رشامة الحنة

البارت العاشر

➰رشـــــامـــة الـــــحنة〰️
▪️البارت الــعاشر
بقلمي: جيهان مرعشلي 🥇

غسان خرج و زاد باللوطو ديالو متاجه للرباط  مخلي لي فالدار غا جالسين حدها هدى ناضت تقاد الغدا و بقاو حياة و الفقيه مع بعضهم
•الفقيه: هاكي ابنتي هاد شوية الفلوس خليها عندك دوزي بيها هاد السيمانة بيننا جيت راه يخصك شيحاجة لولدك و لا هاكاا تقدية الدار  (هدر و مد ليها عشرين الف ريال فيديها و هي خرجات عينيها باغا ترففض)
•حياة: لا لاا اعمي ايولي نتا فضلك عليا كبير و نزيدك تا بهادشي انا اندير انخرج نلقا خدمة و لا اندير داكشي لي منعرف ندير و بالحلال انوكل ولدي
•الفقيه: اوا الخدمة مكتلقاش بالزربة ابنتي هاكي شدي هادو و مني تتخلصي من ورا متخدمي رجعيهم لياا صاافي مفاهمين هاكا(هدر و هداتهم هي بزز و هو يتبسم ليهاا )

•حياة: ربي يخليك لياا اعمي والله ربي يخطيك علياا (ناضت و مشات للبيت حيت الفقيه  من بعد شوية ايمشي  يجلس فالجامع شوية يوذن و يصلي الظهر و هي بدات تتلعب شوية مع ولدها بينما وجد الغدا حيت هدى مخلاتهاش توقف و داكشي لي كان كملت الماكلة و حطاتها عاد عيطت ليها بقاو تسناو الفقيه عاد تغداو مزيااان حيت تباركالله الخير موجود و ورا ديك الساعة كل واحد مشا لبيتو يرتاح و كان صوت الفقيه فالقران مسمووع فالدار كااملة )

غسان وصل للرباط بلاصا اللوطو ,و دخل لقا ريحة الغدا ميكيناش ,لمح مو جالسة و مقابلة مع التلفازة و ساهية مشا سلم عليها و جلس حداها
•غسان: ماالك شعندك؟
•فاطمة: والو اولدي غا تنخمم شكون ضرب هاد العائلة بالعين تا ولات هكا (شافت فيه) لا نتا لا مراتك مابقيتو كيف قبل
•غسان: راه تاحاجة مكتبقا كيف الاول الحاجة را غا بنادم مدوز وقتو و تيصبر صاافي هادشي لي كاين (هدر و شوية جات زينب سلمات عليه و هو رد عليها عادي بحالا ناسي اش طرا لبارح تا لمحات حاجبو مضروب)
•زينب: غسان مالك فعينيك احبيبي اويلي ؟؟ (قربات ليه و هو خلاها على خاطرها حيت معندو گانة و هنا ناضت فاطمة قافزة من السداري حيت ماشافتش مزيان)
•فاطمة: عااد شفتها دابااا (تتقيس) اش طرا؟؟
•غسان: مشيت عند خالي و مع الضلمة مشفتش مزيان و قست عيني مع الباب راك عارفا تما الدنيا محفرة(اوما ليه بتفهم هي و زينب )
•زينب: اوا بعدا ماشي شيحاجة الحمدلله جاتك غا فيعينك
•غسان: الحمدلله( دار عند مو لي جلست) ااه حكا راه خالي غدا مسافر لمراكش على شي شغل و انا راك عارفا خاصني نقابل ليه تما غيابو (هدر و فاطمة شافت فيه بريبة هي مرة و عارفا اش تيطرا مني تيكون الراجل فهاد لحالة اما زينب فما عرفتش شنو بالضبط يعني لي عارفا انه فقط تيمشي يعوض بلاصة الفقيه و صافي و تيرجع)
•فاطمة: ااااه (شافت فيه  مني ناض ومني سمعها و هو يوقف و شافيها ) قلتي سيمانة مم اوا دي معاك تا زينب منها نيت تبقا و تنوس لبلاصة ميمكنش تخليها هنا راك راجلها زعماا
•غسان: (عرفها باغا تلوي ليه يديه و لا باغا تمرگو و تخليه يحس بالذنب جهة مرتو و لكن قاليها) الا مشات معايا ليوم مزيان و لكن على هاد الحساب غدا اتبقا فالدار لهيه غا بوحدها حيت عندي شي شغل مع حياة و هدى و عثمان تاهو (دار عند زينب لي مفهمت والو) مازال باغا تمشي ؟
•زينب: كيفاش ؟ شكون حياة و شكون هدى ؟؟؟( شافت فيه مخرجة عينيها) و عثمان همم؟؟
•فاطمة:(تبسمات و لكن عارفا راس ولدها قاصح و معندو ميخسر و هاهو نوض العافيية دابا على ضهرها تاهي)
•غسان: علاش الحاجة ماقالت ليك والوو (دار عند مو) واايلي الحااجة زعما تتدوزي معاها لوقت كتر يعني كان خاصك تقوليليا انا غا نسيت و كان  اوا قوليليها ليها دابا ياك نتي لي حبدتي الموضوع دابا
•فاطمة: نسييت و صافي
•غسان: ماشي مشكيل انا انقول (دار عند زينب) جات واحد لبنت حاملة و كانت هربانة من عائلة راجلها دخلات للجامع فين كاين النسا و من بعد دخلاتها الحاجة لدار الفقيه و ولدات تما ولد و انا سميتو عثمان اناا اه(هدر مأكد ليها و هي غا تتشوف و لكن مهتماتش كتر حيت عارفا غسان اش تيسوا و ميمكنش يقلل العفة على شي وحدة بلاما تبغي هي و لا تجبرو هي و فهاد الحالة مستحيل حيت البنت عاد ميت ليها الراجل لدلك نوعا ما رتاحت) اوا و بقات عند دار الفقيه من البارح و غدا انشاءالله انمشي معاها باش تقيد ولدها فالحالة المدنية و صافي هادشي لي كاين (دار عند مو لي غا تتشوفيه على قصوحيتو )

