و قيل ان الحب جنون رقيته الزواج ❤️.
_________________________
بلسان مرام :
داليا بخلعة قالت لي انتي حامل!
بسسرعة نطيت بخلعتها و قلت ليها لااا قصدي ايي يعني ما عارفه..
تاني اخدت نفس و قلت ليها ما متأكدة يا داليا ،، ماف شي واضح الا اعمل تحليل دم.
قالت لي و هي متجهة على الباب : انتظريني عندك امشي و اجي،
و قبل ترد على سؤالي كانت طلعت .
مرت زي ربع ساعة جات راجعة و في يدها شريط اختبار حمل و قالت لي خلينا نشوف.
ابتسمت ليها على فرحتها دي.
و بعد مسافة دخلت الحمام.
وقفت و على يدي الشريط.،، ظني خاب و فرحة داليا ما اكتملت ،، انا اتسرعت و لا شنو ؟!
عيوني غصباً عني اتملوا دموع ،، صحيت من شردتي دي على صوت داليا من ورا الباب
فتحت ليها و هي من شكلي عرفت النتيجة حضتني و قالت لي عادي يا بت يادابكم عرسان ما تستعجلي،
قعدت معاي و بتحاول تونسني و تخفف علي ،، ما كنت زعلانة.، ،،على الاقل ما اتحمست و كلمت فارس ده الشي الوحيد المخفف علي.
بالمساء داليا رجعت بعد عملت معاي الغداء ،،، و عشان ما تخليني افكر كتير اصرت نعمل مكرونة بالبشميل و هي تاكل منها حتى تمشي و ده الحصل.
قعدت في الغرفة و رقدت في السرير لحدي ما فارس يجي ح اقوم ،، ،و ما عارفه كيف نومت اصلاا.
صحيت بيد على خدي و فارس في الارض جاثي على ركبتيه و بسألني بقلق : مرام انتي كويسة؟!
ابتسمت على لهفته و خوفو دي فقمت على حيلي و هو قام و قعد جنبي رميت نفسي في حضنه و قلت ليها : اشتقت ليك!
رفع رأسي بيدو و عيوني لاقت عيونها الفحمية كأنه بطمن علي و قال لي : انا اكتر.
قلت ليهو اممممم خلاص قوم غير و انا ح اجهز الغداء.
هز رأسه في ايجاب و انا قمت للمطبخ اجهز في الغداء ،،، بعديها طلع هو من الحمام شعرو كان مبلول و نازل على جبهته.،، دي اول مرة من اشوفه يكون شعرو كتير كده عاينت ليهو ببلاهة هو قرب مني و غمز لي و قال :
_انا حلوو للدرجة دي!
رديت ببلاهة : هاااا ؟!
ضحك و عاين لي.،،، استوعبت نفسي و دنقرت بسرعة و شلت صينية المكرونة ختيتها بره.
قبل نقعد نأكل الباب دق لمن فارس فتح كان ده عمر.
جاني صوته و هو بسأل : عليك الله ما تقولي لي غداكم ملاح رجلة و لا خضرة عشان خلاص انتوا املي الوحيد.
