يمكن دقيقه كامله و أنا بحاول استوعب في الشايفاهو و هم الإتنين ما قادرين يقولوا حاجه !! القروش وقعت من يدي و طارت !! والله بس بعاين ليهم و أنا فاقده المنطق و ما قدرت أفكر في أي حاجه او اسألهم عن حاجه 💔 اتذكرت كل شي و الصوره الكانت خاتيها في الإستوري حقو و فهمت إنو البت ديك ملاذ....
بعد دقيقه قدرت أحرك لساني و أنا دموعي عشره عشره مع إني حاولت امسك نفسي و ما أبكي قدامهم ، بس ما قدرت ، قلبي كان واجعني شديد ، ما قدرت اتكلم بقيت ببكي قدامهم بس ، ملاذ كانت مخلوعه و خايفه شديد ، ما قدرت تقيف أكتر شالت نفسها و بإستعجال مشت على مدرستها و أنا لسه واقفه ببكي و ما قادره ارفع عيني و أعاين ليهو أو أتحرك ....ما عارفه هو الكان موقفو شنو ، حاجه وحده خطرت على بالي و هي انو هو شمتان فيني و متكيف عشان شايفني ببكي ، ف طوالي مسحت دموعي الأضلا اتمسحت بالتوب الكنت مغطيه بيهو جزو من وشي ، شجعت نفسي و بكل قوتي رفعت يدي و ضربتو كف و عدلتو بواحد تاني ، قلت ليهو عارف انك واحد حقير و باطل و مقرف ما بس عاطل !! مصنوع من شنو انت بس فهمني ؟ بتعمل كدا ليه ؟ بتستفيد شنو يا حقير يا حيوان ، بتلعب علينا الإتنين ليه ؟ ما كفايه التمثيل و اللعب العملتو لي أنا كمان جاي تعمل حركاتك دي لأختي !!؟؟ ما لقيت غيرها ؟! .....بتعمل دا كلو عشان تكسرني صح ؟ احب أطمنك انو البكسرني لسه ما إنخلق و أنا لمن بكيت بقيت على غبائي بكيت لأني ما مشيت ورا إحساسي الكان بحذرني منك ، أنا لحد آخر لحظه كنت شاكه و ما مطمنه بس انت عرفت تمثل كويس و أصلا دا البتقدر عليهو و دي الحاجه الوحيده الإنت فالح فيها ، موهبتك الوحيده هي اللعب ببنات الناس لأنك مريض و حاسي بنقص جواك بخليك تعمل المستحيل عشان تعلق بت فيك و في النهايه تنسحب ، قايل نفسك كدا واو يعني ؟؟
عارف مفروض ما ألومك انت ! مفروض ألوم نفسي لأني نزلت من مستواي و اتعاملت معاك و رغم ريحة قذارتك و قرفك المعروف أديتك فرصه عشان تلعب ب عواطفي و تخليني زي الهبله قدامك ، بس أبشرك انك ما كسبت شي و ما تنسي اني الجيت و سلمتك خاتمك لأني عمري ما ح أرضى اكمل مع زول بحسسني اني ولا شي او بيعمل كدا عشان يكسرني ، اقول ليك الحقيقه ؟؟!
