مها !، متين أنا قلت ليك بكرهك ؟؟!
طبعاً إنخلعت ! دي اول مره يناديني بإسمي و أنا اسمو دا ما حصل اتكلمت معاهو بيهو ، للحظات حسيت بإحساس غريب بس ضبطت نفسي ، قفلت الباب و إتلفت عليهو و قلت ليهو انا شايفه انك الأحسن ترجعي و تتصرف زي زمان ، ارجع لهمجيتك و ردحك و عدم إحترامك و كراهيتك لي لأنو الدور جا ما جا علي ، فهمت ؟!
قال لي ما جاوبتي ، متين أنا قلت ليك بكرهك ؟؟ قلت ليهو الأفعال خير دليل و بعدين ما فارقه كتير المهم اني بكرهك و ح أفضل أكرهك لحد ما أموت ، عشان كدا بطلي التمثيليه دي لأني ما غبيه !....إتنهد و قال لي ليك حق تفكري كدا أصلي ما بلومك بس كمان ما تخلي منظورك ضيق ، ليه بتعاين للناس من زاويا وحده ؟؟ المستحيل شنو يعني ؟؟
قلت ليهو في شمس بتشرق من الغرب ؟ طيب في أفيال بتطير أو سمك بعيش برا المويه ؟؟
قال لي أنا فاهمك ، قلت ليهو في حاجات ثابته ما بتتغير و أصلاً ما مفروض تتغير عشان ما يحصل خلل في التوازن و الحاله الصابتك فجأه دي خلل في التوازن ، عشان كدا بطل عمايلك دي ، أنا ماف زول بقدر علي و ما تحاول تستدرجني لأني على طول مفعله و رافعه شعار #ممنوع_الإقتراب ، ف يا عاطل ما تتعب نفسك ساي ......إبتسم و قال لي أساساً دا العاجبني فيك ! ما بتتخيلي أنا بنبسط كيف لمن تقولي لي كلمة عاطل دي....كدي عيديها تاني .....عاينت ليهو بغيظ و كنت ح أدخل بس هو قال لي : أنا متأكد زي إسمي دا إنك ما بتكرهيني ، قلت ليهو ربنا يشفيك ، حالتك بقت صعبه شديد ، واصل كلامو و قال لي حاولي تدي نفسك فرصه....ختيت يدي على جوانب راسي و قلت ليهو أنا صدعت من كلامك دا .....من الآخر قول لي عايز تصل لشنو إنت ؟
قال لي ل قلبك !..... طبعاً حصلت لحظة صمت هنا ! قلت ليهو و بعدين مع العباطه الصابتك دي ! و كمان ما تنسى انك اعترفتي لي و قلت إنو كلام أصحابك كلو كان كذب في كذب ! مالك جاي تتهابل تاني ؟
عاين لي جوه عيوني و قال لي يعني انتي عايزاهو يكون حقيقه ؟
قلت ليهو توف من خشمك .....اعوذ بالله ، الفكره بحد ذاتها مقرفه ....قال لي مشكلتك معاي شنو انتي ؟ عيبيني؟
قلت ليهو معاك ورقه و قلم ؟
قال لي لا ليه ؟
قلت ليهو لأنو عيوبك قدر التراب ، ولا اقول ليك بالمختصر كل مليان عيوب ، قال لي زي شنو مثلاً ؟
قلت ليهو زي الهباله و العباطه البتعمل فيها هسي دي ، يعني أمبارح كنت بتشتمني و هسي جاي تكون صريح معاي و تقل أدبك ؟
