ايام العرس ،،كنت كل مرة بمشي لنون عشان اعرف شعورها شنو وفي كل مرة بتخيل نفسي مكانها وبتخيل انو العرس ده عرسي انا ،،،ما ح اقول نون اتغيرت علي لااا هي زي ما هي بس في فجوة بيناتنا، ،يمكن الفجوة دي كان ممكن نتخطاها ونرجع زي ما كنا بس بعد الحصل الفجوة دي كل مرة ح تزيد و ح تزيد حتى لو ما دايرين انها تزيد ،،الحاجه الحمدت عليها ربنا عرس اخوي كان معاهم يعني كنت بلقى لي حجه اقولها ،، او اعتذرت اني ما بقدر اكون معاها الوقت كل ،،،يوم حنه مصطفى مشينا كلنا كنت قاصده احننن مصطفى في حاجه جواي قالت لي اعملي كدا وعارفه انو ح يصورونا و بالطبيعي مصطفى يرسل الصور لي نون ،،كنت عايزاها تحس و لو واحد في المية من شعوري او احساسي ،،،و اوريها ياتو شعور بصل الانسان لمن طرف تاني يقرب من الطرف البخصك...،،،و بكره العرس كنت بفكر اكلم مصطفى و اقول ليهو نون وافقت بمبدأ شنو ،،وفعلا دا الحصل مشيت في اتجاه قبل القعد بدقائق قلت ليهو مصطفى دقيقه ،،قال لي ميعاد؟؟ دقيقه هسي ؟؟ قلت ليهو اي ،،قال لي لاا ما عندي وقت ،، قال لي لااا بس ثواني ،،فكر كدا قال لي سريع سريع طيبب ،، طلعنا على برا قال لي اها الناس منتظراني، ،اخدت نفس وانا خايفه من الخطوه دي رغم إني قلت اصبر عليها كنت عايزه اكلموو بعد ما يعرف شخصيه نون ويعاشرها بس النار الجواي بقت تحرق فيني قلت احسن من هسي اكلمو، ، قلت ليهو ما سألت نون وافقت عليك ليه ؟؟؟؟ قال لي كيففف؟؟ قلت ليهو في الاول هي كانت رافضه و بعديها وافقت في حين إنها كانت مرتبطه ؟؟ سكت عاين لي قال لي هي فعلا كانت مرتبطه بس علاقتي ده بي ده شنو ؟؟ دي علاقه وانتهت ؟ قلت ليهو ما هو ما هو ....قبل ما اتكلم جاء صوت مازن بورانا وبيقول يعني يا ميعاد انتي بتتكلمي الفتره دي كلها مع مصطفى عشان تقول ليهو نون وافقت عليهو ليه؟؟؟.... اتلفت بوراي وانا متوتره شديد ما عارفه هل مازن معاي ولا ضدي ؟،، جاء قريب لينا قال لمصطفى ما اكيد وافقت عشان لقت الراجل البستاهلها وكمان مصطفى اخوي بترفض؟؟؟ مصطفى بقى بعاين لينا الاتنين ،، مازن قال لي ولا ما كدا يا ميعاد ،،رفعت رأسي نظرات مازن كانت جهنميه، ،فلا اراديا هزيت راسي، ، قلت ليهو وفعلا زي ما قال مازن ،،مصطفى قال لي بس انتي قلتي كانت على علاقه ف الموضوع ده علاقتي شنو ب إنها توافق ؟؟ مازن ده عاين لي بطريقه لو كانت النظرات بتقتل انا كان هسي اترفع جسماني،، قلت ليهو لاا ما انا كان قصدي انها بدت تحبك وتنسى علاقتها الكانت زمان ،، مصطفى عاين لي وشكلو ما مقتنع ،،فمازن قال ليهو مالك يا مصطفى ح تعاتب بت الناس على علاقة انتهت ،،قال ليهو لاا ما كدا بس بحاول اربط الاحداث ،،قال ليهو ولا تربط ولا حاجه انت عليك بالجاي الماضي ده انتهى هسي افرح يااخ ،،في الأثناء دي جاء زول نادى مصطفى،،، وهو ماشي قال لي مازن معاك حق الواحد عليهو بالجاي الماضي ده انتهى .. وفات على كدا ،،انا دايره امشي قال لي اقيفي على وين يا حلوة ؟؟؟؟ قلت ليهو عايز مني شنو ؟؟ قال لي انتي العايزه من مصطفى ونون شنو عايزه تخربي العلاقه البيناتهم ليه ؟؟؟؟؟؟،، قلت ليهو اخرب ههه اذا ما عارف اعرف نون لمن وافقت على مصطفى اخوك وافقت بسبببك انت،، وافقت عشان تبين ليك انها ما فارق معاها .. سكتت عاين لي قال لي حتى لو وافقت بسببي انتي ما شايفه فرحت مصطفى بيها ؟؟ انا اول مرة بعد وفاة ابوي اشوف مصطفى فرحان كدا ف باقي ليك ح استخسر عليهو انو يفرح او اخرب ليهو العرس ؟؟؟ ،، حتى لو كان روحي في نون ف انا ممكن اضحي بحياتي عشان اخوي ،،، ردة فعل مازن كانت صادمه بالنسبه لي حلقي لمن نشف، ،وحسيت إني بتعامل مع شخصيه اول مرة اشوفها ما مازن البعرفو ولا الكانت بتحكي لي بيهو نون ،، حسيت اني بتعامل مع انسان اكبر من عمرو ،، وعي ومنطق ،، رغم انو بحبها بس مستعد يقدم حياتو لي اخوه ،،وانا البقول بحب مصطفى ،،شكلي عمري ما حبيتو لانو لو جد حبيتو ما كنت هسي عايزه اخرب عليهو في حين إني شايفه فرحتو من متين يا ميعاد انتي بتتعاملي بالخساسه دي ؟؟ مازن قال لي عايز أسألك لو العرس ده ما تم ؟؟ ح تكوني مبسوطه فرحانه؟؟؟ ح تستفيدي شنو ؟؟؟ولا مفتكره مصطفى ح يعرسك اذا العرس ده ما تم ،،اعرفي لو هو عايزك كان من زمان جاء اتقدم ليك ،،خليك يا ميعاد قنوعه بقدرك ،،زي ما انا مقتنع ،، ما تشوفيني ثابت قدامك كده ،، يمكن انا بحب نون اضعاف الحب الانتي بتحبيهو لمصطفى بس انا غلطت وغلط ما بتغفر ودي النتيجة وده العقاب حقي إني اشوفها مع غيري ،،، جاء بجنبي وقال لي اوعك تفكري مجرد تفكير او تخلي شيطانك ده يوسوس ليك مجرد وسوسه انك تبوظي العرس ده ،،لانو في اللحظه الح يوقف العرس بسببك انا ح اكون اخدت فيك إعدام.
وفات خلاني ،،بسبب نبرة صوتو القويه و اسلوب كلامو التهديد جسمي بدا يرجف ،،من متين مازن ده صعب كدا البشوف ضحكتو و استهتارو ما يقول جواه شخصيه حاميه ودمها حار كدا ....نص ساعه انا وافقه في مكاني داك حركه ما قادره اتحركها ،،فقلت في نفسي بختك يا نون بختك يا نون لقيتيها والله من جهة مازن و من جهة مصطفى ،، ده النصيب الحلو البقولوا عليهو ....
طلعتني من دوامه الافكار دي ساره وهي بتقول لي يابت عقدوا وين انتي اتصلي لي على نون ما عارفه تلفوني وين ،،، مع عقدوا دي وضرب الرصاص انا قلبي كان بيضرب الف ضربه شوبه وح يطلع من مكانو، ، بيد مرتجفه اتصلت ب نون .....
_______________________