مفروض انت التكون زعلان و متضايق لأنك فقدت فرصة انو اسمك يرتبط بإنسانه عظيمه زيي ، بس حكمة ربنا انو الشبه بعض بكونوا سوا عشان كدا ربنا ألهمني و نور بصيرتي و خلاني ألحق نفسي عشان كدا جيت و سلمتك الخاتم ، أنا بستاهل انسان زي مميز خلقاً و فكرا و ديناً ما عاطل و نسونجي زيك و الأكعب انك لا بتصلي لا كنت بتعرف المسجد بكوين ، انت نكره و باطل و عاطل و ضعيف لدرجة انو صيام يوم واحد بغلبك و بطلع عينك.....ضحكت و قلت ليهو بالجد أنا في الفتره ديك كنت غبيه و رغم شكوكي بس قلت يمكن انت بالجد اتغيرت 😂 يعني فرعون لحد آخر لحظه في حياتو ما آمن ب ربو ، عاش كافر و مات كافر و انت ما أحسن منو و وجه الشبه بينك و بينو انك مستحيل تتغير ، زي ما إتولدت عاطل و باطل و عديم فايده و نسونجي و ضعيف و عديم الرجوله حتموت كدا ✋
طبعاً آخر جمله قلتها دي حسيتها زي السكين دخلت ليهو في نص قلبو ، أصلاً هو من ضربتو كفين ملامح وشو متغيره و بعد كلامي الآخر دا وشو اتغير زياده ، قلت ليهو آخر كلام عندي ، ملاذ دي خليك بعيد عنها عشان ما أندمك على اليوم الولدوك فيهو ، و هي تصبر لي بعرف أأدبها كيف و اخليها تكره تسمع إسمك ذاتو.....
اول ما إتلفت عشان أمشي لقيت أصحابو في وشي ، حسن قال لي قايله نفسك منو انتي عشان تقولي عنو كدا ؟؟ قلت ليهو أسكت لأنك ما أحسن منو كلم عديمين الرجوله و ما نافعين ..... طبعاً جملة عديمين الرجوله دي خلتهم يفوروا زي الخميره ، واحد منهم قال ليهو خليها يا حسن دي موجوعه و مغيوظه عشان فارس لعب بيها 🤣🤣🤣
حسن قال ليهو الزمن كلو بتنبذ فينا و في فارس و قالت بتكرهو و أول ما قرب منها بكل غباء و سهوله صدقتو و حمدت ربنا إنو لقت ليها زول يحبها 😂 واحد من شلتو قال ليهو أصلا حركاتها ديك كلها كانت استهبال منها و هدفها كان انو تلفت نظر صاحبنا و عشان هو كان بسفهها بقى ليها حار عشان كدا كانت بتغضب و بتنبذوا قدرتها و هي من جواها مكسره فيهو 🤣 حسن قال ليهو صراحة لمن مثلاً عليها و أوهمناها إنو فارس بحبها اتوقعت أنها خالص ما تصدقنا بس الهبله وقفت و سمعتنا و رغم أنها اتجاهلت الموضوع لكم يوم إلا أنها كانت بتفكر فيهو و صاحبنا الشاطر عرف كيف يلعب عليها ، ضحكوا كلهم بصوت عالي ،، حسن قال لي كل الحصل و كل المواقف الحصلت كنا مخططين ليها عشان تعرفي اننا ممكن نعمل شنو لو واحد أهان زول مننا خاصة لو كانت بت و انتي أحمدي الله انو وقفنا على الخطوبه بس ، عادي كان ممكن نشوه سمعتك أو نخلي فارس يعرسك و من اسبوع يطلقك ساعتها كنتي حتقدري تبريء نفسك كيف ؟؟
