شـتات قـدري

الحـلقـة ٣٠ (الجزء الثاني)

شـتات قـدري

#فاطمه القيسي

ابقه اگل للروح لو جرحي انلچم
ياروحي اسكتي

عريان السيد خلف
____________________________

بعد مرور اربعه اشهر.......

رحيق....

-يوم جمعه ما عندي شيء كاعده اكلب بلتلفون وعمه ابتيهال وياسر راحو ويه اهل مريم علمود شغلات العرس اني ما رحت وياهم مجان بيه حيل صراحه.

دكيت على زهراء مرتين وما ترد ودكيت مره لخ جاوب عليه صوت كلش قويه وكال.

علي: نعم منو حضرتج؟

رحيق: اني رحيق زهراء موجوده بلا زحمه.

علي: هاا اي اي موجوده بس نايمه هسه اكعدها.

رحيق: لا لا عوفها نايمه مو مشكله.

علي: اني اسف

رحيق: على شنو اخويه تعتذر مني.

علي: على ذاك الموضوع الي صار بالفاتحه مجنت قاصد صدكيني لبالي زهراء.

رحيق: لا عادي مصار شي يلا مع السلامه.

-سديت الخط بوجها قبل لا يحجي لان حسيت صرت بنص هدومي وخجلت منه يمه شهل شعور الي جاي احسه ياربي الصبر منك.
...............

مريم.....

-طالعين نشتري شغلات العرس وعمتي يا شيء اختاره تكلي محلو وماعندج ذوق وهي كلشي تختاره من زمن العصملي اخر شي كله اختارته ما خلتني راح انفجر سحبت ياسر على صفحه.

مريم: بطلت ماريد عرس عوفني وهاي حلقتك.

ياسر: هيوو شنو الحلقه اخذها شبيج انتي.

مريم: ادري منو راح يتزوج اني لو عمه ابتيهال كلشي اريده ما تقبل اخذه شنو هاي.

ياسر: اوكفي لحضه.

-راح على امه وكال الها.

ياسر: يمه رجعي الغراض كله ماريدهن محلوات وشكلهن قديم.

ابتيهال: ليش عيني قديمات شو يخبلن لو سحبتك وماعجبها شيء من الي جبته.

ياسر: يمه ترا عرس لبنيه مو عرسج خليه تختار معليج انتي.

ابتيهال: هيج يعني من هسه قوتك عليه موو.

ياسر: لا يمه ترا حقها تختار مو قضيه تقويني عليج ولا شيء حقهااا حقهاا لا تخلوني هسه اكلب المحل على راسجن سترن على نفسجن وخاليها تختار.

-باوعت عليه عمتي وخوزرتني وكعدت اختار الغراض وفترينا السوك كله يا محل نفوته تكلب بي اشياء تعجبني عمتي اطلعنا وتكول محلوات خلي نروح لغير محل وكضينا الطريق كله نفتر هلكنا لما حضرناهن.

والله كلش فرحت بيهن وما مصدكه واخيرا فرحتي راح تصير وي الي حبيته من صغيره احس راح اموت من الفرحة الا شويه.