قلت ليها أنا حلفت يا أمي العده دي ما بغسلها تلات مرات ، بناتك ديل مكسرات ولا محننات ؟
قالت لي أخواتك وينن هسي شايفاهن قاعدات ؟قلت ليها يقعدن كيف يا أمي و انتي مخلياهن يمشن و يجن على كيفهن ؟ لو كنتي بتتكلمي معاهن و بتقعديهن في علبهن ما كانوا هيكون برا البيت للزمن دا و ما كانت العده هتتردم كدا ! قالت لي البسمعك بقول لافت في شارع النيل و ما بجن إلا أنصاص الليالي !...ما ياهن في بيت ناس هويدا عشان الليله حنة بتها هند و هي عزمتنا و وقت أنا ما قدرت امشي احسن يمشن هن ، قلت ليها بناتك مخليات شغل البيت و جاريات يغسلن و ينضفن في بيوت الناس ....متأكده انو هن حالياً يا بغسلن يا بضيفن في ضيوف الناس .....قالت لي ما ياهو حال الأعراس !و انتي ماف زول منعك من المرقه براك قلت ما ماشه ....قلت ليها أنا عندي كرامه و عزة نفس ما بتخليني اقلل من نفسي و اتذل للناس ....قالت لي يا بت هوي عليك الله ما تقعدي تنقي لي في راسي ! قلتي ما ماشه الحفله و سكتنا خليناك و ماف زول جبرك على حاجه هسي الكواريك في شنو ؟....مش العده دي خليها أنا بغسلها أصلو الزول ما يرجى منك حاجه .....قلت ليها يا أمي أنا غسلتها مرتين خلال اليوم دا ولو.....قاطعتني و قالت لي ما تنقي كتير ، قلت ليك بغسلها أنا ✋
قالت كدا و مشت المطبخ عشان تغسلها و انا خالص ما لحقتها لأنها في كل مره بتعمل كدا عشان تجبرني اعمل الحاجه ، بس اتضايقت ضيق من أخواتي ، طوالي لفحت توبي ، لبستو و غطيت بيهو جزو من وشي زي ما بعمل دايماً ، بزهجتي ديك طلعت من البيت و ما قلت لأمي ماشه وين ، الساعه كانت 8 أو 9 كدا بليل ، ناس هند ديل ساكنين في الشارع القدامنا طوالي ، المهم قلت الليله بمشي انادي اخواتي و اكذب عليهم و اقول ليهم ابوي جا و بناديكم ، أصلاً ماف زول بقدر عليهن غير أبوي ، الشارع كان مليان إضاءة و مليان ناس كتيره شديد لأنو ناس هند ديل معروفين و ذاتهم ما ناس هينين ، المهم و انا ماشه كدا جيت ماره بأكتر شله وهميه و عاطله في حلتنا قليلين أدب و بحبو مشاغلة البنات زي حبهم لعطالتهم دي ، بكرههم موت شلة الرمتاله دي و الغايظني انهم ناس كبار يعني ما اعمار الطاشرات ! ديل في نهاية العشرينات و لسه بتصرفوا تصرفات المراهقين ، اول ما مريت جنبهم كدا بدوا يشاغلوا واحد منهم قال لي على وين يا جميل !....اول ما قال كدا جاني صوت ضحكة عاليه شديد لمن ركزت لقيتو دا الرمتالي الإسمو فارس داك ، كان قاعد معاهم بس ما كنت منتبه ليهو ، قال لصحبو ذوقك بيئه يا حسن ، أيوه نعم هي مغطيه جزو من وشها بس أطمنك دي زينا كدا ، أول ما قال كدا شلتو انفقعت بالضحك !....اتغظت غيظ ما عادي و أصلاً أنا من يومي بشمو و بكره اسمع اسمو ذاتو ، قلت ليهو فعلاً والله انا زيكم ! كلنا بنات في النهايه 😊
لمن قلت كدا قال لي بنات في عينك ....قلت ليهو ما ه اقول ليك و في عينك لأنو أصلاً عيونك مليانه بنات ، صحبو قال ليهو ما تكتر معاها خلينا نشوف البعدها....شوف شوف المزه الجايه علينا ديك.....كلهم إتلفتو على البت الكانت جايه علينا ، كانت لابسه لبس قصير و ضيق شديد...فارس إبتسم و قال لصحبو نحنا بنشاغل الزي ديل و عمرنا ما بنعاين للزباله الزيها.....طبعاً لمن قال كدا أنا دمي فار ، إنفعلت و قلت ليهو ماف زباله غيركم ...مالين الشوارع و عاملين لينا زحمه في البلد ...انتوا زيادة عدد ساي ، رمتاله باطلين و تافهين و ما منكم فايده ، انتوا البنات احسن منكم ، انتوا نوعية الذكور البترقدوا و اخواتهم أو أمهاتهم بصرفوا عليهم .... طبعاً لمن قلت كدا كلهم إتلفتوا علي ، فارس قام من مكانو و جاني بإندفاع ، رفع اصبعو و قال لي اتخارجي من هنا و ما تخليني اديك كف انسيك بيهو إسمك ، قلت ليهو لو راجل مد يدك دي عشان ترجع ليك مكسوره ... طبعاً جاط و غضب غضب ما عادي و حسيتو بالجد هيضربني كف إلا أصحابو مسكوهو مني و هو شغال ليهم فكوني ليها عشان أربيها ....قلت ليهو كدي ربي نفسك بالأول أنا هينه ، انفعل شديد و الغايظو إنو ما قادر يتفكى من اصحابو عشان يجيني ، واحد من شلتو الفاسده دي قال لي يا بت الناس خلاص اتخارجي من هنا فارس دا لو فيكناهو فيك اهلك ذاتم ما هيقدروا يعاينوا ليك مرتين ....ربعت يديني و قلت ليهم أساساً الوقفه معاكم ما عاجباني ، حالياً حاسه بالقرف ، المهم من اليوم و لقدام تاني ماف اي واحد منكم يرفع عينو علي أو يتكلم معاي ، احسن تحترموا نفسكم ، و لو الحصل دا اتكرر تاني صدقوني مستعده اشتكيكم و اتهمكم بتهم من الله خلقكم ما سمعتوا بيها، فارس قال ليهم تستاهلوا عشان تاني تعاينوا للزباله دي مع انها بتكون ذاتا ما مصدقه إنو لقت ليها زول اشتغل بيها و شاغلها ، قلت ليهو انت غبي ! مشاغلاتكم و تفاهتكم دي أنا بستفيد منها شنو ؟ و بعدين.....قبل ما أتم كلامي عم الماحي جا و قال خير يا شباب في شنو ؟
