خليت دا كلو و ركزت في أهم سؤال ! قلت ليهو دا منو يا أبوي؟؟؟
قال لي خليل ...
طبعاً إنصدمت ! سكته مسافه و بعدها قلت ليهو خليل منو ؟؟ قال لي خليل سمير الواحد دا ! ، أمي قالت ليهو والله خليل ما فيهو ولا كلمه ، وافقي ساي يا بتي ! قلت ليها لا ما عايزا ، أبوي قال لي ما على كيفك المره دي ، أمي قالت لي عيبيهو لي ؟؟ قلت ليها كفايه اني ما عايزاهو و انتهينا ، أبوي قال لأمي عقلي بتك دي ، بعد يومين أديني موافقتك ....قربت أبكي والله ! اول مره أبوي يفرض علي حاجه !! قمت منهم و أنا عيوني مليانه دموع ، دخلت الأوضه و قفلتها علي و طوالي شلت تلفوني و أنا واصله الحد من الغضب اتصلت على خليل و لمن فتح الخط و قبل ما اقول حاجه قال لي دا الصح يا مها ، انا غيرك ما شايف و متأكد إنو سعادتك و مصلحتك حتكون معاي.....قلت ليهو جايب الثقه دي من وين انت ؟؟؟ عارف إني انصدمت فيك بالجد !! بعد إحترامي ليك دا كلو و بعد ما كنت متخيلاك انسان متفهم و واعي و خلوق و ما زي باقي الناس !!، قال لي بعد دا كلو انتي رفضتيني !...يعني أخلاقي و إحترامي و تفهمي إذا ما شفعوا لي قدامك فايدتهم شنو ؟؟
قلت ليهو كلامي و أسمعو كويس : أنا ما موافقه عليك يا خليل و انتهينا ....قال لي كلو بسبب فارس صاح ؟؟
قلت ليهو ياخ انت مالك الزمن كلو مكرهني ب فارس ؟! أنا حالياً بتكلم عنك انت دا ! و رفضي ليك ما ليهو علاقه بأي زول ، قال لي تمام أديني سبب منطقي لرفضك !
قلت ليهو ما كان عندي سبب منطقي بس هسي بعد عملتك دي بقى عندي سبب منطقي و هو عدم إحترامك ل رغبتي 😊
قال لي قولي عايزا ليك سبب بس ، قلت ليهو ما محتاجه لي سبب لأني من البدايه كنت واضحه معاك و رفضتك و ما حصل عشمتك ياريت تفهم الحاجه دي ...
قال لي ما قصدي افرض عليك حاجه بس انا واثق اننا الإتنين حنقدر نفهم و نسعد بعض ، نحنا أكتر إتنين مناسبين لبعض ، قلت ليهو ما عايزا كلام كتير يا خليل ، أنا ما موافقه عليك عشان كدا أحسن تتصل على أبوي و توريهو انك غيرت رأيك و ما عايزني ، قال لي و دا ما حيحصل و طوالي قفل الخط !!
حسيت الدنيا لفت بي ! راسي جاط و أفكاري اتضاربت !! معقوله خليل يعمل كدا ؟؟ يعني دا وشو التاني الكان داسيهو ؟؟!
