بعد يومين نزلت المستشفى زي فترة تدريب كدا في نفس اليوم اتصلت بفيحاء صحبتي وحكيت ليها الحصل كلو ،،ما ردت علي غير إنها قالت لي يا نون بعد كلامك ده تاني خلاص مافي فايده ،،قلت ليها لكن انا ..قالت لي من غير لكن انا اطلعي من الدور الانتي عايشاهو ده وخلي الولد في حالو هو اتكلم معاك بصريح العباره ،،قلت ليها صريح العباره شنو هو اصلا ما فهمني حاجه ،،قالت لي هو زول يقول ليك ما كرهت بت اكتر منك تاني دايره يقول ليك شنو ؟؟؟ قبل ما ارد قالت نون في مكالمة داخلة لي في الخط اقفلي ،،،قبل ما اقفل هي القفلت، ،مع إني استغربت بس ما اشتغلت بالموضوع كتير اصلا دي حركاتها ،،بعديها انشغلت مع البيشنات لحدي ما رجعت البيت مع دخلتي ميعاد اتصلت ،، ما رديت عليها قلت ارتاح وارد ليها لكن هي ما وقفت ،،سلمت على ناس امي ،،وامل قالت لي ردي على تلفونك ،،قلت ليها دي ميعاد هسي ما بكون عندها موضوع، ،رديت ليها قالت لي وين انتي ؟؟ قلت ليها يادوب جيت ،، قالت لي ماشوفتي القروب؟؟ قلت ليها لاا لسه كنت مشغوله، ،قالت لي ما شوفتي اخت مازن ريم طلقوها، ،قلت ليها شنووو ؟؟؟؟؟ ليه بسم الله !! قالت لي زاتي ما عارفه مالا او الحصل عليهم شنو ،، هسي دايرين نمشي ليها ،، قلت ليها ياحليلها والله ،،فكرت كدا قلت ليها دايره امشي معاك.. قالت لي نون !!!! ،،، قلت ليها مالك اها ! ما دايراني امشي معاك !؟ قالت لي كيف ما دايراك تمشي بس انا عارفه دايره تمشي ليه.. عايزه تشوفي مازن صح؟
قلت ليها طيب وقت ما فاهمني بتسألي لي،، قالت لي عشان غلط يانون...قبل ما تتم كلامها قاطعتها قلت ليها طيب طيب انتظريني بجي عليك وقفلت الخط ،، كلمت امي اني طالعه مع ميعاد وكذا قالت لي ماشه تأزري البت؟؟؟ قلت ليها اي ما فيها حاجه، ،قالت لي ما فيها حاجه لمن تكوني بتعرفيها هسي حصل ريم دي جاتك بالغلط، ؟؟؟ قلت ليها يا امي هسي البت في مصيبة خليني امشي ليها عليك الله، ،سكتت مسافه تاني قالت لي ما تتأخري طيب ..ترجعي قبل ما ابوك يجي ،،قلت ليها حاااااااضر، ،، وسريع غيرت هدومي ،،مشيت لميعاد قالت لي مصرة يعني ؟؟ قلت ليها ارح ارح ،، فعلاً مشينا ليهم ،،وفي الطريق ميعاد تنقنق في خالتو سوسن، ،شغاله ليها يا امي مافي داعي نمشي من متين ريم دي بتطلع للناس لمن الناس يصلوها وكذا؟؟ طبعا انا بضرب في ميعاد عشان تسكت خايفه خالتو سوسن تقول لينا ارجعو خلاص وانا ما صدقت اقنعت امي ،،خالتو سوسن قالت ليها شوفي صحبتك الغريبة ماشه ليها انتي ما دايره تمشي؟؟؟ ميعاد عاينت لي بنظرات لمن ضحكت فيها،،البيت ما كان بعيد يعني مشوار بالعربية زي نص ساعه كدا تقريبا ،،،و الموصلنا اخو ميعاد،، محمد ،،، لمن وصلناا انا ما كنت مصدقة نفسي اني قدام بيت ناس مازن ،،او إني ح ادخل بيتهم ،،شعور غريب بس مسيطر علي إني كنت متوترة ،،ميعاد شافتني قالت لي دي الحالة لسه ما شوفتيهو؟؟؟؟؟ عموماً يا صحبتي من هسي عندهم اخوهم مصطفى دا الكبير الحكيت ليك عنو ،،،، قلت ليها المنبرشة فيهو 😂،،قالت لي اي زاتو ان شاء الله يكون قاعد يا نون ،،قلت ليها كل زول في همو ،،،دخلنا البيت رغم بساطو بس كان رهيب العفش واضح انو مختار بعناية، ،دي كانت اول مرة اشوف ام مازن ،، خالتو سلوى،،وشها كان بشوش وروحها شبابية كدا ،،سلمت علينا وجات شهد اتفأجات بوجودي بس ما علقت ،،، بعد السلام وكذا، ،،جات ريم كان اول مرة اشوفها، ،شايلة ليها ولد صغير كدا اسمو ،،مؤيد* عمر السنتين ، من وشها واضح إنها متأثرة وغريب ما كان معاهم زول ،، مع انو عادي يكون ما معهم زول بس انا كنت متوقعة يكون في خالتها او عمتها المهم اي زول من طرف اهلها موجود ،،خالتو سلوى قالت لي انتي منو يابتي ما عرفتك ،،خالتو سوسن قالت ليها دي بت علي امها فاطمه ساكنة جمبنا قالت لي ااااهاا اي عرفتها ماشاء الله عندها بت غير سارة هي ؟؟،، قالت ليها اي دي نون و امل اصغر منها ،،قالت ليها ايوااا،،عاينت لي مسافه زي كأنها بتعرفني ما عارفه حسيتهم زي كأنهم مشبهني من شدة ما نظراتهم كانت قوية قمت شلت مؤيد وبقيت العب فيهو ،،ميعاد زاتها مستغربة معاي، ،، تاني انشغلوا بالونسة وخالتو سوسن بتحاول تصبر في ريم ،،شويه الباب حق الصاله فتح ،،رفعت رأسي وقلت خلاص دا مازن جاء جاء ،،بس اتفاجأت بشخصية تانيه خالص حاجه كدا طول في رهابه في هيبه حاجه كدا جذابة، ،اااي فيها شبه من مازن بس على ملامح كبيرة و واعية ،، جاتني ميعاد جمب اضاني قالت لي شوفي مصطفى ،،، في قلبي قلت ليها مصطفى السرور لكن ،،،سلم علينا، ،مؤيد انا شايلاه رفع يدينو ليهو و شغال خالو خالو ،، مصطفى ضحك ليهو جاء قريب مني في اللحظة دي حصلت صنننه ما عارفه الناس الحوليني ديل سامعين صوت دقات قلبي !!!! عيني جات في عينو طوالي كسرتها هو حمم كدا بصوت وشال مؤيد وطلع فوق ،، بعد ما فات وقفت ،،ميعاد طوالي جرتني عشان اقعد ،،خالتو سلوى قالت لي انتي عارفه مؤيد ده متعلق بمصطفى و مازن ،،انا من سيرة مازن خلاص كل مركز تفكيري بقى معاها ودايره تتكلم اكتر ،،قالت لينا مع انو مازن الفترة دي انشغل عنو مع ذلك لسه مؤيد متعود عليهو ،،،بعديها بقت تتكلم في مواضيع عامة لحدي ما خالتو سوسن قالت نمشي قدر ما حنستنا خالتو سلوى نقعد حلفنا ،، وانا عن نفسي ما دايرة امشي الا اشوف مازن ،،بس وين ما جاء ،،،بعد مسافة طلعنا كان محمد وصل ،،انا الطريق كلو شاردة بفكر في مازن ، وميعاد قالت لي شوفتي مصطفى ؟؟ شوفتي رهيب كيف ؟؟ كل بنات اهلي منبرشين فيه ،،هو ولا عليهو بواحده ساكت بس يعاين بعيونو ، ،، وتتكلم وانا ما مركزه معاها
وانا ما مركزه معاها لحدي ما وصلنا وميعاد تتكلم...
