طبعاً كلنا قمنا جاريين على المظله ، أول ما وصلنا أبوي طوالي قام طالع و أحمد وراهو و نحنا جاريين وراهم لحد الباب خايفين و بنسأل في أبوي بس ما رد على زول فينا ، ركب مع أحمد و مشوا و خلونا وراهم ميتين من الخوف و أنا قلبي اتآكل من شدة الخوف و إحساس الندم 💔
طبعاً كلنا كنا واقفين جنب الباب و مقلقين و عمتي دي تسكلب ساي التقول في زول مات ، دخلت جوه بسرعه جبت تلفوني و إتصلت على أبوي بس ما رد علي خليتو و إتصلت على أحمد بس برضو ما رد ،عمتي نوره فتحت تلفونها و اتصلت على ناس دانيه و خوفتهم زياده ، في نفس اللحظات داليا اتصلت علي ، لمن رديت عليها بقت تتكلم معاي بخوف و تسألني عن الحاصل و أنا ذاتي كنت مقلقه و خايفه اكتر منها فما قدرت اتكلم معاها اكتر ف بس قلت ليها ما عارفه ما عارفه حاجه يا داليا قالت لي هسي بنجيكم و قفلت الخط ، طبعاً جيرانا على صوت جوطتنا و كلامنا جوا مارقين و بقوا يسألونا عن الحاصل ، أمي دي بس كانت خاته يدها على قلبها بس و بتدعي ، عمتي حكت ليهم الحصل ف بقوا واقفين معانا و كلو واحد بقول ليهو تخمين بقلقونا بيهو زياده ، شويه كدا جات أم فارس ماره بينا فلمن شافتنا كلنا واقفين جنب الباب ، جات و قالت لينا مالكن يا نسوان واقفات كدا ها في شنو ؟؟؟
النسوان حكوا ليها ، قلت كر عليها ما يكون كتلوها أو عملوا فيها حاجه ... طبعاً في اللحظه دي قربت أخنقها بس مسكت نفسي ،وقفت معانا شويه كدا و مشت ، بعد دقيقتين كدا فارس جا ماشي علينا ، لمن وصلنا قال لي ماف خبر ؟؟ هزيت ليهو راسي بمعنى لا ! مشى على أمي و قال ليها ما تقلقي أن شاء الله مروه حترجع ليكم سالمه ، ملاذ قالت ليهو الناس ديل عايزين مننا شنو عارف انهم قبيل......الخ و حكت ليهو الحاصل ، قال لي برضو متأكد انها حترجع سالمه انتوا بس أدعوا ليها و أدخلوا جوه لأنو وقفتكم دا ما حلوه حتوتروا روحكم و الناس معاكم و.....قبل ما يتم كلامو خليل جا ، قال لينا السلام عليكم ، لمن ردينا ليهو السلام قال لينا بإستغراب خير في شنو يخوانا ؟؟ طبعاً النسوان حكوا ليهو فطوالي عاين لي بعين عتاب كدا! قال لي طيب أبوك و أخوك مشوا وين ؟؟قلت ليهو ما عارفه ، قال لي تمام ح اتابع الموضوع دا ، خشوا جوه يا جماعه و فعلاً دخلنا جوه و هو ذاتو دخل معانا ، طلع تلفون و مشى عمل مكالمه و جانا راجع و قال لي ح أمشي اشوف أبوك و أخوك و أجي.....المهم هو طلع و نحنا بقينا قاعدين على أعصابنا و النسوان ديل داخلات و طالعات من بيتنا ، بعد مسافه كدا ، سمعنا صوت عربيه ، كلنا جرينا على الباب ، أول ما فتحناهو لقينا أبوي و أحمد و مروه و فارس و خليل ذاتهم كانوا معاهم ، أمي ما صدقت مروه واقفه قدامهم حضنتها و قعدت تبكي ، أبوي قال لينا دخلونا جوه ما تقيفوا لينا كدا ، فعلاً دخلنا جوه و بقينا نسأل مروه عن الحاصل ليها و أبوي و أحمد لقاها وين ف العرفناهو إنها لمن نزلت من المواصلات و دخلت الحله نفس أصحاب العربيه الخوفوا ملاذ و مآب لمن لقوا الشارع فاضي بقوا يلفوا حولينها بعربيتهم فهي طوالي طلعت تلفونها و إتصلت على أبوي و