طوالي اتصلت على داليا ، أول ما ردت علي قلت ليها أبوي دا مالو يعني ليه فجأه كدا قرر يعرس لينا التلاته !! عايز يتخلص مننا يعني ؟؟....قالت لي يا مها أبوي شاف دانيه في مطعم مع واحد و صراحة حركات الولد كانت بطاله و تافهه مع اني ما كنت معاهم بس بعرف الولد دا و ياما حذرت دانيه منو بس ما بتسمع مني المهم أبوي غضب و ما إتفاهم مع أي زول و أول ما وصل البيت مع دانيه ضربها و جاط شديد و ماف زول فينا كان قادر يهديهو ، انتي عارفه كويس انو أبوي بقبل النقاش في أي حاجه إلا في الحاجات البتمس سمعتو 💔
قلت ليها غلط! ليه ما حاول يفهم من دانيه دا منو و ليه كان قاعد معاها ! أبوي ما من عوايدو يمسك الموضوع من طرف و يعممو على كل الناس! قالت لي عمل كدا و سأل دانيه و هي ما نكرت و قالت ليهو ما عايزا غير الولد دا !! يعني أنا ذاتي مستغربه دانيه جابت الجراءه دي من وين ؟ نحنا كلنا ما حصل زول فينا رفع صوتو على أبوي أو اتجادل معاهو بس دانيه عملتها و هو إنصدم فيها و غضبو زاد ، قلت ليها تغلط دانيه و نتعاقب نحنا ؟؟ ذنبنا شنو يعني ؟؟ قالت لي ما لينا ذنب بس صدقيني أبوي ما ح يتراجع عن كلمتو و براك عارفه انو ما بحب زول يعاندو و يكسر كلمتو عشان كدا استسلمي للواقع بس يا مها زي ما أنا ح اعمل و نخلي الدنيا تمشي على كيفها ، قلت ليها بصوت مبحوح و أقرب للبكى : بس انا ما عايزاهو يا داليا 💔
قالت لي الحياة دي ما بتمشي زي ما نحنا عايزين ، نحنا مجبورين نرضى بواقعنا و نكمل عادي و ما معروف يمكن سعادتك تكون مع خليل ، مرات اختيارات الحياة بتكون افضل و أحسن من إختياراتنا بمية مره عشان كدا أحسن نرضى و نسكت ....قفلت منها و أنا قلبي واجعني شديد و خلاص حسيت إني محاصره و ح أنجبر على خليل ، لأني لو قدرت على العالم دا كلو ما بقدر على أبوي ...طلعت برا و مشيت المظله و أنا عيوني مليانه دموع ، قلت لأبوي : دانيه تغلط و نحنا نتعاقب معاها ؟؟ ذنبنا شنو بس ؛!!؟
أمي قالت لي بإستغراب : هسي دانيه الدخلها شنو ؟؟ نهله مرة أبوي قالت لي غلطها البتتكلمي عنو دا كل البنات بغلطنو و دي حاجه عاديه بس أبوك مكبر الموضوع.....أبوي بنبره عاليه قال ليها مكبر الموضوع ؟؟
دي حاجه عاديه في نظرك ! يعني اخليها لمن تباري لي الصايعين الما نافين ديل حتى اجي اتكلم معاها ؟؟ انتي السبب في دا كلو لأنك بتداري ليهن لكن بعد دا أنا ليهن بالمرصاد كلهن و تاني ماف لف و دوران ، قلت ليهو أنا.... قاطعني و قال لي بنبره كلامي واضح و رأيك ذاتو ما بهم و هسي دا بدي الناس موافقتك ....بكيت ليهو و قلت ليهو ياخ ما عايزاهو ما بتجبرني عليهو ، أمي قالت ليهو خلاص عليك الله خليها و ما تغصبها ، نهله قالت ليها هي أحسن من أخواتها في شنو !؟ يعني هن يغصبهن على العرس و هي لا؟؟؟
المهم يومتها حصلت جوطه و نقاش طويل و أبوي كان بتمسك بكلامو و شاكلني قدرتو ، المهم في نفس اليوم دا هو إتصل على خليل و قال ليهو إني موافقه ، يومها بكيت قدرتي و لحد اليوم البعدو كنت قافله نفسي جوه الأوضه ، أمي بتجي تضرب لي الباب و تحنسني عشان أفتح ليها بس انا ما كنت راضيه اتكلم أو اشوف زول ، لحد الضهر كدا كنت جوه الأوضه بعد مسافه كدا جاني صوت عمتي نوره و هي بتقول لي يا بت هوي بطلي جنك دا و افتحي الباب ، قلت ليها خلوني على راحتي !!قالت لي كدي أفتحي. الباب دا !! المهم بقت تنق و تنق لحد ما فتحتو ليها ، دخلت و قالت لي هسي بتسوي دا كلو عشان شنو ؟؟
يعني شنو لو العريس كان اختيار أبوك ؟؟ هسي أنا القدامك دي مصطفى راجلي دا لا كنت بعرفو لا في بينا حاجه ، عرسني ليهو أهلي و رأيي ذاتو ما أخدوهو و ياهو عايشين زي السمنه على العسل و أولادنا وسطنا ، خليني أنا أمك دي ذاتا ما كانت بتعرف أبوك و عرستو بنفس الطريقه التقليديه و ياهو كويسين و متفاهمين حتى و هو معرس غيرها !!
