أبوي قال ليها انتي ما تدخلي ، وقف على حيلو و قال لي ألحقيني و طبعاً أمي دي تعاين لي ساي و خشمها ما فكتو معاي و دا الخلاني استغرب أكتر
لمن دخلنا الأوضه ، قعد و قال لي سامعه الكلام القالوا الناس عنك ولا لا ؟؟
قلت ليهو كلام شنو ؟ ما سمعت أي كلام أنا !! اتنهد و قال لي الناس جابوا سيرتك بالعاطل انتي و لد ميرغني دا ، أنا ما عايزا استعجل رغم إنو الكلام مساني ، قبل ما اقول أي شي و قبل ما أعمل حاجه عايز أسمع منك....
طبعاً أنا انصدمته صدمه كبيره ...موقفي كان بايخ قدام أبوي ! ما بقدر أنكر إني إتلاقيت مع فارس حتى لو ما أنا الخططت ل اللقاء دا !!....قلت ليهو بتردد ، قالوا شنو ؟؟
عاين لي بطرف عينو و سكت بس فجأه جاني صوت عمتي نوره و هي بتقول لي : قالوا إنك وحده ما مربيه و انك كنتي عامله فيها الشريفه العفيفه و في الحقيقه انك كنت بتقابلي فارس ولد ميرغني بالدس و صلاة التراويح دي إنتي عاملاها سبله بس عشان تطلعي و تشوفيهو !!.... طبعاً أخدت دقيقه كامله بستوعب في كلامها ! أنا ينقال عني كدا ؟؟!!
وقفت على حيلي و قلت ليهم يعني انتوا مصدقين الكلام دا ؟ أبوي قال لي ما عشان كدا جبتك تحكي لي الحقيقه شنو ؟ قلت ليهو الحقيقه إنو ماف أي حاجه صح من الكلام الإنقال دا و ناس الحي ديل من زمان عايزين ليهم فرصه فيني لدرجة انو لو شافوا زول جا سلم ساي و مشى بقعدوا يألفوا و يتكلموا فارغ ، إتلفت على عمتي نوره و قلت ليها هسسسي دي توريني القال الكلام دا منو ؟؟
قالت لي بري سمعت النسوان في السوق بتكلمن عنك ساي ، قلت ليها ديل منو ؟؟
سكتت ساي ،أبوي هرشها و قال ليها اتكلمي ديل منو ؟؟
قالت ليهو ديل ناس هويدا....من مكاني داك لفحت لي توب و بقيت ماره و عمتي و أمي و أبوي ماشين وراي ، سبقتهم و بإستعجال مشيت بيت ناس خالتو هويدا ، دقيت الباب قدرتي و أنا ما شايفه قدامي من شدة الغضب ، بعد مسافه جات هناء بتها و فتحت لي الباب ، من دون سلام قلت ليها أمك قاعده ؟؟ قالت ليها بإستغراب ايوه قاعده ....توش دخلت جوه و سمعت صوتها جاي من البرنده كانت بتقول الجا منو يا هناء ، دخلت و قلت ليها دي أنا و ربعت ليها يديني ...قالت لي أهلين اتفضلي ، قلت ليها تكتلي الكتيل و تمشي في جنازتو ! قالت لي بسم الله مالك ؟؟
في اللحظه ديك أمي و عمتي نوره جوا لاحقني بس أبوي ما دخل ، كلم هناء و قال ليها لو معاكم راجل في البيت خليهو يطلع لي ، قالت ليهو في محمد أخوي و طوالي مشت نادتو لأبوي و جاتنا لقتني جايطه مع أمها و هي تشيل و تنكر ، عمتي نوره قالت ليها كمان بتنكري قداااامي ؟؟ أنا سمعتك بإضنيني ديل و أنا كنتي بتتكلمي و ما سكتي حتى لمن شفتيني ، هسي بتنكري مالك ؟؟
قالت ليهم أنا قلت السمعتو و القالوا لي ، قلت ليها مالك ببغاء انتي لمن تكرري كلام الناس من غير فهم !؟ أمي قالت ليها عملتك شينه يا هويدا ، حركه زي دي بترضيها لوحده من بناتك ؟؟
