المهم قعدت 3 أيام مع ناس داليا و أول ما أمهم جات أنا رجعت البيت ، طبعاً ملاذ من جيت بتحاول تتجنبني و نهاي ما بتقعد في المكان البقعد فيهو ، زي العصر كدا أمي قالت ماشه ل عمتي نوره ، مشت هي و عمتو إجلال ، مروه كانت في شغلها و مآب و سلوى طلعوا مشوا بيت ناس عم الماحي عشان عندهم حفلة حنه بدايه من هسي لحد بليل ، المهم بقينا أنا و ملاذ بس ، زريتها ليك جوه الأوضه و قفلت الباب علينا ، بلعت ريقها و قالت لي قافله الباب مالك ، قلت ليها يقفل مخك يا حيوانه يا وسخه ....قالت لي احترمي نفسك ....مشيت عليها بإندفاع و شديتها من ساعد يدها بقوه و قلت ليها أنا محترمه نفسي الكلام انتي !! مصنوعه من شنو يا عواليق ! وقت الرمه العاطل دا بلعب بينا الإتنين و انتي عارفه و عاجبك الحاصل على الأقل كنتي تجي تكلميني عشان انسحب و اخليهو ليك يلعب بيك زي ما عايزه !!
ياخ والله بالجد ما عارفه اقول ليك شنو !! متمنيه افتح راسك دا عشان اشوف مخك دا فيهو شنو ! ما بتخجلي يا انسانه ! ما عارفه ليه انتي بالأنانيه دي كلها !!
قالت لي الأنانيه في دا شنو ؟ و بعدين منو القال ليك فارس بلعب بي ؟!!....قلت ليها اهاااا يعني انتي كنتي عارفه إنو هو بلعب بي و الحصل دا كلو مسرحيه منو!!!
قالت لي ايييوه دا الحصل 😊
من دون ما اتردد ضربتها كفين ورا بعض ، هاجت و قالت لي كيف تمدي يدك علي يا حيوانه يا زفته يا.....ما خليتها تتم كلامها تاني ضربتها ، جاتني بإندفاع عشان تشتبك معاي و أول ما مدت يدها علي مسكتها بكل قوتي و ضغطت يدها شديد أو شبه كنت لاوياها ليها و بقيت اجوط فيها بقت تتألم من مسكتي ل يدها ، لمن خلصت انفعالي كلو فيها فكيت يدها و قلت ليها ياريتني ما بعرفك ياريتك لو كنتي وحده غريبه يا وسخه ، طبعاً قعدت تبكي قدرتها ، طلعت من الأوضه و مشيت قعدت في المظله لحد ما ناس أمي جوا ، لمن ختيت الأكل أمي قالت لي امشي نادي ملاذ ، قلت ليها قالت ما عايزا مع إني أساساً ما جيت ماره بجنبها ، قالت لي أجي !! مالا كمان ؟؟ عمتو إجلال قالت ليها بناتك ديل مدلعات ساي والله ، مدام ما دايره خلوها على راحتها!.....المهم قبل ما نبدا نتغدا مروه جات داخله ، قالت لينا جيت في الموعد ، واااي جعانه جنس جوع ، مشت غسلت يدها و جات ، أمي قالت ليها الزول بقول السلام عليكم أول حاجه ، قالت ليها حاضر حاضر لكن المره الجايه هسي جعانه والله كدي قولوا بسم الله و خلونا نبدا ، أول ما بعدينا كدا ، مروه قالت صحي ما سألتكم ملاذ وين ولا صايعه ك عادتها ؟؟
أمي قالت ليها قالت ما عايزا ، قالت ليها مالا دي كمان ؟؟ أمي قالت ليها بري ما عارفاها والله ، عمتو إجلال قالت ليها بناتك ديل إلا تأجري ليك عربيه و توديهن عثمان الماحي ، مروه قالت ليها عثمان الماحي دا منو كمان ؟؟
قالت ليها ئهه مية سنه في البندر و ما بتعرفن عثمان الماحي! نحنا ناس القرى سامعين بيهو معقوله انتوا ما بتعرفوهو ؟؟ قلت ليها أولا اسمو التجاني الماحي ما عثمان الماحي و تاني حاجه أنا شايفه انك محتاجاهو اكتر مننا يمكن يلقى ليك حل لإحساس النقص الجواك دا و حشريتك و تطفلك و.....سكته لمن أمي قالت لي بنهره مها أحترمي نفسك !!