قلت ليها بس انا خليل دا ماااا عايزاهو ! قالت لي ليه ما عايزاهو ؟ عندك زول ولا شنو ؟....شفتي دي فارغه ساي ، اوعك تكوني باريتي كلام الحب و الفارغه ديك ، تلقيهو غاشيك ساي و ماسك بيك زمن ....خليك عارفه انو البونس ما بعرس 😊
المهم هي اتكلمت و أمي جات إتكلمت و كلامهم حطمني و لو جينا للحقيقه انا ما عندي سبب منطقي يخليني أرفض خليل لأنو سببي زي السراب و ما فيهو شي واضح ...تلات ايام و أهلي بنقوا في راسي و الخبر انتشر و كل الناس عرفت إنو خليل اتقدم لي و أنا وافقت ، في الأثناء ديك دانيه اهل الراجل الجابو ليها أبوي مشوا ليهم تعارف و حددوا مواعيدهم و إتفقوا و أنا خالص ما مشيت مع ناس البيت ، يوم كنت في الأوضه و ببكي ساي ، جات ملاذ داخله و قعدت جنبي ، قالت لي البكى ما بفيدك بشي ، يعني أنا مستغربه ليه انتي فجأه كدا بقيتي ساكته و ما قادره تقولي لا ؟؟
ما رديت عليها ، مسحت دموعي بس و رقدت و قبلت على الحيطه ، ما عارفه كيف بس نمت في مكاني داك و ما صحيت إلا على صوت بقول لي مها !!
لمن فتحت عيوني و إتلفت لقيتها دي شجن ، ضمتني عليها و قالت لي والله ما عرفت إلا امبارح بليل من دانيه ، يا قلبي والله ما تستاهلي ! بس ليه ساكته و مستسلمه ! قلت ليها اعمل شنو يا شجن 💔
قالت لي قولي لأبوك ما عايزاهو ، قلت ليها قلت ليهو اكتر من مره بس ما سمع مني حتى خليل كلمتو و هو صدمني و رفض يتنازل و ختاني تحت الأمر الواقع ، قالت لي الخسيس دا أصلي ما حبيتو ، طيب قولي لأبوك أنا في زول في حياتك ، قلت ليها عايزاهو يضبحني صح ؟؟ و بعدين ماف أي زول في حياتي ....قالت لي تاني رجعتي لنفس النقطه ؟؟ كلنا عارفين انو فارس بحبك و انتي كمان لو من استعجلتي و اديتي فارس فرصه تانيه ما كان حتكوني هسي في الموقف دا و بالحاله دي ، للأسف انتي ظلمتي نفسك و فارس معاك 💔
قلت ليها فارس ما جادي و أساساً البينا ما شي عظيم أو قوي شديد و أنا خلاص قنعت و أساساً ما بقدر اجبر زول علي و فارس أحسن ليهو يشوف حياتو الأصلا هو حالياً شايفها لأنو الدنيا دي ما بتمشي على كيفنا !!
قالت لي معقوله دي إنتي البتقولي كدا ؟؟ قلت ليها ايوه 😊من الغباء الزول يحارب عشان حاجه هي أساساً ما موجوده أو ما ليهو ، قالت لي مها ...قاطعتها و قلت ليها شجن رجاء ما تزيديها علي ، أنا تاني لا عايزا أتكلم لا اتجادل مع زول و خلي أبوي يعمل العايزو دامو داير يتخلص مننا بأي حجه 💔 فجأه ملاذ جات داخله و هي شايله مويه و عصير ل شجن ، عاينت لي و قالت لي اجيب ليك عصير ؟؟
من دون ما أعاين ليها قلت ليها لا ....المهم شجن قعدت معاي واستني و طبطب علي و لمن قامت ماشه قالت لي أرح قدميني قلت ليها ما قادره ، قالت لي يا زوله بطلي كسل ياخ و طوالي جرتني من يدي ، لبست أقرب توب و طلعت معاها ، قالت لي ما تخافي بكلم أحمد يمنع الحاصل دا ، قلت ليها أحمد ما عميان و لو كان عايز يعمل شي كان عملو بس شكلو واقف مع أبوي ..سكتت ما إتكلمت...قلت ليها بمناسبتو بتعرفوا بعض من متين ؟؟
