لمن دانيه جات راجعه لقتني هديت شويه ، جابت أكل و عصير ليمون ، قالت لي هاك اشربيهو عشان تهدي شويه ، شربت منو و ختيت الكبايه ، قالت لي طبعاً أنا جعاااانه شديد أرح ناكل و بعدها نتفاهم ، قلت ليها ما جعانه ، قالت لي على كيفك هو ؟؟
أكلي بلا هباله معاك ياخ ! قلت ليها دانيه والله انا ما عايزا !! ما لي نفس ياخ !...قالت لي خلاص انا ذاتي ما عايزا ، أحكي لي الحاصل عليك شنو لأنو بكيك ما ساهل و أكيد الحاصل دا مؤثر عليك شديد....قلت ليها أكلي بالأول الكلام ملحوق ، قالت لي لا ما عايزا ، مش قلتي ما ليك نفس !....اتنهدت و غسلت يدي و دخلتها في الصحن ، المهم بعد ما أكلنا هي شالت الصينيه ، طلعت و جات بكبايتين شاي ببسكويت جلكوز!! قلت ليها دانيه دا شنو دا كل دقيقتين جايبه حاجه ؟!! قالت لي عشان نحكي بمزاج ، المهم اول ما بدينا نشرب شاي قالت لي منتظراك تحكي !! قلت ليها ما عارفه اقول شنو المهم أنسي....قالت لي مشكلتك انك اتعودتي ما تشاركي الناس أدق تفاصيل و كل حاجه بتحصل معاك حتى لو كان الناس ديل أخواتك ! صدقيني الكتمان دا ما حاجه كويسه و مردودو حيكون سلبي كدا ، لازم كل ضيق أو زعل تديهو حقو و تفضفضي ، قلت ليها الموضوع ما مهم يا دانيه أنسيهو....
قالت لي حتى ولو من حقي أعرف شنو البكى أختي !! ....سكته ما إتكلمت....قالت لي للدرجه دي الموضوع صعب عليك !!؟
طبعاً زعلت قدرتها و خلت الشاي !...ختيت الكبايه و بعد مسافه قلت ليها أنا تايهه يا دانيه و ما عارفه الصح شنو !! خايفه اجري ورا قلبي للمره التانيه و اتخذل ! أنا في وسط حرب بين قلبي و عقلي ، قالت لي زي ما إتوقعت فارس هو السبب ...المهم دا بأكد انك بتحبيهو ، يلا نمشي النقطه البعدها يلي هي مشكلتك شنو معاهو ؟؟ ليه ما ناويه تديهو فرصه تانيه ؟؟
قلت ليها زي ما عارفه هو واحد بتاع بنات و متعود على الكذب و ما جادي في حياتو و الأهم يا دانيه اني ما لاقيه ليهو موقف كدا يشفع ليهو و يخليني أديهو فرصه بس مع ذلك مرات بس.....سكته و ما كملت .....قالت لي بتحسي انك عايزاهو و نفسك تديهو فرصه تانيه بس عقلك رافض الحاجه دي صح ؟؟
قلت ليها ايوه لأني بكره الكذب و النفق و ما بحب زول يستغلني أو يستغباني بأمانه أنا ما واثقه فيهو شديد ، بخاف اتخذل والله !💔
قالت لي انتي من نوعية الناس البفكروا بطريقه سلبيه في كل النواحي ....أنا متأكده إنو فارس المره دي ما بكذب عليك و بالجد شكلو حباك و عايزك تديهو فرصه تانيه بس انتي ما أنا عشان تشوفي الشايفاهو عشان كدا أفضل حاجه انك تغيري طريقة تفكيرك دي شويه ، يعني لنفترض فرضا ساي انك أديتيهو فرصه و هو خذلك للمره التانيه و طلع عكس توقعاتك انتي ما حتخسري كتير لأنك بعد دا حتتأكدي تماماً هو شنو و كل رصيدو العندك ح يخلص و حتخليهو عن قناعه و تاني عليهو ما بتتلفتي و صدقيني حتشيليهو من بالك و تتجاوزيهو عاجلاً أم آجلاً و ماف افضل من الإفلات و التخلي البكون عن قناعه لأنو حيطلعك من دوامة التفكير و الصراع البين قلبك و عقلك لأنو لمن العشم ينتهي و ما يكون في مجال تاني للفرص القلب و العقل ح يتوحدوا و قرارهم حيكون واحد و هو الرفض ، بس انا متأكده زي ما شايفاك إنو فارس ما بكذب عليك فأديهو فرصه....
