قلت ليهو أنا ذاتي عايزا أعرف !!
قال لي أنا شاكي في زول و حاسس انو هو الورا الحاجه دي .....قلت ليهو منو ؟؟
قال لي فارس ..
بعد مسافه كتبت ليهو : لا لا ما أظن !
رسل لي ريكورد قال لي فيهو : ليه مستبعده يكون هو ؟؟ ماف غيرو يا مها بعمل العمايل الوسخه دي ....قلت ليهو لا لا دا ما هو ...قال لي ليه انتي واثقه للدرجه دي ؟؟
قلت ليهو لأنو واجهتو و هو أكيد لي انو ما ورا الحاصل دا ، قال لي و إنتي بكل بساطه صدقتيهو صح ؟؟؟
ما رديت على رسالتو.....طلعت من دردشتو و قبل ما أقفل الشبكه رسل لي : تمام شكلك اتضايقتي لمن اتهمتو ، آسف شديد ...قلت ليهو لا ما اتضايقت لكن دا ما هو ....قال لي بمناسبة سيرتو ، عايز أعرف إنتوا ليه فكرشتوا الخطوبه ؟؟ قلت ليهو ما اتفاهمنا و بس ....قال لي اهااا و سكتنا على كدا ، المهم تاني يوم طلعت على شغلي ، لمن وصلت الفرن وقفت مسافه و بقيت أتلفت و أفتش على البت بس ما ظهرت خالص ، المهم ركبت المواصلات و إتحركت ، حلقة اليوم مفروض نقدمها أنا و أسامه بس لمن جيت اتفاجأت إنو فارس موجود بدل أسامه !! لمن سألت الاء قالت لي أسامه اتصل و اعتذر لأنو عندو ظرف منعو يجي ...قلت ليها متأكده ؟؟ قالت لي آي والله ، قلت ليها دا ما فارس العمل كدا صح ؟؟
قالت لي لا والله حتى هو لمن اتصلنا عليهو عشان يجي بدل أسامه رفض والله و اتجج بعد إصرار شديد حتى وافق انو يجي ....المهم لمن دخلت غرفة البث لقيتو قاعد و برتب في الأوراق القدامو ، ما قلت ليهو حاجه قعدت عن سكات و هو ما رفع عينو و عاين لي ، كان صاري وشو بس ! قبل ما نبدا الاء جات و قالت لينا المره دي خلوا خلافاتكم على جنب و قدموا الحلقه بإخلاص لأنو الإداره شكت منكم بسبب آخر حلقه ليكم و اتكلمت مع فارس بخصوص الموضوع دا ....المهم قالت كدا و مشت و فارس خالص ما إتكلم إلا لمن البث بدا ، لغاية ما خلصنا الحلقه هو لا اتكلم معاي لا عاين لي كأني ما موجوده معاهو ، لمن طلعنا من غرفة البث قلت ليهو انت بتستفيد شنو لمن تكذب يعني ؟؟ ما قادره افهمك أنا هدفك كان شنو ؟؟ ليه قلت انك فتحت بلاغ و انت أصلا ما عملت شي ولا بس كنت عايز تظهر نفسك بطل قدامنا أنا و خليل صح ؟؟
ما رد علي طلع طوالي و خلاني واقفه في مكاني ، لحقتو في الشارع و قلت ليهو بتكلم معاك أنا ما تسكت و قول لي كذبت لشنو ؟؟
قال لي ضروري ؟؟
قلت ليهو أيوه ضروري ! قال لي عايني انتي على كل الأحوال ما حتصدقيني أصلاً ما بتصدقي غير خليل بتاعك داك عشان كدا ما ح أتعب نفسي و اتكلم ....أول ما أتحرك كدا قلت ليهو لا بصدقك قول لي .... طبعاً قلت ليهو كدا ساي عشان يوريني كذب ليه أو اشوف تبريرو شنو ...إتلفت علي و عاين لي بإستغراب !!...قرب مني و قال لي كذب عشان أقنع خليل اني حليت الموضوع و ماف داعي يتدخل و كنت عايز اسوقك معاي عشان نعمل إجراءات البلاغ بس من دون خليل و انتي عارفه ليه 😊
صراحة ما عرفت اقول شنو !! يعني تصرفو زي تصرف الأطفال !!...قال لي عارفك ما مصدقاني و انتي ما مجبوره تصدقي ، اتنهدت و قلت ليهو تاني حترجع ل اللف و الدوران ! فارس انت ما بتتعب من حركاتك دي ! أنا عارفاك بتكذب و انت عارف نفسك كويس فشنو أنهي الكذبه دي كلها و خليك زي ما انت ...زي ما كنت واضح معاي و بتقول الكلام في وشي و ما بتزيف مشاعر ....قرب مني أكتر و قال لي اجيب مصحف و أحلف ليك إني بحبك ؟؟!!
