كفي والمنجمه
بقلمي: leo Alfatlawi
بارت الثامن والعشرون ****
صارت عيني بمصطفى كاعد على جهة مدنگ خال راسه بين اديه ويمه سماح تلطم
ركضت لهيفاء دنگت عليه شلت راسها بحضني كمت اضرب على وجهه حيل بس اريد حركة وحدة منها دل بعدها عايشة
انكث بكل حيلي وهي لا نفس اتخبلت مااعرف شسوي وجهه مورم مبين مضروبة بدون رحمة
دخلوا احمد وكاظم يركضون جروا مؤتمن يردون يخلصون مكرم من ايده عمتي تلطم ومصطفى صافن ذولة كلهم موبالي عقلي كلة يم هيفاء الي حتى نفسها ضعيف
صاحت رجاء هاج مي شمري على وجهه ولج بسرعة
- مابيها نفس يمكن ماتت
-مابيها قز القرط لاتخافين شمري بوجها هسه تصحى
اخذت المي مسحت وجها ماكو اخذته من رجاء شمرته كله بوجها شهكت فتحت عيونها
دااحجي وياها وصار مؤتمن كدامها كامت بسرعة رجعت ليورا تباوع بخوف
انداريت لكيت كاظم كامش مؤتمن واحمد بالنص بس مكرم واگع بالكاع حلكة كله دم ما نعرف شنو الصار ولا اكو واحد يحجي بس مؤتمن واكف يباوع لكرم بغضب وذاك مدنگ خجلان حتى مادافع عن نفسه
صاحت عمتي ركضن ولجن شيلن البت لا يرجعلها مؤتمن كمت دنگت عليها ردت اگومها ماكدرت همست -كومي فدوة هيفاء ساعديني لا تذبين ورحج مااكدر اشيلج
- هسه يذبحني
-دكومي بسرعة يامعزاية قبل لا ينتبه
انتجت عليه وعمتي ساعدتني كوه وصلنا دخلنه للغرفة
عمتي- قفلي الباب ولج غزيلان بسرعة
-اي عمه ثواني بس خلي اگعدها وياح ماتكدرين وحدج
كعدناها كعدت عمتي يمها خلتها بحضنها وبجت همست هيفاء والله ماعملت شي
-صخمتي وجهنا ولج شسويتي ييمه مؤتمن ماراح يعوفج اذا مايذبحج بيده ولج عليش هيج ييمه
دنگت تبجي وترجف بخوف عرفتها كامشها ويه مكرم
اشويه وصار هدوء لان سمعنا صوت جدو اجه يمكن اخذهم للديوانية اندكت الباب صحت منو
رجاء -انه فتحي يصخام مسويه روحها شريفة وضامتها
استغفرت وفتحت الباب اشرت دخلي ؛ باوعتلي صفح ودخلت قفلت الباب رحت يم هيفاء كعدت كلتلها كم مرة حذرتج مو كلتلج مؤتمن اذا كمشج مايرحمج لويش ولج
-ما سويت شي
-عزا العزاج هذا كله ومامسويه شي
-عليش محد يصدگني وين مؤتمن
