أجبروني فهِمتُ فيهِ عشقاً

بارت 10

تريد الصدگ تعبان كلش حالي
منين ما اندار تتراوالي
بكل لحظة هنا وهنا اشوفك گاعد گبالي

*******************************

حسين ـ يوم العيد عزمنه ابو مراد انه والولد عالغدا يمهم جنت اشرب جاي وعون ما بطل مشاكساته كل شوي وضرب ايدي واخزره ويضحكون هو وحسام

شوي وانگلب الجاي علي الحمد لله جان دافي ما حرگ رجلي وبنطلوني اسود ما يبين بيه استأذنت وطلعت للحمام الخارجي غسلت وانه اسب بيهم واغلط عليهم

الگو***** ما يرتاحون الا يحرجوني گدام ابو مراد جنهم زعاطيط مو زلم وواحدهم جنه دنگه

خلصت والتفتت اريد ارجع للاستقبال وتلاگت وياي ام لسان تخبل والرموش طابگات ويه الحاجب والحلگ مرسوم رسم ماعت روحي ههههه بسرعه اشحت نظري عنهه واستغفرت رب العالمين وحجيت

احم شلونج يابه كل عام وانتي بخير ادري ما تردين بس هذا عيد الله

ردت استفزهه حتى اعرف جوابهه رفعت عيني وبرفعه حاجبي شفتهه بلعت ريگهه رسمت ابتسامه خفيفه على وجهي

نور ـ من شفت حسين احوالي اتخربطت ما اعرف شنو صار خايفه على مرتبكه وبس ابلع ريگي من حجه ربكني اكثر رديت واني منصيه راسي

كل عام وانته بخير تسلم

ركضت بسرعه جوا بالبيت

گاعده اشتغل وبالي يمه كله شايفته لابس عسكري اليوم لابس مدني القميص الاخضر جاي ويه عيونه
ورافع شعره والله لو تشوفه ريم الا تتخبل عليه ههههه لو هديره ام الضباط

حسين ـ ردت علي لو احس نفسي انتصرت وهاي بداية معركتي وياهه لان من جنت اوصلهه بايام الامتحانات حتى صباح الخير ما ترد علي

من هاللحظه قررت اقرب منهه مروه حتى توصلي اخبارهه فتره واخطبهه اذا شفت اكو امل واذا ماكو لا ادوس على گلبي الهواها من سنين

نور ـ صار الغدا وجابو السمج من الفران وصواني اللحم (المفطح) كبار بابا حاجزهم من المطعم اني حضرت اللبن

نسوان عمامي وحده حضرت الجاي ووحده حضرت الخضره وامي ترتب الفواكه يعني هيج شغلات بسيطة وسويت صينية بقلاوه ورتبتهم بصحون التقديم واخذوهم الولد للاستقبال وهيج مرت ايام العيد كل يوم خطار شكل

خلص العيد وبابا رجع لدوامه يصعد اسبوع وينزل 3 ايام يگول عدهم مهمه بمكان خطر كل يوم من اصلي ادعيلهم تخلص مهمتهم بخير وسلامه وبابا يرجعلنه
ونشوفه وبعد هذا نزوله صعدوا اسبوعين گال لا تقلقون اذا ما ردينا على الاتصالات نكون مشغولين لو اكو اشتباكات

ام مراد ـ عماد (ابو مراد) فدوه من نتصل رد بسرعه ما اگدر ابقى هيج يضل بالي

نور ـ اي بابا فدوه وانتبه لنفسك ما النه غيرك بعد رب العالمين الله يحميكم وترجعون بالسلامه