هناء قالت لينا أمي ما جابت كلام من راسي و فعلاً دا البقولوا الناس عنك يا مها ، قلت ليها ياخي لنفترض انو كلامك صح ميه في الميه ! انتوا مالكم و مالي !! قاعده أسألكم أنا لمن اشوفكم بتتكلموا مع رجال ؟؟؟
عمتي نوره قالت ليها شفتي نحنا ممكن نسكت على أي حاجه إلا سمعتنا و هسي دي تقولي لي الكلام دا جبتيهو من منو ، قالت لينا دي علويه القالت كدا ، عمتي قالت ليها سمح هسي دي بنمشي ل علويه و انتي ذاتك تمشي معانا عشان تاني تلمن لواسنكن دي عليكن ، طبعاً أبت تمشي معانا ، عمتي بالقوه جرتها من يدها و بتها بتحاول تفك يدي عمتي منها ، لمن وصلنا ل باب الشارع هناء نادت أخوها محمد من برا و قالت ليهو ألحقنا يا محمد ، جا داخل و أبوي وراهو ، عمتي نوره قالت ليها مش كان ناديتي محمد أخوك لو جبتي الشرطه ذاتو ما بفكها الليله إلا تمشي معانا ، أبوي قال ليها ماشين وين ؟؟ قالت ليهو بالكلام القالتو هويدا ، محمد ولدها قال لينا معليش يا جماعه بالنيابه عن أمي و حركه زي دي ما حتتكرر تاني ، عمتي قالت ليهو لا لا الموضوع دا ما بنتهي هنا إلا نقطع لسان أي وحده مست سمعتنا ، أبوي قال ليها بنبره حاده فكيها يا نوره ! عمتي قالت ليهو لكن. ...قاطعها و قال ليها قلت ليك فكيها ، فعلاً عمتي فكتها و قالت ليها كدي تاني اسمعك قلتي حاجه ، أنا من مكاني داك قلت لأبوي هسي برجع و من دون ما انتظر ردو طلعت من بيت هويدا ، طبعاً بيت علويه كان فاتح عليهم ف طوالي ضربت الباب بقوه ف جاتني طالعه هي و قالت لي براحه بتكسري الباب ، قلت ليها أدعي إنو الكسر يكون للباب بس ، قالت لي مالك في شنو ؟؟
عمتي نوره جات ناطه و قالت ليها تعالي هنا يا بتاعة الفتن و القوالات ، قالت ليها احترمي نفسك يا نوره ، عمتي قالت ليها هسي بكوريك الإحترام على أصولوا ، أبوي و أمي و الباقين جوا مارقين و نحنا بقينا جايطين في علويه ،ما أديناها نفس لو أنا سكته عمتي بتتكلم و العكس ، على حس صوتنا العالي ناس الحي كلهم جوا مارقين و إتلموا فينا من ضمنهم خليل ، جا سلم على الرجال و قال خير يا جماعه في شنو ، أبوي قال أنا من قبيل ساكت لأنو ديل نسوان و أنا ما بشاكل لي مره و بقيف ليها جنب الباب بس هسي بما إنو في رجال موجودين فكلامي حيكون معاهم .....أبوي وراهم الحاصل و قال ليهم أنا ما بقبل بأي كلام زي دا ، هسي العملوهو نسوانكم دا صح ؟؟
قالوا ليهو لا والله و ما تشتغل بيهم دا كلام نسوان ساي و أصلا هم كدا بحبوا الشمارات و القوالات ....كنت عايزا أتكلم بس أبوي رفع لي يدو بمعنى أسكت ، قال ليهم ما مشكله يتكلموا في أي حاجه إلا سمعت بتي ، نطت بت خالتو عواطف و قالت لكن الكلام دا ما جا من فراغ و بتك فعلاً كانت واقفه مع فارس ، كل يوم بتلاقوا بعد صلاة التراويح و أنا شفتهم والله ، و ما براي بنات خالتو علويه برضو شافنها ، و هسي بناديهم ليك عشان تسألهم ، قلت ليها لا تناديهم لا حاجه ، ايوه كنت واقفه مع فارس ، عايزين تقولوا شنو يعني ؟؟
