رشامة الحنة

البارت الخامس و عشرين

➰رشـــــامـــة الـــــحنة 〰️
▪️البارت الــخامس و عشرين
بقلمي: جيهان مرعشلي 🥇

حياة شوية و تشدها السخفة باقا هدرة زينب تتمشي ليها فوذينها و دورات راسها لبيت غسان لعل و عسا غاا يبان و يهنيها من هاد الشي لي دارت ليها زينب
•زينب: اواا نوضي احياااة العيالات تيتسناااو (قاطعاتها من شرودها و حياة مرگات مالقات مادير قربات ليها ديك الطبلة ديال الحنة و هزات الحنة تتخلط فيها و تقادها بالورد تاهو و زينب تتضحك اما حياة فدموعها كانو فعينيها)
ناضت حياة من بعد ما خلطات الحنة و هي تتشوف فالبنات بداو يمدو يديهم و هي تسبق واحد البنت و بدات تنقش ليها و عينيها تينزلو بالدموع و مع الموسيقى لي خدامة و شعرها لي طايح على نواضرها تا حد مارد ليها البال من غير ديك اللفعة ديال زينب اوا هنا سالات حياة النقش للبنت و يالاه اتستارح و تعمر حنة فالبرة عوتاتي تا جات الحاجة فاطمة على غفلة من الكوزينة و تتشطح و تتشوف البنت هازا يديها بالتقش تا تتشوف حياة تتعمر فالحنة و عينيها مدمعين و حميمرين بحالا محگورة ،تا مشات تتجري
•فاطمة: اش هااادشي اويلي وححدي(هدرات و مشات هزات حياة لي جالسة ) مالك يبنتي تتحني النسا و نتي خاص لي تحني ليك
•زينب: اويلي اخالتي متزيديش فييه راه النقاشة ماجاتش و قلت حياة تقوم بالواجب(هدرات و هنا فاطمة خنزرات فيهاا )
•فاطمة: طغيتييي ازيينب طغييتي و بزاااف (دارت عند البنت لي شادا داكشي ديال الموسيقى) طفيي علياا داك الشي نساليو هاد التخارف (طفات البنت الموسيقى و هي دور فاطمة عند زينب) نتي ماغادي يعرف ليك غا غسااان رااه حشومة عليك تديري هادشي لبنت و فسبوعهاا راااه حرام و عيب و ماشي دالبنات الاصل
•زينب: ميكين قليلة الاصل هنا قدهاااا (فاطمة طلقات من حياة و مشات تتحري للبيت عند غسان لي دخلات عليه متكي فوق الناموسية بطريقة تتضحك و تيلعب مع عثمان لي غا تيضحك بصوتو الصغيور و تيفركل )
•غسان: الحاجة ياك لاباس خاصكم شيحاجة؟؟(ناض و قرب منها و عثمان فيديه)
•فاطمة: لا ماناقص والو و لكن دوز شوف ديك الهبيلة ديال مرتك زينب اش تدير(هدرات و هو جلس و تشوفيها)
•غسان: مابغيتش نشطنك الحاجة و لكن راه دفعت طلاقي معاها وراه ايام قليلة و غادي نطلقوو رسميا و فالوراق و مابقاتش تهمني لا هي لا مشاكلها تدبر راسها(رجع تيلعب مع عثمان تا هدرات مو)
•فاطمة: رااه مشوهة حياة مع النسا دالحومة و خلاتها تنقش للعيالات كاملين نوووض شوف هاد العيب لي دارت (هدرات و يا ريت كون ما هدرات ،غسان عطاها عثمان فييديها و مشا تيتعكل خطوة هنا خطوة لهيه بقوة العصب فين وصل ليه تعماو ليه لعيون و هي تبعو و البيبي في يديها)

غسان قبل ميدخل لمجمع النسا حمحم و قاليهم
•غسان: لي على راسها الزيف و لا محجبة تردو راه غادي ندخل (هدر و تسنى شوية عاطهيم وقتهم واخا هو وقتو معندوش و شوية و دخل كانو النسا تيحتارموه حيت هو لي مرة مرة كيصلي بالجامع و بعض المرات فرمضان التراويح دالشهر كامل هو لي كيأديهم اما حياة غا شافتو و هي تتجري شافت فيه و مشات وراه
•غسان: اش واقع هناا ؟؟(هدر تيشوف بانت ليه الطبلة دالحنة و بنت ناقشة و دار عند حياة باش تهدر تا شاف البرا و الزيف فديها و كانت يديها شوية فيها الحنة لي يبسات و هو بفعل عقلو فهم لبلان كامل
•غسان: سمحويليا ا نسا الحومة ااا ماديروهاش مني قلة الصواب بغيت نهدر معاهم فشي حاجة عائلية تقدرو تخرجو و لكن السبوع باقي غا هو غادي نعطلوه لواحد ساعة و انشاءلله يكون خيير ماديرهاش منا قلة الصواب(هدر بالزربة و النسا فهمو و تبسمو ليه و بداو يخرجو وحدة وحدة تا بقاو غا غسان وحياة و زينب و الحاجة فاطمة لي هازا عثمان و الطيابة فاللخر ديل الكوزينة لي مسمعات والو و ماعارفاش اش طاري