طبعاً غضبت غضب ما عادي و من مكاني داك مشيت عليهم و مروه جاريه وراي و هي شغاله لي ماشه وين يا مجنونه...
وصلت الأوضه بس ما دخلت طوالي ، وقفت و ضربت ليهم الباب بقوه و قلت ليهم اصحوا يا النايمين ، ضربت الباب شديد لحد ما صحوا و هناك ناس أمي جوا يشوفوا الحاصل شنو ، طبعاً حسين و حامد أولاد عمتو إجلال اتخلعوا و وقفوا على حيلهم ، أمي قالت لي بسم الله في شنو يا بت ، قلت ليها شوفي يا أمي و أشرت ليها على حامد و حسين ، إتلفت على عمتو إجلال و قلت ليها انتوا ضيوفنا و أنا رغم إني ما بقبل الغلط بس مع ذلك ح أحاول اتكلم معاكم بالهداوه المره دي و الدنيا أصلاً رمضان ....شايفه أولادك ولا لا يا عمتو ؟؟؟ العملوهو دا صح ؟؟ يجوا و يرقدوا للبنات في أوضتهم و يخلوهم ينوموا في المطبخ دي حاجه كويسه ؟؟.... طبعاً سكتت و ما ردت علي ، إتلفت على حامد و حسين و قلت ليهم بالجد ما عارفه اقول ليكم شنو لأنكم ما شفع عشان اقعد اشرح ليكم و أفهمكم الصح و الغلط ! ياخ انتوا ما بتخجلوا ؟؟ هسي سلوى أختكم دي لو جا راجل داخل عليها في أوضتها حترضوا ؟؟ ياخ أنا ما قادره افهم ذاتو انتوا بتفكروا كيف !!....شوفوا ما عايزا أكتر معاكم من هنا و لقدام ممنوع تدخلوا الأوضه دي و ذاتكم ما تجونا في بيجاي ، شايفين الأوضه الفي نهاية الحوش ديك ولا ما شايفنها ؟ بس تاني حتقعدوا فيها بس تاني ما ألقاكم هنا ، و هسي لو سمحتوا أطلعوا من الأوضه دي.... طبعاً خشمهم ما فكوهو ، زي السكاره كل واحد لبس قميصو و طلع ، حسين طلع من البيت و حامد مشى الأوضه ديك و أمهم دي قربت تطرشق من الزعل ، قالت لي انتي لو قعدتنا دي مضايقاك إتكلمي ، أمي قالت ليها لا لا ما كدا بس كمان يا إجلال عملة أولادك بطاله و....قاطعتها و قلت ليها ما تبرري ليها يا أمي ، يعني هي و مع إحترامي ليها رغم عمايل أولادها دي كلها ما شايفاهم غلطانين تفتكري إنها حتعرفهم غلطانين إذا بررت ليها و هي شايفه بعيونها ؟ أكيد لا.....عمتو إجلال أنا ما عندي بيكم شغله تقعدوا سنه سنتين مية سنه ، بس لازم تقعدوا بإحترام ، ما بقبل أي فوضه في البيت دا ، لازم كل واحد يحترم نفسو و ما يتخطى حدودو......بكدا نقاشنا خلص و مروه و ملاذ رجعوا للأوضه و هم شغالات لي قادره لكن ....قلت ليهم على فكره الحاجه دي ما محتاجه قوه خارقه ....ايوه في حاجات كتيره ممكن الواحد يغض نظر عنها و ما يتجادل مع زول بسببها بس في حاجات السكوت و التغاضي عنها بأدي للتمادي ، حامد و حسين لو انتوا من البدايه ما أديتوهم وش ما كان اتجرؤا و دخلوا الأوضه دي من الأساس ، ملاذ قالت لي كنت متوقعه ردة فعلك تكون أقوى من كدا بس الله ستر ، مروه قالت ليها فعلاً بس زي ما قال أحمد شياطينها مربطه ، قلت ليهن كلبات حقو الزول كان يخليكن تنومن في المطبخ ، ضحكوا على كلامي و قالوا لي عادي كنا حننوم في المطبخ المشكله وين ؟😂
المهم قريب للمغربيه كدا بدينا نجهز في صينية الإفطار ، عملنا صينيتين وحده لينا و التانيه للخايبين ديلك أولاد عمتو إجلال ، طبعاً ما بطلعوا يفطروا في الشارع مع الناس ، يفطروا هم الإتنين بس في البيت ، المهم فرشنا الفرشه في الحوش و طلعنا التلفزيون ، على بال ما الأذان يأذن أنا و مروه و ملاذ دخلنا جوه و كل وحده شالت مصحف و بقينا نقرا بالدور ، أصلاً بنعمل كدا كل رمضان ، لمن المغرب أذن طلعنا برا و جرينا جبنا الصينيه ، أول ما ختيناها كدا عمتي نوره و عواطف جارتنا جوا داخلين بحاجاتهم ، أمي قالت ليهم أرح أرح ، استعجلوا و جونا سلموا علينا و حللنا صيامنا ، طبعاً