قبل ما أطلع الشغل قعدت مع نفسي مسافه و فكرت كويس ، أنا ما حصل اتنازلت قدر دا و ما حصل استمريت مع زول و أنا جواي شك و لو بنسبة 1٪ إنو ما عايزني ، صرفت النظر عن مؤشرات كتيره ، أبحرت رغم يقيني التام انو السفينه دي مثقوبه ، أنا ما بجازف و ما حصل حاولت اجبر نفسي على حاجه و اتقبلها و أنا من جواي ما عايزاها بس بسبب فارس بقيت زي الهبله و بعترف إنو كان في حاجات كتيره لو كنت أديتها أهميه و ركزت معاها ما كان وصلت للحاجه دي ....أنا لمن شفت فارس بشرب سجاير في نهار رمضان على قدر ما اتضايقت على قدر ما رجعت و أقنعت نفسي و قلت إنو فارس ياداب بادي في الإلتزام و ياداب بحاول يصلي و يصوم مع الناس ....رغم انو زول بالغ و راشد بس تصرفاتو كانت زي المراهقين و أنا للآسف اتقبلتو و قلت إنو ماشي صح ، اليوم صلي معناها بكرا حيصوم من دون ما يعمل حاجات تبطل صيام و بعدها شويه شويه حيكون زول ملتزم و جادي شويه ، بس شكلي نسيت إنو الما بقدر يتحمل صيام و ما بقدر يحافظ على صلاتو ما حيقدر يحافظ على زول !! بالجد الحب دا بعمي الواحد و بخليهو يحمل نفسو فوق طاقتو.....جهزت نفسي و طلعت بدري من دون ما أشرب الشاي ، من كنت عايزا زول من ناس بيتنا يعيد و يكرر لي سؤال : انتي مالك الأيام دي ؟؟
لمن وصلت الإذاعه لقيت ناديه زميلتي في الشغل جات قبليني ، سلمت عليها و طوالي بدينا برنامجنا ....هي اتكلمت و رحبت بالمستمعين و لمن جا دوري كنت سرحانه و ما مركزه إلا هي ختت يدها على يدي و قالت لي بصوت واطي اتكلمي !!
طبعاً نسيت ذاتو موضوع الحلقه كان شنو ، اختصرت و قلت اسعد الله صباحكم بكل خير ، موضوع حلقتنا اليوم ....لمن نسيت العنوان ، ناديه مدت لي الورقه بسرعه ، شلتها و قلت موضوع حلقتنا اليوم بتكلم عن كيفية إختيار شريك حياتك أو كيف بتعرفي إنو دا الشخص المناسب ليك ....اتصلوا و شاركوني بآرائكم ، ناديه قالت طبعاً الموضوع مهم و شيق و متأكده انو حيرضي ناس كتار و متأكده معظم الناس صلحت قعدتها عشان تستمتع بالمداخلات الحنسمعها كلنا ....عندنا أول إتصال و نقول آلو........المتصله كانت من أمبده اسمها غفران ، بعد السلام قالت انو قرار اختيار شريك الحياه دا أصعب خيار لأنو بحتاج تأني و معرفه عميقه بالطرف التاني ، قلت ليها كيف يعني ؟؟ لنفترض انك بتعرفيهو معرفه عميقه و من زمان هل دا بأهلو لإنو يكون شريكك ؟؟؟
طبعاً ناديه قعدت تعاين لي بإستغراب لأني إنفعلت شويه و طريقة كلامي كانت أشبه بالهجوم ....اظن المتصله ذاتا إنخلعت لأنها سكتت مسافه و بعدها قالت لي أكيد ، كنت عايزا أتكلم بس ناديه سبقتني و قالت ليها : غفران بتقول إنو معرفتك بالطرف التاني سبب كافي عشان يكون شريك حياتك ....غفران قالت ليها بالظبط دا لأنو على أساس معرفتك بالطرف التاني دا ح تبدي تقارني بين عادتو و عادتك و لمن تلقي في تطابق و قواسم مشتركه بيناتكم من دون تردد حتقبلي بالزول دا ، ناديه قالت ليها اقبل بيهو من دون ما أكون بحبو ؟؟ غفران قالت ليها ايوه عادي ، في ناس كتيره حبت بعض بعد الزواج ، الحب قبل الزواج ح يعميك عن عيوب الطرف التاني و قدر ما يغلط ح تبرري ليهو و بالغصب تقنعي نفسك انكم شبه بعض و دي حاجه فاشله أكيد ،، ...حسيتها كأنها موجهه كلامها دا لي أنا !! طرف السوط هبشني طبعاً!! ناديه قالت ليها شكراً على مداخلتك يا غفران و وجهة نظرك تحترم .....نستقبل اتصال تاني و نقول آلو :