أول ما أبوي فتح الخط جوها بعربيتهم و خطفوا منها التلفون و رموهو على الأرض فهي طوالي قامت جاريه و بقت تصرخ بأعلى حس عندها و هم جاريين وراها و طبعاً العربيه اسرع من الإنسان المهم لمن خلاص قربوا منها هي لفت طوالي و أول بيت لقتوا لزت الباب و دخلت و قفلتو ، طبعاً ناس البيت اتهجموا و ديلك ما قدروا يدخلوا ليها جوه بيت الناس ، المهم حكت لناس البيت الحاصل و كانوا كلهم بنات و معاهم أمهم ما معاهم راجل ، كانوا كل دقيقتين بعاينوا للشارع بقدة الباب و أصحاب العربيه لسه كانوا منتظرنها و ما مشوا إلا بعد مسافه بس هي نهاي ما طلعت ، المهم صاحب البيت بقى يسألها هي بت منو و ساكنه وين وصفت ليهو بيتنا بس خافت تطلع و تلقاهم تاني و ناس البيت ذاتهم خافوا على نفسهم عشان كدا ماف وحده قالت ليها أرح أوديك بيتكم ، المهم بعدها جابوا ليها تلفون و هي كويس انو حافظه رقم أبوي فطوالي اتصلت عليهو ، هو في الأثناء دا كان مشوا بعيد على جامعة الرازي لأنها آخر مره قالت إنها هناك ، المهم رجعوا تاني و دخلوا الحله و بقوا يفتشوا على البيت لحد ما لقوهو و جابوها و طبعاً اتلاقوا مع فارس و خليل جنب الميدان و هم جوا معاهم ، أمي قالت حسبي الله و نعم الوكيل فيهم عايزين مننا شنو ديل كمان ، خليل قال ليهم يا جماعه اطمنوا الناس ديل خلال ساعات بس حيكونوا في السجن لأنو أساساً في بلاغ مفتوح ضدهم ، طبعاً في اللحظه دي أنا نططت عيوني و ناس البيت ذاتهم إستغربوا ، أبوي قال ليهو شنو ؟؟ منو الفتح بلاغ فيهم قبل كدا ؟؟
خليل عاين لي و قال لي والله قايلك كلمتيهم !! طبعاً كلهم عاينوا لي !! أحمد قال ليهو تكلمنا بشنو ؟؟
قبل ما زول يقول حاجه تانيه دانيه و داليا و أمهم و أمجد جوا داخلين مخلوعين و أول ما وصلونا بقوا يقولوا في شنو يا جماعه الحصل شنو ل مروه !!
عمتي حكت ليهم الحصل ، أنا و خليل بقينا نعاين لبعض ، ناس البيت حسوا انو في حاجه و عشان معانا نسوان ماف زول كرر السؤال تاني ، بس اول ما النسوان مشوا أبوي عاين لي ، فارس اظنو فهم انو نحنا كنا منتظرين الناس يمشوا حتى نتكلم ، فطوالي استأذن و طلع 💔
أبوي و أحمد قالوا ل خليل اتكلم في شنو ؟؟ فهو عاين لي مسافه بعدها حكى ليهم .... طبعاً عمتي جاطت قدرتها و قالت لي دا كلو بسببك انتي أصلا ماف زول غيرك بجيب للناس الكفاوي و البلاوي لو هم بنتقموا منك انتي براك ما مشكله لكن أخواتك ديل ذنبهم شنو يتحملوا نتيجة تهورك و حشريتك ....أبوي قال لي بنبره حاده الكلام دا صح ؟؟
سكته ما رديت ، قال لي بنهره صح ولا لا بتكلم معاك أنا ؟؟ هز ليهو راسي و انا منزله عيوني ، غضب غضب ما عادي و جاط فيني قدرتوا و قال لي ليه من البدايه ما اتكلمتي حتى لمن كانوا بهددوك بأخوانك ما اتكلمتي ليه ؟؟ زوجة أبوي قالت لي النصيحه انتي غلطانه ، هسي لو كان حصل لوحده من أخواتك ديل حاجه كنت حتعملي شنو ؟؟ فرضا انك ما بتخافي على نفسك لكن معقوله ما بتخافي على أخواتك ديل ؟؟ ما عارفه كيف كنتي عايشه مطمنه و انتي عارفه انو في ناس بهددوك بأخواتك ؟!! مصنوعه من شنو انتي يا بت ؟!!
