رشامة الحنة

البارت الثاني عشر

➰رشـــــامـــة الـــــحنة 〰️
▪️البارت الــثاني عشر
بقلمي: جيهان مرعشلي 🥇

هدى نعسات عثمان و شدا التيلفون ديالها و كانت بحالا تتهدر مع شيحد و غا شافت حياة و هي تحطو و تتبسم عادي و مع حياة اصلا دخلات عقلها مرفوع مادات ماجابت
•هدى: مالكي غا تتسوطي هه ياك لاباس؟
•حياة: (شافت فيها) والوو مهم راا قلت ليهم بلي تافقنا انا وياك انمشيو غا بجوجناا باش نقيدو عثمان واخاا مهم غا احتياطا لا سولوك باش متفرشينيش
•هدى:(غوبشات بعدم فهم) ياك تافقنا مع غسان بلي هو لي غادي يدينا مني يوصل الفقيه اش طرا و جرا تا تبدل؟؟
•حياة: ميكين والو اهدى ختي صافي سيد مزوج و بمراتو و عندو عائلتو اش بينا و بينو لي غادي يديناا و نمشيو معاه حنا متشي من لحرمة ديالو ماحنا عيالاتو مزخنا خواتاتو (هدرات و بدات تتخرج عصبيتها فطويان الحوايج )

•هدى:  شوفي احياة راه العوين ميتيجي لا بالزن و لا بالسمية و لا بالعائلة حيت العوين و الخير تيكون تا مع الغريب ولا كان هو مولف بالاجر نتي معندك دخل و لا كانت مرتو الله يسهل عليهم اجي نتيي (غوتت شوية) هااه اجي شوفي فيااا(شداتها من تحت وجهها ) شوفيي فياا فعينياا احيااة( تتشوفيها و حياة كدلك)
•حياة: شنو مالك؟؟
•هدى: ياكما وليتي تبغيه؟(هدرات بشوية و حياة بقات ساكتة شوية تا حيدات ليها يديها بالنتير و خنزرات فيها)
•حياة: لاواه الزفت اشمن بغو هادشي لي بقا ليا نييت واش دخلنا عليك بالله كاين شي بغو فيومين واش تتاكلي شيحاجة من غير الخبز و زايدون الراجل مزووووج و انا عمري نمشي ضرة على شي وحدة واخا نكون نموت عليه و زايدون غسان باينك ماشي من داك النوع لي تيجيب المراة على مرتو و شوفي كيفاش تيحتارمها اما انا اهدى ماباغاش الحب انا فقط عجبني اهتمام ديال الغرباء لي متنعرفهمش و دارو فينا الخير و الابوة لي حسيت بيها مع الفقيه و تا شنو دارو معانا عيالات هاد الدوار اما انا ماشي بنت الحرام باش نخطف راجل من مرتو (بكات) انا ماشي هكك اما لاكانت اتجي شيحاجة فممكن تجي من عندو هو اما انا منرتابطش بواحد تيبغي مرتو
•هدى: حياة شوفي فيا هانتي اا راه ماشي بضرورة يكون حب راه الولف و الاهتمام حسن و اكتر من الحب و مفعولهم كيكون قوي على الحب نييت , ماشي بالضرورة تكوني تحسي تتبغي بالعكس مني تيهتم بيك شي حد و يهدر معاك و يخاف عليك واخا من ابسط الاشياء احياة ختي , بالعكس هادا شعور زوين و نعمة حيت تترتاحي فيها مخصهاش تخمد لداخل خاصها تبان
•حياة: وا دخلنا عليك بالله واش كاين شيواحد تيخلي مرتو و يقلب على وحدة اخرى اهدى ختي راك ماشي فأوروبا خدمي ليا داك العقل شوية و وعااي و اي وحدة تتدي راجل لمراتو فهاد المحتمع تتسما ممزياناش و خطافة الرجالة و انا باغا نعيش لولدي فقط ماشي لشي رجل ديال مراة اخرى  (غمضت عينيها) راه مستحيل
•هدى: شوفي اا هو كيفاش كيتعامل معاك حنين معاك و لي خصاتك تيجيبها لك قبل متقوليها و مهلي فولدك و ميمكنش هادشي كامل يكون كيديرو من ديتو لراسو حيت الرجال قليل فين كيهتمو اختي و مني كيهتمو الا و كاين شي احساس و لو غاا خفيف و تيقيني كون مان مرتاح مع مرتو مكانش اصلا غادي يعطي وجه (شافت ليها) متحرميش راسك و زيد عليها ديجا كان قالينا سي الفقيه بلي هو ماشي فقيه و لا امام هو كيجي مرة مرة يخفف عليه الحمل و تيجيب الدراري الصغار لدار القران هنا و تيدير صدقة من الجمعة لجمعة فمستحيل تخرج شيحاجة خايبة من شخص بحال هادا
•حياة: نني راك هترتي نوضي نقادو العشا قبل ما تبقا تميق عليناا انصدق عاطياها جوابها حيت هاد النووع تينننرفزني (كرزات على سنانها و ناضو بجوج تيقادو العشا و مخليين عثمان ناعس فالبيت)