طبعاً هنا إنخلعت و نططت عيوني و قلبي عمل شحححح! ما قدرت انطق حرف واحد !! قال لي حاسي انو حتى لو جبت ليك مصحف ما حتصدقيني ، ح تتعاملي معاي كدا ل متين ؟؟ ايوه عارف انو صعب عليك تثقي في زول مرتين و عارف إني خنت ثقتك و من دون ما أفكر عملتك تحدي ما أصحابي ...طيب انا اعترفت بغلطي و ندمان شديد عليهو ، ما بستحق فرصه تانيه ؟؟
لفيت وشي منو و ما رديت عليهو ...
قال لي على فكره أنا عارف انك لسه بتحبيني بس عزة نفسك ما بتسمح ليك خاصة اني خذلتك قبل كدا ، ما عندي مشكله ح انتظرك لحد ما تصدقي مشاعري و تقبليها بس بشرط إنك تكوني بعيده عن خليل...
الإتنين بقينا ساكتين و هو منتظر مني اقول حاجه و أنا عقلي جايط و ما عارفه اقول شنو ، في وقفتنا ديك خليل جا بعربيتو و ضرب لي بوري عشان أجيهو ، طوالي فارس عاين لي كأنو بخيرني بينو و بين خليل ، ل ثواني بس إترددت أمشي ل خليل بس لمن ضرب لي بوري تاني مشيت ليهو سلمت و ركبت معاهو و لمن عاينت ل فارس ملامحو اتغيرت و عيونو كانت مليانه عتاب .....طول الطريق كنت بفكر في كلام فارس ! قلبي كان شبه واقف معاهو بس عقلي هو المسيطر و بقول لي ما أديهو فرصه تانيه يمكن عايز يمثل علي للمره التانيه و يهبل بي ، خليل كان بتكلم معاي بس ما كنت مركزه معاهو ف طقطق لي أصابعو و قال لي بتفكري في شنو ؟؟ قلت ليهو ولا شي ...قال لي أكيد فارس زعجك صح ؟ قلت ليهو لا ....قال لي متأكد انك سألتيهو ليه كذب و هو اتبايخ و اتثاقل عليك و انتي انزعجتي بسبب غلاظتو و حركاتو البياخه دي أنا ما نزلت عشان اسألو ليه كذب لأني زي ما قلت ليك شاكي فيهو .....ما رديت عليهو ، المهم لمن وصلنا نيابة المعلوماتيه لقينا نائب الوكيل موجود ، ف دخلنا عليهو و كتب لينا الوقائع بعدها رجعنا لموظف العرائض عشان يختم لينا العريضه بعدها مشينا قسم الشرطه و قابلنا الضابط المسؤول أشر لينا على العريضه و فتحنا بلاغ ، بعدو دخلونا للمتحري و قعد يسألني متين بدا التهديد دا و إذا شاكه في زول و و و ...الخ ، وريتو هم بدوا يهددوني من متين و وريتو كمان أنهم عارفني ساكنه وين و مرتين أدوا رساله لشافعه عشان توصلها لي و أديناهو الرسايل ، قال لي طيب شاكه في منو ؟؟ طوالي خليل عاين لي ، قلت ليهو ما شاكه في زول ، قال لي طيب انتي ما متذكره انك عملتي حاجه لزول و بسببها هو عايز يأذيك ؟؟ قلت ليهو لا ما متذكره ....قال لي براحه براحه ، راجعي نفسك بكل هدوء و لو اتذكرتي حاجه حتى لو كانت بسيطه قوليها لي ....سكته مسافه و بعدها طق اتذكرت !!
قلت ليهو أنا قبل كدا نزلت صورة واحد في الميديا لأنو تتحرش ب بت كانت جنبي في المواصلات و أنا صورتو و فضحتو و البوست انتشر بصوره واسعه ! ....قال لي إتذكري كمان تاني في شنو ؟؟
قعدت اتذكرت و أتذكر بس ما لقيت إني عملت حاجه تخلي زول يهددني غير الراجل الفضحتو ...قلت للمتحري ما عملت حاجه تانيه ، قال لي طيب تمام و اطمني ما حتتعرضي للتهديد تاني و بإذن الله حنلقي القبض عليهو ...المهم خلصنا كلامنا معاهو و طلعنا ، خليل قال لي كدا الموضوع شبه اتحلى ، قلت ليهو أيوه الحمدلله ، قال لي طيب بالمناسبه دي أنا عازمك ، قلت ليهو لا لا عايزا أمشي البيت طوالي ، قال لي ما ح نتأخر لأني حابب اتكلم معاك في الموضوع القلتو ليك ...اتنهدت و قلت ليهو طيب مع اني أساساً ما بحب أقعد في مكان عام مع ولد بخاف زول يفهمني غلط ، المهم مشيت معاهو مطعم و أنا عشان متوتره و ما متعوده على مواقف زي دي حسيت انو كل الناس مركزه معانا ، المهم بعد ما قعدنا و هو طلب و جابوا لينا طلبنا قلت ليهو قول لي الموضوع ! قال لي خلينا نخلص القدامنا دا اول ما تستعجلي ، المهم أنا أكلت شويه و قلت ليهو خلاص شبعت ، قال لي شكلك خجلانه مني ، قلت ليهو ماف شي بخجل ، قال لي المهم مدام انتي مقلقه و مستعجله عشان نمشي ح أجيك من الآخر ، أنا والله زول جادي و ملتزم و ما بحب اللف و الدوران عشان كدا جيتك عديل و ناوي أطلب يدك لأنك الإنسانه الوحيده البتشبهني و بتناسبني ...