أمي من قبيل كانت ساكته و بتعاين لي بس و فجأه قامت و جات لحد عندي و ضربتني كف و قالت لي أنا مش مية مره قلت ليك ما تحشري نفسك في حاجه ما بتخصك ؟؟
عمتي قالت لأبوي بتك دي لو قعدت في الأرض و ربيتها ما كان دي عمايلها ، أحمد قال لي إتوقعت منك أي حاجه إلا تصرف زي دا ، أمجد قال ليهم خلاص يا جماعه براحه عليها ، خليل ليهم أنا ما قلت ليكم كدا عشان تضربوها و هي لو بالجد ما كانت خايفه على أخواتها ما كان مشت معاي و فتحنا فيهم بلاغ ..... طبعا خليل وراهم كل الحقيقه إلا الفيديو الكانوا بهددوني بيهو ، خليل عاين لي و قال لي آسف والله ما عارف اقول ليك شنو و يا جماعه بأمانه كدا انتوا حسستوني بالذنب لأني اتكلمت ، والله ما كنت متوقع يحصل الحصل دا ..... طبعاً أنا ما حصل بكيت قدام زول بس المره دي ما قدرت أمسك دموعي ف بقت تنزل زي المطر ....خليتهم واقفين و مشيت دخلت الأوضه و قفلتها علي و قعدت أبكي قدرتي من جهه لأني السبب في الحصل مع أخواتي و من جهه من الكف و الإهانه و التنهير الإتعرضت ليهو ، و أنا ببكي كدا تلفوني رن ، ما شفت المتصل منو لمن قعد يرن كتير رفعتو و لقيت المتصل فارس ، ما رديت عليهو بس لمن كرر الإتصال جاني إحساس إنو أرد عليهو ، فتحت الخط و سكته لأنو لو إتكلمت حيكون واضح اني ببكي ، قال لي عارف انو أهلك حيكون شاكلوك و ضايقوك و أكيد انتي هسي زعلانه شديد و يمكن بتبكي ، بس أعذري اهلك لأنو ردة فعلهم طبيعيه في النهايه انتي بتهم و زي ما بخافوا على أخواتك بخافوا عليك انتي كمان ف عشان كدا حيكونوا متضايقين شديد و زعلانين لأنك ما ختيتيهم في الصوره و كلمتيهم و عرضتي حياتك في المرتبه الأولى قبل أخواتك للخطر ، و أكيد أبوك و أخوانك الأولاد زعلهم حيكون أكبر لأنك كلمتي الغريب قبل القريب! ....قلت ليهو بصوت باكي بس انا ما اتخليت الأمور تصل للوضع دا و ما كلمتهم خوفاً من ردة فعلهم ، قال لي كدا كدا دي كانت حتكون ردة فعلهم المهم انك تعذريهم .....الإتنين سكتنا مسافه بعدها هو قال لي آسف لأني ما قدرت اعمل حاجه و لأني ما وقفت معاك و قدمت ليك حاجه 💔
سكته ما قلت ليهو حاجه ، بعد مسافه قفل الخط بس حسيت براحه شويه و هديت و مسحت دموعي بس خالص ما طلعت من الأوضه و ما وريتهم وشي.....المهم في اليوم البعدو خليل جا و كلمهم انو الشرطه قبضت الناس دي ، أبوي و أخواني مشوا معاهو لقسم الشرطه المهم في النهايه طلع دا نفس الرجال البشعت بيهو و نزلت صورتو في الفيس ، طلعوا كلهم شبكه إجراميه و قبليها عملوا جرائم كتيره و دا السهل انو يتسجنوا بسهوله .....