رشامة الحنة

البارت التاسع

➰رشـــــامـــة الـــــحنة〰️
▪️البارت الــتاسع
بقلمي: جيهان مرعشلي 🥇

صباح جديد ورا الفجر مني اذن و الصوت كان خارج من الجامع فحال الشلال العذب على الوذنين , فاق غسان حيت تعذب فالنعسة على السداري و هو يسمع الحس فالكوزينة و قال مع راسو ايكون غا لبنااات ,و مني دخل لقا الفقيه
•الفقيه: صباح الخير اولدي هه بنتي ليا هربتي من دارك جيت من الجامع لقيتك نااعس مابغيتش نفيقك و قلت ارا نوجد لفطور الطفلات مازال ناعسات خليتهم على خاطرهم (هدر بشوية و غسان تيحك راسو )
•غسان: ااه جيت مع الفجر تقريبا حليت و قلت اتكون فالجامع دخلت و نعست و هانتا تشوف (هدر و بدا يهز معاه لي قسم الله الفطور لخبز سخون لي تيجيبوه بعض العيالات ليه مساكن و زيتون اسود و الجبن باقي طري و حتى الحليب و هاد الشي لاخر ها اتاي ها القهوة مهم داكشي لي قسم الله و عاد كان راض البلبولة البيضة تتطيب و قرب يطفي عليها حيت ولف يفطر بيها كل صباح مع زويتة بلدية
•الفقيه: و مالك اولدي ? ياكما دابزتي مع زينب ؟(هدر و حطو داكشي و رجعو الكوزينة الفقيه طفا على البوطة و بدا يحط البلبولة فالزلايف ليهم كاملين نيت متجي فين تبرد يكونوالبنات فاقو حيت سمع غوات عثمان لي فاق و اكيد اينضوو هه ميكيحلا نعاس ورا غوات الصغار )
•غسان: واا اش انقوليك اخالي عييت نتا را عارف معندي منخبي عليك وليت نخرج نخمم ندخل نخمم و تاهي تتلقاها سبة و تاديرها معاياا بالصداع و المشاكييل
•الفقيه: اوا الصبر اولدي راه تاحاجة ماساهلة و زيد عليها راه الزواج هادا الا مصبرتوش بجوج شكون ايصبر هاا ؟ اواا حن حن شوية و ضحك ليها و طلق جيبك عليها و ديك ساعة اجي تشوف كيفاش اتولي معاك و النسا راه خصهم لي يخاف عليهم و لي يهدر معاهم و لي يحتارمهم ماشي ينهرهم (هدر و غسان اوما ليه حيت ميؤوس منها هادشي كلو تيديرو معاها و متتقنعش خاصها غا ايمتاش تبدا عليه بالولاد و الموضوع هو كرهو)
•غسان: انشاءالله اخالي ميكون غا لخير انشاءالله دابا ندير هادشي كامل لي قلتي لياا  (حط معاه الزلايف بعدا و هو يقوليه) انا انمشي نغسل و نجي باش نفطرو جميع واخااا

مشا غسان للحمام تيغسل وجهو و بقا مقابل مع المرايا و تيفكر هادشي كيفاش خرج ليه واش زينب لي غالطة ولا هو لي غالط و بدا يلقاها سبة
•غسان: كان يسحابلي نعرف نعوم (تنهد) تا عرفت راسي بديت نغرق

قاد الحمام كيف كان باش ميعيبو حد و خرج منو غادي للصالون و هو يلققا هدى و حياة و فيديها عثمان
•هدى: سلام خويا غسان مرحباا بيك ههه عاد جيتي (سلمات عليه و هو تبسم ليها و اوما ليها ب اه و هو يدور عند حياة)
•غسان: صباح لخير (هدر و هي ردات عليه و قاليها ) عطيه ليااا
•حياة: هااك (عطاتو ليه و هي مبسمة و هو غا شدو فيديه و مازادش تلفت دخل للصالون حدا الفقيه و بدا فطورو و عثمان بين يديه والله مطلقو و حياة دخلات للحمام قدات حاجتها و توضات و شافت كيصبحات مع الولادة دالبلارح و عاد خرجات عطات النوبة لهدى تاهي و تسناتها تا خرجات و دخلو بجوج للصالون يفطرو حيت حشمت و ماجاتهاش بوجهها)

