صحيت بسبب صوت مزعج كدا ، أول ما فتحت عيوني اتفاجأ ليك بزول قاعد و مديني ضهرو !...قلبي طار من مكانو و عقلي شطب ، قمت مخلوعه و قلت ليهو بنبره عاليه بتعمل شنو هنا ؟
طبعاً هو كان خاتي ليهو كرسي في نص الأوضه قدام التلفزيون ، فلمن سمعني إتلفت علي و بخلعه قام من الكرسي و قال لي معليش معليش صحيتك .... طبعاً على حس صوتي ملاذ و مروه صحوا لأنهم كانوا نايمين معاي في نفس الغرفه اتفاجؤا زيي لمن شافوا حسين قدامهم ! شلت طرحتي بسرعه و قلت ليهو بنبره عاليه اطلع من هنا و بقيت جايطه لحد ما ناس أمي جوا ....حسين قال ليهم معليش يا جماعه والله بس كنت متابع فلم قبيل طلع و جيت لقيتك يا خالتو إخلاص دخلتي التلفزيون ، ف دخلت و شغلتو لكن ما قاصد أصحي زول......قلت ليهو تصحي شنو !؟ قايلنا متصايقين عشان صحيتنا بس ! أمي قالت لي مها خالص ، قالت ليهم معليش شكلها مخلوعه عشان كدا ، عمتو إجلال قالت ليهو أطلع قدامي يا حسين و كانت بتعاين لي بنبرة زعل ، كلهم طلعوا إلا أمي قالت لي عيب ما كان تجوطي فيهو كدا ....قلت ليها ما معقوله معاهو يا أمي ! دي أوضة بنات فكيف يسمح لنفسو يدخل علينا و نحنا نايمين عشان بس يتابع فلمو !! قالت لي خلاص معليش ، ذاتو أنا الغلطانه كنت أخليهو يتم فلمو لكن لمن طلع قايلاهو ما عايز يحضر و ديلك كلهم ناموا فدخلت التلفزيون و مشيت المطبخ اتفقد حالو ، قلت ليها تاني ح أتربس الباب بس ، قالت لي حصل خير و طلعت ، مروه قالت لي مبالغه لكن ! ملاذ قالت ليها الولد دا أهبل ساي ...ما شفتو وشو كان عامل كيف لمن مها جاطت فيهو 😂🤣
طبعاً أنا لسه كنت متضايقه من حركتو دي ، مشيت تربست باب الغرفه و قفلت التلفزيون و طفيت النور .....في اليوم البعدو طبعاً عمتو إجلال و أولادها عاملين فيها زعلانين ، لمن أمي ودت ليهم الشاي قالوا ما عايزين ، فطوالي أمي جات و قالت لي إلا تمشي و تعتذري منهم ، قلت ليها ما غلطت عليهم عشان أعتذر ، مفروض هم اليعتذروا مننا ...قالت لي ديل ضيوف و ما حلوه نزعلهم مننا و هم اسبوع ما تموهو معانا ، قلت ليها أمي أنا ما بعتذر و خلاص ...مش ما عايزين الشاي خليهم على راحتهم ، نشوف حيقعدوا من غير أكل و شراب لحد متين !