المهم عديت اسبوعين و أنا ما بتكلم مع أهلي و هم ما معبرني ، بعدها بإسبوع عثمان جا مع أبوهو و عمتي نوره عشان يتكلموا بخصوص عرسو هو و مروه ، مع اني كنت مخططه اتكلم مع عثمان دا و اشوف فهمو شنو بس بعد الحصل ما اتكلمت مع زول و ما كان لي نفس اقابل زول ، ايوه انا غلطانه بس كمان كلامهم كان جارح خاصة كلام عمتي نوره ، المهم اتفقوا و حددوا موعد عرسهم الحيكون بعد شهر بعدها ناس البيت بدوا التجهيزات و دانيه و داليا جوا قعدوا معانا و طبعاً أنا ما شغاله بيهم بطلع بمشي شغلي بكون قاصده أتأخر حتى إني بتغدا برا عشان أجي زولة نوم بس ، يوم لمن جيت راجعه بالعصريه كدا لقيتهم قاعدين و ملمومين ما سلمت عليهم ولا حاجه لمن جيت بجنبهم داليا قالت لي يا بت بايتين معاك نحنا ؟! ايوه فعلاً نحنا بايتين معاكم لينا كم يوم بس برضو سلموا علينا ، دانيه قالت لي انتي لسه زعلانه ؟؟ عمتي نوره قالت ليهم خلوها تزعل تطرشق كمان تغلط و لمن يتكلموا معاها تعمل ليها حالة زعل !! خلوها تطق أن شاء الله ! دانيه قالت لي ما تشتغلي بكلام عمتي دي ، معقوله ما تشتغلي معانا في عرس أختك ! عمتي نوره قالت ليها شغلنا برانا بنقدر عليهو و حاجات عرس ولدي ما بتغلبني اعملها ....قلت ليها شفتي مش عرس ولدك دا لا عايزا احضرو لا عايز أسمع بيهو ، اعتبروني ما قاعده معاكم ، طبعاً امي و مروه زعلوا قدرتهم و أمي جات لاحقاني و هو بتجوط زي ، قالت لي شناة القلب دي إنتي جايباها من وين ؟؟ ياخ قولي كل الناس دي كفتتك عديل معقوله بسببهم تقاطعي أختك و عرسها ما تدخلي يدك فيهو و تقولي ما عايزا تحضريهو ! قلبك الأسود دا جبتيهو من وين إنتي ؟؟ ما رديت عليها سكته بس ، جات مروه داخله و قالت ليها خليها على راحتها ماف زول يسألها ، طبعاً هي قربت تبكي بس مسكت نفسها ، بعد ما هم طلعوا دانيه جات و قالت لي يغسي عليك يا مها مروه دي ذنبها شنو ؟؟ المهم حضنتني و قعدت تحنس فيني و تتكلم معاي و توعيني لحد ما وافقت اني أشارك معاهم في تجهيزات العرس و كلو عشان مروه بس ، أما الباقين ما عندي بيهم شغله ، المهم فعلاً بدينا تجهيزات و بقينا طالعين و نازلين حتى اخترنا قصات فساتينا و الإكسسوارات و اخترنا حنعمل الميك عند منو ، طبعاً بقيتنا بقى مليان ناس جونا من البلد و حفلات الدلاليك بدت ، بنساهر لحد الصباح بالدلوكه ، المهم الأجواء في بيتنا بقت عباره عن بهجه و سرور ، طبعاً عمتو إجلال الكان عامله فيها زعلانه أول ما سمعت بالعرس جات هي و أولادها سلوى و حسين و حامد من بيت ناس دانيه بس مشت قعدت في بيت عمتي نوره نظام لسه ماخده موقف ، طبعاً هي خلصت مقابلات من زمان و مفروض يرجعوا البلد بس شكلو البندر دي على قولها عجبتهم و مفكرين يقعدوا فيها ، طبعاً شجن ذاتا بقت تجينا كل يوم و مرات بتبيت معانا و ناس أمها جونا تلات مرات ، المهم يوم انا و دانيه و شجن كنا راجعين من