خالتو عواطف كان جايبه معاها شفعها الإتنين ، بدل ما تخت ليهم براهم خلتهم ياكلوا معانا ، و طبعاً هم مشاغبين و قليلين أدب ، بقوا يشيلوا الأكل و تاني يرجعوهو الصحن و الواحد يمص أصابعو مية مره و طبعاً براكم عارفين خمج الشفع ، طوالي شلت صحن و نقصت ليهم فيهو و قلت ليهم تعالوا أقعدوا بيجاي و أكلو الإتنين سوا ، خالتو عواطف قالت لي لا لا ما بقدروا ياكلوا إلا مع الناس ، قلت ليها تمام ، نفس الصحن الكنت ماداهو ليهم شلتو لنفسي و بقيت آكل منو شويه شويه ملاذ و مروه بقوا يدخلوا يدينهم معاي ، خمج شفع خالتو عواطف ديل ما كان عاجبهم بس ما قدروا يقولوا حاجه ، خالتو عواطف قالت لينا مالكن قال بتقرفن من أولادي يعني ؟؟
قلت ليها أكيد ! قالت لي هسي البقرف شنو كما دي حركات منكن ساي ، قلت ليها خالتو عواطف كدي عايني لشفعك ديل بياكلوا كيف ؟؟
أمي قالت ليها مها !!...قلت ليها دقيقه يا أمي عشان هي ما تتحسس ساي ، الموضوع ما محرج ولا بزعل ، الشفع ديل كلهم ما أولادك بس بياكلوا بطريقة الخمج دي ، أيوه انتي ك أمهم قد تشوفي اكلهم عادي و ما بتقرفي منهم بس الأكيد انك ما بتقدري تغصبي الناس ياكلوا مع شفعك من صحن واحد ، و زي ما قلت ليك ما أولادك بس دا حال الشفع كلهم عشان كدا يفضل إنو أكلهم يكون براهو و ما يدوهم مع الناس الكبار أنا لمن تكونوا في بيتكم أن شاء الله تاكلي اللقمه من خشمهم ماف زول بسألك بس ما تغصبي الناس عليهم 😊
طوالي طلعت يدها من الصحن و غسلتها و قالت لأولادها أرح أرجعكم البيت عشان ما تقرفوا الناس ، عمتو إجلال قالت ليها خليهم ساي ما تشتغلي بيها دي من قبيل عامله مشاكل مع الناس ، أنا القاعده قدامك دي أدتني حقي و ياهو ساكته و قاعدها ما عشان شئ إلا عشان عقلي أكبر من عقلها و البيت دا بيت ولد عمي ما بطلع منو إلا هو يجي يقول لي يا إجلال امشي لي من بيتي .....عمتي نوره قالت ليها البت دي زول شغال بيها ماف ، و بعدين انتي مها دي بتعرفيها من اليوم ولا من أمبارح ؟! ما من زمان عارفه حركاتها دي الجديد شنو يعني ؟ عليك الله اقعدي ساي و خلي الأولاد في حالهم .... طبعاً أمي تشيل و تحمر لي ، قدامهم قالت لي تاني لو بتسوي لي أمورك دي قدام الناس والله العظيم أعمل ليك صينيه براك و اقفلك جوه الأوضه ، قلت ليهم غيتو أنا ما قلت شي غلط بس براكم ما بتحبوا الحقيقه و النصيحه ، مليت لي كبايه عصير و شلت الصحن و دخلت بيهم جوه ....بعدها صلينا المغرب و جهزنا الجبنه و شربناها و سرعه سرعه انا و ملاذ غسلنا العده عشان نمشي صلاة التراويح ، كل وحده لبست عبايتها و طلعنا ، و نحنا ماشين كدا كانوا في رجال قدامنا ماشين على المسجد و لابسين جلاليب ، ملاذ قالت لينا الفي النص داك مش فارس ؟
لمن قالت كدا قلبي عمل شحححح ، و هو التقول سمعها طوالي إتلفت علينا و سلم علينا من بعيد و كمل طريقو المسجد و أنا مصدومه بالجد لأنو دي أول مره أشوفو ماشي المسجد !! ملاذ قالت أصلو ما بصدق والله !! معقوله فارس مشى المسجد !! مروه قالت سبحان مغير الأحوال ، شكلو بالجد بحب البت ديك عشان كدا اتغير عشانها و بقى ماشي صح !.... طبعاً أنا طوالي حمرت ليها بس من جواي حسيت إني اسعد إنسانه ! كلام مروه دخل قلبي توش و إبتسم لمن عرفت إنو متغير عشاني !! ايوه الموضوع عشان جديد علي حاسه بغرابه شويه بس ما بنكر إني بديت أعجب بيهو ....أو يمكن اتخطيت مرحلة الإعجاب دي ، ما عارفه كيف و متين و ما قادره أرتب أفكاري و أوزن مشاعري بس بيني و بين نفسي عارفه إنو فارس خلق ليهو مكانه كبيره جواي ....