كنا مجهزين ليك جنس عمايل بس ربك ستر و مفروض تكوني اتعملتي الدرس من هنا لقدام أحسن تحترمي نفسك و لسانك دا تلميهو عليك عشان ما نقطعوا ليك ولا شنو يا شباب ؟!! قالوا ليهو اييييوه و قعدوا يضحكوا بشماته ، حسيت نفسي صغيره قدامها و حسيت بالإهانه و طول مدة كلامهم ما إتلفت على فارس عشان ما أشوف نظرة الإنتصار و الشماته في عيونو ، كان ساكت بس متأكده انو عايز يطير من الفرح بسبب الحاصل قداموا دا .....صراحة ما عرفت اقول ليهم شنو ، أعصابي باظت و الدم في شراييني بدا يغلي ، شلت نفسي و مشيت البيت و أنا متغيره 180 درجه بس كويس انو أمي طلعت مشت السوق الجنبنا ، و ناس عمتو إجلال مشوا المقابله و تقريباً دي آخر مقابله ليهم و بعدها ح يسافروا ، المهم نزلت شنطه صغيره كدا و ختيت فيها كم لبسه كدا ، و حاولت جاهده أخلي ملامح وشي تكون طبيعيه عشان أمي ما تسأل ، على بال ما أمي تجي أنا هديت نفسي و أزلت كل علامات الزعل و الضيق ، بعد ما جهزت معاها الفطور و فطرنا قلت ليها أنا بعد شويه ماشه لناس دانيه ، طبعاً استغربت فيني و لمن قلت ليها عايزا أقعد معاهم كم يوم كدا استغربت اكتر لأني ما كنت بحب أمشي ليهم خالص و لو مشيت بمشي بالغصب ! قالت لي ليه مالهم ؟؟ قلت ليها ولا شي لكن لمن كنت بتكلم مع دانيه قالت لي طولتوا ما جيتونا و انو هم حصل جوا و باتوا معانا و أنا نهاي ما حصل بت معاهم ، قالت لي أمرك عجيب لكن كويس ، المهم بعد فطرنا الزمن داك الضهر أذن ، استحميت و جيت صليت ، مآب بعد مسافه جات داخله و بعدها بمسافه قصيره جا هيثم أنا فلانه ديك نهاي ما جات مع انو أول ما يفكوهم بتجي جاريه و مرات ما بتحضر الحصص الآخيره دي و أنا عارفاها هربانه مني و أنا ذاتي هربانه منها لأنو العملتو أنا ما قادره استوعبو والله !! لسه مخلوعه !! ليه ما واجهتني ؟؟ ليه لمن هو خطبني ما حاولت تبعد عنو ! لا و كمان لسه كانت مواصله معاهو و دا معناهو أنها عارفاهو بمثل علي !!! طيب لو دا كلو غالبها على الأقل كانت تجي و تقول لي انها عايزاهو ! أنا ما زيها عشان أخرب علاقة الأخوه البينا عشان ولد حتى لو كنت ميته فيهو ! أنا هي عملتها بطاله شديد والله لدرجة اني ما قادره اقيف قدامها و اتكلم معاها !! و دا بفسر ليه هي اتغيرت من يوم عرفت انو العاطل داك جاي يتقدم لي 💔
المهم جهزت نفسي و ودعت ناس البيت و طلعت ، اتصلت على دانيه و كلمتها اني جاياهم ، فرحت شديد و قالت لي أحلى خير والله ... فعلاً لمن وصلت بيتهم هي و داليا جوا فتحوا لي الباب و أخدوني في أحضانهم و أمجد برضو استقبلني معاهم ...اظنهم قايلني متأثره بفركشة الخطوبه دي عشان كدا متعاطفين معاي ، قلت ليهم عاينوا ما تتعاطفوا معاي كدا و تحسسوني اني خسرت الدنيا و الآخره ، انتوا هبل راجل شنو البخلي حالتي بطاله كمان كدي زحوا لي أدخل ، أمجد ضحك بصوت عالي و قال ايوه دي مها البنعرفها و بعدين هو الخسران و انتي أصلا ما حيفرق معاك ....أصليه كيف ... طبعاً أمهم كانت ماف قالوا مشت لحبوبتهم تقعد معاها كم يوم لأنها عيانه ، المهم دخلنا و بقينا نتونس عادي بعدها أمجد طلع و داليا مشت المطبخ تعمل الغدا ، بقينا أنا و دانيه بس ...