المهم اليوم التاني كان عندي شغل ، لمن جيت راجعه سامعه الناس في الشارع بتتكلم عن فارس ، شفع على الشباب الفي الميدان على نسوان الحي المنتشرات في الشارع ، طلعت السماعه و ركبتها و شغلت لي غنيه كدا المهم ما اسمع سيرة العاطل داك ، ما قلعت السماعه إلا لمن وصلت البيت و المشكله إنهم برضو كانوا جايين سيرة العاطل داك ، طوالي دخلت منهم جوه و قلت نهاي ما حابه اسمع عنو حاجه ، و ما بعيده الحصل دا كلو يكون تمثيل ، مروه جاتني داخله و قالت لي ما وريتك الحصل شنو مع فارس ، قلت ليها ما توريني ما عايزا أعرف عنو أي حاجه ، قالت لي بالجد أنا عايزا أعرف عمل ليك شنو هو لمن فركشتي الخطوبه و بقيتي ما بتطيقي تسمعي اسمو ؟؟
قلت ليها ساي كدا بس لقيتو انسان متهور و ما مناسب لي و ما جادي و تهورو أمبارح لمن طعن الولد دا خير مثال ، قالت لي احتمال كان بدافع عن نفسو !! يعني استحاله يطعن الولد من دون سبب ، قلت ليها عايني ما تتعبي خشمك! ما عايزا أعرف شي و ما بهمني الحاصل عليهو ، شويه كدا جات مآب داخله قالت ل مروه أمي قالت ليك اطلعي أرح ، قلت ليها ماشين وين انتوا !؟؟
قالت لي بيت ناس فارس ، ماشين نشوف أمو ، لويت خشمي بس ، طبعاً ملاذ ذاتا مشت معاهم ، المهم في نفس اليوم دا داليا اتصلت علي و إتونست معاي مسافه بعدها جابت لي سيرة عمتو إجلال و قالت لي صحي انتي طردتيها لأنها قالت كدا ؟؟ قلت ليها ما طردتها لكن هي عايزا تقعد تقل أدبها على الناس في نص بيتهم و ماف زول يسألها ، قالت لي صراحة ليك حق تشميها ، هسي مش جاتنا قريب دا لكن والله كرهتنا ، قلت ليها أمك ما حتقصر منها ، ضحكت و قالت لي آي امبارح كانوا بطاعنوا بعض بالكلام 🤣 قلت ليها مره غياظه خلاص و ما تستاهل يسكتوا ليها و الغريبه انها الزمن كلو شابكانا دي آخر مقابله لي و بعدها ح أمشي بعد لحد الآن قاعده و ما سافرت ، قالت لي مستهبله ساي ، لقت البندر دي على قولها و ما صدقت ، قالت لي و كمان ما شفتي بتها القالت بتضرب بيها المثل و بتقارنا بيها ،اقسم بالله من جات صاحبة أولاد حلتنا كلهم ، كل يوم بتطلع الشارع بحجة أنها ملت من قاعد البيت و عشان انهم هناك في البلد متعودين على الحوامه و هنا مقفولين في حته وحده ، قلت ليها اي سلوى دي بعرف حركاتها كويس ، فجأه دانيه شالت التلفون من داليا و قالت لي خليك من دا و قولي لي الحصل شنو مع فارس ؟؟
قلت ليها الجاب ليك شمارو ليه ما وراك آخر التطورات!؟ قالت لي ما تتساخفي ياخ ! قلت ليها اسألي مروه الجابت ليك الشمار ، قالت لي يعني إنتي ما عارفه ؟؟ قلت ليها ما عارفه و ما عايزا أعرف....المهم إتكلمنا مسافه و قفلنا من بعض ، بعدها دخلت الفيس عشان طولت منو ، لاقتني بوستات كتيره منزلنها البنات تحت #افضح_متحرش ، إنبسطت شديد و قلت دا الأحسن ، المهم كان في كميه من الإشعارات ، معظمها من البوست الكان نزلتو عن الراجل داك ، اتخطيتها كلها و ما وقفت إلا الإشعارات الفي صفحتي الشخصيه ، كان في كميه من التعليقات من ناس ما بعرفهم كل واحد كاتب لي ممكن تراجعي الخاص !
