بعد ما قلت لي امي انا موافقه رجعت غرفتي وحاسه قلبي مقبوض المفروض ما كان اعمل كدا ،،، اتحمقت و شلت في خاطري ،، و اتهورت من غير افكر او اعمل اي حساب للخطوه ،، حتى ميعاد ،،ما عارفه ح يكون شعورها شنو ،، بس حاسه انها ح تتكسر ،، لاا ما حاسه متأكدة ،، اذا انا خديت نفسي محلها مستحيل اقدر اتكلم و خاصه انها تجي من صحبتي العارفه كل تفاصيلي ،،ياخ اذا انا فيحاء خذلتني بعملتها، ،ميعاد ح يحصل ليها شنو ؟؟،، بقيت اكفت في نفسي و اقول متخلفه متخلفه و عويره مستعجله طوالي ،، يعني عشان فيحاء اذتني في اعز انسان لي اقوم انا اعمل كدا في ميعاد ،، ياخ انا بذات نفسي قلت لفيحاء انها انسانه انانيه و لومتها و كفتها هسي المفروض اعمل في نفسيي شنو، ،،،قلت لنفسي ما بخلي الشعور الجربتو ميعاد تجربة لأنها ما تستاهل مني كدا ،،رجعت لامي لقيتها مافي رقدت نامت ،،قلت خلاص الصباح بكلمها و على هذا الأساس نمت رغم انو مازن بتصل كل مرة برقم غريب بس ما اشتغلت بيهو و ماهو ياما كنت بتصل بيهو ما برد ،، ولا الظريفة انو حظرني عشان تعرف الحياة دي دواره كيف و الزول الليل لو كان تقيل عليك بكره بجري وراك وهكذا الحياة بتدي اي زول فرصه وكل واحد بعرف يستغل الفرصه دي كيف ،،،نمت و اليوم ده بذات نومت نوم زول مرتاح او اخيرا هم من قلبو نزل ،، صحيت على الساعه 12 مخلوعه اتذكرت امي جريت جري ليها ،،كانت بتتكلم بالتلفون و اخر حاجه قالت خلاص يا سوسن كلميهم نحنا موافقين يجوا البت موافقه و أبوها كمان ،،، تمام ،، كويس ،،الله يسلمك،، قفلت وانا حاسه نفسي اتيبست في مكاني،، كأني في عالم و الناس دي في عالم تاني خاااالص،، جاتني قالت لي ربنا يتم على خير مصطفى ده بالجد مافي زيو ،،، قلت ليها امي انتي كلمتيها؟؟؟ بالسرعه دي؟؟ هسي عايزه اغير رأيي، ،قالت لي ما انا عارفه جنك الفي رأسك ده عشان كدا اخدت الخطوه دي سريعه قبل ما تجي تعترضي، ،قلت ليها لكن يا امي انا ما دايره ح تجبريني، قالت لي ما ح اجبرك لكن براك جيتيني امبارح وقلتي موافقه اها انا اعمل شنو في الحاله دي ،،وبعدين يا بتي العرس سمح ،، قلت ليها والجامعة قالت لي الجامعه مالا؟ اصلا فضل ليك السمستر ده امتحنيهو وخلاص ،، بقيت افتش في سببب زي الزول الغريق البمسك في قشه، ،قلت ليها بس انا عايزه اشتغل و اكون نفسي واعمل اسم ليها ،،قالت لي اشتغلي واعملي الدايره تعمليهو بس في بيت راجلك ،،، سكتت ما رديت عليها وهي فاتت خلتني ،، يا الله يا الله قدرت ارجع غرفتي ،، وبالي مع ميعاد ليه انا كدا كعبه للدرجه دي ،، و على حس اني شايفه فيحاء كعبه هسي فرقت عنها بشنو ما زيي زيها ،، سبحان الله عشان كدا بقينا صحبات نوايانا او تصرفاتنا زي بعض وربنا ما بجمع بين اتنين الا بالنوايه، ،، بس