قلت ليهو صراحة مليت من تمثيلك الما ليهو حد دا و طوالي مديت ليهو الورقه و قلت ليهو اوعك تنكر انك موصي أصحابك ....شال الورقه و بقى يقرا فيها.....
عاين لي بخلعه و قال لي دا منو ؟؟ قلت ليهو ما بتعرف خطتك ؟؟
قرب مني و قال لي بنبره عاليه جاوبي على السؤال و بس !! الرساله دي وصلتك كيف!! دا نفسو القلتي بهددك ب فيديو ؟؟طيب فيهو شنو الفيديو دا و ديل منو أساساً و ليه بهددوك ؟؟عايزين منك شنو ؟؟
صراحة بعد كلامو و الجديه الكانت في عيونو إقتنعت إنو دا ما هو ....خطفت منو الورقه و قلت ليهو تمام دا ما إنت و طوالي إتحركت من جنبو ، قال لي كلامي معاك لسه ما خلص ف ما تحاولي تستفزيني و تضايقيني أكتر....ما إتلفت عليهو ، سرع خطواتو و جا وقف قدامي و قال لي ما تخليني اتصرف تصرف يزعجك قدام الناس ديل كلهم ، ما بغلبني أجرك على جنب كدا و ما أسمح ليك تمشي بس ما عايز الأوضاع بيناتنا تسوء أكتر ....ربعت يديني و قلت ليهو أنا بالجد نفسي افهم عقليتك دي !! ما عرفتك عديم كرامه ولا عديم موضوع ؟؟ عايز مني شنو يا ود الناس قول لي ؟؟
قال لي خلينا في المهم و قولي لي محتوى الفيديو شنو و من متين بدوا يهددوك و الفيديو إترسل ليك وين ؟؟
قلت ليهو سبب واحد يخليني أحكي ليك مشاكلي ماف !! ما عارفه افهمك بأي طريقه قدر شنو أنا بكرهك و ما بطيق اقيف قصادك حتى ...قال لي طيب تمام يلا جاوبيني عشان نقدر نوقفهم عند حدهم !
طبعاً العاطل دا حيرني و في نفس الوقت ضايقني ، قلت ليهو ربنا يشفيك و المره دي طوالي مشيت بإستعجال و ما وقفت إلا جنب باب بيتنا ....دخلت و أنا لسه بفكر في الكلام الكان مكتوب في الرساله !!
أمي قالت لي انتي الأيام دي مالك ؟!! أصلك ما طبيعيه ، قلت ليها لا لا ماف شي تعب الشغل بس !...المهم مروه لمن جات من شغلها طوالي جاتني بإستعجال و قالت لي قبيل وحده من المعلمات المعانا في المكتب كانت فاتحه إذاعه هلا و زي السمعت صوت فارس !!....دا منو الكان بقدم معاك ولا دا فارس ذاتو ؟؟؟!!!!
قلت ليها بتصدقي لو قلت ليك دا هو ؟؟!! قالت لي أكيد لا ، الإذاعه دي ما حقت أبوهو ....قلت ليها دا العاطل ذاتو , قالت لي شنووو شنووو ؟؟
انتوا ناسكم ديل مالم بقوا يصطادوا في المويه العكره ؟! قلت ليها يعني بتعترفي إنو فارس واحد عاطل و فاشل و ما نافع ل شي و تاني ما تدافعي عنو ....قلت لي حتى لو ما كان كدا لمن الإذاعه دي ما كل من هب و دب بشتغل فيها !!؟ مشى ليهم على أي أساس و كيف هم وافقوا بالسهوله دي ؟؟ يعني هو لا إعلامي لا ولد اسره غنيه و معروفه عشان نقول اتوسطوا ليهو !!!؟؟؟ كيف بس فهميني عشان أنا ذاتي امشي و اشتغل معاكم تعبت من التعليم دا ....قلت ليها اتخيلي قالوا عشان هو صاحب محتوى هادف ؟؟ هسي دا سبب منطقي و مقنع ليهم ؟؟ يعني اي زول بقدم محتوى معناها لازم يبقى مذيع طوااالي كدا ، قالت لي انتي برضو اتعينتي بالطريقه دي ...