عمتو إجلال طوالي طلعت يدها من الصحن و طلعت من المظله و أمي إنفعلت فيني و بقت تقول لي ليه تقولي ليها كدا و و و .... طبعاً مروه كانت ماسكه بطنها و بتضحك ، لمن أمي سكتت و هدت شويه مروه قالت لينا و هي بتضحك يعني عمتو إجلال دي كانت قاصده التجاني الماحي !!🤣🤣
أمي قالت لي هسي دي تمشي تعتذري ليها ، قلت ليها ما سامعاها قالت شنو!! و ليها كم يوم بتجدع لينا في الكلام و هي في نص بيتنا عشان لقتني ساكته ليها الفتره ديك ، قالت لي قلت ليك أمشي اعتذري منها ....قلت ليها تمام ، قمت من مكاني و طلعت من المظله ، مشيت المطبخ كملت أكلي هناك و لقيت عصير في التلاجه شربتو و قمت مارقه من المطبخ ، طبعاً عمتو إجلال كانت واقفه جنب الباب و عايزا أمي تشوفها عشان تعمل دراما أكتر ....عاينت ليها ساي بس ما عبرتها ، لمن رجعت المظله أمي قالت لي اعتذرتي منها ؟؟ قلت ليها ايوه ، قالت لي وينا ليه ما جات تتم أكلها ؟؟
قلت ليها واقفه جنب الباب و قالت عايزا تشم هوا ، مروه قالت لي ليها حق لأنو كلامك بكتم النفس 🤣🤣
أمي قالت لي أنا تعبت منك والله ! يعني كبيره كدا و عايزاني أضربك !! اعمل ليك شنو أنا عشان تخلي عمايلك دي ؟!! يا بت هوي انتي مصنوعه من شنو ؟؟
قلت ليها خلااااص خلاااااص يا أمي عرفت ياخ !!المهم أمي لبست توبها و طلعت من المظله...أكيد ماشه ل عمتو إجلال ، مروه أكلت و رفعت الصينيه مشت بيها المطبخ ، شويه كدا جاني صوت عمتو إجلال و هي بتقول والله دقيقه وحده ما بقعدها في البيت دا و أمي تشيل و تعتذر منها و تحلف فيها ، طلعت براحه و بقيت أعاين ليهم من بعيد و هم جنب الباب ، قالت لأمي بس اتصلوا لي على واحد من أولادي ! ما عارفاهم طفشوا وين ديل كمان ، و سلوى ذاتا مشت وين ، خليهم يجوا عشان نتخارج من هنا ، مروه مشت عليهم و قالت ليها معليش يا عمتو حقك علينا ، قالت ليها بس امشي نادي لي سلوى و لو لاقاك واحد من أولادي قولي ليهو أمك قالت ليك تعال ، مروه قالت ليها لا لا يا عمتو ما تكبري الموضوع ، قالت ليها سمح براي بمشي أفتش بتي و فعلاً مشت عشان تشوف سلوى وين و أنا طوالي مشيت دخلت الحمام ، ايوه هي كريها و غياظه و شوم بس برضو ما اتمنيتها تمشي من بيتنا بالطريقه دي....خفت الموضوع يصل أبوي ساعتها ما حيرحمني ، من بعيده سامعه امي بتقول ل مروه طفشت وين ، مروه قالت ليها ما عارفه والله ، المهم تاني ما سمعت صوتهم ....قعدت مسافه في الحمام لحد ما فجأه جاني صوت أبوي و هو بنده علي بأعلى حس عندو و نبرتو كانت ملانه غضب ....إتوترت شديد قبل ما أطلع ليهو ، لمن بقى ينادي علي كتير ، بتردد طلعت من الحمام ...لمن مشيت ليهو كان واقف في نص الحوش و ناس أمي واقفين حوليهو ، لمن شافني قال لي تعالي هنا ....أول ما وصلتو قال لي قلتي ل عمتك دي شنو ؟؟
سكته ساي
قال لي بنبره عاليه قلت ليك قلتي ليها شنو !!!
إنخلعت شديد والله ف طوالي وريتو قلت ليها شنو و هو من دون ما يتردد رفع يدو و ضربني كف ....قال لي الغلط غلطي أنا الخليتك تتمادي و تقلي أدبك على الناس ، كنت خاته يدي على خدي بس نهاي ما بكيت ليهو ، شاكلني قدرتو و سمعني كلام كتير و أنا دمعه بالغلط ما نزلت مني ، لمن خلص عمتو إجلال قالت ليهو لو ماشي سوقنا معاك بيتك التاني أصلا باقي لينا مقابله وحده بس و حنسافر و نريح الناس مننا ، المهم لملموا حاجاتهم و مشوا مع أبوي بعدها أمي برضو جات سمعتني كلام قدرتها ، سكته ساي و ما إتكلمت مع زول....