المهم أمي مشت ليهم و بقت تشيل و تعتذر منهم و تحنس فيهم و تحلفهم لغاية ما رضوا و شربوا الشاي ، قلت أصلاً دي حركات منهم المهم بعدها أمي نادتنا أنا و مروه و قالت لينا أمشوا لي بيت نوال و جيبوا لي منها صاجين كبار عشان أعوس فيهم الآبري ، قلنا ليها طيب و فعلاً مشينا لخالتو نوال ، أدتنا ليهم و قالت لينا بعدين جيبوا لي من الآبري حقكم ، قلت ليها ما جايانا ولا شنو ؟
قالت لي مصدعه والله لكن لو قدرت بجي عليكم..... طبعاً كذابه ساي ما بتجي كل سنه بتقول كدا و لو جات ما بتعوس معانا بتقعد تعاين بس عكس أمي كل سنه بتمشي ليها و بتعوس ليها و لو عامله جردلين أما بتعوس ليها واحد كامل و مرات واحد و نص ....أمي بتعوس للنسوان الحي كلهم و هم لمن تكون العواسه علينا بقعدوا يتحججوا ، المهم شلناهم و طلنا ، أنا كنت شايله الصاج الكبير و مروه شايله الأصغر منو ، و نحنا ماشين كدا مروه قالت لي مها عايني فارس يعاين ليك ساي ، قلت ليها ما تركزي مع العاطل دا ، طبعاً هو كان براو تحت ضل شجره ، لمن جينا مارين بجنبو قال ل مروه حرام عليك ياخ ! ليه تخليها تشيل الصاج الكبير ؟؟! بتتعبيها لي ....قلت ليهو أحسن تحترم نفسك ، مروه ضحكت و قالت ليهو خلاص تعال شيلو انت .... طبعاً ولا اتردد جا و بالغصب شالو مني ....مروه قالت يا حليلي أنا منو الحيشيل مني ! قال ليها طيب ختيهو هنا أودي دا و أرجع اشيلو ليك ، هي طوالي ختتو و إبتسامتها كانت للضرس الأخير ، لمن مشى قرصتها و قلت ليها ماف سبب يخليك تتكلمي و تضحكي معاهو ، قالت لي لييييه بتغيري ولا شنو ؟
اتنهدت و قلت ليها بالجد أنا تعبت من الشرح و التبرير ، قلت كدا و إتحركت من جنبها ، قالت لي ماشه وين ؟ قلت ليها البيت ، ماف سبب بوقفني هنا و انتي برضو ....قالت لي يعني نمشي و نخلي الصاج هنا ؟ أكيد لي ، خلينا ننتظر فارس لحد ما يجي ، قلت ليها إذاً إنتظريهو انتي و طوالي مشيت ، لمن قربت من البيت فارس جا طالع ، الإتنين كنا ماشين على بعض ، لمن وصلنا بعض قلت ليهو انت ممثل فاشل ، قرن حواجبو و قال لي ممكن ما تفكري فيني بالطريقه دي ؟؟ أنا ما جابرك تحبيني بس على الأقل ما تشككي فيني 😊قلت ليهو إذاً خليك بعيد عني عشان ما اشكك فيك ، ملامح وشو إتغيرت ، قال لي عارفه أنا بالجد كنت غبي و أهبل لمن حسيت انك ممكن تتغيري في يوم ، ح أعترف إني و لأول مره أفشل الحصول على حاجه عايزها ، قلت ليهو أمشي أمشي مروه منتظراك ...عاين لي بضيق و مشى ، المهم لمن وصلت البيت جات بت عمتو إجلال و فتحتو لي ، لمن دخلت أمي قالت لي ما شاء الله والله فارس ما قصر ربنا يبارك فيهو و يهديهو ، بقى ولد هدي و رضي والله و كل الناس بتشكر فيهو ، ما علقت على كلامها ، شويه كدا سمعنا صوت الباب و صوت مروه و هي بتقول أفتحو الباب ياخ ! أمي قالت لي أمشي افتحي ليها ، السلك شكلو مقطوع ، المهم مشيت و أول ما فتحت الباب فارس طلع في وشي ، طبعاً ما عاين لي دخل طوالي و وراهو مروه بترفع لي في حواجبها ، قلت ليها جايباهو معاك ليه يعني ؟كان ممكن توقفيهو جنب الباب و تشيلي منو الصاج 😊 قالت لي بري أنا ما زيك و ما بقدر أقول ليهو ما تدخل و ذاتو ماف سبب يخليني أمنعو من إنو يدخل ، المهم لمن دخلنا جوه اتخيلوا لقيتو قاعد و بكل عين قويه بتونس مع أمي و عمتو إجلال ! جات سلوى بت عمتو إجلال و أدتو مويه ، شالها منها شرب و قال ليها تسلم يدك !!
