حُب في طرقات الجامعة

part20

وحين أغار لا أطيق ولا اُطاق 🍃

وطن.....
طالع من الديوان ابوي طلب مني اجيب مسباح نقدمه هدية  لابو ايمن
واني طاب للبيت  لمحت بنت واكفة بالحديقة وكفت وركزت طلعت وفاء مااحس بروحي الا صرت  يمها وروحي صارت بخشمي حجيت بصياح
-انتي شجابج هنا
وفاء: يمه خرعتني
-لج انتي تعرفين الديوان مليان زلم وواكفة هنا لو احد شافج بالحديقة شيكول عنج
وفاء: الواحد يسلم  ينبه لك خوفتني وبعدين تعال منو سمحلك تحجي وياي بهالطريقة
-وتردين بعد امشي ،،، دااكلج امشي لا احد يشوفج
وفاء: اختك فاطمة جابتني لهنا تشوفني الحديقة وانت اصلا شعليك وخر من يمي
اجت فاطمة
فاطمة: ها خوية شنو
وطن: اني مو منبه هاي الحديقة ممنوع الوكفة بيها
فاطمة: خوية صادك والله بس اعذرني جنت دااشوف وفاء وراح عن بالي
وطن: امشو من هنا يلا ومااريد المحكم لا تطلع الزلم

فاطمة: صار خوية امشي وفاء
وفاء: هذا اخوج بيا حق يحجي وياي هيج
فاطمة : اعذري هو عصبي كلش ومحذرني بس اني نسيت امسحيها بوجهي
وفاء: انتي مو ذنبج عاذرتج
  سكتت وبگلبي اكول ها وطن هيج تتعامل وياي اني الك بسيطة

فهد.....
عقدت سيد ومحكمة صارت ريم مرتي شرعا وقانونا شوية وطلعت من الديوان  مستحيل
اخلي ريم تفلت بالسهولة هاي
فتت للمطبخ وگلت لفاطمة اخت وطن تصيح ريم تجي فوك
طلعت لغرفتي وانتظر
فاطمة: بنات تعالو نشوفكم بيت عمي ابو فهد
البنات : يلا
فاطمة: شاورت ريم وكتلها ماتريدين تشوفين غرفة زوجج غرفتج
ريم: اي اكيد بس خاف عيب نترك النسوان
فاطمة: انتي اطلعي فوك والباقي عليه
ريم: طلعنا ويا فاطمة ودتشوفنا الغرف ودتحجيلي عن علاقتها بيهم هي دائما تجي ساعدهم بالبيت لان ماعدهم بنات بس ولد كلتلي هاي غرفة فهد طبي شوفيها وراحن اني باوعت من الباب الغرفة فارغة امنت وطبيت اباوع الغرفة جبيرة وبيها ميز تواليت وكنتور ملابس وعطور ع المراية وامشاط وسرير ابو النفر وسبلت واني اباوع للغرفة ودخلت مااحس الا واحد لزمني من خصري وانفاسه صارت قريبة مني من العطر عرفته فهد
فهد: ها ريومة شكتلج مافوتها الج
ريم: حباب عوفني وخر فهد شبيك
فهد: لو تلمين الكل عليه مااوخر
ريم: اصيح واخليهم يسمعون
فهد: محد يدخل رجال ومرته
ودرت ريم عليه وسحبتها قوي
ريم: اوخر بوجهي عنه صار كبالي ،،فهد عوفني عليك الله
فهد: درت وجه ريم عليه وبستها من شفتها ولازمها حتى ماتوخر
ريم: غمضت عيوني وحسيته صار يتعمق دفعته قوي ووخرت وجسمي كله قشعر
فهد: هههه هسه ارتاحيت