ما تشوفوني ساكته كدا ، انتي البتتكلمي دي أنا هسي لو قلت عمايلك صدقيني حتبيتي برا البيت و القلتيهم ديل كلهم لا مخليات بتاع دكان لا صالون لا بتاع ركشه ، عشان أنا ما حصل جبت سيرتكم و قطعت فيكم قلتوا اني ما شايفه و ما عارفه حاجه عنكم و على الأساس دا هاجمتوتني كلكم صح؟؟ ، زي ما كنتوا جريئات و شجاعات لمن طلعتوا الإشاعه دي عني خليكم شجاعات و تعالوا اقيفوا قدامي و قولوا لي متين شفتينا واقفين مع أولاد !....المشكله ما في وقفتكم مع ولد لأنو طريقة تفكيري ما قذره زيكم عشان اول ما اشوف بت واقفه مع ولد أطلع فيهم إشاعه و غير كدا أنا أصلا ما عندي بيهم شغله ، انتوا عمايلكم أكبر من كونها وقفه مع ولد و بس ، المهم منو الشجااااعه الجريئه الحتجي تدافع عن نفسها و تقول اني كذابه و تبرئ نفسها .....يلا منتظراكم أنا يا بنات يا شريفات !!
طبعاً ماف وحده جاتني أو فتحت خشمها ، عمتي قالت ليهن عشان تعرفن نفسكن وسخات و خسيسات كيف ، خليل قال ليهم والله يا جماعه الكلام دا عيب و مها دي لا بنعرفها لا من اليوم لا من أمبارح و كلنا عارفين هي شنو و بنشهد ليها بالحاجه دي ، إتلفت على أبوي و قال ليهو أنا بعتذر ليك بالنيابه عنهم كلهم ، أبوي قال ليهو حصل خير ، كل الرجال الكانوا موجودين أكدوا لأبوي إنو تصرف زي دا ما ح يتعاد تاني ، أبوي قال ليهم حصل خير و قال لينا أمشوا البيت بعد دا ، الناس كلها اتفرقت و كل زول رجع بيتو ، طبعاً عمتو إجلال و بتها سلوان كانوا من ضمن الناس الكانت واقفه تتفرج ، عمتو إجلال دي مع انها عيانه و مرات ذاتو بتقول من شدة المرض الصلاة بتغلبها و هسي عاينوا الشمار جابها لحدي وين....
المهم و أنا ماشين على البيت كنا لسه بنتكلم في الموضوع ، عمتو إجلال قالت لي و انتي الموقفك مع ولد الناس شنو ؟ سفهتها لكن عمتي نوره قالت ليها و يعني ؟؟ عارفاها وقفت معاهو لشنو ؟؟و هل دا بديهم الحق عشان يتكلموا فيها ؟؟ عمتو إجلال سكتت ساي......عمتي نوره قالت لي الكلبات لمن واجهناهن ما قدرن يفتحن خشمهن عشان تاني ما يظنوا في الناس ، قلت ليها انتي ذاتك في البدايه صدقتيهم و ظنيتي فيني ، قالت لي بري أنا ما دنيا لكن كنت زعلانه والله من الكلام القالوا ....في النهايه سمعة أخوي بتهمني والله ، أمي قالت غيتو ناس الدنيا ديل حيرونا والله ! علويه و عواطف ديل والله ما إتوقعت منهم حاجه زي دي ، عمتي نوره قالت ليها انتي مسكينه عشان كدا ما بتقدر تتوقعي شينه من زول ، المهم رجعنا البيت و صلينا الضهر بعدها نمنا ، لمن صحيت لقيت ملاذ و مروه معاي في الأوضه و ملاذ كانت بتحكي ل مروه عن الحصل ، مروه قالت لي معقوله دا كلو حصل ! عشان كدا ناس هناء و ندى قبيل الصباح لمن كنت طالعه كانوا بعاينوا لي و بتهامسوا !!
