زي كل مرة بتصل بيهو وما برد ما عارفه الغيرو شنو رميت التلفون في السرير وقعدت وانا ماسكه دموعي اني ما ابكي ،، وابكي عشان شنو عشان زول اتغير علي وانا ما عارفه عامله ليهو شنو ؟؟؟ على الاقل كان يواجهني يقول لي عملتي كذا وكذا ،، ما يخليني بين السماء والأرض، ، لو كعبه يقول لي عديل انتي كعبه يا نون بس ما يخليني كدا ،، ما يخليني في المنتصف لا انا قادره اصلو لا انا قادره ابعد...؛؛ طبيعة علاقتي مع مازن ما ممكن اقول ما بتتجاوز الصحبة،،باعتبار انو بعتبرني اختو ،، بس انا ما قادره اعتبرو اخو لي ،، ففي الاول صحباتي كانو بشغلوني بيهو بس بقول ليهم ده اخوي ،، مع مواقفو و حركاتو و الهظار حسيت اني بقيت ما عايزه غيرو ،، في النقطة دي بالذات انا متناقضة شديد مرة دايره ومرة لااا ،، بس فجأة اتغير علي فالاول كان بختصرني شويه شويه بسفهني تاني بقى يتجاهل اتصالتي ،، وده كل ليه انا ما عارفه،، طلعتني من أفكاري دي اختي سارة بتناديني،،طلعت ليها قالت لي ابوي قال ليك تعالي ،،من غير ما ارد ليها مشيت ،، ابوي قال لي وين انتي !!! من قبيل بنادي فيك !!! قلت ليهو معليش والله ما سمعتك ،،، قال لي ما مشكله ،، عايز اقول ليك انتي ح تنزلي مع سارة اختك في المستشفى تدريب، ،،، اتهجمت ما كنت مفتكره ح القى فرصه سريعة كدا ،،قال لي وهو بضحك مالك مهجومه ؟؟؟، ، قلت ليهو ما كنت مفتكره ح القى فرصه بالسرعه دي ،، قال لي وهسي لقيتيها، ،!! قلت ليهو انا متحمسة اها ح انزل متيين، ،، قال لي يا زوله براحه مش عندك سمستر ،، خلاص خلصي السمستر الفضل ليك ده ،،قلت ليهو لااا هسي انا عندي إجازة خليني انزل طوالي ،، فكر مسافه وقال لي خلاص بس لمن تنزلي جامعة توقفي طوالي ما تضغطي على نفسك ،، قلت ليهو طيببب❤❤ ،، رجعت غرفتي لقيت اتصال من صحبتي ميعاد ،، رجعت ليها قالت لي وين انتي ؟؟؟ قلت ليها قاعده، ،قالت لي طيب تعالي عامله قعدة جبنه تعالي اشربي معانا ،، قلت ليها والله يا ميعاد ما عندي اي طريقه خليها مرة تانيه ،،قالت لي نون انتي ح تفضلي كدا لمتين ،،!! اتنهدت قلت ليها ما عارفه ما عارفه يا ميعاد ،، قالت لي ما انتي لازم تتجاوزي الحكايه دي زول ما عايزك هو الخسران لاقيك وين انتي ،، ابتسمت ابتسامه باهتة قلت ليها ودي الحالة انك عارفه الحاصل كلو كيف تقولي لي اتجاوزي.؟؟؟،،قالت لي عشان انا عارفه الحاصل كلو بقول ليك اتجاوزي، ، ياخ لمتين ح تستمري كدا !! لمتين ح تقعدي تتصلي ليهو وهو ما شغال بيك ،،!!افهمي الزول ده شاف حياتو و كمل من دونك!! قلت ليها ميعاد انا عايزه افهم هو بس ليه اتغير علي ليه البرود ده !! معقوله بعد ده كلو العلاقة تنتهي كدا ؟؟ بكمية البرود دي ؟ لو عملت ليهو حاجه ما يقول لي عملتي لي ،،سكتت مسافه قلت ليها باقي ليك ح يكون زعلان علي ؟؟؟،،ضحكت باستهتار وقالت لي ولا ح يكون شغال بيييك، ،لانو لو جد فرقتي معاه كان رجع كان اتصل كان فهمك بس هو فضل انو يبعد ويخلييك كدا ،،من البداية وريتك مازن ود اهلي ده ما منو رجا، ،، قلت ليها بس يا ميعاد انتي عارفه انو هو ما كان مقصر معاي ،، قالت لي وانتي كذلك ما قصرتي ما تقعدي تتذكري فضائل الناس عليك وتنسي فضائل نفسك عليهم ،،سكتت ،، قالت لي هسي تعالي لي يااااخ ،،قلت ليها ااا طيببب اكلم امي ،،وصحي نسيت اكلمك لقيت فرصة اني اشتغل في المستشفى وانزل تدريبب ،، قالت لي باااااااالجد طيبب حلو ❤❤ فرحتين والله ❤ هسي تعالي لي سريع منتظراك وكمان معانا بنات اهلي ،، قلت ليها كويس ،، قفلت منها ،، سرحت مسافه في كلامها ،، ميعاد دي شايفه الموضوع من جانبها هي من زاويه ضيقة ،،كيف تقدر تقول لي اتجاوزي ،، ما هي ما يوم ولا يومين دي عشرة بيناتنا دي صحبه، ،،،اذا هو قدر انا ما ح اقدر ، ،، ما هو انا ما بهيمة ولا تلاجة متحركة عشان ينهي العلاقه كدا من ابسط حقوقي يوريني الحصل ،،، طلعت من الغرفة عارفه لو قعدت افكر في الموضوع كتير ما ح امشي ولا انجز اي حاجه ،، كلمت امي قالت لي سوقي معاك اختك امل و ما تتأخري ،،،، فعلا اقرب توب لفحتو و اختي معاي ،،مشينا لقيت ماشاءالله بنات اهلها بالرصة لمن شكيت قلت عندهم عرس ،،سلمت عليهم ،، ميعاد قالت لي اتأخرتي قلت ليها اتأخرت وين بس انا جيت بعد مكالمتك طوالي ،، قعدتنا اتونسنا معظم بنات اهلها ديل بعرفهم واحده منهم اخت مازن *شهد* ،، كنت بعاين ليها بس البركة الفي ميعاد جنبي قالت لي ارحمي البت ياخ ،، قلت ليها هسي انا مالي، ، كمان ما اعاين ،، قالت لي نون عدي عدي يااخ ،، بعديها اندمجنا في الونسه ،،زي كلو مرة بنات اهل ميعاد بحاولوا يتوددوا لي شهد لانو اخوانها ماشاءالله وضعهم عادي بس ناس حارين زي ما بقولوا ،، عندها تلاتة اخوان مازن و مؤيد و مصطفى ،،، واخت واحده ريم ،،ريم دي الوحيده المتزوجة ،، المهم حركاتهم دي كان بتستفزني مش عشان مازن والله ،، بس ما بحب حركات تصاحبي البت عشان اخوانها ،،بحس بالقرف والله ،، كل مرة اعمل نفسي ما شايفاهم ،، رغم شهد دي احسن من ريم زولة طيببانه ،،اما ريم دي تقريبا ما قاعده اصادفها واصلا هي ما قاعده تجي ،، بعد ما خلصنا ونسه واحده من بنات اهل ميعاد قالت يخوانا اعملوا قروب يجمعنا عشان نتلاقى تاني ما معقوله كل مرة نجي ميعاد، ،، ميعاد قالت ليها ليه ياخي تعالوا في اي وقتت تنوروا ،، قالت ليها نتفاهم في القروب ،، مبدئيا كدا كلكم عندكم ارقامي الا انتي يا نون ف يا ميعاد رسليهو لي، ،،، وانا ده كلو ساكته ،، بعد ما خلصنا رجعنا عشان