، صرت اتفقدكِ في كل عابرٍ ، أفتعل أحاديث تُشبهكِ ، أرسمُ ظلًا أوازيه بظلي علنا يومآ نكون جسد وقلب واحدٍ ، أُثريت الفراق كي يحنو ونلتقي ، وارتجلت لذكراكِ قصيدة في مطلعها تلتصق الحاء بالباء، وفي نهايتها طويت الأرض لنلتقي في إحدي بقاعها ، 💔
________________________________
بلسان مرام :
كنت قااصدة اتساخف كده لفارس ،،،فكرة انه طلبني من ابوي و اتجاهلني دي ما قادرة اتقبلهاا ،،، و ما ركزت كتير مع موضوع ايمن و انه شال رقمي ليه!! انا ما ح اساعدو بشي ما ح اقدر اصلاً.. حاعرض صحبتي و وفاء و اهلهم كلهم للاحراج،، و اصلا ماف علاقة بين داليا و ايمن عشان نخوض ليها حرب و ايمن ربنا يعوضو بالاحسن من داليا .
ده كان قراري النهايي و خلاص و عشان داليا ما تتوتر اكتر ما كلمتهاا.. و على كده رقدت نمت .
الصباح صحيت نشيطة خلااص ... و كيف ما اكون متحمسة و الليله ح انزل شغل ... رغم الشغل و ضغطته بس على الاقل بخفف مني التفكيير كتييير .... صحيت بدريي قيل ناس البيت و حتى عملت ليهم الشاي و كلهم استغربوا... و بعديها طووالي طلعت مع اخوي مهند..
اول ما وصلت المشفى لقيت احمد منتظرني و رحب بي كنت عايزة اسأله عن علاقته بس سكت في الاخر لو كان عايز يكلمني كان قال لكن طالما سكت يبقى خلاص..
اندمجت في الشغل لدرجة بعيييدة بعيييدة ما فكرت في اي شي حتى كان ممكن اقول نسيتهم عدييل لحدي ما جاتني مكالمة من رقم غريب و اول ما رديت جاني صوت المتوقعاهو صوت ايمن :.
_الو مرام كيفك معاك ايمن اخو وفاء و فارس
طيب عرفنا وفاء بس ضروري يذكر اسم فارس ده يعني و لا مالو!! رديت ليهو تمام الحمدلله و انت؟!
=قال بخخيير الحمدلله ،، ما اكون ازعجتك او مشغولة عشان موضوعي طويل شوية
اخدت نفس و رديت ليهو لا عادي اتفضل عندي بريك نص ساعة!!
قال اووكي تمام ،، طيب يا مرام انت تقريباً حتكوني عارفه سبب مكالمتي دي و اصلا واضح انا حالياً ما عايز شي منك غير رقم ابو داليا
رديت ليه : ايمن انا بحترمك جداً و عاجبني التقدير المقدمو لداليا ده، ،بس كمان كل شي قسمة و نصيب و غير كده داليا و اهلها عندهم فهم الاولوية للاهل يعني صعب عندهم تعرس من بره الاهل و اعتقد داليا كلمتك انه ود عمها طلبها قبل تلاته سنة!!
قال لي انه عايز احاول و اجرب و زي ما قلتي صعب عندهم بس ما مستحيل و لو على النصيب و القسمة فأنا دعيت كتيير تكون من نصيبي و ربنا ما حيخيب حسن ظني مطمن ،، اديني الرقم و ادعي لينا .
_لكن هم هسي اهلهم كلهم عرفوهم لبعض !
=ما بهمني كتير يا مرام انا كلامي مع ابوها ..