بعد صلاة التراويح نحنا البنات انتظرنا شويه كدا عشان الرجال يطلعوا قبيلينا أو يكونوا ماشين قدامنا المهم نكون وراهم ، لمن طلعنا كلنا سوا بنات الحي كانوا بتكلموا عن فارس و منبرشين فيهو عشان لابس جلابيه و في نفس الوقت مصدومين فيهو لأنو دي اول مره يشوفوا داخل المسجد ، مروه قالت ليهم اطمنوا يا بنات شكلو حابي ليهو وحده و هي السبب في التغيير الحصل ليهو دا ، قالوا ليها تفي من خشمك ياخ ، فارس للجميع و ما بنرضى إنو يحب وحده ، يعني يا يحبنا كلنا يا لا ، وحده قالت ل مروه و انتي عرفتي من وين ؟ ما اظن تكون بت السبب في دا لأنو البنات هم البحبوا فارس بس فارس ما بحب أي بت هو بس بقضي بيهم زمن ، طبعاً لمن قالت كدا أنا إتمليت و زعلت قدرتي ، ملاذ قالت ليها و انتي عرفتي من وين ؟قضى بيك زمن ولا شنو ؟؟
مروه قالت ليهم خلاص يا جماعه اقفلوا السيره دي و حالتنا طالعين من مسجد 😂 طبعاً كلهم ضحكوا إلا أنا صدقت الكلام القالوا ، و قلت أنا ليه اتغاببت ليهو للدرجه دي ما أكيد هو عايز يلعب بي و ينتقم مني ....من اليوم داك بقيت ما بديهو وش و لو لاقيتو بالصدفه عيني ما برفعها عشان أعاين ليهو ، رجعت أعاملو زي زمان و أسوأ و كلامي ليهو بقى زي السم ، في يوم ملاذ ما مشت معانا صلاة التراويح لأنو عندها عذر مشينا أنا و مروه بس ...في نص الطريق طلع فارس في وشنا ، قال لينا السلام عليكم ، مروه بس الردت عليهو أنا أنا مشيت طوالي ، طبعاً ما قدر يلحقني لأنو الشارع مليان ناس ، المهم ما وقفت إلا جنب المسجد ، إتلفت وراي لقيت مروه بعيده مني ، دخلت طوالي و مشيت ل المصلى حق النسوان ، مروه لمن جات قالت لي مالك انتي مع فارس ؟؟
قلت ليها مالي ؟؟ في شنو يعني ما من يومي ما بطيقو ! قالت لي مع علي أنا خلينا نصلي بس ....المهم بعد ما خلصنا صلاة و طلعنا مروه قالت دقيقه ما تمشي قلت ليها ليه في شنو ؟؟
جرتني من يدي و ساقتني على جنب كدا ، وقفتني ورا شجره و قالت لي ما تتحركي من هنا هسي بجيك ، قلت ليها في شنو ياخ ؟؟؟
قالت لي ثواني و مشت و أول ما هي إختفت كدا فارس طلع في وشي ، كنت ح أتحرك كدا بس هو مسكني من يدي و قال لي خلينا نتكلم ....إتخلعت و بقوه فكيت يدي منو و قلت ليهو أنا ما وحده من بناتك المايعات البرضوا انك تمسك يدهم و تقرب منهم ! إياك تفكري فيني بالطريقه المقرفه دي ، قال لي ما قصدي والله و آسف شديد بس كنت عايز اتكلم معاك بأي طريقه ، قلت ليهو ما عايزا معاك أي كلام ، قال لي اسمعيني طيب لأني عندي كلام معاك ....