحبت نفس طويل وغمضت عيوني اجت ابالي ماما شنو وضعها هسه شنو دتسوي اعرف ماما متسكت ولاحتى سيف ماامعقوله تعبه وحبه هاي السنين ذوله ياخذوا بالساهل راح ياخذني غصباً عنهم اعرفه
تذكرت ماما من جانت خايفه من رجعته لبغداد اشكد سألتها ليش مجانت اجاوب دوم تسد السالفه
زين شنو البينها وبينهم اليخليهم هيج كارهين بعض وناس حاقده على ناس
رديت اباوع لهذا اليسوق ولد مرتب ومبين رزن مومال يكره ماما ويسوي مشاكل من غير سبب اكيد اكو مصيبه جبيره مظمومه
انتبهت لايده بيها حلقة يعني متزوج اكيد لان امبين شكله نهاية العشرينات لوبالثلاثين
جهازه رن رد وهو منتجي ماحرك نفسه جان مفتوح سبيكر بالسيارة اسمع صوت واحد جبير كله حياك الله
-تحيى وتدوم امرني يالجبير
- ها يصكر الجنوب جبت الأمانه
-افا جدي فديوم انطيتك چلمة ومانفذتها
-اعرفك كدها بس حبيت اطمئن ديربالك عليها لبين مارد
-لاتخلي بالك امانتك يمي ترجع سالم
كالها وسد الفون
-منو هذا أمانة شنو دتحجي عليها تره ارجع لماما اني ما ابقى عندك
وباوعلي بالمرايه حسيت كلبي عصرني عيونه جانت خازرتني ماعاجبه وضعي بسرعه انداريت للجامة ردت اشغل روحي عنه ماعنده مانع هذا هسه يشمرني بالشط امبين ميتفاهم من شكله واني حظي المصخم مالبست هيج غير اليوم حظي واعرفه جنت خايفه من سيف وهو ربع من هذا مابي يمكن عصره وحده من جفه يعصرني اني وسيف ويمحينا
