مو گتلك تبين حوبة المظلوم
ويفتر الزمن ميظل على حاله
ومو حذرتك وگتلك المنك وبيك
ينطيك الظهر بس يترس سلاله
*******†******†*********†******
حسام ـ وشنو المقابل بالضبط احجي انتم ما تسوون شي بدون مقابل
رجاء ـ ترجع لعائلتك اللي ما نزلوا من لسانك طول ما انت مغمي صارلك اسبوع على نومه وحده ونور الله يخليهه الك ما نزلت من لسانك الله يحفظلك بنيتك
حسام ـ جريت حسره
اي بنيتي وهسه شنو تردينه اختصري بالمفيد
رجاء ـ اموت واخلص
حسام ـ ليش
رجاء ـ لان ماكو امل اعيش عائلتي گدام عيني انذبحت صغار وكبار حتى زوجي واطفالي وما بقالي احد من غير مرضي اللي جاي ياكل بيه شوي شوي من تروح ادعيلي بالرحمه يم امير المؤمنين احلفك بعزيز روحك
حسام ـ صفنت بوجهه تمسح عيونهه ورا النقاب گالت
رجاء ـ تحضر وصيت عليك هسه يجون ياخذونك بس اول شي تاخذ هاي الابره
حسام ـ ابرتيش
جاي احجي وياهه زرقتهه بزندي نمت بس احس دكات گلبي شبه وگفت ما حسيت الا بخرابه مديت راسي على بعد مسافه بعيده سيارة جيش
درت يمي منا منا ماكو شي شلون راح يعرفوني لحيتي شكبرهه وانه شنو حالي جني داعشي دورت اي شي ماكو
شفت قماش اسود يمي وبلوكه بيضه تذب جص من اثر تفليش البيت كتبت الامان يا ولد الكرار باكبر خط ورفعتهه ومشيت باتجاههم
توجه علي القناص تشاهدت على روحي انضربت برجلي گعدت على حيلي شوي واتقربوا يمي عنصرين فتشوني بس وين لا ايد ولا رجل اگدر احرك
وجهي متغير صاح واحد عرف اسمك بسرعه بلعت ريك گوه مفتح عيني گتله
ال....... حسام ...... من الوحده ال..... القاطع ال..... ونمت بعد ما حسيت
الا بمستشفى والاوكسجين على وجهي ورجلي ملفوفه وجسمي احسه مخيط باوعت شفت ابو مراد يمي نايم على كرسي ومن الجهه الثانيه عون
اريد احجي صوتي ما يطلع رفعت ايدي على كيف على الميز اليمي اكو بطل مي دفعته طاح اجو يركضون علي اشرتلهم ما اگدر احجي
ابو مراد ـ الحمد لله على سلامتك بويه گول
عون ـ الحمد لله على سلامتك حزام ظهري خويه وينك عني حسيم فتيت گلبي ولك گلت مات بعد ما اشوفه ليش هيج ولك شلون انطاك گلبك تعوفني شلون تعوف عبيد شلون والله گلت لحگ حسين
حسام ـ عون يحجي ويبجي وابو مراد يحجي وياي اسمع وما اگدر احجي راحوا شوي واجه الدكتور گال الحمد لله على سلامتك فحصني گلوله ما يحجي گال
الدكتور ـ اكيد خصوصا وهو صارله شهر بالعنايه وعنده تقرحات لازم يكمل العلاج حتى تروح التقرحات