فجأه قالت لي كونك تتظاهري بالقوه في عز وجعك ف دي براها قوه عظيمه....مها ماف بت ما بتتأثر لمن خطوبتها تتفركش بغض النظر عن الفركشها منو و نحنا عشان بنعرفك كويس عارفين انو مستحيل تقبلي بأي واحد إذا ما كان بمواصفاتك المطلوبه و كونك في البدايه قبلتي ب فارس معناها طابق مواصفتك و نال إعجابك و يمكن بديتي تحبيهو ف بالتالي فركشة الخطوبه دي مأثره عليك و أنا متأكده من الحاجه دي ، ايوه انا ما عارفه السبب شنو لأنك ما رضيتي تحكي لزول حتى ل مروه ، بس اذا انتي بتحبيهو ما كان تستعجلي و تنهي البينكم بالسهوله دي ، فجأه جات داليا و قالت ليها زي ما نحنا عارفين انها ما بتقبل بأي راجل ما لم يكون مناسب ليها كمان عارفين انها ما بتقبل بحاجه أقل ، أي أنا ما عارفه الحصل شنو بس متأكده إنو فارس هو الغلطان و إلا انتي ما كان سلمتيهو الخاتم بالسهوله دي ، دانيه قالت ليها ما معروف يمكن النقاش في حاجه بسيطه و أنا عارفه مها كويس ما عندها أخلاق و بتضايق من أقل تصرف ، يمكن من دون قصد حصل منو موقف بسيط و هي عشان بتحب في كل موضوع تدخل كرامتها و عزة نفسها كبرت الموضوع و في الآخر هي الحتبكي والله !....قالت لي مها حبيبتي انا ما بقول كدا عشان أزعلك بس مصلحتك بتهمني و ما صدقت لقيت فرصه عشان اتكلم معاك ، ما كنتي تتسرعي و كان لازم تدي فارص فرصه عشان.....قاطعتها و قلت ليها كان تمثيل !!
كلو كان تمثيل فهمتي ؟!!
طبعاً الإتنين قعدوا يعاينوا لبعض ، إستجمعت قوتي والله و بالجلاله مسكت دموعي و قعدت أحكي ليهم بس ما قلت ليهم إنو البت دي ملاذ.....ما ذكرت اسمها خالص .....لمن خلصت هم الإتنين كانوا ساكتين و مبحلقين عيونهم ! داليا قالت لي واي ما بصدق والله يا مها !! كيف يعني الحيوان دا كان بكذب عليك و ليه انتي لحد الآن ساكته و ما كلمتي أهلك ؟؟
قلت ليها اقول ليهم شنو يعني ؟؟ يا زوله ما عايزا اجيب سيرتو ذاتو و ما عايزا صورتي تصغر قدام أهلي لمن يعرفوا إنو كان بمثل علي ساي و بالواضح غشاني و أنا الطول عمري كنت عامله فيها مفتحه و ما بتغش لزول جا الحيوان دا و عمل بي مسرحيه طويله عريضه و خلاني أصدقها ، كفايه اني اتهبلت قدام نفسي و قدامكم انتوا هسي فما عايزا أكون هبله قدام زول تاني و ياريت الكلام دا ما يطلع من بيناتنا حتى مروه ما تقولوا ليها لأنو خشمها خفيف و متأكده انها حتكلم أمي ، دانيه بعد مسافه قالت لي مستحيل يا مها !!....فارس الشفتو يوم خطبتكم دا مستحيل يكون بمثل عليك ! في حاجه أنا متأكده ما تظلميهو ساي ! داليا ضربتها في كتفها و قالت ليها ما بتفهمي انتي ولا شنو ؟ بعد الحكتو دا كلو تقولي ليها ما تظلميهو ؟! قالت ليها ما عارفه بس نظراتو ليها يوم الخطوبه كا......قاطعتها و قلت ليها تمثيييل كلو تمثيل ف ريحي بالك .....داليا قالت لي بصراحة يا مها أنا مستغربه كيف انتي أعجبتي بيهو أو إن صح التعبير كيف حبيتيهو بالسرعه دي و حسب كلامك و الحكيتيهو ما شايفه ليهو موقف أو حاجه واو كدا تخليك تحبيهو و تزعلي عليهو كدا !! عارفه اني كنت. متوقعه انك آخره وحده ممكن تحب ليها زول و بالسرعه دي ؟؟
