رشامة الحنة

البارت السادس

➰رشـــــامـــة الـــــحنة 〰️
▪️البارت الــسادس
بقلمي: جيهان مرعشلي 🥇

غسان مع دخلتو هو و مو لدارهم و مع فتحة الساروت فالباب , بانت ليهم زينب
•زينب: (عنقاتو و تبسمات) على سلامتكم اغسان تعطلتو عليا تا بقيت بوحدي(هدرات و هو غمض عينيه و خلاها تا سالات المعانقة و دار شافيها)
•غسان: مني بقيتي بوحدك كون مشيتي فوجتي فداركم و تباتي گااع هانية ميكينش غرام المشكيل( هدر و فوجهو مكين تا ردة فعل و لا شي احساس و هو يود عند مو )

•غسان: اندوش و انعس عييت مع الطريق , و الا كان العشا بالصحة بلاما تفيقوني ( مشا من حداهم مخليهم غا تيشوفو فاطمة عارفا شنو كاين و شنو تبدل عليه لكن زينب نقدرو نقولو مولفاه على حالتو هاكاا)
•فاطمة: ماديش عليه ابنتي زينب راه غا مع الطريق عياا
•زينب: راه اخالتي ولفت عليه من شحال هادي و صافي غسلت منو يدي و لكن انا اش ذنبي راه ربي ماعطانيش التريكة واش بزز (هدرات و جلسات فالسداري  و انبدا تبكي)
•فاطمة: لاواه ابنتي استغفري الله و باراكة من تخارف لبراهش نتي عارفا غسان معندوش مع بحال هاد لهدرة و كون مكان يبغيك راه ساهلة عندو يطلقك مالو غادي يتغلب؟؟ و زيد عليها ابنتي المشكل كان من اللول ديالك سمحيليا و لكن راه كنقول الصح (زينب نزلات راسها ) راه نتي لي مشيتي تهدري فحياتك نتي و راجلك و على انكم مقدرتوش تولدو للناس و مع عائلتك تا ولاو الناس تيشوفو فيه بنضرة ناقصة و مشيتي عند مك كتقوليليها غسان ميكيولدش تا جا باك و حيح عليه و بقا عليه طلق ليا البنت تعيش حياتها و تولد مع الرجال راه عطاهم الله و اهاه مشيتو درتو التحاليل اللازمة و فين لقيتو المشكيل فيك نتي ابنتي زينب فيك نتي  و واخا هاكاك سكت و تحملها و قاليهم بلي هو لي ميكيولدش وسرطها بجغيمة الما اه واخا ماشي عيب و هادشي خلق الله و قدرة الله و لكن نوصيك ابنتي هاد الوصية و ديريها فبالك راه مشاكلك مع راجلك تبقا بين راجلك و معمرك يا زينب بنتي تفرقي فراشكم راه واخا دابزو و لكن وسدو وسادة وحدة راه كترة البعد كيقتل ابنتي كيقتل العلاقة (هدرات و وقفات حيدات الزيف على راسها و تبسمات لزينب)

•فاطمة: يالاه سيري ابنتي عند راجلك و هدري معاه و تحاوري و مني تساليو اجي نزلو تعشاو انا انطيب ههه  و دوري بحالك راه الرجال ميتيبغيوش العفن ( هدرات و تمشات بعيد تا قربات تخرج للصالون و هي تتلفت ليها و قالت من بعيد) راه يمكن يجي شي وقت و متلقايش هاد غسان لحنين فيك  و انا منلوموش ابنتي حيت بعقلو و عندو الصح المعقول لي تيدوم (كملات كلامها و هي عارفة اش قاصدة)

بقات زينب غا تتشوف و وافقات كلامها و مشات لبيتهم مع دخلات لقات سوراتو محطوطين فالكوافوز و الجابادور و الفوق ديالها مطويين و محطوطين فاللخر ديال السرير , تبسمات على هاد النقا و التاويل ديالو لقاتو فوق الناموسية و دار لجهة الاخرى و داير راسو ناعس حيت تتسمع النفس ديالو مخربقة يعني معصب و لا متوتر ماشي ناعس , حيدات ديك الجابادور حطاتها فالماريو و مشات جلسات حداه و هو عاطيها بالضهر و بدات تتمسد على كتفو )

