رشامة الحنة

البارت الثالت

➰رشـــــامـــة الـــــحنة 〰️
▪️البارت الــثالت
بقلمي: جيهان مرعشلي 🥇

حياة شافت فيه و نسات و  تا مالقات متسمي ولدها , بقات غا تتدور فعويناتها الكبار و خسرات سيفتها تا نطق عليها هو لي فهمها غا من وجهها
•غسان: غادي نسمييه اناا  لامكنش مشكيل(شافيها) حيت بان ليا نساتك لولادة (هدر و هي حدرات راسها حيت بصح نساات و عندو الحق )
•حياة: (طلعات عينيها فيه و اومات ليه بمعنى اه) واخاا اخويا سمييه

غسان تبسم و بلاما يزيد يفكر شافيها و قال
•غسان: غادي نسميه عثمان (ضحك فوسط كلامو و هي اومات ليه و الم الولادة بدا تيرجع ليها شوية , و تبسمات و اما فاطمة قوسات حواجبها مني سمعات السمية لي ختار ليه و لكن مابغاتش تبين ليه و هو قرب من وذنيه و بدا يأذن ليه و بسميتو لي ختار ليه و حياة فرحات بعدا على الاقل شوية ضحكات الدنيا فوجه ولدها لي يالاه تزاد , ... غسان كمل و عطاه ليها و جبد شي بركة من جيبو و حطها حدا عثمان الصغيور و حياة بغات ترفض و لكن خنزر فيها و سكتات بلاما تزيد)
•غسان: هادي ديالي لعثمان خوديليه لي يحتاج و راه تاواحد هنا ميخليك بلاش كاين الناس لمزيانين غا كوني مزيانة و تهلاي فهاد اليتيم راه كنتوصاو عليه (هدر و اومات ليه و الدموع محجرة فعويناتها و تتقوليه براسها غا اه و ناضو تا النسا لي تما فرحانات و تيزرروها و هي تتبسم و تشوف فهدى لي جلسات حدا عثمان و تتضحك  )

غسان خرج من داك البيت لي فيه النسا و وقف فالصالون و ففمو التبسيمة و فقلبو الهنا و الطيبة ,تا حس بشي يدين وراه دار لقاها مو فاطمة لي مقوسة حواحبها
•فاطمة: اش داكشي لي درتي لداخل .؟
•غسان:(شافيها و عينيه فعينيها) شنو درت ؟ واش حيتاش آذنت ليتيم و سميتو و فرحت بيه شوية خاصك تنوضي هاد الغوباشة و الكلام و لا شنو ؟؟
•فاطمة: ماقصدتش هادشي اغسان ااه واخا دير الخير و سميه و دير ليه لي بغيتي و لكن اشنو قصدتي مني سميتيه بنفس السمية لي من زمان و نتا تفكر فيها باش تسميها لولدك الا كتاب ليك (غسان مع الدورة و نهاية كلامها خنزر فيها ديال بصح و بعد منها شوية )
•غسان: ولكن ربي مكتبوش لياا واش نقتل راسي و لا ندخل لهادشي ديال الله , ربي ماعطانيش شنو بغيتيني ندير
•فاطمة: و لكن ماشي لدرجة تسمي ولد اخر بسمية لي كنتي حااامق عليها تسمي بيها اول ولد عندك لدرجة اي واحد فالعائلة تيبغي يسمي عثمان تتتنوض القيامة على السمية و داباا (تلفتات للبيت لي فيه حياة و دارت عندو عوتاني ) و دابا تتسمي بلاما تفكر
•غسان: راه غا سمية هادي الحاجة ماشي شيحاجة صافي نسااي و سيري فرحي مع السيدة انا فالبيت لاخر (هدر و ماجا لين يكمل كلامو تا بان ليه الفقيه بجلابيتو و سلهامو و العمامة فوق راسو و قرب عنق غساان بالجهد و بانت لفرحة فعيون غسان و فاطمة)

•غسان: مرحبا بالسي الفقيه (تيضحك) غبرتي على دارك
•فاطمة: على سلامتك اخويا ولد با و ميمتي ههه بقات البلاصة هنا خاوية بلا بيك و لكن هانتا كيف خليتي هنا كيف جيتي دابا
•الفقيه: الله يكتر خيركم و واه عندكم اجر و كبير (دار عند ولد ختو) خصوصا نتا ارودي غسان تخلي خدمتك و مدينتك و تجي تأذن و تصلي بالنااس و ربي غادي يجازيك على هادشي سير اولدي ربي يرزقك الولد لي تتمنااه (غسان اوما ليه و قلبو مقبوط و الفقيه تيسمع الحس فالبيت و تلفت)
•فاطمة: ااه مقلنااش ليك اخويا راه ليوم جاو جوج وليات مغلوبات و طالبين ضيف الله و راه واقع ليهم مشكيل وخدة فيهم هجالة و هاربة من دار راجلها حيت باغين يجوزوها لوسها و مني هربات كانت اتولد فالطريق , و دخلات للجامع على النسا و الباقي هانتا تتشوف عاوناها تا ولدات و راها فالبيت لهيه بقاو فيا مساكن( غسان غا تيسمع و يشوف بلاما يهدر اما الفقيه قلبو جا من جيهتها)
•الفقيه: ربي دارها فطريقنا و خاصنا نعاونوها , راه الدار دارها تتشد راسها هي وولدها  و البنت لي معاها و ديك الساعة راه لي بغاو يديروه مرحباا  را انا تنقيل فلجامع منقربلهم منحاديهم اختي و الاحترام راه زين و كيزيد يزيان لاكان بالعوين(هدر و تبسم ليهم فاطمة اومات و غسان تيشوف )
•غسان: يكون خير انشاءلله يالاه سير رتاح ليك و من بعد يكون خير
•لفقيه: نتوما اتمشيو ليوم(غسان بقا تيشوفيه تا قاليه)
•غسان: نقدر نمشي نقدر لااا (اوما ليه الفقيه و مشا للبيت لاخر يرتاح و بقاو هوما بجوج تا ضارت فاطمة عند ولدها )
•فاطمة: كيفاش نقدر نمشي نقدر لاا (خنزرات) و مرتك ماغاديش تعمر عليها ؟؟