السوق ، جنب الميدان بالضبط كان في كميه من الأولاد متوزعين في الشارع ، دانيه ضربتني في كتفي و قالت لي شوفي منو القاعد يعاين ليك ، لمن إتلفت لقيتو دا فارس ! طبعاً طولت ما شفتو ! حسيت انو لي سنه عديل ما شفتو ، شجن قالت لي حيييا أنا من سماحة الولد دا ، دانيه ضربتها ضربه خفيفها و قالت ليها احسن تحترمي نفسك دا راجل أختنا ، ضحكت و قالت ليها بس أختكم ما عايزاهو ، دانيه قالت ليها منو القال ليك كدا ؟؟ اطمني هي عامله تقيله ساي بس الحب الأول عمرو ما بتبدل ، طبعاً دا كلو و نحنا ماشين و أنا سامعه كلامهم بس لا قدرت أثبتو لا قدرت أنفيهو ، و أنا منزله راسي كدا فجأه سمعت صوت بقول السلام عليكم ، لمن رفعت راسي لقيتو خليل ، ردينا ليهو السلام ، قال لينا كيفكم ؟ قلنا ليهو تمام الحمدلله ، طبعاً أنا إتوترت لأنو من نظراتو دي عرفتو مالو ، قال لي ممكن اتكلم معاك دقايق بس ؟؟ شجن قالت ليهو طوالي و اتقدموا لينا هي و دانيه ، قال لي ما شايفه نفسك طولتي ؟؟؟
مها أنا زول جادي معاك و جيتك بالباب لأني شاريك و مقدرك و عارف قيمتك ، يعني أنا لحد الآن ما لاقي سبب يخليك تاخدي المده دي كلها!! خليك صريحه لو شايفه فيني عيب قولي لي عادي ، قلت ليها لا لا يا خليل ! قال لي طيب في شنو ؟؟ قلت ليهو ما عارفه والله راسي جايط شديد و حالياً مشغوله بعرس مروه أختي و ما قادره اتخذ أي قرار في الوقت الحالي ، قال لي يعني عايزا مده تانيه ؟؟ قلت ليهو أيوه ، قال لي تمام و مشى ، حسيتو زعل بس انا بالجد ما قادره اديهو رد هسي ، بعد ما مشى إتلفت وراي لقيت فارس بعاين لي و ملامحو متغيره شديد ، شجن و دانيه الشمار حرقهم ف جوني جاريين و قالوا لي خليل عايز منك شنو ؟؟
سكته ما رديت ، شجن قالت لي اوعى يكون الفي بالي لأنو جيتو دي ياها الجيه الواحده الكلنا بنعرفها !...برضو ما رديت ، دانيه قالت لي ما تخليني اخنقك انطقي ياخ في شنو ....بعد مسافه حركت لساني و قلت ليهم خليل قبل كدا فاتحني في موضوع الزواج و أداني مده كافيه و لمن طولت جا يسمع مني الرد .... طبعاً الإتنين ختوا يدينهم على خشومهم !! دانيه قالت لي واااي العارض دا جا منو وين كمان !! شجن قالت زي ما إتوقعت ! أصلاً عيونو فاضحاهو لكن يا مها فارس يحبك أكتر منو و على فكره طول الأسابيع الفاتت دي كان بسألنا عنك ، مره بسألني أنا و مره دانيه ....حرام والله هو ما بستاهل ، دانيه قالت لي قلتي ليهو شنو ؟
قلت ليها قلت ليهو ما عارفه و حالياً ما بقدر اديك رد ، شجن قالت لي غبيه كنتي ترفضي طوالي ، دانيه قالت لي انتي خليل دا عايزاهو ؟؟؟