فعلاً دخلت الماسنجر و إنتقلت إلى طلبات المراسله ، لقيت كميه من الرسايل من ضمنهم رسايل من الناس العلقوا لي في الكومنتات ديل ، فتحت رسالة اول واحد منهم لقيتو كاتب لي احفري قبرك بعد دا ، و أرجي الراجيك ، طلعت من دردشتو و فتحت رساله غيرها ، لقيتو كاتب لي تاني فكري كويس قبل ما تطلعي من بيتكم و و و كلام كتير بتاع تهديد و معظم رسايل الكم نفر ديل كانت كلها تهديد ، ما عرفت ديل منو و بتكلموا عن شنو ، آخر واحد فيهم كان مرسل لي فيديو ، أول ما فتحتو رميت التلفون و صرخت ، غمضت عيوني شديد و قلبي كان حيطلع من مكانو ، ختيت يدي على خشمي و رفعت التلفون و عاينت في الفيديو و تاني قفلتو و طلعت بسرعه من الدردشه ....كان مرسل لي مقطع إباحي ، مفبرك و صورتي مختوته بدل صورة البت الحقيقيه ، راسي شطب و مخي وقف عن التفكير ، وقفت على حيلي و بقيت مقلقه و محتاره و ما عارفه اعمل شنو ....ديل منو و من وين جابوا صورتي ...دخلت الدردشه تاني و كتبت ليهو انت منو و عايز مني شنو ؟؟ و جبت صورتي من وين ؟
ما كان داخل ، طلعت من الدردشه و أنا مقلقه و في الأثناء الكنت منتظره فيها رد منو ظهر لي بوست في قروب ، صاحبة البوست كانت منزله صورتي و كاتبه عليها دي مها الشجاعه مذيعة راديو هلا الما إترددت ثانيه لمن وقفت في وش واحد كان بتمادى مع بت في المواصلات بكل شجاعه وقفت ضدو و فضحتو و كانت هي القائده الأبرز ل #افضح_متحرش ، صراحة أنا متكيفه منها شديد و بحيها على شجاعتها دي و ياريت كل البنات يكونوا بنفس شجاعتها 💜
لمن ركزت في الصوره لقيتها نفس الفي الفيديو الإباحي و الصوره دي انا بتذكر أنها كانت قبل شهرين لمن احتفلنا بسنوية الإذاعه ساعتها أخدنا صور جماعيه و فرديه لكل طاقم الإذاعه !!
قلقت بالجد و مخي بقى يودي و يجيب و لمن ناس أمي جوا راجعين ما قدرت أكلمهم والله و أنا بطبعي دائماً متعوده اكتم جواي و مشاكلي بحلها براي ، ايوه الموضوع دا شكلو كبير بس ما بقدر أكلم زول .... طبعاً ناس البيت لاحظوا لي و سألوني مالي ، قلت ليهم فترانه و مصدعه بس ، في نفس اليوم دا اتصلت على شجن ك عادتها كل يوم أو كل يومين ، كنت بتكلم معاها و أنا بالي في حته تانيه و هي تشيل و تحكي لي عن ولد خالتها لمن جاهم قبيل و التلميحات البعملها ليها ، كانت بترغي و ترغي فلمن ما لقت مني تفاعل زعلت و قالت لي عمرك ما حتتغيري يا مها ، مشتهيه يوم اجي افضفض ليك أو أحكي ليك بحاجه باسطاني تتفاعلي معاي و تحسسيني اني ما بقول في حاجه فارغه ، آسفه شديد على الإزعاج و طوالي قفلت الخط في وشي و ما أدتني فرصه أبرر ليها ....ما رجعت ليها تاني أصلا عقلي كان مشغول بالمصيبه الجديده دي ، دخلت الفيس تاني لقيتهم ال4 مرسلين لي ، بتاع الفيديو قال لي لمن ألم فيك بتعرفي أنا منو و عايز شنو و الفي الفيديو دا ح يبقى حقيقه......