قال لي شوفي ليك حق ما تصدقي ...بس خليك عارفه انو اعجابي بيك لا من اليوم لا من أمبارح و غلطت شديد لأني ما صارحتك قبل كدا و خليك البينا يتفاقم ، بس هسي الخلاني أكون صريح معاك حقيقة انك بقيتي عارفه أنا بفكر فيك كيف و ما خجلان اقول انك بتعجبيني و بتلفتي نظري و شخصيتك رغم حدتها مخلياني اتكيف منك لأنك مقعده كل الناس في علبها و الأهم عندي انو ما حصل شفتك مع ولد و أساساً ما عندك علاقه بيهم فلمن شفتك اليوم داك نازله من عربية خليل شياطين الدنيا كلها بقت تنطط قدامي و ما أنكر أني حسيت بالغيره و انو هو افضل مني عشان كدا اتعاملتي معاهو و ركبتي معاهو ، ضيقي و زعلي و إحساسي بالضعف و الإستصغار هم الخلوني اقول القلتو ليك في اليوم داك فأنا آسف شديد مع بس على الموقف دا ، على كل المواقف الحصلت قبل كدا ، و ايوه صح أنا جيت كذبت و نفيت ليك القالوا ليك أصحابي لأنو كلامك استفزاني ....المهم خليك عارفه انو مهما صديتيني أنا ح أكون وراك و وين ما حتمشي حتلقيني و متى ما إحتجتي مساعده حتلقيني أول واحد في وشك ....ما أنا البخسر و ما أنا البتنازل عن حاجه نفسي فيها و بالمناسبه أنا بحب التحديات شديد و انتي أكبر تحدي بالنسبه لي و متأكد اني ح أكسب في النهايه و انتي الحتكوني جائزتي و فوزي بيك حيكون أعظم إنتصار و لليوم داك إتذكري كلامي دا ....قال كدا و بقى واقف يعاين لي ، قلت ليهو عايزا اضحك والله لكن مصدعه و الضحك غالبني ، لو انتهيت من المقاله حقتك دي أمشي من جنب بيتنا عشان ما أفقد أعصابي و اسمعك كلام فارغ يخليك تطفش من البلد دي كلها ....عاين لي جوه عيوني و مشى و أنا أول ما فتحت الباب كدا لقيت مروه في وشي و هي منططه عيونها ! قلت ليها مالك ؟
قالت لي ووووبعلي ووووبعلي دا شنو دا ؟ فارس دا بقول في شنو ؟!...معقوله انتي و فارس ؟!! لا لا ما قادره اصدق والله ...ما اشتغلت بيها خليتها واقفه و دخلت جوه و أمي ما كانت موجوده و أخواتي كمان ماف ، بعد ارتحت شويه مروه جات لاحقاني و قالت لي مها قولي لي فارس دا كان بقول في شنو ؟
قلت ليها اعذريهو دا مجنون ساي ! قالت لي جاده أنا أحكي لي !, قلت ليها أحكي ليك شنو يا مروه دا واحد عاطل و عبيط و ما عندو موضوع بس و احب أطمنك البعمل فيهو دا كلو تمثيليه منو ، عايز يهزمني و يكسرني لكن هو قايلني هبله ولا عويره ؟
سكتت مسافه بعدها قالت لي انتي ليه بتظلمي الناس بالطريقه ؟ مالك ناقصه رجل و لا يد عشان تستبعدي حب فارس دا ليك ؟...ايوه صح حاجه بتحير الصراحه لأنو انتوا الإتنين ما كنتوا بتطيقوا بعض بس زي ما بقولوا ماف حب إلا بعد عداوه و.....قاطعتها و قلت ليها ههه يعني كنت مفتكره اني شايفه نفسي كتيره عليهو عشان كدا صاداهو ؟😂 يا بت انا محترمه نفسي و مقدساها لدرجة اني ما بدي اي عاطل و عديم موضوع فرصه عشان يحاول يتحايل علي !....قالت لي اي زول جا اتقدم ليك رفضتيهو ! برضو عشان بحاولوا يتحايلوا عليك ؟....مها متين توعي على نفسك و تطلعي من دائرة الوهم البتقول ليك انو أي زول بقرب منك معناها عايز يلعب بيك ! انتي ما خسرانه حاجه كدي جربيهو و شوفيهو بنفع معاك ولا لا .... طبعاً ياداب فهمت هو ليه اتغير ، ليهو فتره بدا يشتغل و بقى محترم ، و بعدين ما تنسي إنو فارس بحالوا مكسر فيك 🙈