قلت ليها ما تقارنيني بيهو ، أنا زوله جاده و طول عمري كنت مجتهده و بسعى أكون افضل و أي مجال بتواجد فيهو بدع فيهو و ما تنسي اني دارسه إعلام يعني و دا مصيري و رغبتي حتى لو ما كان عرفت الاء دي أساساً براي كنت ح أجتهد و اعمل لنفسي مكانه أما العاطل داك فهو عكسي تماماً عديم نفع و ما منو فايده!! مستغربه هم بأي منطق خمو الزباله دي و جابوها لينا في الإذاعه ! دا وسمة عاااار لإذاعتنا ، قالت لي حرام عليك يا مها ما تتكلمي عنو كدا ، بالجد طريقة تقديمو كانت جميله شديد و العجب صوتو و الطريقه البتكلم بيها و السيطره و التحكم الكان داير بيهم الحلقه ، بالجد اتفاجأت فيهو ما كنت قايلاهو بقدر يبدع في حاجه ، مفروض بعد دا تغيري نظرتك ليهو يا مها ، قلت ليها ياخ أنا مالي و مالو حريقه تحرقو! قالت لي يخسي عليك والله ، شويه كدا ملاذ جات داخله ، قالت ل مروه ، طرحتك الكحليه وين ؟
مروه قالت ليها عايزا بيها شنو ؟ قالت ليها ماشه لصحبتي ، المهم أديني ليها ، مروه قالت ليها احسن تبطلي الحوامه و اقعدي تقري ليك قرايه تنفعك ، ناسيه انك ممتحنه شهاده سودانيه ولا شنو ؟؟
قالت ليها طول ما انتي ماسكه لي السيره دي اطمني ما ح أنساها المهم أديني طرحتك ،مروه قامت مشت على الدولاب و بقت تفتش ليها في الطرحه ...قالت ليها صحي ما سألتك يا ملاذ انتي الولد الطعنو فارس حصل ليهو شنو ؟؟
قالت ليها ودوهو المستشفى و الطعنه ما كانت عميقه و هو ذاتو كان سكران و هو الغلطان و الحصل كان دفاع عن النفس عشان فارس ما اتسجن رغم انو في ناس كتيره كانت متمنيه تشوفو في السجن...قالت كدا طوالي عاينت لي و طبعاً مروه ما شايفانا لأنها بتقلب في الدولاب ،قالت ليها اي باقي القصه كلو عارفاهو إلا الحصل مع المطعون دا و هسي عرفت ، المهم لقت الطرحه و جات أدتها ليها ، جهزت نفسها و طلعت ، طوالي لفحت توبي و قلت لأمي ماشه اجيب لي رصيد ، لمن طلعت لمحت ملاذ من بعيد ف طوالي مشيت بطريقها و بقيت متتبعاها ، لحد ما شفتها دخلت بيت ناس حنين ، قلت معناها ما كانت بتكذب ، قبل ما أمشي لمحت على الجانب التاني فارس و أصحابو ، كانوا قاعدين ليهو في حجار كبار و كلهم بضحكوا و بتونسوا إلا هو ، كان ساكت ساي بس و بعاين ليهم ، قلت نكات أصحابو العواليق ما عجبتو ولا شنو!!...ما مهم كلهم عواليق و امخاخهم فاضيه زي جيوبهم ، أول ما إتحركت عشان أمشي بطرف عيني من بعيد شفت باب ناس حنين إتفتح ، إتلفت عديل و شفت حنين و ملاذ طالعين كانوا ماشين على إتجاه فارس و أصحابو ! قعدت بس أعاين ليهم لحد ما جوا مارين جنبهم و رجعوا سلموا عليهم ، شايفه ملاذ واقفه و بقت تتكلم مع فارس و حنين مع أصحابو !! حسسوني انهم بنات رخيصات بجوا مارين قدام الأولاد عشان يلفتوا نظرهم و يلقوا ليهم فرصه عشان يتكلموا معاهم ؟!! معقوله ملاذ تتدنى للدرجه دي عشان العاطل داك ؟؟ تنسى تربيتنا و مبادئنا و تختار أنها تبقى زيهم عشان تنال إعجابهم!!