انا كنته معزوره، ،نفضت نفسي قلت امشي أكلم ميعاد قبل ما تسمع من بره احسن تجي مني ولا تجي من غيري ،،، رجعت كلمت امي بس قالت لي لااا تاني مافي مشي على الاقل لحدي ما الموضوع ده يتم ،،قلت ليها امي ضروري امشي لي ميعاد واعتبريها اخر مرة قالت لي لااا يابت جنيتي خليك تقيله شويه اي انا عارفه ميعاد صحبتك بس هسي فرق،، على الاقل خلي الفترة دي تعدي وتاني امشي ليها زي ما عايزه، ،قلت ليها امي عليك الله عليك الله وبديت ابكي ،،قالت لي نون انتي لو عايزاني اقوم ادقك قولي ،، انتي ما نصيحه عايزه تمشي ليها كيف ؟؟ ده بدل ما تكوني رزينه و البت ديك ،،قلت ليها يا امي ما بتكلف لزول انا ،،قالت لي اي ما تتكلفي خليك قاعده جمبي كدا ،، متخلفه دي انا ما عايزاك تتكلفي انا عايزك تبيني انك قدر الحاجه دي و اتمسكني لحدي ما تتمكني بعد ما تتمكني لو دايره تقعي من رأس البيت ده اقعي ،،، امي ما قادره تفهم وجهة نظري انا اساس العرس من رأسو لي ساسو ما فارق معاي ،،،و لو اتلغى يكون في صالحي، ، هسي همي كل ميعاد ،، دايره اتكلم امي قالت لي شكلك ما عايزه تفهمي كلامي وانا العندي قلتو مافي طلعه يعني مافي طلعه ،،،بكيت قدرتي وما نفع ،،احسن حاجه اتصل، ،ما لقيت رصيد دي مشاكل شنو دي ،، قلت خلاص أرسل ليها في الواتس رسلت ليها فعلا قلت ليها ميعاد ارجعي لي ضروري، ، بس هي ما كانت داخله ،،، الحل شنو قلت انتظر اختي ساره تجي لأنو امي ما ح تخليني امشي الدكان ولا ح تخليني اشيل تلفونها كان كسرت رقبتي دي قدامها ،،،،لحدي العصر انا عايشه على اعصابي منتظره ميعاد تدخل ما دخلت ،، جاني اتصل من رقم غريب ما كنت عايزه ارد على حس يمكن يكون مازن بس في حاجه جواي قالت لي ردي و جاني صوت مصطفى وهو بقول لي مبروك علينا ❤ مع انو لسه بس بالنسبه لي موافقتك دي اكبر انتصار انا ببارك بيهو نفسي ❤،،سكتت ما رديت ،، لمن لقاني ساكته حاول يلطف الجو فقال لي كيف اقتنعت وده منو الاقنعك ؟؟ عشان اشكرو شكر خاص، قربت اقول ليهو مازن الاقنعني اشكرو بس ماهو جنبك ،،، قلت ليه يا مصطفى انا ما عارفه وافقت كيف بس نكون على بينه انا ما موافقه على العرس ده ،؟؟؟ قال لي ما موافقه كيف يعني ما موافقه طيب امي ليه قالت لي إنكم وافقتوا وإنك وافقتي ؟؟ قلت ليه انا استعجلت و في لحظه كدا ما عارفه افسرها ليك كيف جيت لامي قلت ليها انا موافقه ،، قال لي انا ح اكون أناني فيك و اقول ليك البركه في اللحظة دي ،، قلت ليهو بس انا ما بحبك قال لي انا ماعايزك تحبيني انا عايزك تتقبلي وجودي في حياتك الحب ده تاني بجي ،،قلت ليهو اكذب عليك لو قلت ليك انا بقدر اتقبل وجودك ،، اخد ليهو نفس وقال لي طيب انتي مشكلتك ميعاد؟؟؟ سكتتت ،، قال لي معناها مشكلتك ميعاد ،، يا ستي انا ميعاد دي كنت معاها صريح وريتها مشاعري اتجاهك وانا لو عايزها ما هي من زمان قدامي ،و اذا خايفه انو تحصل حساسيه بيناتكم ف اتأكدي انها ح تحصل ،،،😂↖️ ،،قلت ليهو الموضوع جادي على فكره ،، قال لي ما انا زاتي جادي الحساسية ح تحصل بس انتي البتقدري تتخلصي من الحساسية البيناتكم دي ،،قلت ليهو معناها لو عايزه اتخلص منها ما اوافق على العرس ،،قال لي انتي بس قولي عايزه تصلي للنقطه دي شوفي انتي بعد ما وافقتي و الكلام بقى كلام رجال اي كان موقفك ضد العرس ف انا داير اقول ليك انا بالي طويل و معاكٍ انتى ح يبقى اطول و اطول فما تتوقعي اني ح ازهج منك او تفتكري بأسلوبك ده ح اتنازل عنك انا ما صدقت لقيتك ❤ ،، قلت ليهو ما عايزه اقطع عليك الكلام الرومنسيه دي بس انا ما بجي بالكلام الحلو فخليك عارف ،، قال لي يعني افهم من كلامك ده انتي موافقه تكوني معاي بس معترضه على طريقتي ،،قلت ليهو يااخ انتتت...،،قال لي اوعك تغلطي ،، زحيت التلفون مني وعاينت مسافه ليهو تاني رجعتو سمعتو بقول الو ،،قلت ليهو اي قال لي المهم العرس ح يكون بعد شهر ،،قلت ليهو بسرعه لاا قريبب ،،قعد يضحك فيني ،،، قال لي يعني مواقفه على العرس ؟؟؟!.... والله بالجد غريب امرك من ناحيه ما عايزاني و من ناحيه مقتنعه بالعرس ما بتجي كدا ،، قلت ليهو طيبب انا ما عايزاك لانو ما بحبك ما تقول لي الحب ده بجي لانو الحب ده اساس اي علاقه وانا قبل ما تقول لي بخليك تحبيني وكذا انا حبيت قبل كدا حبيت لي واحد و خذلني يعني القدامك دي مافيا اي طاقة حيه ولا انا زهره منوره لا انا زهره يابسه ،،، و انت تستاهل زهره منوره زي ميعاد ،، لانها هي الوحيده الكانت قافله عليك و بصراحه انا مجرد تخيل ساي ما كنت بتخيلك فكيف عايز تعرسني كيف ترضاها لي نفسك؟؟؟؟؟،،( حاولت اجرحو بالكلام عشان يخليني عشان يكون عارف إني في يوم ما ح حبو ) هو ما اشتغل بكلامي ده كل و قال لي سريع توريني كنتي بتحبي منو ..... اتهجمت من رده فعلو ما كنت مفتكره مصطفى ده كدا لانو قالها بطريقه بتوضح انو الانسان ده في اقصى درجات الغضب ياخ انا لمن صوتي رااح ،،فقال لي بتكلم معاك اتكلمي ،،قلت ليهو مصطفى ؟؟؟ قال لي ما تقولي لي زفت مصطفى ده وريني كنتي مرتبطه مع منو ومتين حصل و كنت بتكلمو مع بعض لااااا لااا طلعتي معاه؟؟؟ مسك يدك؟؟ شاف ضحكتك؟؟ ونسك .؟ وكان رفيق ليك؟ واهم حاجه لسه بتحبيهو ؟؟،، اتوقعت كل ردود الفعل اتوقعت يقول لي خلاص ننهي الموضوع ده اتوقعت ...و اتوقعت... بس ما اتوقعت الاسئله دي قال لي اتكلمي قبل ما اصلك، ،قلت ليهو لااا ما بحبو، سمعت بقول بصوت براحه الحمدلله ،،قال لي على العموم حتى لو كنتي بتحبيهو كان ح اخليك تحبيني انا ؟؟ قلت ليهو بالقوة يعني قال لي اي و اعتبريها رجاله عديل يا ستي ،،لو ما عجبك اضربي راسك ب رأسي، ،،ما رديت عليهو ،،قال لي ما جاوبتي علي أسئلتي ،،قلت ليهو امممم هو كل الاسئله القلتها دي حصلت، ،ما اتكلم بس صوت انفاسو كانت واصلاني، ،، قل لي بصوت اتغير من شدة ما انفعل ،،برجع ليك ،،و قفل ،،، انا مبحلقه عيوني و بعاين لي تلفوني مستغربه فيهو في شخصيتو وهو متين قابلني لمن يحبني كدا ؟؟؟ بقول بالو طويل بس نفسو حار ،،يتشاف هادي لكن عصبي وبنفعل بسرعه ،،، انا ما كنت مفتكره انو بعرف يتكلم ،، طلع وناس..... .
طلعت الافكار دي من رأسي قلت مالي بفكر فيهو ياخ مالي و مال شخصيتو كان ح اعرسو بالجد يعني .... طلعت من الغرفة مشيت لي سارره سلمت عليها وقلت ليها عايزه تلفونك اتصل بميعاد قالت لي تمام احول ليك رصيد بس ،، قالت ليها الله ينور عليك انتي 💋،،،فعلا حولت بجاي اتصلت بجاي ،، بتصل واتصل ما بترد ،،، في الاخر ردت ،،قلت ليها ميعاد ،،قالت لي يادوب اتذكرتيني؟؟؟؟ قلت ليها لاا من قبيل في بالي ،،قالت لي عايزه مني شنو تاني يا نون متصله لي ليه ؟؟؟ مصطفى و اخدتيهو مني تاني عايزه شنو؟؟؟ انتي وقت ما عايزه عملتي نفسك قدامي مثاليه ليه ؟؟ بس طلعتي زي صحبتك ما بتعجبكم الحاجه الا لمن تكون عند غيركم ؟؟؟ قعدت تبكي ، قعدت ابكي معاها قلت ليها ميعاد، ،قالت لي ما تقولي لي ميعاد على الاقل كان تكلميني ان شاء الله عشان خاطر الصحبه البيناتنا ما تخليني اسمع من امي ،، و تخليني انكسر بالطريقه دي ،،انا كنت مفتكره انك صحبتي و بتحبي لي الخير زي ما انا بحب ليك ،،بس اكتشفت انك شيطان شيطان ب وشين ،، انا ما استاهل منك كدا يا نون 💔،، انتي عارفه ما عندي اخوات وانا اعتبرتك اختي الوحيده ،،ليه تعملي فيني كدا ؟؟؟ لو قلتي لي انا عايزه مصطفى كنت ح اقول طوالي لانو البفرحك بفرحني حتى لو على حساب سعادتي، ،بس انتي عملتي شنو اتخاسستي علي ؟؟ و اتمكنتي من مصطفى و خليتيهو يحبك ،،طيب ما فكرتي في صحبتك ما فكرتي في الوحيده الحبتك بالجد 💔 ،،، نون انتي كنتي نفسي الطالع و النازل انتي القريببه مني و المفضلة، ، كل طلعاتي ونزلاتي معاك ،، وريني تاني ح اطلع مع منو ،،وريني ح احكي لي منو ؟؟ وريني انتي لمن اجي انبرش في مصطفى ح اقدر انبرش قدامك ما انتي خلاص ح تبقي مرتو ،،، نون انا حاسه في نار جواي نار بتغلي و بتأكل فيني اكل ليه علمتي كدا يا صحبتي انتي لو كنتي عايزه عيوني كنت ح اديهم ليك ،، بس انتي كسرتي
كسرتي عمودي لانو انتي كنتي ضهري و سندي الوراي في اي خطوه ،، انا كنت مبسوطه بيك رغم انو عندك صحبات غيري بس انا ما كان عندي غيرك ،، و الوحيده الحبيتها وحسيت معاها انو الخير ح يكون معاها بس اعذريني ما كنت عارفه اني ح ألقى الوجع ده كل، ،ياريتني مت قبل ما اتعرف عليك 💔.....