•الفقيه: كي نعستو ابنيااتي مزياان (هدر و اوماو ليه ب اه و غسان شاف فحياة و تبسم غا خفيف ماشي بزااف )
•حياة: الحمدلله نحمد الله و نشكرو كون مكنتوش نتوما كون راه اا..
•الفقيه: نساي لي فات و ديري لي قلت ليك ابنتي نساااي (تبسم و مد ليها الخبز مقاد بالجبن ) هاكي ابنيتي تقوتي تقوتي راك مابقاش عندك الجهد و شوية لاتبايقش تباني (ضحكهم هدرتو و تعاملو معاااهم ,اوا كملو داكشي و ناضو بجوجات تيتعاونو غا بشوية بشوية حيت حياة مرا تجلس و مرة تنوض تكمل غا باش متقلش نييت عاد رجعات خدات ولدها من عند غسان دخلات للبيت رضعاتو تا شبع و بدلات ليه و ريحاتو عاد خرجاتو ليه عوتاني  لقاتو متكي على السداري و خداه دارو فوق صدرو و بقا هكك و تيمشد ليه على ظهرو تا رتاح و تگرع قول  بحالا هادشي كلو حافضو  , و الباقيين جالسين تما حداهم بما فيهم تا الفقيه. لي تبسم لييه و لفرحتو واخا ماشي ديالو و ماشي فرحتو لكن تيحاوول )

•الفقيه: ااه ولدي غسان نسيت مخبرتك(غسان على فيه عينيه و ناض جلس من الاحترام للفقيه و عثمان باقي فيديه ) راه غادي نمشي عندي شي سيمانة فمراكش كاينة واحد المسابقة ديال القران تما للدراري الصغار و خاصني نمشي و بغيت نخبرك باش تبدا تصلي بناس لي هنا فالجامع راه تنتيق فيك غا نتا و تاهوما ولفو على صوتك اولدي و المواضيع لي تدير ليهم فالجمعة
•غسان: انشاءلله (تبسم ليه) كون هاني بحالا كاين نتا كيف العادة (هدر و البنات شافو فبعضهم حيت ميكين لي يبقا معاهم و لا شنو ايديرو وهوما خوافات)
•حياة: عمي ماديرهاش مني قلة الصواب ااا حنا معامن انبقاو ؟(هدرات و جابت ليهم الضحكة)
•غسان: كيفاش معامن اتبقايو (شاف فالفقيه) اتبقاو هنا علاش
•حياة: ااه يسحابلياا انمشيو نخرجو من الدار راك عارف كاين لي ميبغيش يخلي البراني فدارو
•الفقيه: راه كلينا و شربنا مع بعضياتنا ابنتي و راه ولدك تزاد عندي فالدار كاين شي عائلة كتر من هادي ابنتي نسااي و راه الدار دارك. متخمميش (هدر و هي ناضت عندو عنقاتو و باست ليه راسو و الدموع فعينيها على هاد الخير لي تايدير فيهم )
•غسان: معاياش اتمشي ؟
•الفقيه: غدا الصباح لاكتاب (غسان اوما و هو يشوف فحياة)
•غسان: صافي نيت مزيان انوصلوك معانا فالطريق للمحطة باش تشد الطريق ديالك و حنا (شاف فحياة لي استغربات من شنو ايقول) غادي نمشيو باش تقيدي ولدك فالحالة المدنية ديالكم اكيد ماغاديش يبقا بلا هوية و تا هدى اتمشي معانا

حياة بقات تتشوف و تفكر جاب ربي هزات معاها وراقيها و العقد ديال زواجها و حتا الحالة المدنية ديالها هي و راجلها اما كون راه قطعوهالها لخرين
•حياة: ماغاديش نقدر نقوليك لا حيت مصلاحة ولدي هادي (توترات) ولكن اتمشي معانا تا هدى اا ححيت منقدرش نخليها هنا بوحدهاا واخااً
•غسان: اصلا كانت اتمشي معاناا راه قلتها لك واش مسمعتيش  (هدر و حط ليها ولدها بين يديها و داز من حداهم تيتسكل و كتافو لي ضروه)
•الفقيه: فين عوال غادي ؟؟
•غسان: غادي لداري اخالي خاصني نمشي باش نقولها ليهم و راني خرجت بلاما نقوليهم فين جيت يالاه نشوف شنو خصهم و نقوليهم على غدااا
•الفقيه: اوا سير الله يرضي عليك و سلم ليا على زينب قوليها تجي مرة جاية معاك و تتعرف على البنات تونس معاهم(هدر و غسان اوما ليه اما حياة غا تتشوف حسات براسها توترات بلا سبب او بحاالا شي حد ضربليها هاد القمعة فوجهها باش يفيقها من هاد الاحلام المطرزة لي دخلاتها ليها هدى لراسها و اسغفرات الله  )