قلت ليها يكسر راسو دا منااااافق منااااافق والله بمثل يا مروه انتي ليه ما ناويه تصدقيني ؟.. كدي اسألي نفسك ليه فجأه كدا أتقلب 180 درجه و بقى يظهر لي في أي مكان ؟ اقول ليك ليه ؟ عشان يوهمني انو اتغير و بدا شغل و هو كل هدفو يخليني اصدقو عشان كدا بطلع في وشي ، ما تقليل من شأني بس فكري العاجبو شنو فيني ؟ معروف يعني الرجال بنجذبوا لأي نوع من البنات ، يعني أنا كحل ما بعملوا و بطلع عادي من البيت من دون أي مكياج و ما هاميني شي ، اقنعيني بس انو خلا كل البنات المزز اللافات حوليهو و جاني أنا ؟؟ ما تخليك غبيه يا مروه ....قالت لي الحلاوه هنا 🙈 اتخيلي انو خلا البنات المايعات ديلك و المزز على قولك و حباك انتي و بعدين يختي انتي ما أقل منهم بس ما بتهتمي بنفسك ، و دا دليل على انو بحبك بالجد ، الميك اب ما هو البخلي الراجل يحب البت ، اتخيلي بس البنات ح يتمغصوا كيف لمن يعرفوا إنو فارس الميتات عليهو و الكانوا بنبسطوا لمن يشاغلهم بحبك انتي ، حييييا أنا بس 🙈
قلت ليها ربنا يشفيكم انتوا الإتنين ، دا كلو ما يهمني ، قالت لي قلبك قاسي والله ، قلت ليها معليش ما عندي قلب أنا ، قالت فعلاً دا الحاصل ، المهم بعد مسافه كدا مآب جات داخله ، قلت ليها تعالي هنا مشيتي وين انتي ؟ قالت لي مشيت مع أمي بيت ناس خالتو عواطف ، قلت ليها ليه ؟ قالت لي نادت أمي عشان تخت ليها حنه و أمي مشت ليها ، قلت ليها و أمي دي خدامتها؟ على الأقل كانت تحترم أمي شويه و هي المفروض تجي لأمي في البيت بحكم إنو هي المحتاجه أمي ، ما أمي المحتاجاها و بعدين أمي دي متين اتصالحت معاها ؟ مروه قالت لي من زمان ؟
طبعاً ما استغربت لأنو أمي بتسامح بسرعه مع إنو العملتو عواطف ما بتسامح عليهو بسهوله ، اتخيلوا إنها كانت داخله صندوق مع ناس أمي و أمي كانت أمينة الصندوق ف حصل لخبطه في الحسابات و خساسه و نفاق حصل بين النسوان الداخلات الصندوق ، عواطف خلت النسوان ديل كلهم و إتهمت أمي أنها بتاكل حق الناس رغم تيقنها إنو أمي مستحيل تعمل كدا و كل الناس عارفه الحاجه دي ....جاطت في أمي و شاكلتها قدرتها و سمعتها كلام فارغ .... طبعاً أنا دا كلو ما حضرتو ما سمعت بيهو إلا بعد أسبوعين من حدوثو و أمي ساعتها قالت لي حلينا المشكله و قفلنا الموضوع دا و ماف داعي تمشي تفتحيهو ليها تاني و هي إعتذرت مني ...أنا ما صدقت قصة الإعتذار دي لأنو ماف زول بعتذر من أمي للأسف هي البتعذر منهم ، المهم أنا على أساس انو الموضوع انتهى و حصل قبل اسبوعين و قفلوهو سكته بس ما نسيتها ل عواطف و شميتها أكتر ....