طبعاً كنت ساكته و بعاين ليها و أنا في بالي اجيب ليها سيرة ملاذ بس ما قدرت ....قالت لي مشكلتك بسيطه و محلوله ، أديهو فرصه و خليهو يعمل خطوه جاده و ريحوا نفسكم من وجع القلب دا ....قلت ليها ما مقتنعه....قالت لي اف منك ياخ !! انتي ليه كدا ياخ ؟!!
مها الله يخليك حاولي اتخلصي من طبعك دا ! انتي للأسف عندك أزمة ثقه في كل الناس حتى المقربين منك و أقولها ليك بصراحه ، طبعك و حدتك و حبك للمشاكل نفروا منك ناس كتار و بقى ماف زول بفكر يقرب منك أساساً بس لاحظي رغم عيوبك دي كلها فارس شايفك احسن واحده و عايزك ! أكتر من كدا عايزاهو يثبت ليك إنو بحبك كيف ؟؟
قلت ليها أولا إذا أنا كلي فيني عيوب فهو كلو عيوب و تاني حاجه أنا ما قاعده اعمل مشاكل من فراغ ، أي زول أنا اتشاكلت أو اتناقشت معاهو فهو الغلطان ما أنا و أصلاً البشر ديل لو ما وقفتيهم عند حدهم و رسمتي ليهم حدود ما بمشوا عديل 😊
قالت لي طيب نحنا ذنبنا شنو ؟؟
أنا و باقي أخوانك و قرايبينا غلطنا معاك في شنو ؟؟
مش ملاحظه لطريقة تعاملك معانا و بس قريب دا حتى بقيتي تتعاملي و تتكلمي معانا ؟؟ و بيتنا دا جياتك ليهو بتتعد والله ، طبعاً سكته ساي ....قالت لي لدرجة انو أحمد أخوي كان ماخد موقف منك عشان كدا ما كان بتعامل معاك لأنو حسب تعاملك معانا أوحيتي ليهو انك ما بحبينا عشان أولاد أبوك عشان كدا كان بتعامل برسميه معاك انتي و بس و مع باقي أخواتك تعاملوا غير يمكن أمجد هو الوحيد الكان بتحمل طبعك الحاد و ردودك الجافه عشان هو عكسك تماماً انسان مرح و ما بزعل من الناس بسرعه بس الأكيد انو تحملو ليك ما معناهو إنو ما حصل زعل من تصرفاتك بس هو ما بحب يظهر ليك ، انتي في سبيل انك ترسمي حدود و تعاقبي الناس و تمنعيهم من التعدي عليك و على أهلك نسيتي تستثني الناس البتدافعي عنهم ديل و للأسف نفس معاملتك لعدوك ياها معاملتك لينا .....
مسكت شنطتي و قلت ليها ماشه البيت ، قالت لي يعني بتتهربي صح ؟؟
قلت ليها ما بتهرب و عمرك ما حتفهميني لا انتي لا غيرك ، القساوه الكلكم بتتكلموا عنها دي ما جات من فراغ ولا انتي كنتي عايشه معاي و عارفه تفاصيل يومي عشان تجي تتكلمي معاي و تغلطيني ، ما كنتي معانا يا دانيه لمن الناس كانت بتستغلنا عشان طيبتنا ، ما كنتي معانا يوم جارتنا كان عندها مناسبه و قالت عايزانا نشتغل ليها و نحنا من دون ما نتردد جرينا بيتها و نضفنا ليها و في الآخر قالت اننا سرقنا دهبها و مع ذلك ما تبنا و بمجرد ما جات و قالت لينا معليش لقيت دهبي سامحناها طوالي و بقت كل مره تخلينا نمشي ليها و ننضف و نحنا الهبل مبسوطين ، ما كنتي معانا يا دانيه لمن النسوان كانوا بنادوا أمي في بيوتهم و بخلوها تحننهم و هي عشان طيبتها و حق الجيره ما كانت بتمانع و عادي تحنن 3 و أربع في اليوم ، ما كنتي معانا يا دانيه لمن كنا نساعد كل الناس بالفي و المافي و على حساب نفسنا و لمن نحتاج لزول ما نلقاهم ، تفاصيل كتيره و مواقف و ظلم و قهر اتعرضنا ليها بس من غبائنا و سذاجتنا ما كان شايف إنو البحصل دا استغلال و ذل و إهانه لينا....
