حُب في طرقات الجامعة

part34

بارت34
عِفت چَم كَلب رايدني ورضَيت استَوطن بـ كَلبك .
.
.
&&&&&&
.
.
وفاء....
كاعدين العيله كلها نتابع فلم ونضحك طبعا احنا كل خميس ننجمع يجي ايمن وعيلته وهناء وعيلتها تصير لمه حلوة مرات نلعب دومينا مرات نحشش ونذكر الطفوله ومرات عقال لان بابا كاعد دك موبايل امي شفته خالي رائد انطيته لامي وهيا ردت واني رجعت احجي مع هناء شويه ورجعت امي حجت مع بابا
ام وفاء: اكول ابو ايمن
ابو وفاء: كولي عيوني
ام وفاء: اخوي رائد خابرني كال مسوي عزيمه بمناسه تعينه فخبر عزمنا وكال كل خواتي متجمعات وكال لازم تحضرون فشنو رايك
ابو وفاء: يستاهل رائد طبعا ترحون واني اخابره واعتذر منه لان مكدر احضر عندي دوام خلوا ايمن ياخذكم عود نروح اني وانتي نباركله غير يوم
ام وفاء: مثل ما تريد هسه اتصل وابلغه
ابو وفاء: اي ايمن تكدر تاخذ امك وخواتك باجر لخوالك
ايمن: اي اكدر باجر من الصبح اخذ دنيا لبيت اهلها واجي اخذهم وهم اطلع اغير جوا
وفاء: ليش تودي دنيا لهلها خلي تجي ويانه تتونس
ايمن: غير حامل واخاف عليها من الطريق
وفاء: ولج دنيا حامل وماتعلمين
شيهانه : اي عيني خيانه نسمع من ايمن
دنيا: ههه ولكم والله البارحه حللت وعرفت حتى اهلي بعد محد يعرف كلت اليوم ابشركم بس ايمن خربها عليا
وفاء: حجي يفيدج زعلنا بعد وحتى على خوالي ماناخذج ويانه حتى لو ايمن يوافق شتكول حروثي
حارث: ماما ماتجي بس اني مو فوفو
وفاء: اي تروحلك فدوه فوفو انت تجي مو مثل بعض عالم راح تبقى وحدها ههه
هناء: اكلتي البنت بكشورها معليج دنيا الف مبروك وتكومين بل سلامه
دنيا: تسلمين حياتي الله يسلمج
هناء: ماما اني معزومه لو لا
ام وفاء: اكيد يمه شلون ينساج حتى زوجج معزوم
هناء: خوش حتى اجي معاكم زوجي مايحجي شي
وفاء: هاك استلم تزوجتي وماخلصنا منج ورانا وين مانروح
ابو وفاء: ههه حقج تورطنا زوجنها بل منطقه كل يوم يمنا
هناء: ماتفرحون بنتكم بنصكم
وفاء: هل فرحه مانريدها
هناء: ها صارت هيج هسه اخبر زوجي يجي ياخذني
s_rw15
ام وفاء: معليج من ام لسان اني افرح من تجين يمي واشوف جهالج باجر تجين وغصب عنها كل بيوت خوالج مفتوحه الج
هناء: سمعتي وفاء غصب عنج اجي واخذ مكانج
وفاء: لابالله هم نازل وهم يدبج
ايمن: يلا احنا نترخص الصبح تحضروا من وكت
دنيا: يلا بنات مع السلامه
الكل: الله وياكم
وفاء: راح ايمن ومرته وهناء بقت يمنه تبات صعدنا لغرفتنا فوك محتارين شنو نلبس كل شويه نبدل اخر شي استقريت على فستان عسلي شيفون والصدر مالته لون اسود وبي حزام من الخصر حضرتهم ونمت كعدت الصبح على صوت هناء تكعدني
هناء: كومي ولج صار ساعه اصيح ماتردين
وفاء:خير ماتخلون واحد ينام بهل بيت
هناء: وجع كومي تاخرنا امي كالت خلي تنزل لو اجي اذبها من فوك
وفاء: افتهمت كمت على سريع طبيت للحمام سبحت وطلعت نزلت تريكت بسرعه شيهانه غسلت مواعين الريوك اني صعدت بدلت وخليت مكياج قوي لان مناسبه كملنا تبديل ايمن خابر كال اطلعلولي بل باب قفلنا البيت وطلعنا اني وانس الطريق كله مناكر اخر شي رزلنا ايمن يلا سكتنا وصلنا خوالي الساعه عشرة ونص