قلبي وجعني شديد و حسيت نفسي مكتفه و ما قادره اعمل شي و أنا عارفه كويس انو ملاذ وقحه و عنيده و أنا ما بقدر عليها و في نفس الوقت ما بقدر أكلم ليها زول ....عاينت ليهم مسافهو بعدها قلت لا ملاذ لا العاطل داك ماف واحد فيهم ح يهتم بكلامي و أنا عارفاهو كويس بعمل الفي بالو بس ! بس دامو ملاذ لاصقه فيهو كدا معناها هو مديها ضوء أخضر ، سكته فتره و كنت بفكر و لو أول مره أتنازل و أفكر بطريقه غير ، فتحت تلفوني و فتشت رقم فارس ، لمن لقيتو إترددت شديد في الآخر اتصلت عليهو ، شايفاهو وقف على حيلو و مشى بعيد من أصحابو و طوالي رد علي و هو ما مصدق إني إتصلت عليهو ، من غير سلام أو مقدمات قلت ليهو تعال دكان عوض و طوالي قفلت الخط و سبقتو ل دكان عوض ، طبعاً عوض لمن لقاني واقفه ساي قال لي ما عايزا تشتري ولا شنو ؟ قلت ليهو ما عايزا حاجه و في اللحظه دي فارس جا داخل و باين انو مبسوط ! في نفسي قلت الغبي أكيد قايلني صدقتي حركاتو و كذبو للمره التانيه عشان كدا مبسوط ، لمن الإتنين إتلفتنا على عوض قال لينا خلاص خلاص فهمت ، ح أطلع برا ، لمن طلع فارس قال لي عايزا تقولي حاجه ؟ قلت ليهو أكيد يعني ما ح أكون اتصلت عليك عشان اتفرج على سواد عيونك ، قال لي ما كنت عارف انو عيوني سودا شكراً ليك على حسن الملاحظه ، قلت ليهو بطل فارغه ما جايه اتظارف معاك ، قال لي ولا أنا ...قلت ليهو حلو يلااا خليك جادي و في نفس الوقت شجاع و واضح و قول لي الحقيقه ، عايز شنو انت من ملاذ أختي ؟!! عايزا تلعب بيها زي ما عملت معاي صح ؟
قال لي مدام بتعرفي تجاوبي على نفسك متصله علي ليه ؟؟ قلت ليهو عايزا اسمع الكلام دا منك عشان ما يكون ظنون و اقدر أواجه ملاذ بالحقيقه دي ....قال لي ما فهمت وضحي أكتر و ما تلفي و تدوري 😊
قلت ليهو ماف زول غيرك بلف و بدور و سؤالي واضح عايز شنو من ملاذ أختي ؟؟
قال لي بتسألي على أي أساس و علاقتي شنو بملاذ أختك !؟ قلت ليهو مش من البدايه قلت ليك خليك شجاع و واضح ؟ ما تخاف مني للدرجه دي ما ح أكتلك أنا ، قال لي انتي ليه ما بتسألي اختك ولا ما عندك شجاعه تواجهيها ؟؟
قلت ليهو اختي و عارفه البيها و العليها و من ناحيتها كل شي واضح بالنسبه لي ، باقي انت !
قال لي برضو ما فهمت 😊
قلت ليهو ما تتغابى ، خليك شجاع و جاوب ، قال لي لمن تكوني شجاعه و تقولي سؤالك بصيغه واضحه ح أجاوب غير كدا ما ح أتعب عقلي في التحليل و التفسير ، قلت ليهو ما قايلاك بتخاف مني للدرجه دي..... طبعاً كلامي استفزاهو ، جا ماشي علي و أنا بس ثابته في مكاني و بعاين ليهو بنفس نظرات القوه الكان بعاين لي بيها ، لمن وصلني و كان بيناتنا سنتمترات قال لي أنا ؟!! أخاف منك انتي ؟؟ ما تضحكيني عليك الله ....قلت ليهو اضحك ساي ما ياهو الضحك دا الحاجه الوحيده البتقدر عليها مع شلتك الفاشله ، ملامحو اتغيرت ، قرن حواجبو و قال لي على فكره أنا من قبيل متحملك و ساكت ليك ، ما تخليني أفقد أعصابي و أظهر ليك بشخصيه تانيه ، قلت ليهو بأي شخصيه ؟؟القذره ولا الحقيره ولا المنافقه ولا العاطله ولا النسونجيه ؟؟! غمض عيونو مسافه و لمن فتحهم بعد عني شويه و قال لي من الآخر قولي عايزا شنو ؟