نطت دانيه و قالت ليها نحنا محتاجين للحب في الحياه دي....داليا لوت خشمها و قالت اها فيلسوفة الحب قامت ، قالت ليها اسكتي ياخ أنا بتكلم مع مها ، دانيه قالت ليها مها ما حتقدر تجوابك لأنها ذاتها ما عارفه ليه بس أنا ح اقول ليك السبب ، داليا عاينت ليها بطرف عينها و سكتت ، دانيه واصلت كلامها و قالت : طبيعي تحبو بالسرعه دي و دا بسبب حاجتين ، اولا حاجه أنها لقت فيهو كل المواصفات العايزاها ، زي صلاتو و صيامو و......قاطعتها و قلت ليها مية مره قلت ليك انو كان تمثيييل ياخ ما بتفهمي إنتي ؟؟ قالت لي ما تقاطعيني لو سمحتي.......تاني سبب هي انو هي ما حصل حبت زول أو ارتبطت بيهو ، ف البنات البكونوا بعاد كل البعد عن حباني و حبيتو و درامات البنات دي اول ما يجيهم واحد بنبهروا بيهو في أقل تصرفاتو ، يعني مثلاً البت بتاعة اول تجربه لو قال ليها كيفك ساي حتنبسط و تطير من الفرح أما صاحبة التجارب المتعدده بتشوفها حاجه عاديه لأنو قبل كدا اتقالت ليها و هي حالياً عايزا اهتمام أكتر من كدا و عايزا مواقف كتيره شديد تثبت ليها انو الزول دا بحبها و ما زي الباقين و الأهم انو يكون جادي و يبدا من المكان الوقفو فيهو غيرو .....قلت ليها والله !! يعني عايزاني امشي اعمل علاقات مع الأولاد عشان ابقى واعيه و ما اجي أحب لي زول بسرعه !!؟
ضحكت و قالت لي ما تنفعلي يا مها أنا لمن اقول علاقه أو تجربه ما بالضروره يكون قصدي تمشي تصاحبي الأولاد ولد ولا و تعملي معاهم علاقات ، تجربه أو علاقه دي قد اكون قاصده خطوبه أو زواج ، يعني اذا وحده وحده كانت مخطوبه و فركشت ف دي تعتبر تجربه أولى و برضو الكانت معرسه و إتطلقت ف برضو زواجها كان علاقه أو تجربه فإنتي بس ما تحوري مصطلح "علاقه " و تخليهو ضيق أو تصفي بيهو حاله وحده فقط .....
لمن سكتت أنا و داليا بقينا نعاين ليها ساي ، داليا ضحكت و قالت ليها الكلام دا بتجيبيهو من وين انتي ؟؟ قالت ليها عقلي دا قالوا ليك قاعد في إجازه ؟! المهم ضحكنا على كلامها و بعدها صلينا العصر و جينا عشان نتغدا أول ما قعدنا كدا سمعنا صوت الجرس ، داليا لبس توبها و مشت تفتح الباب بعد شويه أحمد جانا داخل ، أول ما شافني قال لي و أنا أقول الليله بيتنا دا منور كدا مالو و لمن عاينت للمبات لقيتهم كلهم طافيات ف جيت اشوف مصدر الإضاءه دا ، ضحكت على كلامو و قلت ليهو أيوه ايوه كسر لي تلج و طبل لي بحب التطبل أنا ، ضحك و جا سلم علي .... طبعاً برضو متعاطف معاي عشان فسخة الخطوبه و كدا و أنا بالجد ما بحب