البيت مليان تكول عرس مو هيج سلمت عليهم بس شنو فكي راح ادور على نور ماكو سالت مرت خالي عليها كالت ابيتهم الطبخ متكدر تجي هسه بقيت كاعده مع بنات خوالي شويه وطبت ريم
ريم: السلام عليكم
الكل: وعليكم السلام
وفاء: شجابج هنا
ريم: اللي جابج جابني غير معزومه مثلج ههه
وفاء: اقصد منو وصلج
ريم: فهد ليش
وفاء: لا هيج سلامتج كعدت ريم يمي وبدينا نسولف قدمو ضيافه تقريبا ربع ساعه واجه خالي سلمان (طبعا سلمان خالي الجبير ويصير ابو نور)
سلمان: وين وفاء
وفاء: هلا خالو رحت سلمت علي وبوسته
سلمان: شلونج بويه اخبارج
وفاء: بخير دامك بخير
سلمان: الحمدلله اكول خالي لجا لو للذيب
وفاء: يخسا الذيب كولي خالو عيوني الك
سلمان: سالمات عيونج بس محتاجينج هناك يم الطبخ ومريتي دزت مخصوص عليج
وفاء :صار تامر انت ومريتك
سلمان: هههه مايامر عليج ظالم لعد خلي اوصلج واروح يم الزلم
وفاء: رحت لبيت خالي سلمان طبيت للمطبخ مخبوص من الهوسه ذبياح وجياس بصل وباميه
شفت نور مخبوصه ماانتبهت لدخولي رحت حضنتها من ورا هيا فزت
نور:يااا وفاء هلا بل ضلع شخبارج حب
وفاء: زوينه بوستها ورحت سلمت على مرت خالي
عاليه: هلا يمه وفاء الله جابج
وفاء: كولي خاله
عاليه: اريد تساعدين نور بل تحضيرات ماكو غيرج امون عليها
وفاء: صار خاله بعيوني نور تعالي انطيني شي من عندج البسه الفستان مقيدني
نور: روحي قبلي للغرفه بس اغسل واجي
وفاء: رحت للغرفه شويه واجت نور اخذت دشداشه من عدها وبدلت اكلج نور اختج وين اشو البيت فارغ
نور: راحت لبيت عمو رائد امي طردتها لان تعل الكلب بل شغل هيا ما صدكت على الله بدلت وراحت
وفاء: تفتهم مو مثلج
نور: انجبي والحكيني للمطبخ
وفاء: رحنا للمطبخ بدينا نشتغل نفلس باميه ونكشر بصل وخاله عاليه كل شويه تروح يم الكدورة وترجع ومكيفه على شغلنا اني ونور كضينها سوالف
عاليه: يمه وفاء اخذي هاي وانطيها لخالج خلي يحطها فوك الطبخ بس لاتتاخرين
وفاء: صار اخذت الجدر وطلعت طبعا بيت خالي سلمان بي باب خلفي على حديقه فمسوين يمه مكان مالت طبخ وشوي يعني مرتبين مكان ومعزول عن البيت شفت خالي رائد ويمه واحد منطي ظهرة لابس قاط حبري توقعت من ولد خوالي تقدمت وحجيت خالو رائد هذا الجدر خاله دزته تمول خلي يضيفه فوك الطبخه فجاه اندار الشخص فتحت عيوني على وسعهم وطن شجابه هنا
رائد : جيبي خالو
وفاء: انطيته الجدر وعيني على وطن اللي راسم ابتسامه على شفته
رائد: وطن اعرفك هاي بنت اختي اسمها وفاء وتكدر تكول اقرب وحده عليا وصديقتي
وطن: تشرفنا شلونج خويه وفاء
وفاء: بسيطه مسوي نفسه مايعرفني اذا ما خجلته هلا وطن شلونك الشيخ شلونه هوا وفاطمه
رائد: هههه طلعتي تعرفي
وفاء: طبعا اعرفه يصير ابن عم فهد وابن الشيخ .....
وطن: اي صحيح
دك جهاز رائد
رائد: من رخصتكم بس ارد على سلمان ها خويه اي هسه اجي لا مااتاخر هلا
رائد: وطن خلي عينك على اكل تعرف لو ادز احد يمك
وطن: افاااا عليك كضيت عمري كله يم الطباخين واجيب بهل ذبياح نسيت انا ابن منو
رائد: ههه لا ما نسيت لعد اعتمد عليك شغله نص ساعه وارجع وانتي وفاء شوفي شنو يحتاج لاتخلين وحده من البنات تجي هنا خوش
وفاء: تمام راح خالو رائد وبقيت وحدي يم وطن
وطن: اي وفاء شخبارج
وفاء: زينه صدك مع منو جيت
وطن: مع فهد خالج رائد عزم ابوي وامير ابوي مكدر يجي لان عنده فصل بل بصره فااجيت انا بمكانه