قالت لي فاهماك يا مها بس النقطه العايزاك تفهميها إنو ماف زول جبركم تجوا على نفسكم عشان ترضوا الناس ! قلت ليها اكتشفت دا مؤخراً و حالياً دا البعمل فيهو و الما عاجبكم 😊
قالت لي برضو ما فهمتيني.....
التعامل ما خيارين يا إما كعب للآخر يا إما طيب و ساذج للآخر في تعامل وسط ليهو حدود و ضوابط ، حاجه ما بتقدر عليها و ما عايز تعملها طوالي ترفض ، زول طلب منك حاجه و في نفس الوقت عندك حاجه أهم من حاجتو طوالي ترفض ، ماف أي قوه بتقدر تغصبك على شي ، ما تزعلي من كلامي بس انتي كنتي من نوعية الناس الساذجه للطيش و متاحه للغاشي و الماشي و بتحبي تبذل جهد مضاعف في سبيل أنها تساعد في زول هي عارفه إنو الزول دا بستغلها و ما حصل قدم ليها حاجه و في الآخر تقعد تغني ظلموني و تعيش دور المقهوره و المظلومه و تطلع كل الناس كعبين و عايزين يستغلوها 😊 يعني جيرانكم ديل لو ما انتوا براكم الأديتوهم وش زياده و فرشتو ليهم سجاد أحمر و عظمتوهم ما كانوا فكروا يستغلوكم و يجوكم جاريين اول ما يحتاجوا حاجه ، على ما اعتقد يا مها انتوا ماف قوه جبرتكم تشتغلوا خدم للناس ، ايوه عارف كلامي حار بس ضروري تفهمي الحاجه دي.....
طبعاً قربت أبكي بسبب كلامها دا ، قلت ليها بصوت متحشرج : التربيه الغلط الربتنا ليها أمي هي الجبرتنا ، الفهم الخاطئ للتوقير و إحترام الكبير هو الجبرنا ، سذاجتنا الغبيه و قلوبنا النقيه هي الجبرتنا 💔
نحنا خلينا نفسنا ملطشه و عرضه للإستغلال في سبيل انو سيرتنا تكون طيبه و ماف زول يقول اننا ناس ما كويسه أو أهلنا ما عرفوا يربونا 💔
قالت لي ما كعب انو الإنسان يكون طيب الكعب انو يخلي نفسو زي الكتاب الماشي و الجاي يشيل منو من دون مقابل و في أي وقت ، قلت ليها طيييب نحنا غلطانين و أغبياء و بلدين و حالياً أنا قاعده اصلح في غبائنا حق الماضي و أصحح الغلط ....قربت مني و قالت لي لا لا يا مها والله ما قصدي كدا ما تفهميني غلط أنا.....ما إنتظرتها تكمل طوالي شلت شنطتي و طلعت من غرفتها و هي جاريه وراي و بتعتذر مني ، طبعاً أمها على حس صوتا جات طالعه و قالت لينا في شنو ؟
طبعاً أنا كنت ماشه على الباب و ما وقفت خالص ، لمن أكون زعلانه ما بتفاهم مع زول ، أول ما وصلت الباب و فتحتو لقيت أحمد في وشي ، عيوني كانت مليانه دموع ، طبعاً اتخلع لمن شافني عايزا أبكي و وراي دانيه و أمو و هم بتكلموا معاي ، قال لينا خير يا جماعه في شنو ؟؟؟
أنا طوالي طلعت و كنت ماشه ، دانيه عشان كانت لابسه بجامه بس ما طلعت لي في الشارع ، أمو قالت ليهو بري ما عارفنها طلعت فجأه كدا ، أحمد جا لاحقني و وقفني ! قال لي في شنو قولي !...مسحت دموعي و قلت ليهو ولا شي ، قال لي كيف يعني ولا شي و انتي هسي مسحتي دموعك ؟!!.....كدي تعالي معاي و أتحرك قدامي ، قلت ليهو ما راجعه تاني ماشه البيت ، إتلفت و قال لي إنتي متشاكله مع أمي ولا شنو ؟؟
أمو من جنب الباب قالت ليهو بصوت عالي يخربني كان اتكلمت معاها ! بري لا سألتها لا جيت بجنبها اسأل دانيه دي ، دانيه قالت ليهو هي زعلانه مني انا لأنو اتناقشنا في حاجه ، أمها قالت ليها اجي نقاش بسوا ليهو كدي !