زول يتعاطف معاي أو يحسسني بالضعف ، المهم غسل يدو و جا قعد يتغدا معانا و يمكن دي تاني مره اقعد مع اخواني من أبوي و اتونس معاهم كدا ، بعد الغدا عملنا شاي و طلعنا الحوش برا و بقينا نشرب بمزاج لحد ما تلفون داليا رن ، قالت لينا دي مروه ، لمن ردت عليها قعدت تضحك و قالت ليها مها ، مروه قالت لي قولي للخسيسه الجاتكم دي لو انتظرتني امشي معاها كانت حتموت ، قلت ليها قولي ليها ما فات شي هسي كان جايبه تعالي ، طبعاً مروه سمعتنا قالت لي ما جايه و أن شاء الله تضوي ليهم ، أحمد شال التلفون من داليا و قال ل مروه هسي انتي زعلانه مالك يا زوله لو عايزا هسي بجيك و بجيبك هنا ، قالت ليهو ما عايزا قال ليها خلاص ما تزعجينا مبسوطين نحنا و هسي بنشرب في شاي بمزاااااج ، قالت ليهو اصلكم معفنين و طوالي قفلت الخط ف ضحكنا عليها بس ....المهم بعد المغرب أبوي جا و اتفاجأ لمن شافني معاهم ! جا سلم علي و هو مستغرب بس ما قال لي حاجه ، بعد صلى المغرب و شرب الشاي قال لي ارح أنا ماشي ل ناس أمك ، قلت ليهو بري ما ماشه 🙂
عاين لي كداااا و قال لي ليه هربانه ولا شنو ؟
قلت ليهو في زول بهرب من بيتو و بجي ل بيت أبوهو 😂✋ قال لي سمح اهااا مالك ؟! قلت ليهو ساي ياخ ، داليا قالت ليهو اجييي يا أبوي ! يعني نحنا ما أخوانها ! ما فرقت لو قعدت هنا أو هناك ، قال ليها يا بت هووووي أنا ما قصدت كدا لو عايزا أقعد خليها تقعد أن شاء الله مية سنه ، المهم أنا ماشي يلا مع السلامه ، طلع كدا و تاني جا راجع و قال لينا الصايع داك مشى وين ؟؟
قلنا ليهو ما عارفين والله ، قال أصلو أمجد دا ما يقعد لي في البيت ، المهم يا احمد أوعك تطلع و تخلي أخواتك براهم ، قال ليهو حاضر يا أبوي ،، المهم أبوي مشى و نحنا دقيناها ونسه في نص الحوش ، لصقنا سرايرنا بس و قعدنا نتونس و أحمد يشيل و يضحك فينا.....صراحة اول مره اعرف انو هو ظريف كدا و ونستو حلوه ...
المهم تاني يوم كلنا صحينا بدري و احمد عشان صحى قبلينا هو العمل لينا الشاي ، بعد ما شربنا قال لينا تعالوا أوصلكم ، ركبنا معاهو أنا و داليا بس لأنو دانيه طريقها غير و متعوده تمشي مع أمجد و هو كان نايم ف لمن نحنا طلعنا هو ياداب كان صحى من النوم .....المهم وصلت الإذاعه و بدينا حلقتنا و صراحة ما كنت مهتمه بيها كتير لأنو موضوع الغلاء المعيشي دا اتكلمنا عنو مليون مره و في مليون قناة و إذاعه كل يوم بتتكلم عنو ، أنا بفضل المواضيع المنوعه ، المهم في نهاية اليوم و أنا راكبه مواصلات بحري فجأه في بت سامعاها قاعده تقول للراجل الجنبي بصوت واطي يا اتلمى ، احترم نفسك ياخ ...صوتها كان أشبه بصوت الزول الببكي.....