وفاء: امممم يلا اني تاخرت على خاله
وطن: اوكفي وفاء
وفاء: شنو
وطن: عندي كلمتين اسمعيهم وروحي
وفاء: شنو اسمعك بدا يتقرب واني ارجع لي ورا نلزكت بل حايط وطن حاصرني من الجهتين بايدي خفت منه حيل وقربه وترني حجيت وشفتي ترجف ووط طن عوفي خلي اروح حباب
وطن: روحي منو لازمج
وفاء: عيونه تلمع وعطره سطرني هوا خشن واني ناعمه مين اعبر اذا هوا سد الطريق غمضت عيوني ماريد اشوف عيونه الخذت نص حيلي فجاه نطبعت بوسه على خدي هنا كلبي وكع من قرب وطن لو من بوسته احس كلبي راح يطلع من صدري ابتعد وهوا يضحك واني مصدومه مادا اصدك وطن باسني
وطن: روحي منا واذا شفتج مره ثانيه ابوسج تمام
وفاء: هزيت راسي وطكتيها ركضه للبيت واسمع ضحكته ورايه طبيت للمطبخ نفسي مكطوع
نور: شبيج شنو جتني تركضين
وفاء: بارتباك ها اي شفت بزونه وخفت منها وطبيت اركض
عاليه: ههه شكبرج اصرين وبعدج تخافين منها
وفاء: هههه معرف والله رجعت اشتغل جان خاله عاليه تكول
عاليه: يمه وفاء روحي ودي هاي وتعاي حتى تسوين الجاي
وفاء: اخذته منها ومحتاره شلون راح اودي ووطن كال اذ طلعتي ابوسج احسن شي اخلي نور تودي
عاليه : بعدج مارحتي يلا روحي بسرعه
وفاء: ها اي اخذته ورحت وصلت يمه احممم الزم هاي خاله دزتها
وطن: لازم تردين بوسه انا شكلت
وفاء:لاتفهم غلط والله خاله دزتني
وطن: ههه حجي يفيدج
وفاء: والله مااطلع بعد ولا تشوف وجهي
وطن: دنشوف
وفاء: مشيت كم خطوه واجه ابن خالي لؤي (يصير اخو نور حصل مجموعه طبيه)
لؤي: هاي منو اليوم يمنه شلونج بنت عمتي
وفاء: بخير انت شلونك شلون دوامك
لؤي: ههه جنت بخير قبل لاتجبين طاري الدراسه
وفاء: ههه ليش
لؤي: مسحول والحمد لله شعجب هنا مو مع البنات هناك
وفاء: غير امك دزت عليا حكم القوي على ضعيف
لؤي: غير تحبج وتحب شغلج صدك خلي يوم نشوفج بل دوام ونتغده كلنا
وفاء: احجي مع لؤي وناسيه وجود وطن رفعت راسي شفته خازرني اشرلي بمعني روحي ترخصت من لؤي وطبيت جوا وما طلعت بعدها التهيت احظر الجايات كملوا الطبخ وصبو الاكل اني بقيت يم نور خلصوا غده وجابو الصياني حتى وطن ينكل معاهم هوا والقاط مالته نور دقتني بخاصرتي
نور: ولج وفاء وطن هنا
وفاء: سويت نفسي متفاجا حتى نور لاتشك
صبينا الجايات ونضفنا المطبخ وكعدنا ناكل اني ونور خلصنا اكل ونور صعدت تسبح حتى نروح لبيت خالي رائد مع البنات طلعت بدلت ملابس ونزلت انتظرها برا اجه خالي رائد يمي
رائد: شعندج هنا وحدج
وفاء: انتظرك حتى اموتك
رائد: هههه ليش ولج
وفاء: من جيت لحد هسه مافتهمت كلشي من وراك كضيتها بل مطبخ والخواتين هناك دك سوالف
رائد: ههههه خطيه غير يغيرن جوا
وفاء: خنكته وكرصته من زنده
رائد: خرب اهلج هسه الكل يحسب مرتي
وفاء:حيل بيك تستاهل روح زعلت منك
رائد: اعرف شلون اراضيج اكو ناس اليوم سالت عليج وين واصله بل دراسه
وفاء: لاتجذب سوالفك مو عليا
رائد: بشنو تريدن احلفلج
وفاء: لاتخلف كالو للجذاب احلف كال اجاني الفرج
رائد: طيح الله حظج وحض اليكعد معاج
وفاء: خفه وراحه واذا عزمتنا هيج عزيمه بعد اطيح حظك اجتي نور ورحنا للبيت لكينا الكل نايم بل حق احنا انام مو هما رحنا لغرفه خالي ونمنا بيها

