ما جان للموعد فضل
حبيتك من الصدفه
شكرا لان دگ الگلب
وبأيدي صارت رجفه
********************************
نور ـ حسام فدوه درس حسوني الاسلاميه لما اخلص الملابس واجي اكمل باقي دروسه
حسام ـ دايخ وتعبان والله خلي عبودي يدرسه
نور ـ شبيك حسام بس يسمعلك
حسام ـ وينه تعال ابو كرش تعال وينك
حسين ـ ها بابا انته تسمعلي وين امي
حسام ـ اي امك عدهه شغل يله تعال شنو درسك
حسين ـ اية الكرسي
حسام ـ يله اقرا اسمعك گوه فاتح عيوني وحسيون يقرا شفته زين حافظهه يله عفيه بالسبع بعد اكو شي منا منا
حسين ـ لا بس اريد فلوسا
حسام ـ ههههه يا طلابة الفلوسا غير اخذت مصروفك اليوم وين وديته
حسين ـ هيه شني نريد نشتري والله جوعان
حسام ـ روح ذيج الثلاجه متروسه لو الا حلويات وتعال سنوني خربت تعال بطني مغص تعال هيج شي والزگ النعال بجهرتك وانعل ابو خيرك
حسين ـ ما اريد بعد شبعت
حسام ـ وشبعتهم الخايس تريد اكل شو امك ما مخليه كيك وتسوي وكعك وتسوي لو الا من برا تريد الوصخ المجرجف طلع يدردم لفيت راسي ونمت تعبان كلش
نور ـ اگول حسام شفته نايم ومشغل السبلت خرب يومك المستحر طفيت السبلت وغطيته نص جسمه وطلعت شفت الولد يدرسون ها حسيون سمعت الدرس لابوك
حسين ـ اي وما قبل ينطيني فلوس اشتري
نور ـ وليش تشتري هذا الكيك والكعك وين اخليه بالثلاجه لو اتبرع بي روح اخذ قطعه واكلهه لما اكمل تجهيز الغدا يله لو تنتظر لما يخلص الغدا
حسين ـ شنو غدانه
نور ـ باجه يا العظام مو مشتهيهه ورطتوني بيهه همزين ابوك جابهه نظيفه جان شمرتكم انتم وياهه بالشارع
عبد الله ـ هههههه لا بداعة عماد لا تشمرينه احنه ولدج وين نروح نديح
نور ـ ولك ليش ما شوفتني درجتك مال الفيزياء ها
عبد الله ـ ها وين ماكو ورقه ما مستلم شي
نور ـ عبيييد مو درجتك بيهه مو زينه شفتهه اليوم من رتبت الميز وينهه جيبهه بسرعه
عبد الله ـ ها لا شسالفه وينهه مشتبهه صدگيني
نور ـ كتفت ايدي ووگفت اشرتله براسي يله جيبهه وتعال مال تعبر سوالفك براسي گطنه وشيلهه من اذنك