المتصله برضو كانت بت من الكلاكله اسمها رماح ، قالت لينا اول شي صباح الخير عليكم يا مها و ناديه و حابه أحييكم على الموضوع الحلقه المهم و المفيد دا ، سمعت مداخلة الأخت غفران قبل شويه و كلامها قد يكون ممكن أحياناً بس مرات معرفتك بالطرف التاني براها ما كافيه عشان تختاريهو شريك للحياة ، ناديه قالت ليها ليه طيب ؟؟
قالت ليها نحنا ما ضروري نكون بنشبه بعض في تفاصيلنا و طريقة تفكيرنا....ما عايزين نتناسخ نحنا ، أهم شي انا شايفه و مصره إنو لازم يكون موجود في أي علاقه هو الحب ، لأنو لو بتحبو بعض حتقبلوا بعض بكل عيوبكم و إختلافاتكم ، الحب هو أساس نجاح أي علاقه و.......قلت ليها آسفه على المقاطعه بس سؤال ، انتي كيف بتعرفي إنو بحبك ؟؟ أو من وين بتجيبوا الثقه البتخليكم تقبلوا بالزول دا و تواصلوا معاهو باقي حياتكم ؟؟
قالت لي الحب بكون واضح ما بحتاج شرح ، قلت ليها معليش بس حاولي اشرحي لي ، قالت لي ما عارفاك عايزا تصلي لشنو لكن الحب دا ما ياهو الحب الكلنا بنعرفوا!! قبل ما افتح خشمي ناديه قالت ليها فعلاً يا رماح الحب هو أساس كل العلاقات ! عاينت ل ناديه بإستنكار لأنها ما خلتني اسأل البت و طوالي أنهت الإتصال.!! قلت ليهم قبل ما نستقبل مكالمه تانيه أنا لسه مصره على سؤالي و ياريت تجاوبوني : بتعرفوا من وين انو دا الشخص المناسب !! بتضمني كيف انو ما يحب غيرك طول عمرو و أساساً من وين بتعرفي إنو بحبك ؟؟
طوالي اتصلت علينا وحده من شرق النيل اسمها ليان و قالت عادي جداً ....ممكن اعرف انو بحبني لمن يعترف لي أو من تصرفاتو .....قلت ليها طيب بتضمني انو ما يحب غيرك ؟؟ قالت لي بما انو بحبني فأكيد ح أكون ماليه عيونو و ما حيشوف غيري إلا لو حبو دا ما كان حقيقي...... طبعاً كلامها جاني في الجرح 💔
قلت ليها الأولاد ما مضمونين و عادي يعترف ليك بلسانو بس قلبو عكس كدا تماماً ، قالت لي نحنا ما بنعلم بالغيب عشان كدا بنكتفي بالحاجه الظاهريه فقط بس لو حصل كدا الأيام و المواقف هي الحتظهرو لي على حقيقتو لأنو البكذب من البدايه ما بقدر يواصل في كذبتو ، ح يمل و يتعب من التمثيل و المشاعر المزيفه أما بالنسبه لسؤالك التاني النفوس بتتغير و ما ح اقول ليك ما حيحب غيرو و دا برضو ما معناهو إنو ما حباني لأنو الحب براهو ما كفايه مثلاً أكون بحبو و في نفس الوقت بنكد عليهو و لمن يرجع من الشغل زهجان و تعبان ازيدها عليهو بحجة انو ما وداني بيت أهلي مثلاً و هو وعدني !! مع الأيام و تكرر المواقف دي هو حيزهج ، أو قد يكون بحبك بس حبو ليك ما كفايه عشان يشفع ليك قدام نقدك و وجع الراس البتعمليهو ليهو و هنا هو ببدا يفتش على وحده تفهمو و تقدري ظروفو و الضغوطات البمر بيها ....لاحظي إني ما قلت بفتش على وحده تحبو لأنو زي ما قلت ليك الحب براهو ما كفايه ، بس دا كلو العايزا اقولو.... طبعاً مفروض أرد عليها و أشكرها على أن اتصالها بس سرحت بعيد و ناديه هي الردت عليها .....بعد خلصنا انا بقيت شارده و بفكر في كلام كل بت اتصلت علينا ، طبعاً كل تيم الحلقه لاحظوا لي و قالوا لي انتي اليوم ما طبيعيه !...قلت ليهم مصدعه بس...