في اليوم البعدو ، طلعت الصباح بدري حتى الشاي ما شربتو ، أول ما جيت ماره بالميدان كدا فارس طلع في وشي ! قلت أعوذ بالله من الشيطان و الأكعب منو ، قال لي ممكن دقيقه ؟؟
قلت ليهو دقيقه ح تكفيك عشان تألف سيناريو ولا أصلا عاملو جاهز ؟؟
قلت كدا و طوالي إتحركت من جنبو ، إستعجل و جا وقف قدامي و برضو اتجاوزتو و مشيت ، بقى ماشي وراي و هو شغال لي خليني بس اوضح ليك نقطه وحده ....لمن ما إتلفت عليهو و كملت مشي ، قال لي أنا و ملاذ أختك ماف بينا شي و أنا ما خنتك معاها ولا كنت بلعب بيها.....ولا اشتغلت بيهو و كلامو زي ما دخل طلع ، أثناء ما أنا ماشه كدا و هو وراي بتكلم معاي ، خليل طلع في وشي ب عربيتو ، وقف قدامي و نزل القزاز ، عاين ل فارس و رجع عايني لي و قال لي دا مالو معاك ؟؟
إتلفت وراي و قلت ليهو منو ؟؟ ما شايفه زول أنا و ما كنت سامعه شي غير نباح كلب !!
طبعاً خليل استغرب ! بعد مسافه قال لي طيب اركبي أوصلك ....من دون ما أتردد ركبت معاهو و اتحركنا و هناك فارس لسه كان واقف و بعاين لينا ، طول الطريق أنا و خليل كنا ساكتين ساي لحد ما هو كسر الصمت دا و قال لي ممكن سؤال ؟؟
قلت ليهو لو ليهو علاقه ب العاطل داك ف لا ما ممكن! قال لي للأسف ليهو علاقه بيهو ، قلت ليهو معليش بس انا ما عايزا أتكلم بخصوصو ، قال لي تمام نقفل السيره و بقى يتكلم معاي في مواضيع تانيه لغاية ما وصلني .....
نهاية اليوم لمن جيت راجعه كالعاده الرمتاله ديلك قاعدين لي في الطريق ، بقيت أكرهم أضعاف مضاعفه ، كانوا بتونسوا ساي و بضحكوا ضحك العواره داك إلا الرمتالي الكبير كان ساكت ساي و أول ما شافني بقى يعاين لي لحد ما مريت بجنبهم و اتجاوزتهم ، يعني قدمني عديل بنظراتو ، في سري قلت ليهو ليك حق تعاين لي كدا ، أكيد انت شمتان فيني و بتضحك علي....المهم لمن وصلت البيت لقيت مروه بتظبط في نفسها ساي ، قالت ناس عم الماحي عندهم حفله ، قلت ليها هم مش أمبارح برضو كان عندهم حفله ؟؟
قالت لي ايوه ، حفلاتهم دي حتكون مدوره لحد يوم عرس بتهم ، قالت لي أرحك أمي ذاتا ماشه ، قلت ليها بري ما ماشه ، المهم هم جهزوا و مشوا حتى ملاذ مشت معاهم ف بقيت براي في البيت ، صليت العصر و ارتحت شويه بعدها قمت أكلت لي حاجه ، دخلت الأوضه و رقدت على السرير و حاولت أنوم بس ما قدرت ، كنت حاسه بزهج و ملل ما عادي ، قعدت كدا لحد المغرب ، أمي جات راجعه مع مآب ، مآب جات تغير ملابسها عشان اتوسخت ، ما عارفه الغير رأيي شنو بس قلت ليها انتظريني ماشه معاك ... طبعاً هي و أمي إتلفتوا علي في لحظه وحده و هم مصدومين !!