عند غسان و زينب لي جالسين فالبيت و بعاد على بعضهم
•زينب: اش كانت تقوليك؟
•غسان: مالك ماسولتيها ازينب ( شد راسو) عافاك خليني عليك راه والله مكتلوي ليا يديا راه انا هو هاداك لي معندو ميخسر و لا يربح خلي هاد السيمانة دوز بيخير عافاك راه شلا ما فراسي و ماباغيش ندير مجهود و نخرجهم ؟؟  الله يرضي عليك ازينب (هدر و تما فوق السرير و هي قلبات عينيها بملل و بدلات لبسها و لبسات عليها بيجامة و خرجات برا عندهم لقاهم فالكوزينة غا من صوتهم عرفتتهم)

هدو تلفتات اما حياة فعرفتتها هي و كتكمل الطاجين لي ردات و هدى تتقاد شلاضة
•زينب: نعاون؟
•حياة: لا ازين ديالي  مابقا والو را حنا مكافيين اههه غا جلسي تما و بلاما تعذبي راسك (تبسمات ليها و رجعات اكمل لي فيديها و زينب جابت كرسي جلسات حداهم و تتشوفيهم من اللور و تتعبر فحياة )
•زينب: قوليلياا احيااة (دارت عندها حياة بعمنى شنو )  فاش كنتي خدامة و منين جيتي
•حياة:(دارت عند هدى مقوسة حجبانها بمعنى واش راجلها ماعاودش ليها ) انا رشامة الحنة يعني نقاشة فالاعراس و جيت من كازا غاا هناا نييت من سوسيكة
•زينب: يعني قويصحة مع راسك هه و بنت الوقت تباركالله
•حياة: ماشي بالضرورة تكوني جايا من شي بلاصة واعرة باش تسماي قاصحة و بنت الوقت خاص غا يكون عندك العقل و التبات و الباقي تيجي مع التجربة (هدرات و غمزاتها و زينب بقات غا تشوف فيها حيت فعلا شخصيتها قوية و باينة راسها عامر)
•زينب: اوا شي نهار حني ليناا نشوفوو حنة يديك (هدرات باش تمرگها و حياة حبسات الموس من يديها لي كانت تقطع بيه البطاطا و دارت عندها )
•حياة:(تبسمات كأن شيئا لم يكن) اوا لا كنتي اتخلصيني مرحباا ازين ههه الخدمة ماشي عيب لا كانت حلال (هدرات بالضحكة لي دخلات لقلب زينب بحال العافية كانت باغا هي تنزل راسها فالارض ساعة العكس و هي تهز حياة البطاطا و قاداتها فالطجين و سدات عليه مسحات يديها و خرجات من الكوزينة و خلات غا هدى و زينب)
•زينب: واا زعيمة مع راسها هاد صحيبتك
•هدى: مازال ماشفتي فزعامتها غا لونهاا (و زادت غمزاتها تاهي و خرجات من الكوزينة لقات حياة فالبيت حدا عثمان جالسة و تتشوف غا بوحدها)
•هدى: شتي علاش قلت ليك غسان رتاح معااك (هدرات و حياة بقات تتشوفيها حيت فعلا شخصية زينب تتعصب و ميمكنش تبقاي جالسة معاها ساعة وحدة فما بالك مسكين غسان لي مزوج بيها و يشوفها بالليل و بالنهار)