غمضت عيوني عشان أمنع دموعي لأني تايهه شديد و ما عارفه الصح شنو و لازم اعمل شنو ، قلت ليهم اقفلوا السيره دي و طوالي مشيت منهم ما وقفت إلا لمن وصلت البيت ، دخلت و خليت ليهم الباب فاتح ، طبعاً هم جوا راجعين بعد مسافه و حاولوا يتكلموا معاي في الموضوع بس ما أديتهم فرصه ...مشوا شمروا ل داليا و مروه ، طبعاً ما سألوني إلا لمن فضوا لي بليل الساعه 11 جوا كلهم إتلموا لي في سريري ، داليا قالت لي خليل دا ما فيهو أي عيب وافقي عليهو و انتي مغمضه ! دانيه قالت لي لو ما بتحبيهو اوعك توافقي عليهو ، شجن قالت لي خليل شنو عليك الله ما تركزي معاهو ، ماف زول يستاهلك غير فارس ، داليا قالت ليها والله ماف مقارنه بين خليل و فارس بتاعكم دا ، دانيه قالت لي و بعدين تعالي هنا يا مها انتي الشباب ديل عامله ليهم شنو الإتنين جاريين وراك كدا ؟؟ 😂😂
داليا قالت ليها أتعلمي يا خفيفه يا شاي البكى ، شجن قالت ليها بالجد والله ، مها بتجوط و باعلي صوتها و بتنكد حياة الناس و مع ذلك الأولاد بجروا وراها و نحنا اللطيفات الرقيقات ماف زول شغال بين 😭😭😂😂
فجأه كدا جات وحده قريبتنا جات من البلد ظريفه كدا و من جات عامله لينا جوا في البيت ، هي مره لا كبيره شديد لا صغيره ، قالت لينا معقوله تفتحوا موضوع زي دا و ما تنادوني يا بنوت ، جات قعدت جنبي في نص السرير و قالت لينا النحدثكن : الأولاد بموتوا و بجروا ورا البت التقيله الما شغاله بزول و أهم حاجه عندهم انو البت تكون محترمه نفسها و مقيماها و ما عندها علاقه مع الأولاد ، بحترموا شديد البت الما بتختلط بالأولاد و عشان فلانه المزعجه دي ما شغاله بزول هم مركزين معاها ، المهم أنا الشابين الإتكلمتوا عنهم ديل ما بعرفهم لكن يا زوله شوفي نفسك عايزا منو و منو منهم بناسبك ما ح اقول ليك قارني بيناتهم الإتنين ، المقارنه دي في حالة انك ما مايله لواحد منهم لكن إذا في واحد من الإتنين ديل في بالك طوالي وافقي عليهو....
داليا قالت لي صدقيني يا مها خليل هو الخيار الأنسب خلقه و أخلاق و زول مثقف و مهندم و بتحمل المسؤوليه و عندو قروش عكس العاطل داك و بعدين تعالي هنا انتي مش فركشتي خطوبتك من فارس ؟ في شنو البخليك تحتاري بينو و بين خليل ؟؟ ....
قلت ليهم ما عارفه ماااا عااااارفه ، اف منكم ياخ ، خلوني في حالي عايزا أنوم أنا ، ملاذ جات و قالت ل داليا الشاي بتاعك دا دفق ، داليا قالت ليها ياخ ما كنتي تكبيهو بالمره مع اللبن و تجيبيهو لينا !!.....دانيه قالت ليها بالمناسبه مالك انتي يا ملاذ بقيتي لا سلام لا كلام !! بتحبي ولا شنو ؟؟ مروه ضربتها على راسها و قالت ليها ما تدخلي ليها كلام زي دا في راسها دي نفسيات امتحانات بس ،داليا قالت ليهم ما تركزوا مع دانيه دي أصلا هي غير الحب ما عندها حاجه ، المهم ماشه اجيب ليكم شاي لبن ! قلت ليها شاي زي الزمن دا ! قالت لي ايوه مالو !!