ملاذ قالت ليها لكن أبوي و مها و عمتي ندموهم على الساعه الفتحوا فيها خشومهم و قالوا القالوهو !!...مروه من دون ما تفكر قالت لي : لكن هم شافوكم متين ؟؟ ما كان في زول يوم.....طوالي سكتت لمن أشرت ليها بعيوني على ملاذ ، ملاذ قالت ليها يوم شنو ؟؟ يعني انتي كنتي معاهم ؟ لأنو مها قالت قدامهم كلهم انها كانت واقفه مع فارس ! بس ليه ؟؟
قلت ليها كنا بنتشاكل ، ضحكت و قالت لي ك عادتكم يعني لو ما اتشاكلتوا ما بترتاحوا ، المهم شويه كدا أمي نادت ملاذ اول ما هي مشت مروه قالت لي ليه ما عايزاها تعرف ؟ قلت ليها تعرف شنو ؟؟
قالت لي أصلو ما معقوله معاك ياخ !! المهم بعدها بمسافه جهزنا الصواني ، أبوي جا شال حقتو و خلى حسين و حامد يطلعوا معاهو الشارع ، لمن جا موعد صلاة التراويح اتوضينا و طلعنا ، طبعاً ماشه و بعاين ل بنات الحي بكل عين قويه ، قلت ليهم تاني تبقى وحده مره بت رجال تجيب سيرتي عشان أوريها نجوم الضهر ، المهم بعد صلاة التراويح ، مروه قالت لي فارس منتظرك جنب الزقاق داك ، قلت ليها أرح قدامي البيت بلا فارس بلا زفت و أنا ذاتي بطني طمت منو و من حركاتو و تمثيلو دا ، أنا ياداب فهمت الحاصل و عرفت انو العاطل داك عمل كدا قاصد عشان يشوه سمعتي و هسي عايز يعيد نفس الحركه عشان الناس تتكلم أكتر بس ما أنا البستغبيني و.....سكته لمن مروه بقت تعمل لي حركات بعيونها ، أول ما إتلفت وراي شفت فارس ،، ملامحو كانت متغيره على الآخر و الضيق و الزهج باينات عليهو ، مروه كانت عايزا تمشي بس فارس ما سمح ليها ، قال ليها خليك واقفه معانا ، قال لي انتي مشكلتك شنو قولي لي ؟؟ اعترفت ليك و قلت ليك مستعد اصل بيتكم و ما عندي مانع أجي في أي لحظه بس منتظر موافقتك و مع ذلك إنتي لسه بتشككي فيني ؟؟ أكتل ليك نفسي أنا يا بت الناس عشان تصدقيني ؟؟
طبعاً بتكلم معاي بنبره حاده و حسيتو شويه كدا حيرفع صوتو و يصرخ فيني ، قال لي الحصل ما زعجني أكتر منك عشان كدا كنت حابب أقابلك هسي و أسمع قرارك لأني ما قادر انتظرك اسبوع خاصة بعد الكلام الطلع عننا و......قبل ما يتم كلامو سمعنا مروه قالت بتردد اب...أبوي يا مها !...... فعلاً لمن إتلفتنا لقينا أبوي في وشنا و أنا اتمنيت الأرض تتشق و تبلعني !....بقى ماشي علينا لحد ما وصلنا و هو لسه ما شال عيونو عني ، فارس قال ليهو قبل ما تفهمنا غلط خليني أشرح ليك ، مروه قالت ليهو أيوه يا أبوي أسمعو عايز يقول شنو ، أبوي قال ليهو بنبره حاده : لو عندك كلام عايز تقولو كنت جيت لي في البيت ، فارس قال ليهو و دا الكنت ناوي اعملو بس والله كنت منتظر موافقتها هي و بس و......أبوي قاطعوا و قال لينا بنبره حاده امشوا البيت سرعه ...
