رشامة الحنة

البارت الثالت عشر

➰رشـــــامـــة الـــــحنة 〰️
▪️البارت الــثالت عشر
بقلمي: جيهان مرعشلي 🥇
•هدى: اش قلتي ؟ فهادشي
•حياة: سيري تا نتي تجلسي قبل منصبنك , عيقتي علياا بحالا منعرف صافي اصاحبتي متعيقيش(حيدات البينوار ديالها و بقات غا بالبيجامة بسروالها و تكات حدا ولدهاا ) مهم شوفي انا انعس اختي و مني يطيب العشا عافاك طفي عليه و حطي ليهم يتعشاو لا سولو عليا قوليهم عيانة و مافيها لي يتعشا و خاصها تنوض غدا بكري و بعد المرات تيفيق عثمان بالليل عليها دابا تستغل الوقت و نرتااح
•هدى: على خاطرك الصاحبة ديالي ههه يالاه تصبحي على خير انا انخرج نجلس برا شوية و نطل على طويجين و ديك الحمقة اتبقا فارعة ليا الشقفة ديال راسي
•حياة: تجاهليهااا تا نتي حنا اصلا مابقا لينا والو و مشيو راه ثقلنا عليهم (هدرات و غمضات عينيها هدى خرجات مشات للكوزينة تتشوف الطاجين حيت البطاطا هي لي بقات حيت داروها هي اللخرة و بدات تتحط الشلاضة فالطباسل و تحطهم فالطبلة و الخبز تاهو ,و قلبات التلاجة لقات المونادا حطاتها تاهي و معاها الكيسان ,و دازت واحد نص ساعة و حطات الطاجين لي طاب و جا على حقو و طرييقو )

اذن العشا و شوية عاد دخل الفقيه من الجامع غسل يديه و جلس فالطبلة سول هدى على حياة قالت شنو كاين و بلي عيات شوية و خاصها ترتاحو  عاد عيطو على غسان و زينب لي فالبيت و جاو  جلسو
•الفقيه: بسم الله اوليداتي (تبسم و بدا ياكل انا غسان باقي منوى يبدا و تيقلب بعينيه و هو يسول )
•غسان: فين لخرى ؟ ماغاديش تتعشى(هدر باهتمام و هدى تبسمات و خشات الضغمة ففمها اما زينب شافت فيه)
•الفقيه: لا اولدي ماغاديش تتعشا قالت ليا ه بلي عيات شوية و بغات ترتاح (هدر و زينب عرفاتها اتكون تقرصات من كلامها معاها و هي تضحك و بدات ماكلتها و غسان كلا شوية و ناض للبيت دخل يتكى و هدى هي لي مسكينة جمعات  الطبلة و الفقيه دخل ينعس و زينب كدلك بقات غا جالسة جامعة يديها عاد دخلات)

صباح جديد فالدار منورة و مفوهة بالشمس,و الصباح بدا بغوات عثمان و حياة تتحاول تشكتو و تتضحك معاه
•حياة: هانا امامي هانا اكبيدتي انلبس و انهززك عااغاك هه عفاااك (هدرات معاه و هي تتلبس عليها غا ديك الجلابة البيضة لي جات لابساها حيت معندهاش البديل و هي تهزو و خرجات برا الصالون لقات الفقيه فايق و جالس مسكين موجد اتاي و البيض و الزيتون و لي قسم الله مهم كان الفطور تيشهي
•حياة: اويلي اعمي كون غا خليتينا غا تنفيقو و نوحدو الفطور و الله تا حشومة (هدرات و فيديها عثمان و شوية خرجات زينب تتحك فيعينها و شعرها مشعكك دازت نيشان للحمام و هدى و حياة بقاو غا تيشوفو حشومة تخرج بهاد الحالة من النعاس قدامهم و قدام الفقيه على الاقل تحتارمو)
•زينب:(خرجات من الحمام و شافت فيهم ) غسان ميكينش؟؟
•الفقيه:(تعجب مني هي مرتو و ماعارفا تا فين هو ) خرج قبيلة ابنتي علااش ماقليكش فين مشاا؟
•زينب: كون قالي منسولش اخالي  (حياة و هدى بقاو غا تيشوفو )
•الفقيه: كيبان ليا انا انمشي نشد غا طاكسي ابنتي و نمشيو حيت دابا 9 و غسان لي ايوصلني مازال ماجاا (هدر مع حياة لي اومات ليه و زينب تتطلع و تهبط فجلابة حياة البيضة تا شوية تسمع الباب لي تفتح و دخل غسان و معاه شي ميكات كبار شوية سلم عليهم و دار شاف فحياة)
•غسان: هاكي هادو فكرت لبارح بلي مني جيتي مجبتي معاك والو من غير هاد الجلابة لي لابسة و نتي دابا غادا خارجة ماجاتش تمشي بيها عاود  و تا نتي اهدى هاكي خديت ليك شيحاجة بدلو عليكم (هدر و مدهم ليها فيديها و عطا لهدى ديالها  دارت هي شافت فهدى و الفقيه لي اومأو ليها انها تشد من عندو  خداتهم و تبسمات ليه)
•حياة: شكراا اخوياا (حدرات راسها و دخلات للبيت و تبعاتها هدى باش تقيش و متعطلش اما غسان فبقا غا واقف فبلاصتو على هاد برودة الهدرة لي ولات ليها معاها و هو يدور عند زينب لي لقاها خارجة بديك البيجامة مزيرة و شدها من يديها و دخلها للبيت و حط ليها بلاستيكات لي تاهي خداليها شيحاجة منها من البنات )

•زينب: ااي غاا بشوية راك ضريتيني
•غسان:(خنزر فيها) واش ممعلماش الحيا و الحشمة نتي ولا شنو ؟؟ اش هاد التزيار لي لابسة(هدر و هي تبسمات و قربات ليه تتضحك)
•زينب: هه كتغير عليا ااحبيبة هه ياك (تتحلون و هو يبعدها عليه)
•غسان: غلطتتي .، حيت على ذمتي و خاصك الوقار و الاحترام ازينب و على الاقل حتارمي غا الفقيه اما تا البنات راكم النسا و هانيا لكن راه الاحترام ا زيينب  و ...(هدر و شافها ماغاديش تصنط ليه و هو يسكت)
•زينب: عادي تا نتاا
•غسان: مهم انا غادي دابا انوصل خالي نتي بقاي فالدار و شوفي شنو توجدي الغدا و لا شيحاجة صاافي و لا بغيتي مني نجي راه نخرج  و البنات راه قاليك ايمشيو راسهم تهلاااي وراه جبت ليك شيحاجة شوفيهم لا عجبوك و بصحتك (هدر و عطاها شي فلوس و خرج عند الفقيه لقاه واقف تيتسنا فالبنات باش يسلم عليهم)