اول شي خليك عارفه إني ما بفكر فيك بأي طريقه مقرفه لأنو الحاجه دي ما شبهك خالص ، يعني مهما كنت تافه و حقير و نسونجي زي ما بتقولي علي مستحيل أفكر فيك بطريقه قذره و لعلمك كل البنات الكنتي بتشوفيني معاهم هم الكانوا بجوا لحد عندي و انا ما حصل استغليت وحده و خدعتها ، كلهم شايفين و عارفين أنا شنو و مع ذلك كانوا بجوني ، تاني حاجه أنا بطلت الحاجات دي كلها و حالياً مبسوط من نفسي و راضي عنها ، تالت حاجه انا عرفت السبب الزاعجك و الخلاك تختصريني و ترجعي تعامليني زي زمان و اسوأ و لعلمك أنا اتضايقت أكتر منك لأنك صدقتي كلامهم و شككتي فيني رغم اني اتنازلت و جيت إعترفت ليك و يا بت الناس خليك عارفه اني غيرك ما شايف و أساساً ماف سبب يخليني أضيع زمني و أغير نفسي بس عشان اتقرب منك من فراغ !!
أنا لمن اتغيرت اتغيرت عشانك ، عشان انتي بتستاهلي راجل بالمعنى الحرفي ، انتي ما حاجه هينه عشان تقبلي بأي زول و خلاص ، إنسانه زيك قدرت تحافظ على عفتها و ما أدت أي زول فرصه عشان يلوث سمعتها و عفتها تستاهل زول يعمل المستحيل عشان يصل ليها ....رابع حاجه حركتك دي أوحت لي بحاجه و انا أصلا كنت متأكد منها بس كنت عايزك تلمحي لي بالحاجه لأني عارف كويس انو صعب عليك تجي و تعترفي لي ، مهم تعترفي لي المهم انك تكوني بتبادليني بنفس الإحساس ، أنا ما عندي مشكله بنتظرك لحد ما تشاوري نفسك و تشيلي كل شكوك دي و خليك عارفه اني مستعد اصل لحد بيتكم و هسي لو عايزاني أصل البيت بصل انتي بس أديني الإشاره .....
طبعاً بقيت مبحلقه عيوني فيهو و أنا ما قادره استوعب كلامو دا ، زح مني شويه و قال لي أمشي بعد دا عشان ماف زول يشوفنا سوا و يفهمنا غلط.... طبعاً لسه كنت واقفه و ما مصدقه السمعتو ، فهو ابتسم بس و قال لي خلاص انا الح أمشي ، مشى كدا و طوالي مروه جاتني ناطه و قالت لي بحماس هاااا قال ليك شنو ؟؟
ما رديت عليها لأنو كنت مصدومه شديد ، مشينا البيت و أنا طول الطريق ما رديت على اسئلتها ، لمن جينا البيت طوالي مشيت سريري ورقدت فيهو و اتغطيت رغم إنو ماف برد ، بس انا كنت حاسه انو في برد بالإضافه لأنو ضربات قلبي كانت غير منتظمه و حالتي كانت حاله ، ما نمت خالص بس كنت مفتحه عيوني ، برمش عادي بس بالي في حته تانيه ، أمي كانت كل ما تطلع و تاني تدخل بتلقاني بنفس الوضعيه ، و مروه قاعده و منتظراني أحكي ليها ، أمي قالت لي مروه البت دي إلا كان عيانه ولا الصابها شنو يا ناس ! سمعت مروه قالت بصوت واطي ، صابتها سهام الحب ....أمي جات ختت يدها على جبيني و قالت لي حرارتك عاديه ! طيب مالك يا بتي ؟!! قلت ليها ولا شي بس حاسه نفسي نعسانه و في نفس الوقت ما عايزا أنوم لأنو أنا و مروه اتفقنا نحضر فلم الساعه 1 في mbc2 عشان كدا أنا هسي قاعده أصارع في النوم ، قالت لي غايتو انتي ! من متين الفلم بسوا ليهو كدا ، نومي لو عايزا تنومي فلم شنو البتصارعي النوم عشانو !...