طبعاً ما قدرت اجادلو ، مروه كانت خايفه خوف ما عادي و طول الطريق شغاله لي الليله أبوي ح يضبحنا ، كدا الموقف اتكرر مرتين يا مها و المره دي أبوي ما حيصدق انك برضو و للمره التانيه وقفتي معاهو ساي ، الليله ووووبعلينا بس ، طبعاً أنا كنت ساكته ساي بس راسي كان بودي و بجيب ، لمن وصلنا البيت مروه الغبيه ما قدرت تخفي خوفها و توتره و أول ما أمي سألتها حكت ليها و قالت ليها إنو فارس طلب يدي و أنا ما أديتو رد و لمن جا عشان يحسم الموضوع و ياخد مني القرار النهائي أبوي شافنا و قال لينا أمشوا البيت و هسي خليناهو واقف معاهو .....أمي دي بس بقت فاتحه خشمها مره تعاين لي و مره تعاين ل مروه ، قالت لي و انتي مابياهو مالك و وكت أبيتيهو ليه ما رفضتيهو طوالي ؟؟ مروه قالت ليها بإستعجال لا لا رفض شنو يا أمي ، فارس بقى زول كويس و الحلو أنها جاها دغري عديل و ما كان عندو مانع يجي البيت بس هي الكانت مانعاهو ، أمي قالت لي هسي في داعي ل دا ؟؟ براك بتجيبي الكلام لروحك ....
المهم بقينا متوترين و قاعدين على أعصابنا و كل ما نسمع صوت الباب بنقول خلاص دا أبوي بس بنكتشف انو زول تاني ، المهم بعد حكاية ساعه كدا أبوي جا داخل ، كعادتنا كنا مطلعين التلفزيون و السراير و مفرشين الفرشه ، جا داخل قعد و بقى يتكلم مع عمتو إجلال و سلوى عادي و بسألها عن صحتها و عن موعد مقابلتها الجايه ، طبعاً نحنا بنعاين ليهو بشباك المطبخ ساي لحد ما فجأه سمعتو بقول : مها يا مها....إتوترت و قلبي طار و مروه كأنو ناداها هي إتكبكبت و بقت تقول الليله ووووبعلي الليله الضبح ، أمي قالت لي اتوكلي و أمشي ليهو ، فعلاً صلحت توبي و طلعت ليهو برا و قلت ليهو أيوه يا أبوي ! قال لي لو في عصير منقه جيبي لينا ...في البدايه إفتكرت نفسي سمعت غلط ، ف بقيت مبحلقه فيهو بس ،، قال لي بتعرفي عصير المنقه ؟؟ قلت ليهو أكيد ، قال لي خلاص امشي جيبيهو لينا ...مشيت و أنا مستغربه من هدوء أبوي دا ، لمن دخلت المطبخ مروه قالت لي شكلو دافنها لينا ل بعدين ، منتظر ناس خالتو إجلال ديل ينوموا عشان الجو يفضى ليهو 😭😭
قلت ليها جنك دراما ...أمي كبت العصير و أدتني ليهو عشان أوديهو لأبوي ، فعلاً مشيت وديتو ليهم و كنت ح أمشي قال لي اقعدي اتونسي معانا و أنا طبعاً أعصابي تالفه ، قعدت بتردد و أنا بتلفت ساي على المطبخ و عيني على مروه الشغاله تعملي لي من بعيد في حركه بمعنى :"الليله كتمت " أبوي كانت بتكلم مع عمتو إجلال عن العرس و كدا ، حسيتو قاصد يوترني ، قالت ليهو هي البت عايزا شنو غير الستره ! هسي أنا سلوى بتي دي اول زول اتقدم ليها وافقنا عليهو و بعدين ما نرجع البلد ان شاء الله ح نعرس ليها ، أبوي قال ليها لكن الزول دا هي عايزاهو ؟؟
قالت ليهو اجي !!؟ كمان من متين عندنا عايزاهو و ما عايزاهو !! نحنا لمن عرسوا لينا قال ليك شاورونا؟؟! قال ليها يعني العملوا فيكم عايزين تعملوا في بناتكم ؟؟! قالت ليهو انت بترضى ب راجل جاي من طرف بتك ما معروف لقطتو من وين ؟؟
قال ليها بتي دي رقاصه ولا بت ما تمام عشان تلقطو ؟؟ قالت ليهو معنى كلامك لو وحده من بناتك جابت ليك واحد إنت طوالي حترضى بيهو !!؟
قال ليها ما طوالي ، هي من حقها تختار شريك حياتها و أنا من حقي ابحث عنو و اتأكد منو تمام حتى اديها ليهو بس ما بجيب ليها زول و بغصبها عليهو ، قالت ليهو هووووي دا كلام شنو ولا عشان انتوا ناس البندر ؟؟!