المهم مآب دخلت شربت مويه و تاني كانت طالعه ، مسكتها من يدها و قلت ليها طلعه ليك تاني ماف ! بتمشي وين انتي ؟ شايفاك لافه من دكان لدكان ، بتترسلي للنسوان مش ؟ قالت لي بري بري و إتفكت مني و مشت ، من مكاني داك مشيت على الباب و أول ما فتحتو اتفاجأت بضيوف جايننا من البلد في وشي ، سلمت عليهم و فضلتهم و مروه ما قصرت ضيفتهم ، جاتنا مره مع بتها و أولادها اتنين و كلهم كبار ، طبعاً المره بت عم أبوي ، يعني عمتنا باللفه ، قلت لقيت لي حجه ، طوالي طلعت و مشيت بيت ناس عواطف ، لقيتها راقده في مظلتها و أمي بتحنن فيها ، أمي قالت لي انتي ذاتك جيتي لاحقاني ! هسي مآب كانت معاي و رجعتها البيت ، خالتو عواطف قالت ليها عشان متعودات عليك ....قلت ليها يا أمي جوك ضيوف من البلد ، قالت لي ضيوف ناس منو ؟جوا متين ؟ قلت ليها عمتو إجلال و أولادها ، جوا هسي ، قالت لي خلاص امشي اقعدي معاهم و ضيفوهم لحد ما أجيكم ، قلت ليها أمي انتي عارفاني ما بعرف اتونس مع الناس و مروه ما حتقدر تعمل ليهم أكل و تتونس معاهم في نفس الوقت و باقي بناتك ما موجودات ، خالتو عواطف قالت لي خلاص انتي اطبخي و خلي اختك مروه تقعد تتونس معاهم ، قلت ليها ما بعرف أطبخ أنا ...قالت لي يعني قاعده ساي ! طولة لسان بس ! قلت ليها ايوه لكن بعرف أحنن ، جيت قومت أمي بسرعه و قلت ليها خليها أنا بحننها ، قالت لي ما بتعرفي ، قلت ليهو والله بعرف و ذاتو ختت الحنه دي ما حاجه صعبه عادي الوحده تختها لنفسها ، طبعاً خالتو عواطف سكتت ساي و أمي بعد إلحاح مني مشت ، المهم شلت حنه و ختيتها ليها على رجلها و كنت قاصده انها تكون عشوائيه و ما تتخط في حدود الرجل ، قالت لي دا شنو دا ما بعملوها كدا ! ما شايفاها ملطخه كيف و طالعه برا ! وقت ما بتعرفي ليه خليتي أمك تمشي ، قلت ليها والله يا خالتو عواطف أمي جوها ضيوف و شينه في حقها تكون قاعده هنا بتخت ليك في الحنه و هناك الضيوف منتظرنها! قالت لي هوي ها أمورك دي أنا بعرفها كويس من البدايه قولي انك عايزا تطفشي مني أمك بس.....قلت ليها لي حق ...خلينا نجي للصراحه ، انتي عارفه كويس انو أمي طيبه و مسكينه و ما بتقول لا لزول عشان كدا بتهينوها قدرتكم و لمن تحتاجوا ليها من دون خجل بتنادوها ! انتي الله قدرك و جبتي خدامه تغسل و تكوي ليك و خدامه تطبخ ليك و خدامه تنضف ليك بغلبك تجيبي حنانه ؟؟ولا بتحبي الملح ؟