وفاء: اني وفاطمة وشيهانة دنشوف الغرف كملنا واحنه نازلين اجت ريم ع السريع وتكول لفاطمة شسوي بيج  ماتكولين فهد بالغرفة
فاطمة: هههه هو موصي شون اخرب الوصية
ريم: اني الكم
وفاء: لج ريم حمرتج متخربطة عدليها
ريم: صدك هسه اعدلها رحنا للمغاسل اني ووفاء اعدل نفسي
وفاء: ها شسوالج
ريم: وانتي شعليج
وفاء: مو عليه مبين شسوالج
ريم: مادام واضح لا تسالين
وفاء: عابت
اجت فاطمة وطلبت نروح نشوف مزرعتهم ورحنا وياها
ريم راحت يم النسوان مسطولة مدري شسوالها فهد واني وشيهانة رحنا ويا فاطمة
طبينا للمزرعة تجنن جبيرة كلش  بيها حيوانات خيل وكلاب حراسة وبط ونعام وارانب
شيهانة: هاي كلها لابوج
فاطمة: اي كلها النه بس الخيل لاخواني
وفاء: احب الخيل بس ممجربه اقربلها او الزمها اخاف
فاطمة: صدك تخافين
شيهانة: لج هاي لشوفيها تسولف وتزامط حتى من البزونة تخاف
فاطمة: ههههه جبانة
وفاء: ها شيهانة بعتيني لفاطمة  مو جبن بس عندي فوبيا من هالشغلات
فاطمة: فوبيا شنو ههه تعالو شوفوهم عن قرب
شيهانة: هاي كلش حلوة مبين ،،لزمتها ونهضت اني رجعت لورا خفت
فاطمة: هاي الاصيلة لاخويا وطن من صار بالامن الوطني وبسبب
انجازاته وياهم بابا هداه هاي الفرس من الامارات جايبيها وماتقبل احد يلزمها غيره
شيهانة: مغرورة تبين
وفاء: مثل صاحبها غير
فاطمة: هههه بس ترا كلش حباب وحنون
وفاء: دخلنا لحديقة كلش حلوة بيها مكان كعدة وصايرة ختله وحواليها اشجار برتقال وليمون وباردة وبيها فيّ كومة
-فاطمة هاي ليش معزولة
فاطمة: هاي خصيصا للبنات والعيلة لان باقي الحدايق صايرة مقابيل الديوان واحنه ديوانا ميفرغ يعني الزلم رايحه جايه لهلسبب بابا سواها
شيهانة: هاي الحديقة مال واحد يقرا بيها وعلى كوب گهوة كلش حلوة
فاطمة: انتو حبابات كلش تمنيت لو عندي اخت مثلكم نبقى نسولف اني وياها
وفاء: انتي هم تنحبين وتشبهينا
فاطمة: ههه شكرا اني هم راح اعتبركم خواتي
شيهانة: هلابيج بشلتنا
فاطمة: شنو يعني
وفاء: يعني انضميتي لمجموعتنا
فاطمة: اهاا كلش شكرا
وفاء: عفوا ،،، اجا اخوي الزغير يكول يلا دروح
فاطمة: ليش ماتبقون
شيهانة: اجا الامر من بابا منكدر هههه
وفاء....
رجعنا لكيناهم ينتظرون ودعناهم وطلعنا بالسيارة
الطريق جان طويل فتحت الشباك والهوا بارد ويرد الروح احس يدخل باعماقي وتصير رجفة بعظامي احبها كلش عادة بيه من اني وزغيرة دائما يمنعوني بس ميفيد بيا
ريم...
مرت ايام واني وفهد مرة حلوين ومرة نتعارك هيج كاضينها صار يدخل بقراراتي واني اعاند بيي وجوري وفاء ينصحون بيه بس ميفيد نبقى نتعارك
وبالدوام جوري معذبة عدي صار يحاول يصادقني لخاطرها وهي بس تشوفه تفلت ووطن قليل يدوام وبس يشوف وفاء واحد يخزر بالخ مدري شنو قصتهم
بعدها قررنا نسوي خطوبة واتفقنا واني من وقتها يوميا نطلع للسوك اختار فستان وصالون وسوالف الخطوبة وجوري ووفاء استلموني بشرة وماسكات خابصات رواحهن
اجا يوم الخطوبة رحت للصالون وسويت تنظيف بشرة ورتبت نفسي ومكياج خفيف وتسريحة بسيطة خليت شعري مفلول لان شعري طويل والفستان جان شفقي فاتح كلش وانيق من كدام مفتوح شوية وكله تول منفوش طلعت اشبه  اميرات ديزني وجوري ووفاء حايرات بلبسهن والمكياج فرحانات اكثر مني  وفاء لبست فستان اسود مخصر وبي شرحة وسوت مكياج سموكي وحلت شعرها طلعت تخبل وجوري لبست فستان اخضر ملكي مو كلش منفوش وخلت مكياج فاتح ولبست حجاب
وامي عزمت الكل وماخلت كيك وتحضيرات
طبيت للبيت راجعة من الصالون تلگوني بالهلاهل واختي هناء مسوية كوشة وشيهانة كاشخة ولابسة والاغاني والركص شوية وكالو اجو اهل العريس اني روحي احسها صارت برجلي
وارجف وجوري تگلي شبيج لتخافين ساعات وتعدي
فهد:
اليوم خطوبتي واهلي فرحانين والكل متحضر والولد فرحانين كل واحد يفكر بنفسه وبحبيبته ،،لبسي جان دشداشة عسلي وغترة بيضة وبشت اسود طلعنا متوجهين لبيت ريم
دخلنا لبيتها وامي وعماتي يهلهلن  طلعت عمتي ام ريم واستقبلتنا طبينا للصالة شفت ريم كاعدة شهل حسن شهل نزاكة تكول ملاك طالعة تسالمنا وبستها من راسها وكعدت يمها واني ممصدك الي اشوفه شون طالعة تخبل والخجل ماليها
همست باذنها
-شونه الحلو مالتي
ريم بخجل : بخير
فهد: وينها التعارك شو خانسة
ريم: لخاطر هاي الاوادم مستحية
فهد: هههه احد كلج طالعة ملاك وتخبلين
ريم: لاا انتظرها منك
فهد: لج ريحة العطر سطرتني غير تراعين مشاعري تدرين بيه صبري قليل
ريم: اختبار هذا
وفاء: طبو اهل فهد واني من شفته خليت شال على راسي فهد وريم طالعين يخبلون والاغاني مشتغلة واني اباوع لجوري واضحك اريد اركص ومستحية شوية وصارت لخه جوري كومتني واني مصدكت كمت اركص  عود مستحية جنت شوية وشديت الشال وركصت شرقي النسوان كلها تباوع
والبنات ملتمين على ريم وفهد
واني وجوري بس نتبسم  اجت فاطمة تگلي ركصج يخبل مو بنت لاستيك شهالمرونة وجوري تگلها
غير هاي ركاصتنا فضحتني
باوعت للنسوان كلها صافنة عليه وام وطن تگلي صلوات ع النبي تخبلين ضمي شعرج لا تنرگعين بعين  سالتني شنو اقرب لريم جاوبتها اني اختها وبداخلي كلش فرحت لان لفتت ام وطن