قلت ليهو عايزا حاجتين و السلام :
اول حاجه تعترف انك كنت بتمثل علي و متفق مع أصحابك و تاني حاجه قول لي عايز شنو من ملاذ أختي و ياريت ل مره وحده بس يا فارس تكون صادقه و اقول لي الحقيقه..... طبعاً لمن ذكرت اسمو نظراتو إتغيرت ....بعد مسافه قال لي ايوه كنت بمثل عليك 😊و كلو عشان أثبت ليك انو العاطل البتنبذي فيهو الزمن كلو و الشايفاهو ولا شي و البتقارنيهو مع خليل و البتكرهيهو شديد و ما بتطيقي تسمعي اسمو ح يخليك تجري وراهو و تتعلقي و تعشمي فيهو و دا الحصل ..... طبعاً و هو بقول كدا أنا قلبي وجعني وجع ما عادي بس خالص ما بينت ليهو و كنت عاديه قدامو بس من جواي بتآكل من شدة الألم ، قال لي أما سؤالك التاني الكان مفروض ينسئل بصيغة : في شنو بينك و بين ملاذ أختي " بس شكلك ما قدرتي تقولي الصيغه دي 😊 المهم بيني و بين أختك ماف شي ، قلت ليهو قلنا شنو ؟؟
قال لي دي الحقيقه انا لا حبيتها لا عشمتها لا جيت بجنبها أساساً براها بتجي و تسلم علي ....قلت ليهو ما تكذب عشان تطلعها غلطانه براها ، انت الخدعتها بحركاتك البتعملها مع كل البنات عشان تعلقهم فيك ، انت كنت مصاحبها و غاسل ليها مخها لدرجة أنها كانت عارفه انك بتمثل لي و مع اني أختها ما جات كلمتني !!!
قال لي هنا مفروض تسألي نفسك ، لو كنت واعدها ف ليه امشي أخطب أختها و ما أخاف أنها تحكي ليك بالبيناتنا و تفضحني !!؟ ما عارفها عرفت من وين بس أكيد ما أنا الجيت قلت ليها اني ح أمثل على أختك و أعيشها في أوهام و بما انو هي ما ورتك فأكيد عندها اسبابها و مفروض تمشي تسأليها هي ما أنا ....قلت ليهو هي قالت انك مكلمها بالحتعملو كلو ....قال لي و أنا بقول ليك اني ما جبت ليها سيره ، بالمنطق كدا كيف اقول لوحده اني عايز أمثل على أختك !؟؟ قال لي زي ما قلت ليك أمشي اسأليها و أعرفي السبب ...
قلت ليهو إنت السبب ....قادر تصدق انها فضلتك علي !!؟ اختارت تسكت عشان ما تفشل ليك خطتك و تزعلك على أنها تجي و تكلمني ، كانت عارفه انو دي تمثيليه و كلها كم يوم كدا و تخلص عشان كدا ما إتكلمت و إختارت انها تخليك تستمتع على حساب أختها !💔 عارفه انها بسببك اتغيرت علي و هسي نحنا الإتنين بقينا ما بنتكلم مع بعض خالص و في حواجز كتيره اتبنت بيناتنا ؟؟ بطالتك و عطالتك و قذارتك كوم و كونك تعمل مشاكل بين أختين كوم تاني يا فارس و أنا عمري ما ح أسامحك على العملتو .....الإتنين سكتنا مسافه و بقينا بنتجنب نعاين لبعض ، بعد مسافه قلت ليهو قدامك خيارين يا تفهم ملاذ الحاصل و تخت حدود بيناتكم و تحاول ما تمارس تفاهتك و قذارتك على أختي ، يا تبقى قدر عمايلك و حركاتك و تجي تتقدم ليها بما انك السبب في دا كلو مع اني شايفاك ما مناسب لأي بت بس بما انها باعتني عشانك ف إن شاء الله تضوي عليها .....لمن قلت ليهو كدا رفع راسو و عاين لي و هو متضايق شديد ، قلت ليهو ما تضايق قدر دا ايوه عارفه المسؤوليه دي بتغلبك ، عاين لي جوه عيوني و قال لي جاده إنتي ؟؟ عايزاني اتقدم لأختك ؟؟