امي ،، امل في الشارع قالت لي ظريفييين يااخ ،، قلت ليها خلينا من ظرييفين النتيجة متين انتي !! قالت لي يا الله لسه لسه ،،قلت ليهاا لااا كويسس بعدين ارفعي لينا راسنا بالله ،، قالت لي ان شاء الله ❤ *امل اختي الاصغر مني طوالي ممتحنة شهادة سودانية * ،، دخلنا البييت امي قالت لي لاا كان تتغدوا قلت ليها امي الحالة جينا بدري ،، قالت لي تعالي ساعديني في الغداء ،، عاينت لي امل قلت ليها عليك الله ساعدي امي انا بجي اغسل العدة ،، ودخلت غرفتي ،، عاينت لتلفوني لسه مافي اي اتصال من مازن ،، مسافه ما صليت العصر واتغديت لقيتهم ضايفني في القروب ،، و الرسائل تتسابق فتحتهم بس ما قدرت ارد ،، اتذكرت صحبتي فيحاء مختفية مع انو دائما بتفقدني بس قلت ما مشكله اتصلت ليها ما ردت ،،قلت بتكون مشغولة ،، ميعاد اتصلت لي قالت لي شفتي استوري مازن، ،قلت ليها مازن متين عمل استوري قالت لي اجري شوفي ،،قفلت منها بحثت عن اسم مازن بس مافي اي استوري ليهو،، زعلت زعل لمن عرفت انو عمل لي استثناء ،، ميعاد رسلت لي اها شوفتيها؟؟ قلت ليها ميعاد مازن دي مستثنيني من الاستوري ،، قالت لي دقيقه اعمل ليك اسكرين ،، فعلا عملت لي اسكرين لقيتو كاتب
* ما كنت مفتكر اني سوف اهنٌ وهنتُ* راسي بقى يودي ويجيب قاصد شنو ؟؟ هو اصلا قاصد منو !! ،، ما غير تردد رسلت ليهو في الواتس قلت ليهو مازن رد علي ،،، قرأها وما اشتغل بي،، رسلت ليهو تاني قلت ليهو على الاقل عشان العشرة الكانت بيناتنا، ، هنا رد قال لي دي ياتو عشره كانت ،؟؟؟ هو انتي الزيك بعرف للعشره حاجه ؟؟؟؟ واصل قال لي انا في الدنيا دي مستحيل اكره بت اكتر منك ،، ولحدي هنا كويسين ،، قبل ما افهم الحاصل حظرني ،،انا ساعة بستوعب في القالو اتيبست في مكاني ،، كلامو هز ثقتي في نفسي شديد كنت عايشه دور الضحية و طلعت انا الظالم في الحكايه ،، طيبب متين و عملت شنو لمن اوصل مازن للمرحلة دي ،، مازن ده انسان بالو طويل شديد و ما بيقيف لزول على الغلط، ،بس معنى كلامو ده انا عملت حاجه اكبر من طاقتو ،،بس هي شنو !!! ،،هنا يادوب بكيت بعدلي ،، ما اداني فرصة عشان ابرر ليهو ،، و ابرر على شنو انا ما فاهمه، ،بس على الاكيد كان يفهمني ...💔
"من اسوء المعاملات الممكن الزول يعملها ليك انو يتعامل معاك على حسب مزاجو يعني يومين كويس معاك تلاته ايام متغير وانت المفروض تتقبلو كدا عشان تحافظ على العلاقة "
بعد بكيتي ديك اخدت عهد على نفسي انا لازم اعرف هو اتغير علي ليه حتى لو ما عن طريقو ان شاء الله ادخل بيتهم المهم اصل لفكرة اتغير ليه ،، هو مفتكر اني بعد كلامو ده كدا خلاص مفروض اقنع لااااا بموت بفضولي لو ما عرفت هو مالو ،، و خلاهو يصل للمرحلة دي شنو ....
