مشتاگ يمه لدفعة ايدج للباب
الغربه يمه وفرگتج اذوني
يا يمه گمت اكل واغصن بالزاد
حنضل ييمه الزاد اللي بماعوني
*******†*******†********†********
نور ـ الصبح تريگنه بمضيف الامام اني ما اكلت احس معدتي تگلب شربت حليب دافي وطلعنه راجعين بالطريق للبيت
نمت بالسياره بحضن مروه لما وصلنه گعدتني ونزلنه گبل للغرفه سبحت ونمت حتى ما انتظرت حسين يجي او اذا يحتاج شي بس حضرت ملابسه على طرف السرير ونمت
حسين ـ اخذتهم وزورتهم وبكل مكان نزوره اشتري شي تذكار واكثر شي شغلات لنوره ومروه ما اريد وحده منهن تحس انه مفضلهه على الثانيه
رحنه للمقبره استغربت نور ما سألتني عرفت امي حاجيتلهه رجعنه للبيت ونزلت الاغراض اكلت فاكهه وصعدت شفتهه نايمه
اخذت الملابس وسبحت ورحت يمهه جريتهه علي حضنتهه ودفنت راسي بشعرهه ونمت للعصر گعدتنه امي تدگ الباب خايفه علينه لان طولنه بالنومه گعدت مطيت جسمي وگمت لبست تراك ونزلت جوه بالحديقه
نور ـ گعدت ما لگيت حسين لميت شعري ولبست تراك نيلي ومنقط ابيض لفيت شالي الصوف على اكتافي ونزلت سويت زعتر وصبيته واخذته الهم للحديقه گاعدين
اول ما شربت منه معدتي وجعتني ونفسي گلبت ركضت للمغسله صرت اتقيأ ونفسي احسهه تطلع
وحسين يدك على ظهري وخالتي تصيح على كيفك يمه عوفهه لا تدگ ظهرهه يتعب وين يله ارتاحيت وعيوني تجري
غسلت وجهي وارتجيت على الحايط سحبني حسين على صدره ويحجي علي لان ماخذه برد
حسين ـ شميت ريحة زعتر حبيب الشتا شوي وجابته نور وزعته بدينه نشرب وهيه ركضت لحگتهه لو اشوفهه روحهه تطلع
صرت ادك على ظهرهه وامي تصيح ما افتهمت شي بس ادري بيهه ماخذه برد دخلتهه جوه يم الصوبه الكهربائيه ولفيتهه ببطانيه وهيه تضحك رغم رايحه روحهه بس تضحك علي واخزر بيهه
نور ـ اهتمام حسين كلش حلو يدفي برجلي يم الصوبه ولفني ببطانيه حسيته مثل امي ضحكت واحس روحي رايحه تمددت بحضن خاله تلعب بشعري
ردت انام ما خلتني گالت راح يصير المغرب وگالت لحسين ياخذني اسوي تحليل بالمختبر رفعت راسي
ليش خاله تحليل شنو
ام حسين ـ ما عليج يله روحي بدلي والبسي شي دافي وروحي ويه رجلج
حسين ـ ليش يمه عادي اجيبلهه علاج واجي عليمن ماخذهه للمختبر هو ماخذه برد وتشرب سوائل دافيه وتصير زينه
ام حسين ـ انه شاكه ولو متأكده مو شاكه مريتك حبله ييمه
حسين ـ كلش ما اجه ببالي موضوع الحمل گمزت يم امي
بروح ابوج يمه يعني هسه نويره حامل