قلت ليهو إذا جادي معاها هي على الأقل ف ايوه دا العايزاهو ، قال لي بنبره عاليه ما على كيفك و ما إنتي البتفرضي علي قرارات ، و أختك دي أنا لا لمحت ليها لا عشمتها فيني ! قلت ليهو ياخي !!...كنت متصور معاها و رافع الصوره لا و كمان بتقابلها جنب المدرسه و هسي جاي تقول لي ما عشتها ؟؟ العشم دا كيف بالنسبه ليك ؟؟قال لي بإستغراب متين أنا اتصورت معاها و رفعت صورتها ؟؟ربعت ليهو يديني و قلت ليهو الكذب بجري في دمك بس ثواني ....فتحت تلفوني و بقيت أفتش ليهو في الصوره لأني بتذكر اني تاني رجعت و عملت ليها حفظ يعني زي كأني حسيت انو حيجي يوم و ينكر ...لمن لقيت الصوره لفت ليهو التلفون و قلت ليهو ما تكذب تاني ....عاين للصوره مسافه و قال لي بس دي ما ملاذ أختك ...ضحكت بسخريه و قلت ليهو حنلف و ندور كدا لمتين ؟؟
قال لي دي ما أختك زي ما قلت لي و يوم شفتيني معاها جنب مدرستهم فأنا أصلا كانت ماشي مدرستها ولاحق كم نفر هناك من لجان المقاومه عشان كنا بنعمل صيانه للمدارس و الدور كان على مدرستهم و هي و صحبتها شافوني بالصدفه و وقفوا سلموا علي و بقوا يتكلموا معاي بس شكلها أختك عايزا توصل ليك فهم معين عشان كدا ما قالت ليك الحقيقه 😊
طبعاً إتصدمت شديد في ملاذ! لا و كمان إتصدمت فيهو هو القال شغال مع ناس لجان المقاومه حقت حينا !!! لكن صدمت ملاذ هي الأكبر ، أبدا ما كنت متخيلاها كدا!!!
قلت ليهو برضو دا بسببك انت ! قال لي أنا قلت ليها حبيني؟؟؟
طبعاً لمن قال كدا رفعت راسي و عاينت ليهو ، قلت ليهو انت ما بتقول ، انت بس بتفعل و بتخلي بنات الناس معلقات فيك و بعدين تعمل نفسك رايحه و ما قاصد شي..... طبعاً قلت كلامي دا من غير ما أركز....عاين لي جوه عيوني و قال لي و دا معناهو انك اتعلقتي فيني و لسه متعلقه !
قلت ليهو أنا اتعلمت انو الكرامه و عزة النفس فوق كل شي و مهم كنت متمسكه بحاجه و الحاجه دي بتمس كرامتي من دون ما أتردد بفكها و تاني عليها ما بتلفت ، قال لي بس إنتي لسه متمسكه فيني ..
قلت ليهو بدليل اني سلمتك خاتمك صح ؟ و كمان بدليل إني قبل شويه أديتك خيارين من ضمنهم انك تجي و تتقدم لأختي ...دا التمسك صح ؟؟
من عارفه ليه انت واهم نفسك للدرجه دي و مفتكر انو الناس لا عندها شغله أو مشغله غيرك ! افهم إنو ماف زول مركز معاك إلا البنات الشبهك بالظبط ، انت كنت مرحله وهميه في حياتي و انتي و ذاتي ما ح اقول عنها مرحله ، انت كنت عباره عن دروس لفتره محدوده علمتني حاجات كتيره أهمها إنو الإنولد منافق و نسونجي و قذر و زباله حيفضل كدا و حيموت كدا ، و انت الخسران طبعاً لأنو حياتك كلها عباره عن ذنوب و قرف و عواليق و نفسك وسخانه و ما حتصادق أو تقابل إلا أصحاب النفوس الوسخه زيك ، الحياة حتتغير و الناس حتطور و تتغير كمان و تنجز في حياتها و حتقدم لنفسها و لغيرها إلا أنت و المعاك حتكونوا زي ما كنتوا و لو مرت مية سنه حتكونوا في نفس الحته تحت نفس الشجره أو الحيطه بنفس السجائر إتعودتو عليها من زمان ....حتى الحيط البتقعدوا تحتها دي حيجي يوم تنهد و ينبنى غيرها أو يتغير شكلها للأفضل طبعاً بس انتوا حتكونوا انتوا بنفس عولاقكم بنفس أهدافكم المن ضمنها انكم كيف تشاغلوا البنات و تخلوهم يتعلقوا فيكم و تراهنوا عليهم ...
قلت ليهو كدا و طلعت خليتو و هو كلمه ما قدر يقولها...
يتبع.......