قالت لي من يوم خطبتكم انتي و فارس ، قلت ليها و الغربيه انك ما حكيتي لي !...وقفت و قالت لي ياتو يوم انتي سألتيني عن الحاصل علي و جديدي شنو ...انتي ما بتلاحظي لي لا لحزني لا لسعادتي و أساساً يا مها ما حصل حسستيني انك متاحه لي متى ما حبيت أشاركك حاجه بلجأ ليك ، كنت دائماً بسمعك و بقيف معاك و أنا جواي حاجات كتيره عايزا زول أقولها ليهو و للأسف انتي ما حصل حسيتي بي ....المهم أنا ما عايزاك تعملي لي حاجه بالغصب بس خليك عارفه انو متى ما إحتجتيني حتلقيني جنبك 💜
طبعاً كلامها مساني والله و حسسني بالذنب ، أول ما إتحركنا هي بدت تتلفت ، بعد فتنا الميدان بمسافه ، قلت ليها أنا ح أرجع بعد دا ، قالت لي تعالي و مسكتني من يدي و مشت بي على مكان بالزاويه كدا بعيداً عن الناس ، قلت ليها مالك في شنو ؟؟ كانت بتعاين لتلفونها و بتكتب في حاجه ، قالت لي ثواني بس ، بقيت كل ثانيه اقول ليها شجن في شنو ليه موقفاني هنا و هي شغاله لي اصبري لحد ما فجأه جاني صوت بقول شكراً ليك يا شجن ....أول ما إتلفت لقيت فارس قدامي !!
طبعاً حسيت نفسي لي سنوات ما شفتو ، قلبي عمل شحححح ، شجن قالت لي اتفاهموا ...يلا باي ، قال لي مع السلامه طبعاً هي مشت و انا بقيت متخشبه في مكاني ....كان مدخل يدينو جوه جيبو و بعاين لي جوه عيوني و ملامحو متغيره شديد و شكلو مبهدل ! قال لي سمعت انو خليل اتقدم ليك و انتي وافقتي عليهو!! والله ما شاء الله ، يعني في لفيتي حولينا الإتنين و في الآخر اخترتيهو !! مش قلت ليك انتي وحده انانيه و بتاعة مصالح و ما بهمك شي غير القروش و أبدا ما تنكري الحاجه دي 💔
هو بتكلم و بعاين لي و أنا بالجلاله ماسكه دموعي ...ما حاولت أبرر ليهو و اقول ليهو انو دا قرار أبوي و مهما اتكلمت و اتناقشت معاهو ما بقدر عليهو....ما قلت كدا لأني ما عايزاهو ينتظرني ساي و يتعشم أكتر ، كفايه لحد هنا بعد دا لازم كل واحد يرضى بقسمتو و نصيبو و نبطل نجري ورا حاجات عمرها ما بتكون لينا...
قال لي ياريت ما كذبتي علي ! كنت تقولي لي عديل انك عايزا خليل بدل تتنافقي و تقولي انك رافضه خليل برضو ! عارفه إحساسي كان شنو لمن مشيت لأبوك و فاتحتو في الموضوع و قال لي البت دا اتقدم ليها واحد ؟؟....عارفه الخلعه الدخلت فيني ؟ يعني انتي رغم كل العملتيهو و رفضك لي بس كنت حاسي انك من جواك عكس كدا بس متردده و خايفه لأني خذلتك قبل كدا عشان كدا قلت اعمل خطوه جاده أثبت ليك بيها إني فعلاً جادي معاك و ما قاعد ألعب بيك زي ما إنتي مفتكره ....اتنهدت و قلت ليهو انسى دا كلو و ركز مع حياتك و خليني أركز مع حياتي ....قال لي يعني كدا انتهينا ؟
قلت ليهو هو أساساً ما كان في شي عشان ينتهي 😊 قال لي تمام يا زوله ، كدا شبه اتعادلنا و انتي قدرتي تاخدي حقك مني و تخذليني.....لو شايفه انك مع خليل حتكوني مبسوطه فأمشي وربنا يوفقك بس خليك عارفه أنا ما ح أسامحك على العملتيهو دا مع اني عارف انو حتى عدم مسامحتي لي ما فارقه معاك ، انتي ماف شي بهمك غير القروش....سكته ساي و ما اتكلمت لأنو لو فتحت خشمي دموعي حتصب عديل و نبرة صوتي ح تتغير 💔
قال لي ما عندك شي تقوليهو صح ؟؟