في اللحظه دي يدي بقت ترجف ، قويت قلبي و قلت ما تخافي يا مها أكيد دا فارس و شلتو العواليق عايزين ينتقموا مني ، كلهم عملت ليهم حظر ، تاني ظهروا لي صفحات كتيره وهميه و يبدوا يعلقوا في بوستاتي ب إيموشنات سكاكين و مسدسات ، برضوا حظرت الصفحات دي و قفلت ملفي الشخصي ، بعدها حاولت أهدي نفسي و بعد مسافه هديت و حاولت اتناسى الموضوع ، المهم بعد مرور يومين الناس لسه كانت بتجيب سيرة فارس و أنا ثانيه ما بقيفها عشان اسمعهم بقولوا عنو شنو ، بعد تلات أيام بقيت ما بسمع إسمو حتى ، قلت أحسن ذاتو و أن شاء الله يعفن في السجن ، يوم لمن جيت راجعه من الشغل لقيت ناس أمي جنب الباب و قالوا ماشين بيت ناس فارس عشان طلعوهو من السجن ، مروه قالت لي أرح معانا ، قلت ليها أنا مالي و مالو يطلع من السجن ولا يطلع من القبر ذاتو ما عندي بيهو شغله ، مآب قالت لي انتي ما نصيحه ، المهم هم مشوا و أنا دخلت البيت ، في اليوم البعدو و البعدو ما كان عندي شغل ف من البيت ما طلعت ، اتصلت على شجن بس ما ردت علي فما كررت اتصالي تاني و قلت كدا على راحتها ، تاني ما علي لوم لأني اتصلت عشان أبرر موقفي و هي ما ردت ، على كيفها.....المهم في اليوم البعدو من الصباح جهزت نفسي و طلعت ل شغلي ، لمن وصلت سامعه الاء و نجوى يتبسموا ساي و سامعه الاء قالت حيكون إضافه حقيقيه لينا ، لمن جيت سلمت عليهم قالوا لي طبعاً عامله عمايل في الميديا و بقيتي مشهوره و صورك بقت متداوله ، قلت ليهم انتوا صور سنوية الإذاعة كنتوا منزلنها في صفحاتكم ؟؟ قالوا لي آي في الفيس و الواتس تقريباً كل التيم كان منزلها في صفحاتو و كمان في صفحة الإذاعه ، انتي ناسيه ولا شنو ؟؟
قلت ليها لا لا بس عشان الفتره ديك ما كنت بدخل الفيس كتير و معظم التيم أنا ما مصادقاهم في الفيس عشان كدا بوستاتهم ما بتظهر لي ، نجوى قالت لي عاد ما لأنك رافعه قزاز و ما شايفه زول ، المهم موعد الحلقه بدا خلاص خشي ، استعجلت و مشيت بس سامعه الاء قالت لي في زميل انضم لينا جديد ، قلت ليها خلاص كويس كويس و طوالي مشيت ، لمن دخلت غرفة البث لقيت واحد متيني ضهرو ، قلت معناها دا المذيع الجديد ، قلت ليهو السلام عليكم و طوالي مشيت قعدت و بقيت و شلت الورقه القدامي بسرعه و شفت عنوان الحلقه ، أول ما رفعت راسي كدا شفت فارس قدامي !!!
طبعاً طبعاً دي آخر حاجه ممكن تخطر على بالي !! الحيوان دا الجابو هنا شنو و كيف و متين ذاتو اتعين هنا و على أي أساس !! إنخلعت طبعاً ، زهجت و اتضايقت قدرتي ، قلت ليهو الجابك هنا شنو كمان ، قال لي زمن الحلقه بدا و فعلاً الحلقه كانت باديه و أول ما أخدنا إشارة بدء البث ، فارس قال صباح الخير على كل مستمعينا الأعزاء ، وين ما كنتوا أهلاً وسهلاً بيكم ....مفروض بعدو اتكلم أنا بس بالجد الكلام غلبني و ما قدرت أقول شي رغم أنهم كانوا بنبهوا فيني عشان اتكلم !! فارس اتدارك الموقف و قال موضوع حلقتنا اليوم بتكلم عن الشخصيه الخجوله ، بس قبل ما نستقبل مداخلاتكم خلونا نسمع اللحن الصباحي ،اول ما بدأ اللحن الصباحي الاء و نجوى و أبو ذر مهندس الصوت جوني و قالوا لي خير في شنو عشان لو ما بتقدري تقدمي الحلقه نشوف غيرك أو نخلي فارس يمسكها براهو ....