دخلت جوه طوالي و أقرب عبايه طلعتها ، جهزت نفسي قبل مآب بس قبل ما أطلع كدا وقفت مسافه قدام المرايه ، طوالي فتحت دولاب مروه ، لقيت ماسكرا و فاونديشن و كونسيلر و ليب ستيك و و و ....المهم عملت من كل حاجه شويه لأني ما متعوده على الميك أب ، لمن طلعت أمي و مآب برضو عاينوا لي بنفس النظرات ! مآب ضحكت و قالت لي يا حليلك الحمى طلعت ليك في راسك.... طبعاً أمي ما قالت لي حاجه لأنها عامله فيها زعلانه مني من اليوم المشوا فيهو ناس عمتو إجلال ، المهم مشينا الحفله و كانت معموله برا الشارع و الصيوان مليان ناس و أي زول برقص في إتجاه ، مشينا نهاية الصيوان ، قعدت ورا و بقيت أعاين بس للناس البترقص و الهجيج العاملنوا ، شويه كدا لمحت ليك مروه و ملاذ برقصوا ساي في نص الناس !!...شويه شويه شايفه ملاذ بقت ترقص بطريقه مجنونه ! و الأكعب انو الأولاد محيطين بيها و برقصوا معاها ، اقسم بالله زعلتني زعل ، إتلفت يميني عشان اقول ل مآب تمشي تناديها بس مآب ذاتا ما لقيتا !!
طبعاً الأولاد المعاها بقوا يتمادوا و هي عاده الحاجه دي عاديه ، صراحة ما قدرت اقعد اكتر و أعاين ليهم ، طلعت من الصيوان عشان ألف و اجي بالإتجاه التانيه بدل ما أدخل ليها من نص الحفله ، المهم أول ما طلعت من الصيوان كدا لقيت كميه من الأولاد برقصوا و بشربوا سجاير !! كانوا زي السكارى !! عاينت ليهم بقرف و جيت بجنبهم عشان أمشي طويل ف واحد منهم إعترض طريقي و بقى يقول لي كلام خارم بارم ساي و واضح إنو سكران ، زحيت منو كدا تاني أتحرك و وقف لي قدامي ، قلت ليهو شفت أحسن ليك تحترم نفسك و إلا ما حيحصل خير والله ، قال لي وااااي خفتا ، طوالي المعاهو قعدوا يضحكوا بصوت عالي ، قرب مني أكتر و قال لي حيحصل شنو يعني ؟؟
فجأه حسيت بيهو واقع و داقي الواطه ، لمن عاينت يميني شفت فارس !! اصحاب السكران و البرضوا سكرانين زيو جوا على فارس فهو طوالي طلع ليهم سكين ، برضو ما وقفوا و بقوا يضاربوا معاهو و أنا بس بقيت مخلوعه ، رجعت ل ورا و أنا مخلوعه من حلبة المصارعه الحاصله قدامي دي ، فجأه الشكله كبرت و الناس خلت الحفله و طلعت من الصيوان و جات تشوف الشكله ، أصحاب فارس جوا جاريين و طوالي بقوا يضربوا معاهو ، و الجوطه بقت كبيره ، فجأه جا واحد واقع ! و كل الناس زحت من جنبو لأنو كان مطعون و الطعنو فارس!! كل الناس بقت تتجارى و أي مره ساقت أولادها و جرت بيهم بيتهم و المكان بقى شبه فاضي ، مروه و ملاذ و مآب جوا وقفوا جنبي و هم مخلوعين زيي ، ناس عم الماحي قالوا ل فارس سرعه امشي من هنا ، في اللحظه دي الشرطه جات و رفعوا كل الشباب الكانوا في موقعة الحادثه و شالوا المصاب معاهم ، حتى عم الماحي و أولادو رفعوهم معاهم ، مروه قالت الليله ووب علينا سرعه ارحكن البيت ، بإستعجال مشينا على البيت و قبل ما نصل لقينا أمي في نص المسافه مع هيثم و كانوا جايين علينا ، أمي قالت لينا أرح البيت سرعه سرعه ما يقوموا يجوا يخموكم معاهم و يقولوا شهود ، المهم دخلنا البيت و قفلنا الباب و مروه و مآب ديل يرجفوا من فوق لتحت ، أمي قالت دي مصيبة شنو و فارس ليه طعن الولد ؟؟ مروه قالت ليها ما عارفين يا أمي ، كانوا بتشاكلوا و طعنو قالت لينا و انتن المقعدكن شنو بعد الحصل ، أنا لمن سمعت ساي خفت والله و قلقت ، مروه قالت ليها ربنا يستر بس حتى عم الماحي رفعوهو معاهم...
انا كنت ساكته ساي و ذاتو ما عارفه اقول شنو بس عيوني تلقائياً مشوا على ملاذ ، صراحة ما قدرت احدد شعورها شنو بس الأكيد أنها شاطره في التمثيل و حتى لو مقلقه عليهو بتقدر تخفي شعورها دا ، هيثم قال لأمي الراجل نزف شديد والأرض كلها كانت عباره عن دم شكلو مات عديل ، مآب قالت ليهو لو مات معناها فارس حيموت في السجن....
يتبع......