أحمد قال ليهم خلاص خشوا جوا و انتي تعالي معاي ! المهم مشيت معاهو بعربيتو الجنب بابهم أول ما فتحت بابها كدا دانيه قالت لي والله ما قاصده يا مها انتي فهمتيني غلط ، أحمد قال ليها خلاص يا دانيه خشوا جوا بعدين بفهم منك الحاصل ، المهم ركبنا الإتنين و هو دور عربيتو ، كنت قايلاهو موديني البيت بس كان ماشي بطريق تاني ، قلت ليهو دقيقه انت ماشي وين ؟؟ قال لي لمن نصل حتعرفي ، قلت ليهو ما عايزا أمشي أي مكان رجعني البيت بس ، قال لي خليك ساكته أحسن ...المهم تاني ما إتكلمت لأني أصلاً زعلانه و ما عندي قدره على الكلام ، المهم نزلنا في مطعم صغير و ظريف كدا ، أول ما قعدنا بقى يشوف في قائمة المأكولات و المشروبات قال لي عايزا شنو ؟؟
قلت ليهو ولا شي ...قال لي غلطان ما كان أسألك ، المهم ح أختار على ذوقي ، المهم طلب على ذوقو هو ، بعد مسافه تلفونو رن ، قال لي ثواني هسي برجع ليك و طوالي طلع و لمن جا راجع جا مع شجن !! طبعاً بقيت أعاين ليهم الإتنين ، لمن وصلتني سلمت علي و قالت لي خربتي لينا موعدنا و ضحكوا الإتنين و أنا فاتحه خشمي و بعاين ليهم بإستغراب !!؟
أحمد قال لي معقوله شجن ما حاكيه ليك ولا بس اتفاجأتي لمن شفتيها ؟؟
قلت ليهو نعم ؟؟
ضحك و قال لي معناها جد جد ما عارفه ، قلت ليهو ما عارفه شنو ؟؟
شجن قالت لي يا هبله يعني اي حاجه إلا يشرحوها ليك بالشده و الضمه!😂😭😂😭😂😭المهم يعني أنا و الأستاذ دا قريباً ح نتخطب !
طبعاً اتفاجأت لأنها ما حصل جابت لي سيره ! مع اني حكيت ليها عن فارس بس هي ما جابت لي سيرتها هي و أحمد يعني كأني غريبه !!
قلت ليها ربنا يهنيكم و سكته و طول القعده كنت معظم الوقت ساكته و ما بتكلم إلا يسألوني يعني هم بس الكانوا بتونسوا....المهم قلت لأحمد أنا ح أ مشي بعد دا قال لي بدري ياخ خليك معانا عشان نطلع التلاته سوا و بعدين أنا لسه ما اتكلمت معاك بسبب بكاك قبيل ! شجن قالت ليهو كانت بتبكي ؟؟ ليييه ؟
قال ليها شكلها اتناقشت مع دانيه و زعلت ، قالت ليهو لكن هي ما بتبكي بسبب نقاش ! ضحك و قال ليها انتوا بنات و بتفهموا مع بعض عشان كدا اتكلمي معاها و افهمي الحاصل ح أرجع ليكم بعد شويه ....أول ما هو مشى ، شجن قعدتني و قالت لي في شنو يا مها أحكي لي !!