جوري: دانركص اني ووفاء والنسوان يباوعن علينا بس اكو نسوان اثنين ماشالو عينهم مني ويسولفن بيناتهم مااهتميت شوية وصاحت بيه المرة رحت يمها
-ها خالة
المرة: انتي شسمج
جوري: جوري
المرة: اسمج حلو مزوجة لو لاا
جوري: لا خالة ممزوجة وداادرس حاليا
المرة:شنو تدرسين
جوري: كلية.....قسم......
المرة: هه نفس قسم ابني
جوري: ليش خالة
المرة: شوفي اني حبيتج وانتي حليوة ومثقفة ونفس تخصص ابني واريد اخطبج
جوري: بس خالة اني ادرس وممفكرة بالزواج
المرة: اسمعيني بالاول
جوري: ههه خالة اسمعج على عيني وراسي بسس
المرة: عوفي البسس اني عندي ولد واحد وبنتين وابني جان بالخارج يدرس وهسه رجع لوطنه ودايدرس تخصص مناسب لشغله وعمره كلش مناسب للزواج انتي شكد عمرج
جوري: عمري 20 سنة
المرة:  ابني عمره 25 سنة
جوري: العمر كله خاله
المرة: ابني موجود هسه برا تعاي حتى اشوفينه
جوري: لا خاله والله اني مااعرف شكلج (لزمتني من ايدي وكلش انحرجت منها طلعنا
يم الحديقة وباالباب وكفنا)
المرة: هذا وليدي
جوري: باوعت الولد منطي ظهره وبگلبي اكول هاي شون اقنعها لا يروح  تريدني لاحد قريب من عدي وينتهي كلشي بينه حجيت وياها
خالة اهلي مينطوني لغربة
واني احجي وياها باوعت للولد اندار باتجاهنا وشفته وهنا جانت صدمة عمريي  حسيت الدنيا وكفت بلحظتها
معقولة.....
يتبع...
. راح اتوقف على النشر اسبوعين لان عندي. امتحانات🤍.