المهم طلعت من مقر الإذاعه و ركبت مواصلات و طول الطريق كنت سرحانه و بفكر و قلبي دا واجعني شديد و طبعاً الشوارع كانت زحمه عشان كدا أخدت زمن طويل في التفكير💔
لمن وصلت حلتنا مشيت دكان عوض لقيتو بصلي العصر ، طلعت تلفوني و إتصلت على فارس ، المره الأولى ما رد لحد الخامسه حتى رد علي و قال لي خير في شنو ؟؟
قلت ليهو في حاجه حاصله تعال دكان عوض ضروري ، قال لي في شنو ؟؟
قلت ليهو لمن تجي حتعرف ، المهم بعد حكاية 5 دقايق هو جا على راحتو ، الزمن داك عوض خلص صلاتو و قال لي عايزا حاجه ؟؟ قلت ليهو لا و لمن فارس جا قلت ل عوض ممكن تخلينا برانا عايزا أتكلم معاهو و عشان ما نقيف في الشارع فضلت اتكلم معاهو هنا ،قال لي أخدوا راحتكم و طوالي طلع من الدكان ...فارس قال لي دا موضوع شنو البخليك تطلعي عوض من دكانو ، غمضت عيوني مسافه و لمن فتحتهم قلت ليهو أنا عمري ما فرضت نفسي على زول و ما بحب أكون تقيله على زول و متى ما حسيت اني غير مرغوب فيني طوالي بنسحب ، بس قبل ما أعمل الخطوه دي أنا عايزا أعرف ليه وصلت معاي لمرحلة الخطوبه إذا انتي ما مبسوط بيها و طول الوقت محسسني إنو في زول جابرك علي ، احب أذكرك انك انت الكنت جاري وراي ما أنا ، ربع يدينو و قال لي مناسبة الكلام دا شنو ؟؟
قلت ليهو جاوبني اول ، قال لي اسئلتك البايخه دي أنا لا عندي ليها زمن لا عندي ليها أجوبه ، قلت ليهو تمام و طوالي طلعت الخاتم من يدي و سلمتو ليهو و قلت ليهو و أنا كمان حركاتك البايخه دي لا بقدر اتحملها لا عندي زمن عشان اقعد ابررها ليك ، ما قال لي حاجه و ذاتو ما كان مضايق لمن طلعت ليهو الخاتم ، يعني كأنو منتظر فرصه زي دي و جاتو ، طلعت من الدكان و أنا منهاره على الآخر بس كنت حابسه دموعي و لحد ما وصلت البيت ما خليت دمعه وحده تنزل مني بس من جواي كنت بتقطع من الوجع و الخذلان 💔
رقعدت رقده وحده ما قمت إلا لمن أمي صحتني و قالت لي انتي عيانه ولا شنو ؟ قلت ليها لا بس فترانه ، قالت لي خلاص قومي أكلي ليك شي من جيتي نايمه ، قلت ليها ما جعانه و طوالي مشيت أوضه تانيه و رقدت فيها جات لاحقاني و قالت لي في شنو ليه ما عايزا تاكلي ؟؟