المهم بعد ما اتعشينا مروه بقت تنق في رأسي عشان أحكي ليها ، قلت زي ما مشيتي حكيتي ليهو خليهو يحكي ليك ...قالت لي هو قال ليك اني حكيت ليهو بالكلام القالوا البنات يوم داك و البسببو انتي زعلتي ؟؟
لمن رفعت ليها حاجبي ختت يدها على خشمها و قالت لي والله هو الأصر علي عشان أحكي ليهو الحاصل ف حنيت عليهو و حكيت ليهو ....قالت لي ياخ قولي لي قال ليك شنو ؟؟
مع اني ما بحب أحكي لزول أو افضفض حتى لأقرب الناس لي بس يومها ما عارفه نفسي كنت حاسه بشنو ، بس الأكيد انو الجواي كان أكبر من إنو ينسكت عليهو ، أحاسيسي غلبتني و أصرت إنو تظهر نفسها ف لقيت نفسي بحكي ل مروه و هي كل ما اقول حاجه تقول لي ووووبعلي ، بعد ما خلصت كلامي لقيت عيونها زي القلوب ، قالت وااااي معقوله فارس قال ليك. كدا ؟!!! طلع جادي والله ، مش قلت ليك ما قاعد يكذب عليك ، قلت ليها ما عارفه ....قالت لي لا لا بعد دا إنتي أكيد عايزا ليك كف كفين كدا عشان يعدلوا راسك ! يا بت الولد قال ليك مستعد اصل البيت أكتر من كدا عايزاهو يثبت ليك إنو جادي كيف ؟؟
قلت ليها برضو ما مقتنعه ، زهجت مني و قالت لي عنك أن شاء الله ذاتو ما تقتنعي ، انتي عويره و مقعده و ذرة فهم ما عندك و حتفضلي كدا و الأكيد انك حتقضي طول عمرك وحيده لأنك بتنفري الناس و بتشكك فيهم ، أنا بس زعلانه على فارس لأنو اختار الإنسانه الغلط .....قالت كلامها دا و مشت خلتني ، رقدت و قبلت على الحيطه و أنا أفكاري كلها جايطه و ما فاهمه حاجه.....بعد يومين من الكلام دا تاني لقيت فارس بالصدفه ، قال لي أنا جادي والله ، انتي عايزا كم يوم عشان تديني موافقتك ؟؟
اتنهدت و قلت ليهو منو القال ليك اني ح أوافق ؟ قال لي مها نحنا اتجاوزنا مرحلة الكبرياء و الغرور دي ، أنا ما طالب منك تعترفي لي بس على الأقل ما تنكري البتحسيهو اتجاهي 😊
سكته و ما عرفت اقول شنو ، قال لي خلاص اسبوع كيف معاك ؟؟
فكري فيهو كويس و أديني قرارك عشان أجيكم في البيت و الموضوع يبقى رسمي و ماف زول تاني يتجرأ و يفتح خشمو .....صراحة ما فهمت كان قاصد شنو بس كان متضايق شديد و شكلو زعلان من حاجه بس ما قدرت اسألو و أنا ذاتي أموري كانت جايطه و ما عارفه أعمل شنو ، المهم كملت طريقي لحد ما وصلت البيت و أول ما دخلت كدا جاني صوت عمتي نوره و هي بتجوط ساي ، لمن دخلت لقيت أبوي ذاتو معاهم ، قلت ليهم بإستغراب السلام عليكم ، أبوي بس الرد علي و ردو ذاتو ما كان زي الناس ، قلت ليهم خير في شنو ؟؟...عمتو نوره كانت عايزا تتكلم بس أبوي سبقها و قال لي خشي إرتاحي و تعالي لينا....
صراحة استغربت شديد و ما قدرت أخمن الحاصل شنو و أبوي ليه عايزني أجيهم !!؟
بدلت ملابسي و ارتحت شويه و مشيت قعدت معاهم كان. في أمي و عمتو إجلال و بتها سلوى و عمتو نوره ، قلت ليهو أيوه يا أبوي !!
قال لي الحاصل شنو ؟
قلت ليهو بالنسبه لشنو ؟؟
عمتو نوره قالت لي كمان عامله نفسك رايحه و ما عارفه حاجه يا الشريف الرضي ؟؟؟
أبوي قال ليها انتي ما تدخلي ، وقف على حيلو و قال لي ألحقيني و طبعاً أمي دي تعاين لي ساي و خشمها ما فكتو معاي و دا الخلاني استغرب أكتر
يتبع......