الاء ضحكت و قالت ليهو لا لا يا ابو ذر مها بس شكلها إتخلعت لأنها شافت خطيبها يلي هو فارس و يمكن هو ما كلمها عشان كان عاملها ليها مفاجأه صح يا فارس ؟؟ابتسم و قال ليها ايوه !! طبعاً الاء من الناس الحضروا خطوبتنا بس هم ما عارفين اننا فسخناها ، سكته ما رديت عليهم ، على بال ما اللحن الصباحي يخلص كنت بحاول أكون طبيعيه عشان اتكلم عادي ، المشكله انو الحيوان داك بعاين لي ساي ، متأكده انو مبسوط لأنو بكون مرتاح و فخور بنفسو لمن يعكر لي مزاجي و جا هنا مخصوص عشان يضايقني ، لمن رجع البث ، رحبت بالمستمعين و ذكرتهم بموضوع الحلقه و بعدها اتجاهلت وجود فارس و حسستو اني قاعده براي و ما شايفاهو أساساً ، أول ما خلصنا الحلقه قلت ليهو طبعاً بتموت لو ما عكرت لي مزاجي و طلعت في وشي في كل مكان أمشي ليهو ! ياخ مالك انت ؟؟ ولا عندك باقي مسرحيه عايز تتمها!....ما قال لي شي ، كان مربع يدينو و بعاين لي بكل ثقه ، قلت ليهو مستغربه كيف جابوك من الشارع و بقوك مذيع !! كيف حصلت الحاجه دي أساساً انت واحد عاطل و فاشل و حتفضل فاشل و مكان المناسب هو تحت ضل الحيطه ، انت نكره و وجودك زي عدمك ....قال لي بنفس النظره و تاني ؟؟
قمت من مكاني و طلعت و أنا زهجانه ، مشيت ل الاء و قلت ليها ممكن أفهم دا الجابو هنا شنو ؟؟ قالت لي منو ؟؟ قلت ليها مذيعكم الجديد ....عاينت لي بإستغراب و قالت لي قصدك فارس ؟ قلت ليها ايوه 😊
قالت لي اتعين هنا ، قلت ليها على أي أساس بس فهميني!!؟ بأي شهاده ولا بأي واسطه ؟؟!
نجوى قالت لي و انتي لمن اتعينتي عينوك ب شهاده ؟؟ ما نفس الطريقه الجيتي بيها انتي هو جا بيها ، انتي كنت وحده مثيره للجدل في الميديا و عندك مواضيع معينه بتتكلمي عنها خلتك تبقي مشهوره و دا الخلى الاء تجيبك هنا ، هو زيك بس أبدا ما كان مثير للجدل و محتواها هادف و كل مستخدمين التيك توك و اليوتيوب بعرفوه دا غير موهبتو الكويسه شديد في التقديم ....الاء قالت لي انتي متشكله معاهو ولا شنو ؟؟.....أنا من شدة الزعل ما قدرت ارد ، شلت نفسي بس و طلعت.....أول ما ركبت العربيه كدا و قعدت فارس جا قعد جنبي ، طوالي نزلت من العربيه و ركبت في وحده غيرها ، الطريق كلو قضيتو زعل و زهج ، لمن وصلنا إفريقيا نزلت طوالي و قبل ما أقطع الزلط العواليق داك جا و قال لي دقيقه في عربيه جايه ما تقطعي ، ما اشتغلت بيهو ، ختيت رجلي في الزلط و مشيت رغم اني شايفه العربيه جايه علي بإندفاع ، بقيت اسرع في خطواتي عشان اركب في الممشي الفي النص قبل العربيه تصلني ، بتاع العربيه بقى يضرب لي بوري و انا حسيت المسافه لحد الممشي بقت لي طويله و قربت اجري عديل و أول ما العربيه دي وصلتني أنا بسرعة البرق شلت نفسي و ختيتها في الممشي ! بعدها ختيت يدي على قلبي و اتنفست كويس ، فارس قطع الزلط و جا و بقى يتزهج فيني ! قال لي مجنونه انتي ولا شنو ! هسي لو العربيه دي ضربتك و.....ولا انتظرتو يتم كلامو ، قطعت الزلط المن الناحيه التانيه و مشيت على مواصلات الجامعه ، تاني جا لاحقني و شغال لي أنا بتكلم معاك يا إنسانه !!