قالت لي يا بت هوي الفارغه دي ما بتنفع معاي ، ما بتعرفي تختي الحنه قومي أمشي من هنا ، طبعاً فرحت عشان تكون لي حجه قدام أمي ، وقفت على حيلي و قلت ليها غيتو حاولت اساعدك بس انتي طردتيني ، بعد دا ما علي لوم .... طبعاً شكلها خافت إني اكلم أمي عشان كدا قالت لي بإستعجال لا لا أنا ما طردتك ، قلت ليها لا طردتيني و طوالي مشيت البيت و أنا متكيفه ، أمي قالت لي معقوله انتهيتي ليها بالسرعه دي ؟ قلت ليها أكيد بتك شفته و خطيره ....ضحكت و قالت لي وكت بتعرفي تختي حنه لي ما بتختي لي ؟! قلت ليها ما انتي بتحبي تختي حنتك براك ما حصل قلتي لي ختيها لي ....المهم قريب للمغرب الصايعات ديلك جن ، لقوا البيت مضيوف ، لمن جوا و سلموا على الضيوف عمتو إجلال قالت ليهم لافات سااااي لقيتو أبوكم ماف ههههه لكن اخير ليكن يا بناتي قعدت البيت دي ذاتا ما بتندار ..... طبعاً بت عم أبوي دي ما أول مره تجينا فيها جاتنا قبل كدا كتيير و حركاتها دي كلنا عارفنها كويس ، المهم نحنا بيتنا ما مفصول لأننا كلنا بنات و هيثم دا صغير بس في أوضه بعيده شويه عن باقي الأوض خلينا أولاد عمتو إجلال يقعدوا فيها ، بعد ما صلينا المغرب ، أمي دخلت المطبخ عشان تشوف مروه بترص في الأكل ولا لا ، لحقتها و قلت ليها المره دي قالوا جوا ليه ؟
قالت لي هوووس ما يسمعوك ، عيب !...عمتكم جات عشان عيانه و عايزا تقابل الدكتور ، قلت ليها و أولادها ال3 ديل برضو عايزين يقابلوا الدكتور و لا جايين يتفسحوا ساي !؟ قالت لي مها ما تخليني أقبل عليك ، خشمك دا لميهو عليك ، المهم سكته خليتهم ، مشيت الأوضه حقتنا أنا و أخواتي ، لقيت ملاذ و مآب و هيثم بحضرو ساي ، قلت ليهم فلمكم دا بنتهي متين عشان عندي فلم عايزا أحضرو في mbc2 ، ملاذ قالت لي ما عارفنوا والله ، أمي جات داخله و قالت لي امشي انتي و ملاذ طلعوا ليهم السراير في الحوش و أنا بمرق ليهم التلفزيون برا ، قلت ليها شنووو ! بس يا أمي أنا عايزا أحضر ! قالت لي و الناس ما تحضر معاك ولا كيف ؟ قلت ليها هم المكان الجوا منو دا فيهو تلفزيون ؟
طبعاً سفهتني ....المهم طلعنا ليهم السراير برا و فرشناهم ليهم و أولادها طوالي جوا و كل واحد إتبطح ليهو في سرير ، أمي طلعت التلفزيون و شغلتوا ليهم ، المهم ختينا الأكل و كلنا أكلنا سوا ، بعدها مشيت عملت ليهم الشاي و لمن خلصوا ملاذ غسلت العده ، أمي و مروه قعدوا يتونسوا معاهم و انا و ملاذ دخلنا جوه و كل وحده مسكت تلفونها ، المهم لمن تاني طلعت عشان أصلي العشا لقيت المره و بتها ناموا من تعب السفر بس أولادهم صاحيين و بحضرو في الفلم الكنت منتظراهو أنا ، مشيت اتوضيت و رجعت دخلت جوه و صليت ، قلت ل ملاذ ما عايزا تصلي ولا شنو ؟ قالت لي قايمه قايمه و فعلاً مشت صلت و جات مسكت تلفونها ، اتصفحت كدا لحد ما نعست و نمت ....نومت نومه عميقه ما صحيت إلا الساعه 12 ، صحيت بسبب صوت مزعج كدا ، أول ما فتحت عيوني اتفاجأ ليك بزول قاعد و مديني ضهرو !...
يتبع.....