قال ليها والله الكلام دا ما ليهو علاقه لا بمدينه لا بقريه يعني حتى لو كنت ساكنه في قريه و مربي بناتي هناك تفكيري حيكون هو هو و ما حيتغير ، قالت ليهو خلاص انتوا أمشوا بفكركم و أنا بنمشي على عاداتنا و تقاليدنا
المهم بعدها انتهى حوارهم ، بس حسيت انو أبوي قال كدا عشان يطمني و يوصل لي فهمو ، براحه شلت الكبابي و مشيت بيهم المطبخ ، أمي اللحظه ديك كانت انتهت من العشا ، مروه قالت لي وااااي سمعتي أبوي قال شنو ؟؟ قلت ليها لا ما سمعتو لأني كنت في المطبخ و انتي كنت قاعده معاهم برا ، ضحكت و قالت أبدا ما اتخيلتو يقول كدا !! أمي قالت لينا أصلاً أبوكم فاهم و واعي و الكويس فيهو انو ما بتسرع و ما بحكم على الحاجه طوالي عشان كدا أنا من قبيل ما كنت شايله هم لمن قلتوا لي إنو هو شافكم واقفين مع فارس ...
المهم لحد اليوم التالت أبوي ما جاب لي سيرة الموضوع داك ، في اليوم الرابع المفروض يمشي فيهو ل بيتو التاني ناداني و قال لي طول ما انك ما عملتي حاجه غلط ما تدسي من زول و خليك صريحه ، و ولد الناس دا لو ما عايزاهو ماف زول حيجبرك عليهو و لو عايزاهو أنا ما عندي مانع بس تكوني مقتنعه بيهو لأني انتي صاحبة القرار و انتي الحتكملي معاهو عشان كدا فكري كويس و أدرسيهو كويس ، أنا سألت عنو و عرفت هو كان شنو و بقى شنو ، ما بهمني ماضيهو على قدر ما بهمني حاضرو مستقبلو ، في اليوم داك هو ما إتردد و صارحني و قال الحقيقه عشان ما يحصل سوء تفاهم ، عشان كدا اقعدي مع نفسك و فكري كويس ...ح أديك مده أقصاها 3 أيام عشان ندي ولد الناس كلمتنا ...
المهم قلت كلام أبوي لناس أمي بعد ما هو مشى ، أمي قالت لي أنا عارفه لأنو كلمني .....المهم أموري جاطت زياده و أنا لسه ما عارفه نفسي عايزا شنو و ما قادره أثبت على قرار ....مره اليوم الأول و التاني و أنا لسه محتاره و مروه و شجن ضاغطين علي شديد و أنا والله لحد اليوم التالت ما عارفه نفسي ح أختار شنو و دي اول مره تحصل لأني ما حصل اتردد في حاجه ، أبوي اتصل على أمي و قال ليها إنو ح يجي بعد الإفطار عشان يسمع ردي ....بعد الإفطار مشيت مع مروه التروايح و اليوم داك نهاي ما لمحت فارس ...لمن كنا راجعين من المسجد مروه كانت بتنق في راسي و شغاله لي حلفتك وافقي و عليك الله ما تضيعي فارس من يديك هو والله بستاهلك و غير من نفسو كتير عشان يكون مناسب ليك ، عليك الله أدي نفسك فرصه و ما تظلميها و قلت ليك الكلام دا لأني عارفه كويس انك من جواك عايزا فارس بس بتكابري ....المهم لحد ما وصلنا البيت هي لسه بتنق في راسي و انا حسيت انو راسي حينفجر من كترة التفكير ، لمن دخلنا لقينا أبوي قاعد سلمنا عليهو و أنا طوالي دخلت أوضتنا .....جا لاحقني و قال لي ال3 أيام انتهوا ، ها رأيك شنو ؟؟
مروه و أمي جوا داخلين في اللحظه دي و مروه قالت ليهو هي موافقه يا أبوي و أنا عارفه كدا ، أبوي قال ليها لا عايز أسمع منها عشان لو موافقه نديهو خبر عشان يجيب أهلو و يجي أو العكس ...