في قلبي قلت ليها انتي حكيتي لي ؟؟!....قلت ليها ماف حاجه ! قالت لي ما علي أنا ، أيوه انتي قد تكوني ما بتعرفي تفاصيلي شديد بس انا حافظاك و عارفاك كويس.....حسيت انو اليوم دا تحديداً كل الناس كانت بتنتقدني و توريني عيوبي بطريقه أو بأخرى!!
لمن ما رديت قالت لي بسبب فارس صحيح ؟؟ قلت ليها لا ..قالت لي زعل و بكى و نفسنة الحب دي بتكون واضحه على فكره فأحكي عمل ليك شنو ؟؟!!
طبعاً ما قدرت أسكت ليها كانت مصره و محاصراني من كل الجوانب و متأكده إنو فارس هو السبب ، بعد تردد حكيت ليها .....قالت لي يعني انتي هسي زعلانه عشان مشيتي ليهو في المستشفى و ما قدر جيتك لأنو أمي كانت مرقده و حالتو حاله خاصة بعد ما فقد أبوهو قبل كدا ؟؟!
من كل عقلك يا مها ؟
قلت ليها ما تندميني لأني حكيت ليك يا شجن ! قالت لي ما عايزا أندمك ! أنا بتحاور معاك و عايزا اصل معاك لسبب منطقي و مبرر لزعلك دا ! و غير كدا يا مها انتي زول رفضيهو مية مره و بعد ما فتر من الجري وراك متوقعاهو بكل بساطه يتعامل معاك عادي ! و أصلا الحاله الهو كان فيها ما بتسمح ليهو يتفاعل مع أي زول ! يعني زول مرقده و حيعملوا ليها عمليه عايزاهو يخلي دا كلو و يثبت ليك إنو ممنون ليك لأنك جيتيهو ؟ لا و كمان عايزاهو يثبتو ليك كيف يعني ينطط و ينزل يبوس رجليك لأنك نزلت من برجك العالي و جيتيهو ؟!
طبعاً سكته و بقيت أعاين ليها بخلعه ! قالت ليها مالكم انتوا الليله ؟! قالت لي مالنا ؟؟! شكلها دانيه برضو غلطتك عشان كدا زعلتي منها ، للأسف يا مها انتي ما بتزعلي لمن الناس تواجهك بحقيقتك ، بتزعلي لمن تكتشفي انك غلط لأنك طول عمرك مقتنعه بفكرة انك صح و الباقين غلط ، شيلي غشاوة الغرور و شوفة النفس دي من عيونك و شوفي عيوبك قبل ما الناس تأشر ليك عليها و صدقيني فارس ما غلط عليك...
طبعاً تاااااني زعلت و إتمليت ، شلت شنطتي بس و قلت ليها ندمتوني لأني جيت و حكيت ليكم ، تاني لو ح أنفجر عديل من الكتمان ما ح أفتح خشمي ، قالت لي انتي مشكلتك انك عايزا كل الناس تصفق ليك و تقيف معاك على الغلط و ماف زول يفتح خشمو و يقول ليك انتي غلط بس دي الحقيقه يا مها و لازم انك تتقبليها يعني ما عيب الواحد يقول أنا غلطان ! كلنا بشر و بنغلط !!