طبعاً هي ما صدقت تشيل و تتكشم ، قعدت و قالت ليهو إنت جارهم ولا شنو ، ساكنين وين ؟ قال ليها ايوه جيران بس بيتنا لقدام شويه ، نهاية الشارع ، قالت ليهو ايواااا ، عمتو إجلال قالت ليهو ما قصرت يا ولدي و ما عليك حركات أولاد البندر ديل ، كونك تساعد أخواتك ديل و تشل عنهم الصاجات قدام الناس حاجه بتوضح قدر شنو انت زول شحم و أصلك طيب ، قال ليها العفو يا أمي ما عملت شي ..... طبعاً أنا كنت بحمر ليهو ساي و كل ما يقول حاجه بعاين ليهو بحده أكتر لأنو كلامو كلو كذب في كذب ....قلت ليهم المظاهر خداعه يخوانا .... طبعاً هو اتخلع و ما اتوقعني اقول كدا قدامهم و مروه طوالي بقت تقول لي بصوت واطي لا لا ، طبعاً أمي ما إهتمت بكلامي لأنها شايفه اني عندي حساسيه مع كل الناس و عارفه إني قبل كدا اتشاكلت كتير مع العاطل دا بس نظرتها لي كان معناها إنو ماف داعي اتكلم عنو كدا قدام الناس و هو في نص بيتنا ، سلوى قالت لي قصدك شنو ؟؟
طبعاً هنا مروه و أمي اتوتروا ، قلت ليها ما قصدي حاجه بتكلم براي أنا ....عمتو إجلال قالت لأمي بوك دي ما طبيعيه إلا توديها لشيخ .... طبعاً لمن قالت كدا فارس قعد يضحك و سلوى طوالي قعدت تضحك معاهو ، في سري قلت حقو الزول يمسكهم الإتنين و يضربهم في بعض ! شويه كدا قال ليهم أنا أمشي بعد دا ، أمي حلفت ما يمشي إلا يشرب الشاي ، عمتو إجلال قالت ليهو اقعد يا ولدي اشرب الشاي ....أمشي يا سلوى أعملي ليهو شاي..... طبعاً سلوى زي الشاطره قامت طوالي و مشت المطبخ ، و أنا طوالي مشيت خليتهم ، بس في نص الحوش خطرت على بالي حاجه طوالي مشيت المطبخ و لقيت سلوى تعاين للبتوجاز ساي و ما عرفت بستعملوهو كيف ...في سري قلت ليها دي الشلاقه ، مشيت فتحت الأنبوبه و ولعت ليها النار ، قالت لي طلع ساهل ، قلت ليها ايوه ، المهم لمن المويه سخنت قلت ليها خلاص بسويهو و انتي ودي ليهو الشاي ، قالت لي كويس و كان واضح انها مبسوطه شديد ، المهم أديتها ضهري و مشيت على حافلة العده و شلت علبة الحب شاي و علبة الشطه الحمراء و فلفل مسحون ، جيت كبيتهم كلهم و كترت الشطه ، كبيتهم معلقتين ، دا كلو و هي ما شايفاني ، المهم شلت كبايه و صفيت الشاي فيها ، ختيتو في صينيه و مديتها ليها ، شالتها مني و هي بتتبسم ساي و مشت بيها عليهم ، خليتها بعد ختتها ليهو و قعدت حتى مشيت ليهم و طبعاً مروه تتبسم لي ساي و ترفع لي في حاجبها ، قايلاني جيت راجعه عشان فارس لسه قاعد ، أمي قالت ليهو أشرب الشاي ما يبرد ، شال الشاي و أنا بعاين ليهو ساي و أول ما شال جغمه منو وشو جاب ألوان و طوالي عاين لي ! كان ح يكح و يبزغ الشربو بس كتمها ،والله قايلاهو ح يخلي الشاي بس شربو كلو و هو بعاين لي لمن إستغربت فيهو ! لمن خت الكبايه عرقو كان صابي زي المطره ! قال ل سلوى تسلم يدك شاهيك حلو ... طبعاً هي المعفنه ما قالت ليهو اني العملت الشاي ، اتخجلت و قالت ليهو تسلم ....الغبيه قايله طعم الشاي سمح ، قال لأمي بعد دا ح أمشي ، قلت ليهو أقعد اتغدا معانا ، لمن عاين لي إبتسمت ليهو بخباثه و هو فهمني ، قال لي مره تانيه ، ودع ناس أمي و مشى بإستعجال ، كنت مبسوطه شديد من العملتو لدرجة اني كنت ببتسم ساي لغاية ما لقيت مروه بتعاين لي و هي مكشره وشها و لمن بقينا برانا ضربتني في ضهري و قالت لي عملتي ليهو شنو في الشاي يا بليده !