إتلفت عليهو بزهج و قلت ليهو انا شايفه انك احسن تمشي تشوف ليك مخرج او منتج يتبنى موهبة التمثيل حقتك دي ، أنا ما ناقصه وجع راس ، احترم نفسك و ياريت تبطل حركاتك الوسخه دي انت و أصحابك لأنو والله العظيم لو الحصل دا اتكرر تاني ح أخليكم تعفنوا في السجن ...عارف انك كل مره بتصدمني !؛ اتوقعتك منك أي حاجه إلا أنك تصل للدرجه دي من الوساخه و الإنحطاط ! للدرجه دي أنا مأزماك و موتراك و عامله ليك مشاكل عشان تفكر تنتقم مني بالطريقه القذره دي !! ما بتخجلوا انتوا ياخ !....المهم خليك عارف اني ما بتهدد لا ب فيديو لا غيرو......قال لي دقيقه انتي بتتكلمي عن شنو ؟
قلت ليهو بنبره عاليه ياخ على الأقل خليك شجاع ، خليك وقح و جرئ بنفس الطريقه الهددتني بيها بالفيديو انت و أصحابك ، معقوله لمن أكون قدامك بتخاف مني للدرجه دي ؟؟
قربني مني و قال لي بتتكلمي عن شنو انتي و فيديو شنو الهددتك بيهو!
ما رديت عليهو إتحركت من جنبو و أنا عايزا أطق من الغضب و الزعل ، تاني لحقني و المره دي بالقوه مسك يدي و لفتني عليهو و قال لي بنبره حاده : قلت ليك فيديو شنو ردي و متين حصل الكلام دا ؟؟
انتفضت و فكيت يدي منو و قلت ليهو اوعك تمد يدك دي تاني و تمسكني بيها ، قال لي آسف ما قصدي بس انتي عصبتيني !قولي لي فيديو شنو دا البتتكلمي عنو و منو الرسلو ليك وين و متين و أساساً فيهو شنو ؟؟
قلت ليهو انت عارف أجوبة الأسئله دي كويس فما تستهبل علي ، المهم الرساله العايزا أوصلها ليك انو لا فيديو لا صوره بتخوفني ، حركاتك البطاله دي كلها بتمثل نفسك المريضه و شخصيتك القذره ....قال لي بغضب ما تجننيني ياخ فيديو شنو يا بت الناس أنا ما رسلت ليك اي فيديو ، قلت ليهو كان انت كان أصحابك ما فرقت ما كلكم نفس درجة الوساخه و القذاره...قلت كدا و طوالي مشيت و المره دي ما وقفت ليهو خالص و طبعاً الناس بتعاين لينا ساي ، ركبت مواصلات الجامعه و طوالي العربيه إتحركت لأنها كانت شاحنه و ناقصها نفر واحد ، المهم العربيه لمن فاتت جامعة الرازي بشويه طقطقت و نزلت جنب الفرن ، أثناء ما أنا ماشه و خاشه ل جوه الحله ، جاتني شافعه من بنات الحلب ديلك ، مدت لي ورقه ، قلت ليها دي شنو ؟؟ قالت لي ما عارفه أدتني ليها و جرت طوالي ، لمن فتحت الورقه لقيت مكتوب فيها : طلعتي ساكنه هنا ، الليله ما تنومي خليك صاحيه عشان ممكن انط ليكم في بيتكم في أي لحظه ....صراحة للحظات إتوترت و بقيت أتلفت في كل الإتجاهات ، بقيت واقفه في مكاني و ما قادره امشي على البيت بعد كلامو دا !!!.....قلت اكيد دا الحيوان داك متفق مع أصحابو و بهددوني ، عايزين يخوفوني ....قلت كدا بس شبه ما اقتنعت بالكلام دا و بقيت متردده ما عارفه اعمل شنو ، لحد ما فارس نزل من العربيه و من شفتو جاي علي طوالي اتحركت من مكاني و مشيت بشارع غير شارع بيتنا ، وقفت في نص الطريق و ما عرفت اعمل شنو ، فارس برضو كان ملاحقني ، تاني جاني و قال لي كلامي معاك ما إنتهى يا بت الناس و من حقي اعرف بتتكلمي عن شنو لأنو حضرة سيادتك متهماني أنا و أصحابي ...
قلت ليهو صراحة مليت من تمثيلك الما ليهو حد دا و طوالي مديت ليهو الورقه و قلت ليهو اوعك تنكر انك موصي أصحابك ....شال الورقه و بقى يقرا فيها.....
يتبع......