طبعاً زعلتني زياده و كنت شايفاهم كلهم غلطانين إلا أنا ! يعني كأنهم اليوم اتفقوا علي الإتنين مع فارس و قرروا يسمعوني الكلام دا كلو !!....ما وقفت كتير شلت شنطتي و طلعت طوالي و لمن شفت أحمد من بعيد غيرت طريق و على طول مشيت الظلط و أول عربيه جات ركبتها و مشيت ، طبعاً طول الطريق أحمد كان بضرب لي بس ما رديت عليهو ، فصل كدا شجن إتصلت علي بس برضو ما رديت عليها ، لمن وصلت إفريقيا دانيه اتصلت ، قفلت التلفون و دخلتو في شنطتي ، المهم من هناك ركبت مواصلات الجامعه و مشيت البيت ، أمي قالت لي بقيتي تتأخري ! قلت ليهو أيوه بسبب الشغل ، المهم تاني يوم ناس أمي مشوا لأم فارس في المستشفى عشان حيعملوا ليها العمليه ، ملاذ ذاتا مشت معاهم ، بقيت قاعده براي في البيت لحد ما هيثم جا الضهر كدا و بعدوطوالي مآب جات ، هو طلع و بقينا قاعدين أنا و مآب برانا ، طبعاً بعد الضهر حتى فتحت تلفوني و لقيت مكالمات احمد و شجن و دانيه و داليا المهم ما رجعت ليهم و هم تاني ما إتصلوا ، المهم بعد 3 أيام من الكلام دا أبوي جانا مع مرتو نهله ، أنا جيت سلمت عليهم بس و رجعت دخلت الأوضه طبعاً من اليوم داك زعلانه من أبوي ، بعد مسافه أمي نادتني ، لمن مشيت ليهم قالت لي انتي صحي اتناقشتي مع دانيه ؟؟
قلت ليها متين دا ما متذكره !😊 نهله قالت لي يوم داك لمن جيتينا و فجأه قعدتي تتبكي و طلعت الشارع إلا احمد دا لحقك و والله يا جماعه دانيه تشيل و تعتذر منها و هي عليها ما إتلفتت و اليوم دانيه لو ما عندها شغل والله كان جات معانا عشان تعتذر تاني ، بنات قلوبهن رهيفه والله ما برضن يزعلن زول لكن النصيحه بتكم دي قاسيه القساوه الوااااحده دي ، أنا و دانيه و أحمد التلاته كنا بنتكلم معاها و عايزين نفهم منها الحاصل و هي علي ما إتلفتت....
طبعاً ختتني في موقف بايخ و حته ضيقه شديد !! يعني هسي اقول ليهم كنت ببكي ليه و هم عارفين انو دموعي ما بتنزل بالساهل !!؟
قلت ليها ما كان في شي مهم مجرد نقاش عادي ، قالت لي أجي ؟!! نقاش بزعلو ليهو قدر دا !؟ بعدين انتي زعلتي من دانيه يعني على الأقل كنتي تردي علي لمن كنت بسألك مالك !؟
قلت ليها معليش طيب..... طبعاً عاينت لي مرتين عشان تصدق اني قلت ليها معليش و أنا قلتها عشان أنهي نقاشها دا ، أبوي قال ليها حصل خير و بعدين هم اخوات عادي يزعلوا من بعض ما تكبروا الموضوع ....المهم أنا ما جاي للسبب دا ،عندي معاك موضوع تاني..... طبعاً صلحت قعدتي و استغربت ! أمي قالت ليهو اللهم اجعلو خير في شنو تاني ؟؟
عاين لي و قال لي في زول إتقدم ليك و قبل ما تقولي رايك خليك عارفه اني موافق عليهو و هو المناسب ليك ... طبعاً لحظات و أنا بحاول استوعب في كلامو !! نهله قالت لي وافقي ساي أخواتك دانيه و داليا برضو أبوك جاب ليهن عرسان ، عرسن سااااي و خلن الفوضى دي ....استغربت فيها !! يعني الحاصل شنو لمن أبوي فجأه كدا يقرر يجيب لينا ال3 عرسان و يفرضهم علينا ؟!!!
خليت دا كلو و ركزت في أهم سؤال ! قلت ليهو دا منو يا أبوي؟؟؟
جميع الأشياء التي مرّت في حياتي لها قيمة وتركت أثراً ما بقلبي ، لا أتذكر أنني يوماً تباهَيت بترك شيء بدم بارد دون مبالاة حتى ، لم أتجاوز شيء دونَ إحساس دونَ تأثّر ، أنا من الذين يتحدّثون عن كل شيء انتهى بعدَ عَيشهِ مدة طويلة معهم ، لا شيء كانَ تركُه سهلاً بالنسبة لي حتى لو أنني من اختَرتُ ذلك ، جميع النهايات أوجعتني وآلمتني بطريقة مختلفة ، بكيت وانهرتُ معها ..لا شيء في حياتنا جميعاً تأتي نهايته عادية أبداً..
لكاتبه
يتبع.......