قلت ليها بآخر نفس مع مغص يا أمي و ما عايزا أي حاجه غير النوم و فعلاً أنا كان معاي مغص ، قالت لي خلاص بعمل ليك حاجه دافعه تشربيها و دا الحصل و عشان ما تسألني تاني شربتو ليها و قلت ليها كدا خلاص عايزا أنوم تاني ما تصحوني....كنت بهرب من الواقع و النوم هو كان حلي الوحيد. نمت نومه عميقه زي الكأني عايزا أدخل في غيبوبه ، لمن صحيت صحيت تاني يوم الساعه 9 ما عندي شغل ف اتسوكت و شربت الشاي و رجعت نمت تاني و دا الحصل في اليوم البعدو ، بقيت أنوم بس حتى إني اتصلت و أخدت إذن من ناس الإذاعه بحجة إني عيانه و كذبت على ناس البيت و قلت ليهم الإذاعه عامله دوره تدربيه للمذيعين الجداد و عايزين يدوهم الإذاعه لكم أسبوع كدا عشان يتدربوا فيها و يقدموا برامجهم ، المهم بيجاي بيجاي اقنعتهم و طوالي نمت بس ما كنت عارفه اقول شنو ل ناس البيت ! قلت خليهو يكلمهم هو ما عارفاهو ليه ساكت لحد اللحظه دي !!
في نفس اليوم دا جات أم فارس و كلمت أمي إنو أنا و فارس فسخنا الخطوبه !! طبعاً كلهم جوا إنكبوا لي جوه الأوضه و أنا رغم إني منهاره بس مثلت قدامهم و حسستهم انو الموضوع عادي و ما فارق معاي ، قلت ليهم يا جماعه الناس بتتخطب ليه ؟؟ مش عشان في الفتره دي الطرفين يكتشفوا بعض و يقرروا بعدها إذا حابين يكملوا أو لا ؟؟ يلا نحنا اكتشفنا اننا ما بننفع مع بعض و أنا لمن سلمتو الخاتم حقو سلمتو عن قناعه و بعد تفكير طويل ..... طبعاً كلهم جاطوا و قالوا لي ليها تاخدي قرار زي دا براك و و و غيتو حصلت جوطه كبيره و أنا بالجلاله ماسكه دموعي ، تاني يوم طوالي أبوي جا عشان يفهم الحاصل ف قلت ليهو نفس الكلام القلتو ليهم أمبارح و ختمت كلامي بإنو تاني ماف زول يتناقش معاي في الموضوع دا ، دخلت الأوضه و قفلتها علي و أنا لحد اللحظه ديك حابسه دموعي و جواي براكين و فوضى كتيره 💔
بعد يومين من الكلام دا نسوان الحله بقوا يتقاولوا ساي و قالوا إنو فارس هو الفسخ خطبتو مني ما أنا .... طبعاً دي أمو القالت ليهم كدا ...ما عايزا تطلع عيب في ولدها و تقول إنو أنا الفسخت الخطوبه دي ....كنت بسمعهم و بسكته ما لأني ما قادره أرد بس انا ما قادره اتكلم في موضوع الخطوبه دا مع أي زول ، بحس انو لو حاولت افتح خشمي و اتكلم دموعي حتنزل و أنا ما ببكي قدام زول ، بليل لمن كنت براي في الأوضه ، فتحت دردشتو حقت الواتس و بقيت أراجع في الرسايل القديمه و كيف انو في الأيام الأولى كان هو البرسل و البسأل و البحاول يفتح مواضيع لحد ما شويه شويه رسايلو بدت تقل و لمن أرسل ليهو بسفهني ، قريتهم كلهم لحد آخر رساله كانت مني و لحد اللحظه ما رد عليها ، دموعي طوالي نزلت بغزاره ، مسحتهم و حاولت أمنع البكى ، طلعت من الواتس و دخلت الفيس و حاولت أكون انسانه عاديه بتتصفح الفيس لحد ما لاقاني بوست ل فارس في صفحتو منزل صورتو مع أصحابو و كاتب أحلى لمه مع الشباب ....