أنا و هي و الراجل دا كنا قاعدين ورا و هو في نصنا ، في البدايه ما اتدخلت كنت منتظراها تحسمو و تتخذ موقف لأنو الوحده ممكن تسكت على أي حاجه إلا الحاجه البتمس شرفها و عرضها ، لمن هو كتر تفاهتو و حركاتو البعمل فيها و أنا شايفاهو و هي بدت تبكي ما قدرت أسكت والله ف بس بشنطت الشايلاها ضربتو في راسو و قلت ليهو بصوت عالي انت حيوان ولا شنو ما بتخجل ياخ يا عواليق يا رمه ياخ الله يحرقك يا حقير..... طبعاً في اللحظه دي كلها الناس إتلفتت علينا و بتاع العربيه وقف ، طبعاً الناس فهمت الحاصل ف الأولاد جوا جروهو من قميصو عشان ينزلوهو من العربيه و النسوان ديل كانن بنبذن فيهو ، ما خلن صفه كعبه ما قالنها ليهم ....أنا لسه كنت محروقه من الموقف الزباله دا ، قلت ليهم دقيقه دقيقه ، أكيد ما بالسهوله دي ، شلت تلفوني و جيت وقفت قدام الراجل و لمن عرفني عايزا أصورو حاول يغطي وشو لكن الأولاد مسكوا ليهو يدينو و خلوني أصورو بعداك نزلوهو من العربيه ، طبعاً البت غطت وشها بطرحتها و خالص ما إتكلمت معاي و الناس قايلين انو الراحل اتافه علي أنا! المهم في نفس اليوم دا لمن رجعت البيت حكيت لناس دانيه الحصل ، داليا قالت لي صراحة يا مها بما إنو البت سكتت و غطت وشها حتى بعد ما أخدت ليها حقها و ما شكرتك انا شايفه انك من البدايه ما كانت تدخلي نفسك يا مها ، بما انو هي راضيه و ما قالت حاجه و فما كنتي تدافعي عنها لو استمريتي كدا صدقيني حتورطي نفسك ....دانيه قالت ليها ما عملت شي غلط و ياريت كل البنات يقيفوا مع بعض و يعملوا العملتو....
أنا ما اكتفيت ب كدا موضوع زي دا بالنسبه لي حاجه خطيره و كبيره شديد و لازم يتخت ليها حد ، عشان دخلت الفيس و في أكبر القروبات كتبت القصه و نزلت معاها صورة الراجل و كتبت في النهايه #افضح_متحرش
طبعاً معظم الناس دعمت الهاشتاق خاصة البنات اما الأولاد ف ما كلهم لأنهم عواليق و كلهم بنفس عقلية المتحرش داك..... طبعاً البوست انتشر بصوره مبالغه لمن إتخلعت و معظم الناس إتداولت القصه في باقي الليل داك .... جاتني داليا ناطه وقالت لي مها دا شنو دا العملتيهو دا ؟؟!!جنيتي إنتي ؟؟
قلت ليها عادي المشكله وين ؟
دانيه جات و قالت لي لكن ما للدرجه دي يا مها ما تفتشي المشاكل بيدك !!
قلت ليها أنا ما بفتش للمشاكل أنا بفضح واحد أجرم في حق بت و غيرو كتار ، لو أنا اليوم سكته زي سكتة البت القبيل ديك معناها كل البنات ح يسكتوا و يخلوا العواليق ديل يتمادوا أكتر بس لو اتشجعنا و بقينا نفضحهم الواحد فيهم حيفكر مية مره قبل ما يمد يدو على بت
داليا قالت لي ما عارفه بس انا ما مطمنه خالص ل عملتك دي و بعدين يا مها ست الحق ما إتكلمت انتي ليه مصره تتكلمي نيابة عنها ؟؟
قلت ليها أنا ما عملت كدا عشانها هي شخصيا أنا عملت كدا عشان اي وحده حصل ليها موقف زي دا ما تسكت و تاخد حقها حتى لو ماف زول من الركاب وقف معاهو بس هي ما تسكت و ما شرط إلا تصورو و تنزل صورتو الأهم إنها تقيم نفسها و ما تسمح ليهو يتمادى أكتر 😊
يتبع.......
