حُب في طرقات الجامعة

part10

وفاء: اكلج ريم اني اريد اغير اشتراكنا
ريم: ليش
وفاء: وصلت حدها تعبت من تدخلات بنات الخط بينا تخيلي هذاك اليوم من طلعت اتسوك اني وجوري وحدة تكلي شفتج تسوكين شكد تسوكين انتي وشعندج
ريم: وهيه شعليها
وفاء: تحاسبني عبالك اهلي
ريم: براحتج اذا نغير
وفاء: خل اخابر جوري واكوللها حتى هيه هم تغير معانا
ريم: اي خبريها هسه
وفاء: الو هلا جوري اشونج
جوري: هلا بمرت الشيخ بخير انتي اشونج
وفاء: الحمدلله سفرتج اخبارها
جوري: رجعنا البارحة وميتة تعب
وفاء: الظاهر ما كعدتي ها
جوري: اي مخليت مكان يعتب عليه
وفاء: المهم اريد نغير اشتراكنا ترا بنات الخط طلعن ارواحنا
جوري: اي والله شكد غثيثات شوفي اسأل اخوي الجبير واخلي يلگيلنا اشتراك واردلج خبر
وفاء: ديلا خوش باي
جوري: هلا
ريم: ها وفاء بشري
وفاء: انتظر ردها كالت راح ادور بس بقى بابا منو يگلو اخاف يتعصب
ريم: تريدين اني اكلو اكيد خرفانة انتي نسيتي منو المدللة مالتو الي مايردلها طلب
وفاء:  احاول واذا ترزلت احطها براسج
ريم: انهيج وفاء اكعدي راحه
شيهانة: وفاء وريم تعالو جوا اجا ايمن ومرته ( ايمن اخويه الجبير )
وفاء: يلا جاية
نزلت سلمت على اخويا وبوست مرته وكعدنا سوالف وضحك اتصلت جوري طلعت للمطبخ ورديت
جوري: وفاء اخويا يكول اكو اشتراك واسم ابو الخط هشام يمكن يعرفو اهلج هذا كال روحو وياه صديقي
وفاء: خوش اكول لبابا واردلج خبر
فتت للغرفة وكعدنا اجا ابويا ويسولفون فاتحته بالموضوع كتله يابا هذا يعرفو اخو جوري نريد نروح وياه
ابو وفاء: ليش تغيرون الخط مالكم
وفاء: تبهذلنا يابا ونريد نغير
ابو وفاء: منو هذا شسمو
وفاء: هشام
ايمن: هشام صديقي وجيران نعرفهم
ابو وفاء: منو هذا
ايمن: يابا هذوله اصحاب الكوسترات ابو هشام
ابو وفاء: اها عرفتو تمام مادام نعرفهم روحن ويا
ايمن: ترا هشام يطلع بالسبعه الا خمسة واذا تاخرتو يعوفكم ماينتظر
ريم: لا ننتبه نطلع من وقت ان شاءالله  سمعتي وفاء مو تنامين
وفاء: سكتي لا كدام بابا اشش
راح ايمن ومرته وخابرت جوري بلغتها واتفقنا ع الاشتراك ورحت حضرت هدومي ونمت
كعدنا الصبح لبسنا وكملنا وخابرت جوري وطلعنا للخط
جوري: صباح الخير
ريم: صباح النور وين الخط
جوري: هناك يوكف دائما امشو نصعد
صعدنا للسياره والطلاب جانو ماخذين راحتهم واحد رافع الحذاء ويتبهت والخ يضحك ويشاقه بس شافونا صارو عقال خطية هه ريم وجوري كعدو سوية واني كعدت بوحدي وطالب واكف مابقى مكان ويباوع للمقعد الفارغ كلي ممكن اكعد يمج كتله  اتفضل ماصدك كعد فورا واني لزكت بالشباك وبگلبي اتهدد بجوري وريم عافني بوحدي  وصلنا للجامعة ونزلنا
جوري: هاا كعد يمج طالب شنو شعورج هههه
وفاء: اسكتي انتي وريم لا اتبرد بيكم من الصبح عفتوني يم هذا الطالب
جوري: ديلا شصار
ريم: كولو الحمدلله اهم شي خلصنا من الحياية هههه
رحنا للنادي تريگنا وتوجهنا للقسم
جوري: ها بنات منو تفوت اول اكيد راح نترزل ع الغياب
وفاء: ابشرج دلال خابرتني كالت الدكتور سال عنكم وضاج
جوري: صخاام اني اخاف مااريد يمسحنا كدام الشعبة هسه يشمتون بينا
ريم: تصدكين بس شنسوي
وفاء: نروح عليه بس لازم وحدة تضحي وهيه تحجي ويا
جوري: ريومة اكيد هو يحبها
ريم: امشو ولو تريدون يبهذلني
وفاء: الله يخليج ريم ماكو غيرج
ريم : امري لله امشو ، دخلنا لغرفة الدكتور وطبعا النظرة جانت غضب واني خايفة وريم وجوري وراي
الدكتور: ها ع الخير شفناكم
ريم: اي دكتور صارت ظروف وماجينا
الدكتور :اسمع شنو ظروفكم
ريم: ابوي انجلط واجو خطار وماكدرنا نداوم
جوري: طلعت للشمال ويه اهلي
الدكتور: الله يشافي شوفو الغيابات محسوبة عليكم كلها بلغونا ع الاقل كولو مو تختفون هالمرة سامحتكم لخاطر ريومة يلا روحو لا يفوت عليكم الدرس
ريم: شكرا دكتور
وفاء: بس لو اعرف شلگه بيج وحبج
ريم: حلوه ونازكة شون مايحبني
وفاء: عابت اييع فرحانة