قلت ليها دا سر الوصفه ، قالت انتي وحده غبيه و بليده ساي ! المهم بدينا نعوس في الآبري و ما خلصنا إلا بعد المغرب ، أمي شالت من الآبري و ختتو في كيس و قالت لينا لمن تقولوا ماشين ترجعوا الصاجات دي ل نوال أدوها معاكم الآبري دا ، قلت ليها حقو الزول ما يديها 🙂
المهم بعد ما صلينا المغرب و اتغدينا ، طلعنا عشان نودي الصاجات ، المره دي ملاذ مشت معانا ، وصلنا بيت ناس خالتو نوال أديناها الصاجات و الآبري و مرقنا مشينا على دكان عوض عشان نشتري منو اللبن ، طبعاً عوض كالعاده جنو يهاظر مع ملاذ و أنا حركاتو دي ما بتعجبني ، فقلت ليهو عوض احترم نفسك شويه و انتي يا ملاذ تلمي نفسك ولا أكلم ليك أبوي ؟😊
قالت لي هسسسي انا عملت شنو الزمن كلو شابكاني اكلم ليك أبوي ، أكلم ليك أبوي !! امشي كلميهو ما خايفه أنا ، مروه قالت لينا ياخ ما تقعدوا تتشاكلوا لينا هنا ! شلنا اللبن و طلعنا و ملاذ عامله فيها زعلانه ، مروه قالت ليها ماف حاجه بتزعل و مها كلامها صحيح ، عوض دا انتي مالك معاهو ولا هو المالو معاك ؟
قالت ليها دا واحد من معجبيني الكتار و أنا بس برد عليهو عشان ما أكسر خاطرو ، عارفاهو مكسر فيني ✋😎
طبعاً أنا و مروه عاينا لبعض و بعدها قعدنا نضحك ، أثناء ما بنضحك كدا جانا صوت بقول ضحكونا معاكم ، لمن إتلفتنا لقيناهم شلة العاطل داك (مش قلت ليكم ديل عاطلين و 24 ساعه بكونوا في الشارع و بتلقاهم في أي مكان و زمان !) حسن قال ليهو أسكت يا مان لأنو فارس لو سمعك بكسر ليك خشمك دا ، قال ليهو لكن هسي فارس ما موجود و بعدين أنا سألتهم بس ، عايزا اضحك و أنبسط معاهم ، مروه قالت لينا أرح أرح ما تركزو معاهم ، طبعاً أنا كنت جاهزه و منتظره واحد منهم بس يسألني أو يتجادل معاي عشان أكرهو حياتو بس ما حصل ، ملاذ قالت غريبه فارس ما قاعد معاهم ، مروه قالت ليها فارس بقى ما زيهم و اتغير كتييير و عايز يبقى زول بعد دا ، ملاذ قالت ليها يعني كان بعاتي و قعدوا يضحكوا ، في سري قلت ليهم فارس بتاعكم دا حالياً بكون بايت في الحمام و قعدت ابتسم بشماته و هم ما منتبهين لي ، ملاذ قالت بالجد كدا يا ربي فارس دا الغيرو شنو ؟
مروه قالت ليهو يمكن حب ليهو وحده و عايز يتغير عشانها و طوالي عاينت لي ، ملاذ ضحكت و قالت ليها يمكن ، المهم لمن وصلنا البيت لقيت مكالمات من شجن ، رجعت ليها و قعدت أتكلم معاها ، قلت ليها انتي أريج صحبتنا مشت وين ؟ قالت لي اييييك انتي من زمنها يا مها ! أريج سافرت دبي لخالتها و هسي ليها قريب ال6 شهور ، قلت ليها اهاااا ، قالت لي لو كنتي بتتواصلي معانا كنتي عرفتي أخبارنا 😊 طبعاً سكته ساي
المهم في اليوم البعدو كان عندي شغل ، برضو أنا و أسامه الحنقدم الحلقه سوا ، الاء قالت لينا المقره دي ما عايزين أي مناقره و ياريت تتعاونوا مع بعض عشان الحلقه تكون ناجحه ، قلنا ليها أن شاء الله و فعلاً بدينا حلقتنا ، بعد السلام و الترحيب بالمستمعين قلت ليهم موضوع حلقتنا اليوم بتكلم عن العنوسه و أسبابها و كيفية معالجتها ، اتصلوا علينا و شاركونا بإقتراحاتكم أو حلولكم و نسعد بمداخلاتكم 💜
يتبع......
