جميع مَن حولي .. أتحدث معهم بعقلي ، بنضجي ، بحذري إلا أنتِ كنتُ دائماً أتحدث معكِ بقلبي ، بعاطفتي و بكامل رغبتي ♥️!
_________________________
بلسان فارس :
التفت علي و كانوا عيونها حمر .. بكت و لا بتبكي و لا الحاصل شنو !!
سألتها بصوت واطي : مرام !!!
قبلت مني و قشت دموعها قلت ليها تعالي . سكتت ماردت
بصوت حاد قلت ليهو مرررررام
عاينت لي و مشت قدامي و قعدت ... سيف كان مستغرب و سألني بعيونه بس رفعت اكتافي اني ما عارف شي .. مديت ليها مووية شربتها و عيونها كلها دموع !!
_ مالك يا بت
رفعت راسها و عاينت لي بعيون باكيه و في ثواني نظراتها بقت حااادة و كأنها قطة شرسة!! و قالت لي كلو منك انت...
_ مالي انا!؟
=ماله هوو؟!
انا و سيف ردينا في نفس الوقت و ضحكنا هي عاينت لينا و حولت نظراتها بينا الاتنين و قبلت مننا ساااكتة ..
اتنهدت و بغيظ قلت ليها : العوير داك عمل ليك شنو
ردت بدون تعاين لي : اسمو احمد و هو دكتوري ما تقول ليهو عوير
قلت ليها. : بالله !! ده البهمك اسي ما اقول ليهو عوير !!
_اي... ما بسمح ليك تنبذ دكتوري .. من قبيل بتتمادى و بتغل...
=حيوان و عوير كمان ... ها ايه تاني!!
لو ما انت سمرا كان وشها بقى طماطماية من الغضب ... حمرت لي لمن حسيت شرايين وشها حتطق من الغيظ !!
سيف قال ليها. : طيب ممكن تفهمينا حصل شنو !! ؟
_عاقبوني و ما ح امسك حالة مرضية الاسبوع ده كلو !!
رديت بعدم اهتمام : احسن ليك ترتاحي من جو المستشفيات ده زاته!!
_ياخ انت انسان متعجرف بشكل!
=قبيل كنت تافه و اسي متعجرف تاني في شنو !!
سكتتت و طنشتني و تاني رجعت قالت لي : كان في داع تقول لاحمد!!! مش قلت ليك اسكت انا!! ؟
_انا قلت شي غلط!! قلت الحقيقة و لا انتي كنتي عايزة تكذبي عشان تتجنبي العقاب يا دكتورة !!
ما حسيت الا و برجل سيف تحت الطربيزة بعفصني على كلامي ده !!
اما هي فقامت على حيلها و قالت لي : ما كنت ح اكذب بس كمان ما كنت ح اتكلم بعنجهية و استفزاز كأني بتحداهو يا استاذ !!