جوري: وفهد هم لا تنسين يحبها
ريم: بنات اني مو كلت لا تجيبون طاري فهد
وفاء: فهد فهد فهههههد
ريم: شكد خبيثات  يجيكم يوم
دخلنا للدرس وحضرنا واخذنا الواجبات متراكمة علينا وبالدرس الاخير الدكتور كال راح ينضم طالب لشعبتكم جديد مسوي نقل وهالايام يجيكم
ريم: هو احنه ناقصنا عدد
جوري: اي والله كثار صرنا
الطلاب: هلا بي دكتور
وفاء: زاد يرحبون
  خلصنا وطلعنا تغدينا واحنه رايحين للخط شفنا فهد وبقى يمشي ورانا لباب الجامعة وريم مغلسة ووطن مختفي ماكو  حسيت الجامعة فارغة واني ماردت اسال خفت لا يكولن حبيتي وطلعنا للخط ورجعنا للبيت دخلت نمت وكعدت المغرب وتعشينا ويه العيلة وبعدها كعدت احضر مافاتني من واجب واقرا وخلصت ونمت
ريم: وفاء كعدي الساعة 6 دوبج تبدلين وتتحضرين
وفاء: اي اي كعدت
كمت بدلت وتريگت اني وريم وطلعنا مع جوري للخط ووصلنا ورحنه للقسم دخلنا وبدينا ناخذ محاضرات
يونس: هلا وفاء كعدي بمكاني اني راح اكعد بالاخير ويا اصدقائي
وفاء: تمام
طبعا يونس وصديقه وسام طلاب بشعبتنا ومشاكسين فد مرة مكضينها ضحك وسوالف ونصب ومعارك ويه الدكاترة طفشو منهم خطية واني وجوري دائما وحدة تكول للخ هذا يشبهج ونشاقة عليهم سوالف تضحك بالدرس احجليكم شوية عن مواصفاتهم
يونس( طويل واسمر ولحية خفيفة كلش وشعر ثخين)
وسام( طول متوسط ومعضل وشعرو خفيف كلش شبه اصلع) بس شخصية مع الطلاب كارثة الكل يحبهم
جوري: ها وفاء يونس انطاج مكانه  ترا تتراهمون نفس سوالفج ويشبهج بالحركات
وفاء: لج وين يشبهني لا تخبليني اصلا انتي الي تشبهين وسام  انتي يعجبج هيج نوع بس اصلع
جوري: دباوعي ليونس شضعفه لا تقلدين على وسام اموتج ترا
وفاء: احنه شكو نتكاون بسببهم
جوري: تصدكين هه مخبلات وربي بس احس نظراتهم متغيرة
وفاء: اي فعلا  يلا انتي اخذي وسام
جوري: لا بالله اذا ماتاخذين يونس شكو متورطة مو گلنه ناخذ اصدقاء
ريم: كفي تسولفن انتبهن للدرس
وفاء: اي سكتنا
خلصنا المحاضرة الثانية واجا ممثل القسم يكول خلصنا دكتور..... ماموجود ماياخذنا فرحنا وطلعنا گلنه نتغدا  واني رايحة للكافيتيريا  يونس عبر من يمي وضربني بجتفي عود مو منتبه واني باوعت بضوجة ورحت لجوري حجيتلها
جوري: هذا يونس مو كاعد راحه اليوم
وفاء:  شون ضربني عابت شديحس
ريم: شنو تاكلون اني رايده لفة كص
جوري: اني هم بس دجاج مو لحم
وفاء: كص لحم
جابت ريم الاكل وكعدنا ناكل خلصت ورحت للماغسل واكفة اغسل اجا يونس ووكف يمي غسل ويباوعلي بالمراية اني متت خوف رحت ركض للبنات كعدت يمهم وخايفة
جوري: رايحة اجيب عصير حتى نشربه
اجت جوري شايله العصير وطبعا وسام ويونس يباوعون علينا اشو جوري رمت العصاير واحد وكع بالكاع ووسام يضحك ميت ضحك ويونس هم اني حيل ضجت كتلهم امشو حتى عصاير منريد وطلعنا برا للحديقة
جوري: معرف شوكع العصير انقهرت عليه
ريم: فاهيه ماتمسكيهم زين
وفاء: تعالو نروح بعيد ترا اذا بقينا راح انفجر على وسام ويونس البايخين
طلعنا لحديقة النافورة وكعدنا بالكاع نسولف ودلال هم جت ويانه باوعت شفت وطن بالحديقة واني طرت من الفرح وماعلمت البنات بقيت اباوع عليه وهو جان عيتصور بالحديقة ولابس قميص مخطط والبنطرون اسود والمناظر والسلاح بجيبه طالع يخبل
جوري: بنات يلا نطلع للخط صار الوقت
وفاء: عفت وطن وطلعت للخط واني لو عليه مااروح الا يروح
بس مااكدر ابقى وهم ماكلت للبنات حتى ماياكلون راسي صعدنا للسياره
جوري: وفاء احسج فرحانة اكو شي
وفاء: لا هيج مايصير افرح من حالي مرتاحة واموري طيبة
جوري: اني اعرفج متفرحين من حالج خاف اذكرتي وطن
وفاء: ديلا اصلا صار فترة مشايفتو ما يهمني
جوري: مو عليه سوالفج بس راح اعبرها هالمرة
وفاء: يلا لا تخبصيني هسه تفطنين ريم عليه
وصلنا للمنطقة وكلمن راحت لبيتها.
ـــــــــــــــــــــــــــــــــــــــــــــــــــــــــــــــ
ياترى منو هذا الطالب الجديد
شنو تتوقعون  انتو ؟؟؟؟؟؟؟