والله يخوانا دقيقه كامله و أنا ما قدرت انطق بحرف واحد و مروه شغاله لأبوي مش قلت ليك هي موافقه بس خجلانه تقول ليك ؟!!
أبوي قال لي ماف شي بخجل ، اتكلمي ! ان شاء الله تهزي لي راسك بس ....سكته ما إتكلمت ....أمي قالت لي يا بتي لو ما موافقه قولي لينا عادي عشان ننهي الموضوع دا ... طبعاً هي أول ما قالت كدا قلبي عمل شحححح..... بعدها عم هدوء و كل الأنظار كانت متجهه علي و منتظرني افتح خشمي و اقول قراري ..... أخيراً حركت لساني و قلت ليهو موافقه يا أبوي
قال لي متأكده ؟؟
قلت ليهو أيوه متأكده .....طوالي أمي و مروه بقوا يزغردوا و على حس صوتهم سلوى و عمتو إجلال و ملاذ و مآب جوا داخلين ، عمتو إجلال قالت لينا فرحونا معاكم ! مروه قالت ليها مها اتقدم ليها واحد و وافقت ، قالت لي مبروووك والله و طوالي قالت ل أبوي عشان كدا يوم داك قلت انو لو وحده من بناتك جابت ليك راجل حتقبل بيهو ، قال ليها بالظبط كدا 😊
ملاذ قالت لينا عايزا أزغرد بس ما بعرف 😭😭 ف بقت هي و مآب يزغردوا زي المصريين ، مآب قالت لينا دقيقه دقيقه الإتقدم ليك منو ؟؟
مروه قالت ليها فارس ، مآب قالت ليها شنو شنو ؟! فارس ؟! مروه قالت ليها صدمه صح ؟ قالت ليها أكيد ! ما بصدق والله لأنهم كانوا بكرهوا بعض و دائماً بتشاكلوا ، عمتو إجلال قالت لي دا الكنتي واقفه معاهو ولا شنو ؟ قلت ليها ايوه ياهو ذاتو 😊 عاينت لي بطرف عينها و سكتت المهم باقي الليل داك أبوي بقى يتكلم معانا كلنا و يدينا نصايح و و و لحد لحظة العشا ، المهم في اليوم البعدو أبوي اتصل على فارس و كلمو بموافقتي و إتفقوا على يوم يجينا فيهو فارس و أهلو و اليوم دا كان بعد 3 أيام ف مروه طوالي إستلمتني ليك شي ماسكات و شي شنو ما بعرف و أنا لو علي فازلين ما اعملو ، والله لحد لحظة اليوم الجونا فيهو أنا ما كنت فاهمه شي ....قعدت مع أهلو و أنا سرحانه و أول ما إنتبهت لقيت فارس بضحك و بعاين لي ، رفعت ليهو حاجبي نظام مالك ؟؟
أشر لي على نفسي و قال لي بصوت واطي إنتي المالك ؟ هزيت ليهو راسي بمعني ماف شي و في الأثناء دي مروه كانت مركزه معانا و بتضحك ساي ، طبعاً ما أنسى انو في اليوم دا أخواني من أبوي جوا و داليا و دانيه ما قصروا اشتغلوا مع أمي و ضيفوا الضيوف .... طبعاً فارس أبوهو متوفي من زمان و أمو ناهد نحنا بنعرفها بس أعمامو و خالتو هم الما كنا بنعرفهم ، المهم اتفقوا و حددوا موعد الخطوبه و حددوا موعد العرس ، المهم هم جونا بعد التراويح و قعدوا معانا لغاية الساعه 10 و بعدها مشوا ، طبعاً مروه و داليا و دانيه بقوا يشغلوها لي ، دانيه قالت لي تعرسي و أخواتك بإيرات ؟