لا أريدُ التحدُث معك مُجددًا ومع ذلك لازلتُ أنتظرُ منكَ رسالة، أريدُ نسيانَك ولا أستطيعُ النومَ دون أن أتذكرك، أتمنى لو أنّي لم أعرفك ومع ذلك أعتبرُك أجملَ ماحدث لي في هذه الدُنيا، أنا فعلاً تعبتُ من تناقُضَ الشُّعور داخلي .
______________
عند محمد :
رجع بيه الزمن لسنتين ورا .. سنتين استنفذوا طاقته .. بت عمته البحبها من هم صغار...... معرووفة محمد لرنده و رنده لمحمد .. فرحته لمن كان عمر 22 سنة و هي ياداب 20 و اعترف ليها بمشاعرو ... بتذكر قبلها و بطيش مراهقين دخلت معاهو نفس التخصص عشان تكون جنبه .. حافظ على حبه ليها بكل الطرق .. كان بحترمها في غيابها و حضورها و كأنها الأنثى الوحيدة في العالم .. الجامعة كلها عارفة علاقتهم و الحب البينهم !! ..
وقتها كان اسعد انسان في الكون..!! ما شايف في اسعد منه !! ..اتخرج و خلاها بوراه فضل ليها سنتين تتخرج !!
بس مع الاسف
السنتين ديل ضيعوا حب عمر كامل!!
كان مشغول بشغله و ماجستيره بس ما اهملها !!! كان بفضي ليها وقت !!!
كانت بتقابله ببرود و كان بسكت و بتحمل !! الحب الطوييل الـ بكنه ليها ما كان بعكره
شي!! و لمن جهز نفسه و حاله و صارحها يعملوا خطوة رسمية بين الاهل صدمته بردها
و كانت مكالمة نهت الحاصل في ثواني
FLASH BACK
_ خطوة رسمية في شنو!!
=حبيبي ركزي معاي!! في علاقتنا.. اصلا الناس عارفين حتى اهلنا بس لازم نلبس دبل بعد ده !!
_محمد انت شايف كده احسن يعني!
=طبعا طبعا
_انا ما عايزة نستعجل و نندم!!
_نندم على شنو .. لو ملاحظة يعني عمري ماشي على التلاتينات بعد ده
يعني ما بندم على حب ليهو اكتر من عشرين سنة 😂😂😂
=يمكن ده ما حب!!
_اممم صح هو شغف نجوى هيام حاجات كبيرة على الحب..
=محمد انا جاده اسمعني
و لحدي هنا هو ما كان خاتي شي في باله و ماخد الموضوع هزلي
هي تابعت و واصلت :
_محمد انا من صغيرة فتحت عيوني و لقيتك انت قدامي .. انت كنت معاي في كل يوم تقريباً من حياتي!!! لو ما ح ابالغ يمكن بس ساعات النوم هي المابنكون فيها مع بعض!! مش انا ،، لو اي بت لقت في زول معاها و جنبها و مصاحبها في كل مرحلة من حياتها حتحبو او تفكر نفسها بتحبه !!