وطن: طلعت لبيت رائد استقبلنا خوش

استقبال واكف مع رائد نحجي اجتي وفاء بس شطالعه بنت اللذين تمشي وتفر الخصر ما تحملت منظرها وبستها حبيت خوفها مني وارتباكها اخر فترة كل تفكيري صار بيها طولها عيونها اللي ادوخ اكبر رجال دمها ولا لسانها كلشي بيها ينحب معرف مشاعري تجاه وفاء حب لو اعجاب بس اللي اعرفه تعلقت بيها غرت عليها من حجت مع ابن خالها مع العلم الحجي صار كدامي اففف وفاء،شسويتي بحالي
طلعت حتى اخبر خالد وقهره لان اني ابيت نور سمعت عركه وفاء مع رائد هههههه حقها بس تعرف شلون تاخذ حقها قويه هل بنت
.
.............
.

جوري
من يوم اللي سافر عدي واني احس مثل اللي مضيع شي الجامعه كرهتها كل مكان جان يكعد بي عدي صرت اروحله واتخيل عدي كدامي بنات الشعبه تخبلن وهنا يسالن علي وليش مختفي مرات يجن جنوني اكوم واضرب راس براس بس اتعوذ من الشيطان واطلع من الشعبه
عدي كل يوم يدز رسائل وغزل مامر يوم اذا ما راسل
مرات ارد مرات بس اقرا اخر مرة دزلي اغنيه(رضا العبدالله بعدك حبيبي) سمعتها وكمت ابجي تمثلنا ومن يومها صارت اغنيتي المفضله ودوم اسمعها

بقيت افكر بحاله اشونه بالخارج شنو ياكل وشون عايش گلت لروحي لج جوري الولد متعود على هالشي عليمن قاهرة روحج وتفكرين
اشتاقيتله وتذكرت نضراته الي وخوفه عليا وشلون جان يسال ريم عن اخباري وشلون جان فرحان لمن اجه يخطبني كل هل مواقف صارت بعيني ليش اني من دون البنات حظي هيج

نشرت ستوري اغنيه هيه قسمه لجلال الزين وشافها فورا اتصل عليا وجان ضايج
عدي: وحق ربج ما اخذ غيرج واني قسمتج غصب عن الكل
لج جوري ليش تحرگين گلبي
-بقيت اسمع كلامه وساكتة لخاطر مايسمعني ابجي ويتاذى
جوري: سد الخط اني الدنيا وكفت بعيني وبقيت ابجي على حضنا

.
.
.لاتنسون النجمه وتعليقكم الحلو♥✨.
يتبع....