😂 ضحكت بس ، داليا قالت فعلاً بقولوا البكون سنقل فتره طويله في النهايه بجيب حاجه نضيفه ، اوووبعلي أنا من فارس دا 😭😭 مروه قالت ليهم الكلبه الجاحده للنعمه ما كانت عايزا توافق عليهو ...دانيه و داليا بصوت واحد قالوا ليها شنوووو ؟؟قالت ليهم والله جد و بقت تحكي ليهم......المهم هم باتوا معانا و مشوا في اليوم البعدو و مروه طوالي مشت السوق و خمت لي لوشنات و مرطبات و شنو ما بعرف و أنا أصلاً الحاجات دي كلها ما هاماني والله ....قلت ل مروه صحي اتذكرت اها عثمان ما قال ليك راجع متين ؟؟
طبعاً عثمان دا ولد عمتي نوره ، هو برا السودان و دا المخاطبين ليهو مروه بس لسه ما جا عشان يعمل حاجه رسميه ، قالت لي ما عارفاهو....قلت ليها كيف ما عارفاهو ؟؟ قالت لي كدا و بس و طوالي غيرت السيره ، قلت ليها متشاكله معاهو ولا شنو ؟...هزت لي راسها بمعنى اي ، قلت ليها ما مشكله بكرا بترجعي تتكلمي معاهو عارفاك أنا ، قالت لي مستحيل و خلينا نقفل الموضوع دا لأني ما حابه اتكلم فيهو ، المهم خليتها على راحتها و غيرنا السيره و بقينا نجهز ل الخطوبه و أول ما بدت التجهيزات و التشغيلات من مروه و ناس دانيه و داليا ياداب حسيت بحلاوة الحاجه دي ،، ياداب حسيت بالسعاده بعد ما كنت محتاره و ما عارفه نفسي عايزا شنو ، في الأيام القبل موعد الخطوبه ، مودي اتغير و بقيت أكون مبتسمه طول اليوم ، طبعاً فارس اظنو شال رقمي يا من مروه ، ف بقى يرسل لي على طول و أول ما أصحى بلقى رساله منو فيها كلام حلو ، ايوه كنت بنبسط بس ما كنت برد عليهو و هو مع ذلك ما وقف بالعكس قال لي أنا متقبلك زي ما إنتي و ما عايز منك أي رد كفايه جداً إنك بتقري رسايلي و بتنبسطي فيها و أساساً الهدف منها أخليك مبسوطه اليوم كلو ، قبل يوم من الخطوبه على غير عادتي رسلت ليهو و قلت ليهو انا خايفه و متوتره يا فارس ! رد علي في نفس اللحظه و قال لي تخافي من شنو و أنا معاك ؟ انتي ما عايزاني ولا شنو يا مها ؟! قلت ليهو لا ما كدا بس متوتره و خلاص ، قال لي عادي ما تتوتري و إتذكري إنو دي اللحظه البحلموا بيها أي إتنين ، أخيراً حيكون في شي رسمي بيناتنا و كل الناس حتعرف بيهو ، أنا لو علي الخطوبه دي نقلبها عقد و خلاص لأنها جر هوا ساي ، قلت ليهو لا لا فتره الخطوبه مهمه ، قال لي الله يصبرني بس ، قلت ليهو يلا تصبح على خير ، قال لي و إنتي من أهلي 💜...
قريت الرساله بس و قعدت أتبسم ، حضنتا التلفون و نمت مبسوطه و أصلا من اليوم الدخل فيهو فارس على حياتي اتغيرت و بقيت أحس بطعم السعاده 💜
يتبع....