•زينب: غسان (هدرات بخفوة و هو ماعطاهاش شي جواب) غسان غسان( عاردات المرة الثانية و الثالتة و ماعطاهاش جواب كدلك لكن حل عينيه)
•زينب: واش ماباغيش تهدر؟؟
•غسان: (دار عندها بالخف و الزربة) واش بانت ليك هاد الحالة ديال شي واحد باغي يهدر ازينب (غوت) الله يحفضك لاما خليني فروحي هاني راه عيان و معندي خاطر راه معيااني الطريق لي انشد يوميا تال كازا من الصباح تالليل و نجي نخدم خدمتي هنااا
•زينب:(شداتو من يديه و تتشوفيه) و هدر قوليا اش عندك ماالك ياكما شي حاجة عصباتك اليوم
•غسام: بالعكس گااع داكشي لي شفتو ليوم زوين ( هدر بالتخنزير ) خليني عليك راه والله ماباغي نغوت عليك و نخسر ليك المورال خليني عليك راه طلبتك زعماا

•زينب: راااه عيقتي اغسان معايااا وااااه(ناضت و رفعات صوتها تتغوت) واخا نكون منعرف اش دايرا صافي راه طلبت السماحة على اش درت و نتا باقي منسيتي
•غسان: دابا لغوات لاش نتي عارفا معنديش مع هاد الهدرة الناقصة ( وقف قدامها) راه مادام مدكرتش ليك شي موضوع صاافي يعني نسيتو و طويت صفحتو انا ليوم معنديش لگانة للهدرة واش بزز ازينب الله يرضي عليك جلسي و خليت عايشين مرتاحين
•زينب: رااه متكون غاشي وحدة معمرة ليك العين , نتوما الرجال مني تتبان ليكم شي وحدة فيها ميدار تتقلبو على كولشي و تنساو على كولشي(بقا مصدوم فيها وبقا تيشوف فيها هو فعلا عيان و ماباغيش يهدر لكن شوف هو فين و هي فين ماجات فين توعى على شنو خرجات من فمها و تطلب السماحة تا بان ليها بالزربة لبس جاكيط على الكيطمة لي لابس و هز السبرديلة غا فيديه و السوارت و التيلي فاليد لخرى و تيعتر فالدروج بحال الحمق و يلبس على رجليه و ماجات قدامو غا مو )
•زينب: حبسيه اخالتي الله يسهل عليك حبسيه غا نهدر معاه(هدرات من الفوق ديال الدروة و بالخف حبساتو مو و تتشوفيه تا نزلات زينب من الدروج)
•فاطمة: مالكم اش واقع مموالفينش تكترو المدابزة تال هاد الدرجة؟
•غسان: الحااجة الله يسهل عليك فماا حسن لما غا طلقي مني راه مابقاش عندي الشارج لي يكتر فهادشي  سيري سوليها هي شنو تتقول (هدر و تيسوط بحال لهبيل لي هارب و باغين يشهدوه تا زينب حدرات راسها)
•زينب: راه اخالتي قلبي و مابغا يخرج راه ماجيتش و شكيت راه مابقاش يبغي يهدر معايا و لا يعمر (هدرات و ماجات فين تكمل تا فاطمة طلقات من ولدها غسان وتبسمات ليه)
•غسان: خرج بدل بساعة اخرى تا تبرد و اجي سير الله يسهل عليك (هدرات و هو بزربة خرج ماسمعو غا اللوطو كسيرات تا تحفرو الروايض مع لرض و هي دور عند زينب بالفجعة و معصبة)
•فاطمة: قلت ليك كحليها عميتيها( سبقاتها للصالون و تبعاتها زينب) راه نتي السباب ابنتي غا سمحيليا راه الولد بعقلو نتي ناقصك عقل تبتي فمحالك و زرعي الورد و نتي عندك غا مع الشوك ابنتي راه الراجل لامشا تا بات ليلة ورا الدار غا غسلي يديك منو هادي انا نقولها ليك ابنتي و علقيها فودنيك و دابا نوضي نتعشاو انا وياك و سيري مني تسالي نعسي و رتاحي لك راه موحال يجي هاد الليلة (بعدات عينيها لبعيد) كان حابس راسو ساعة نتي دفعتيه

•زينب: كيفاش اخالتي
•فاطمة: والو ابنتي غا الله يخرج هاد الليلة على خير عليكم بجوج (هدرات و مشات الكوزينة هي وياها تيحطو العشا لي معرفوه منين ايدوز)