المهم جابت الشاي و معاهو بسكويت ، شربت قبليهم و قلت ليهم عايزا أنوم و طوالي إتغطيت و إتلفت على الحيطه و أنا حاسه بألم في قلبي 💔 حاسه نفسي في مكان أضيق من خرم الإبره ، غمضت عيوني كدا و فتحتهم لمن شفت صورة خليل و فارس و ملاذ في وشي ! حاسي عقلي ح يطق ، ما بقدر أغض نظر عن ملاذ و اعمل نفسي ما عارفه حاجه ، ما بقدر أكون زيها و أعاين لحاجه هي عايزاها ، ضميري ما بسمح لي والله ، المهم ما نمت كنت صاحيه و عارفه انهم كلهم طلعوا برا عشان ناويين يساهروا لسه ، نزلت من السرير و كنت ماشه اقفل باب الأوضه و اللمبه ، أول ما وصلت الباب كدا ملاذ جات داخله ، كانت بتعاين لي بنظره مليانه غضب و زعل ، قالت لي انتي ما بترتاحي إلا تسببي لينا ضرر صح ؟؟ يعني ما لقيتي غير فارس ؟؟ عايزا توجعي قلبي كم مره يعني ؟؟ أول مره سكته ز اتحملت كل الكان بحصل قدامي من يوم خطوبتكم ، و عشان انتي اختي ما قدرت اعمل حاجه و أصارحك ، و ما لمتك لأنك ما كنتي عارفه حاجه بس هسي البوجع شديد انك عارفه و مع ذلك لسه بتفكري في فارس حتى انك حرضتيهو علي و جبرتيهو يقول القالو لي و كلو بسبب أنانيتك ! فارس دا ما عجبك إلا لمن أنا حبيتو ؟ و لعلمك أنا بحبو من زمان من لمن كنتي بتكرهيهو و ما بتطيقي تسمعي اسمو و استحاله انتي ما تكوني ملاحظه لتصرفاتي و استحاله ما تكوني فهمتي اني بحب فارس.... طبعاً كلامها كان زي السكين على قلبي 💔 بعد مسافه قدرت أحرك لساني و قلت ليها فارس ما شافع عشان أحرضو عليك و لو هو كان عايزك ما كان جا و خطبني ، قالت لي بضيق خطبك عشان كان متحدي بيك أصحابو و.....سكتت لمن وعت على نفسها و القالتو ، جريتها من يدها و قفلت الباب و ضربتها كف ، قلت ليها بما انك فتحت الموضوع أنا بتمو ليك يا عديمة الإحساس و الضمير ، عشانو يا حيوانه تخليهو يلعب بي و ما تفتحي خشمك ؟؟ يعني المسرحيه الكانت حاصله ديك كلها كانت عاجباك ؟؟ يعني انا بالجد إنصدمت فيك لمن عرفت !! اعمل فيك شنو أنا بس قولي لي !! بتفضليهو علي !! معقوله !!
طبعاً كانت خاته يدها على خدها لأنو الكف وجعها ، عيونها إتملت دموع ، قالت لي ايوه بفضلو عليك منو انتي أساسا عشان أوزنك بيهو !؟....قلت ليها لا أكيد انتي جنيتي ! قالت لي لو جنيت ف دا حيكون بسببك انتي ، بسبب أنانيتك و قلبك الأسود ، أنا عملت ليك شنو عشان تشيلي أي حاجه أنا بخت عينها عليها ، فارس دا انتي من متين بقيتي مركزه معاهو ؟؟ أنا متأكدة انو ما عندك حاجه ليهو بس عشان تقهريني عايز تلفي حولينو و تلفتي نظرو.... طبعاً كنت عايزا أضربها تاني بس مسكت نفسي لمن قعدت تبكي ...رجعت ل ورا و قعدت في السرير و أنا راسي جايط و أفكاري متضاربه ، بعد مسافه قلت ليها أنا ما زيك و استحاله اعمل عملتك و اتخاصم معاك بسبب راجل ، مش عايز فارس دا ؟؟ خلاص شيليهو لو هو عندو ليك حاجه و على كل الأحوال أنا اتخذت قراري و بعد القرار دا لا بعرفك لا بتعرفيني و اعتبري انو ما عندك أخت من الأساس ، بقت قدرتها و طلعت و أنا طوالي مسكت تلفوني في ليلي داك عشان أحسم الموضوع دا 💔💔
كان يُعاني من تقلّبات مزاجِها ومع ذلك يصمتُ حُبًّا لها وفيها.
تقول عنهُ ذات مرة :
عندما كنتُ حزينة أخبرتهُ بأنّني لا أرغبُ برؤيته، فأطفأ الضّوء وظلّ بجانبي.🥺💔
لكاتبه
يتبع.....