قلبي وجعني شديد و فهمت إنو ما فارق معاهو بس ليه كان بكذب علي ؟؟💔 ليه استغباني و مثل علي ؟
انفجرت بالبكى و بكيت بكى عمري ما بكيت زيو ، كل ما دموعي تنزل كنت بحس بقلبي بتقطع حته حته ، بقيت استرجع في كلامو و حركاتو و مواقفو ، فكرت و فكرت في سبب أو مبرر لتصرفاتو الآخيره و ما لقيت مبرر غير إنو كان بلعب بي 💔
من البدايه ما كنت مطمنه ليهو خالص و قلبي كان قابضني بس لمن وقف قدام أبوي و صارحو حسيت إنو جادي و ما اتوقعت انو جراءتو و حيونتو توصلو لدرجة إنو يخطبني عشان بس يعشمني فيهو و يكسرني 💔 ما سبب تاني غير دا والله ما سبب تاني ، ياريت لو يطلع دا كلو حلم ياريت لو ما عرفت ياريت لو ما صدقتو و خليتو يستعطفني و يلعب بي 💔
رقدت على المخده و غضيتها بأسناني عشان ما أطلع صوت و أنا ببكي ، الليله ديك كأنت من اسوأ الليالي في حياتي ، كانت طويله شديد و مع ذلك دموعي ما وقفت و المخده كلها بقت عباره عن مويه 💔
حاولت قدر الإمكان أسكت نفسي بس فشلت ، جواي كان في كميه من الزعل و القهر و الخذلان و الندم ، بقيت ببكي و بشهق و مرات بخت يدي على خشمي عشان ماف زول يسمعني ....جوه الأوضه ديك أنا عشت صراع و ضقت طعم الخذلان و عرفت يعني شنو ألم 💔
ما ح اقول حياتي بقت عاديه بس بحاول أكون عاديه ، على الأقل قدام أهلي و فارس بقيت أتجنب امشي في شارع هو موجود فيهو ، من اليوم داك أنا تاني ما إتلاقيت معاهم وش ل وش بس شايفاهو في الفيس كل يوم بصوره جديده ، ما ألغيت صداقتي معاهو في الفيس لأنو ما قاعده اتهرب من الحاجات البتوجعني ، بالعكس بقعد أعاين ليها كدا لمن بطني تطمن منها أو مع الأيام تكون بالنسبه لي حاجه عاديه ، يوم ما كان عندي شغل و ملاذ نست قروشها حقت الفطور فأمي أدتني ليهم عشان ألحقهم ليها في المدرسه ، شلتهم و لفحت توبي و ك عادتي بحب اغطي بيهو جزو من وشي ، المهم في اللفه القبل المدرسه من بعيد لمحت ملاذ واقفه ليها مع واحد !! غضبت جنس غضب ! قلت دا منو كمان و عايز منها شنو ؟؟؟ سرعت خطواتي و مشيت عليهم بإندفاع و لمن قربت منهم قلت ليها بنهره كدا : ملاذ !! طبعاً هي إتصدمت لمن شافتني و أنا إنصدمت شديد لمن لقيت انو الواقف معاها دا فارس !!
يمكن دقيقه كامله و أنا بحاول استوعب في الشايفاهو و هم الإتنين ما قادرين يقولوا حاجه !! القروش وقعت من يدي و طارت !! والله بس بعاين ليهم و أنا فاقده المنطق و ما قدرت أفكر في أي حاجه او اسألهم عن حاجه 💔
وكأنك في خلاف أبدي مع الحب ، إما أن تجد من يحبك وأنت لا تحبه ، أو أنك تحب من لا يحبك. ولو شاء القدر والتقيت بمن يحبك وتحبه ، لا تحبكما الحياة معاً!".
- جبران خليل جبران
يتبع......