•زينب: سميتها حياة قلتي يااك ممم اه مزياان عادي اصلا الخير تينفع فحوايج الماجيين (عنقاتو) و اصلا هادشي ماخافيش على راجل بحالك ديما تادير الخير احبيبي (غسان تبسم ليها )
•غسان: انا انطلع شوية نرتاح و لاكان شي غدا عافاك طلعيه لياا فيا الجوع و مع الطريق و لا كنتي اتمشي قادي حوايجك حيت مابغيتش نتعطل (هدر و طلع  لبيتهم مخليهم غا تيوشوفو)
•فاطمة: ماغاديري والو؟؟
•زينب:(شافت فيها مخنزرة) اش اندير و نتي بايتة و مخبية علياا اصلا ميكين والو ولدك راه عارفاه الخير تيجري ليه فالدم و مع اي واحد(هدرات تتواسي قلبها شوية و تتهدن و فاطمة شافت فيها)
•فاطمة: و لكن مشفتيهاش باقي ؟
•زينب: علاش ؟(هدرات و فاطمة طلعاتها و هبطاتها بمعنى فهمي)
•فاطمة: جمال و دلال , الصاگ صاگ و الدراع درااع (ضحكت) و مهلية فراسها واخا ضروفها قاصحة
•زينب: (بقات تتشوف) هادشي عاد جيتي تقوليه ليااا ؟
•فاطمة: واخا منقولوش ليك خاصك نتي من ديتك لراسك تهلاي فراجلك و ركنتك ازينب ماشي تتجي شي وحدة عاااد و كان نتي تبداي (ضرباتها على يديها بتحذير) ردي البال ابنتي و لا فات الفوت راه طال الزمان و لا قصار تيهمني ولدي حيت من دمي و لحمي اما الكنة تمشي وحدة و تجي وحدة , ماديريهاش مني قلة الصواب و لكن تنحيد ليك الدراقة على عينيك راه الزواج ماساهلش و الريح تيكتر 

هدرات و مشات لبيتها خلاتها توجد الغدا خفيف و مني سالات طلعاتو ليه لبيتهم لقاتو جالس و ساهي
•زينب: هاك تغدااا (هدرات و حطاتو شافيها و شاف اسلوبها ميكينش و تعاملها معاه معمرو تيتحسن و كيفاش غادي يفهمها بلي تاهو باغي اهتمام واخا غا شوية و ميضطرش انه يقلب عليه برا دارو و هادشي تيخليه يزيد يبعد و يقرب لبلايص اخرين)
•غسان: تغديتي ؟ اجي تغ..(يالاه ايمد ليها دغمة ففمها و قاطعاتو هي)
•زينب: لا مابغيتش اويلي(بعدات ليه يديه) غا بالصحة مافياش داباا عاد فطرناا معطلين شوية (اوما ليها و بدا ياكل بروحو و الدغمة تتنزل ليه ثقيلة و هي تتجمع حوايجها لي قاليهاا و اكيد ماغاديش ضيع الفرصة و بكن كان عليها واخا مافيهاش الجوع على الاقل مترجعش دغمتو من يديه)