هزيت ليهو راسي بمعنى ايوه
قال لي تمام ، امشي ل خليل بتاعك دا و ربنا يسعدك و أن شاء الله بقروشو دي يضوي ليك 😊💔
كلامو كان بنزل على قلبي زي السكين ، ما قدرت اقيف اكتر و أسمعو لأني شويه كدا و ح أبكي ، شلت نفسي و إتحركت من جنبو و أنا ما شايفه قدامي من كترة الدموع ، لمن وصلت باب بيتنا مسحت دموعي و دخلت ، أمي قالت لي وصلتيها بيتهم ولا شنو ؟؟
قلت ليها الونسه جرت ، دخلت جوه و انا قلبي بتقطع من الألم ، شويه كدا جاتني ملاذ و هي شايله التلفون ، قالت لي هاك دا أحمد ، قلت ليها قولي ليهو نايمه ، قالت لي عارفك صاحيه ، شلتو منها و قلت آلو ، قال لي مها كيفك ؟ قلت ليهو تمام.....سكت مسافه بعدها قال لي عارفك زعلانه و ما راضيه بقرار أبوي لمن صراحة ولد الناس دا ما فيهو كلمه و أنا بنفسي سألت عنو لأني ما بدي أختي لأي زول ، قلت ليهو كتر خيرك ....قال لي ما تتكلمي معاي كدا !! قولي لي سبب واحد يخليك ترفضي الولد دا ؟؟
قلت ليهو ما بحب الحاجات البتفرض علي ، قال لي لو ما شفناهو مناسب ليك ماف زول بغصبك عليهو ، الولد مهذب و محترم و خلوق و كمان جاهز يعمل عرس و يفتح بيت و صدقيني حيصونك و يقدرك و يشيلك في راسو ....المهم خليتو يتكلم و خالص ما رديت عليهو لمن براهو زهج و قفل الخط ...المهم بعد يومين خليل جاب أهلو و جوا ، أنا في البدايه أبيت أطلع ليهم بس أبوي جا وجرى لي شعاع ، طلعت بس و قعدت معاهم زي الصنم ...قالوا ما عايزين فتره طويله للخطوبه و عايزين عرس بأسرع وقت و في الحقيقه خليل كان ما عايز خطوبه أساساً بس أهلي قالوا ليهو يأجل العرس شويه عشان برضو في عرس دانيه اختي و موعدو قرب ، خليل قال ليهم طيب ممكن نعمل العرسين مع بعض ، عمتي نوره قالت ليهو لا لا نحنا هسي ما جاهزين ، ما تزنقونا في موعد العرس دا و خلونا نجهز ليهو على راحتنا ....المهم براهم اتفقوا و عملوا العايزنوا و أنا بعاين لخليل دا بغيظ و كراهيه و هو عامل نفسو رايح ، في نفس اليوم دا بليل رسل لي رساله كان كاتب فيها ، أنا آسف والله ما قصدي ازعلك و شوفتك في الحاله دي ما عجبتني بس متأكد إنو دا كلو حيتغير بعد الزواج و متأكد انك حتتقبليني ، المسأله مسألة وقت بس و انا بنتظرك بس بشرط انو الإنتظار دا يكون بقربك ، قريت رسالتو بس ما رديت عليهو ، في اليوم البعدو جابوا قولة الخير حقت دانيه و حددوا موعد العرس و برضو ما مشيت و الشغل ذاتو ما مشيت تاني ، خلوني براي في البيت و طبعاً مروه اتصلت علي اكتر من مره بس ما رديت عليها لأني حرفياً تعبت من الكلام في الموضوع دا لأنو كلام ما منو فايده و ما حيغير شي ، دخلت الفيس و أول بوست لاقاني كان ل فارس كاتب فيهو :
إلى التي خذلتني :
أما عن العفوِ فقد عفوت
أما عن الودِّ فلن يعود
فاللهم طريقاً لايؤدي إليك أبدا
و اللهم حياة تخلو من أشباهك..."
"لم يكن نزع الوِدّ سهلاً ، لكنها المواقف التي عزَّت عليك فيها نفسك ، تجبرك على نزع حتى اللحظات المتجذّرة في أعماق ذاكرتك."
زعلت بسبب كلامو و قلبي وجعني شديد بس ما بقدر اعمل شي 💔
يتبع ......