طبعاً كانت صدمه كبيره كبيره شديد !! أبدآ ما خطر على بالي انو ممكن يقول لي كدا ! استبعدت الحاجه دي خالص !! بقيت بعاين ليهو و أنا كل ملامح وشي باين فيها الصدمه و الإندهاش !! قال لي ما عايز أسمع جوابك هسي ، فكري على راحتك لأني عارفك كويس ما بتستعجلي لحاجه خاصة بعد ما فكرشتي خطوبتك من فارس ، أكيد ح تحتاجي زمن أوسع عشان ترجعي و ترتبطي بزول للمره التانيه بس انتي عارفه انو في فرق كبير بيني و بين فارس و إنتي عارفاني كويس ، ما قصدي أشكر ليك نفسي بس ح اقول ليك الحقيقه ، نحنا الإتنين بنفكر بنفس الطريقه و بنتفق في حاجات كتيره و صفاتنا زي بعض و أهم صفه فينا الجديه و الإلتزام و الوضوح و أنا كنت واضح معاك و ما حاولت ادخل و اطلع ليك ، جيتك من الآخر....
طبعاً هو بتكلم و أنا لسه بعاين ليهو و بحاول استوعب في كلامو !!!
ما عارفه كيف و متين طلعنا و صلينا!! لمن دخلت بيتنا لقيتهم غريبين و متوترين ، قلت ليهم خير في شنو ؟؟ هيثم قال لي مآب قبيل لمن جايه راجع من المدرسه في عربيه مظلله جات عليها و في واحد طلع يدو بالشباك و جرا منها الطرحه و هي وقعت لمن ركبتها اتجرحت ...قلت ليهو شنو ؟؟!!! أمي بس كانت خاته يدها على خشمها و متمحنه ، طبعاً أنا عرفت دا منو !! قلت ليها مآب انتي كويسه كدي أشوف جرحتك ليه ما كلمتوني ، أثناء ما أنا بشوف في جرحتها كدا أمي قالت ديل منو يا ربي و عايزين شنو من بناتي ! لأنو ملاذ حصل ليها نفسي الشي ....إتلفت على ملاذ و قلت ليها صحي ؟؟ قالت لي آي بس ما جروا مني الطرحه لكن جوا لفوا فيني بعربيتهم و مشوا..... !!
سكته ساي و بقيت متوتره معاهم ، ملاذ قالت لأمي اتصلت على أبوي و كلمتو قال هسي بجي ، .... طبعاً أنا حسيت بالذنب لأنو الحصل ليهم و الحيحصل ليهم كلو حيكون بسببي ، دخلت جوه و فتحت الفيس ، دخلت الماسنجر و فتحت طلبات المراسله و زي ما إتوقعت لقيت رسايل تهديد تانيه بحسابات تانيه و الرسايل دي ليها يومين ، كتبت ل واحد منهم : عاين انا الغلطت عليك و أساساً عرفت انت منو ، لو عايز تنتقم من زول انتقم مني انا خليك بعيد عن أهلي لأنهم ما عملوا ليك حاجه ، المهم طلعت من الفيس و كنت ح اتصل ب خليل بس إتراجعت بعد الموضوع الفاتحني فيهو صراحة حسيت بحاجز اتبنى بيناتنا ، المهم طلعت ليهم برا و انتظرنا أبوي لحد ما جانا هو و أحمد أخوي ، مآب و ملاذ حكوا ليهو الحصل معاهم و أنا خفت و ما قدرت أقول ليهم إني السبب لأنو أبوي ما حيرحمني ، أحمد قال لينا معناها ديل قاصدنكم عديل و بحركتهم دي عايزين يرعبوكم ، أبوي كان ساكت و بفكر ، قال لينا أنا ح اقعد معاكم هنا لحد ما نمشي نفتح بلاغ و نتابع الموضوع دا و نشوف ديل منو ، أمي قالت ليهو والله دخلوا فيني و في بناتي جنس خوف هسي تاني يمشن المدرسه كيف ، أبوي قال ليها عادي و لو اضطريت بوديهم و بجيبهم ، قالت ليهو بري ما بخليهن يمشن تاني إلا الناس دي تنعرف ، أحمد قال ليها أنا بوديهم و برجعهم ما تخافي ، المهم أبوي و أحمد قالوا حيقعدوا معانا ، شويه كدا مروه اتصلت علي لمن رديت عليها قالت لي الحاصل شنو في البيت دانيه اتصلت علي و قالت في حاجه حاصله لأنو أبوي و أحمد طلعوا من البيت مستعجلين و قالوا جايين بيتنا و.....قلت ليها مروه هدي شويه لمن تجي بنحكي ليك ، قالت لي في شنو يا مها تخوفيني ، قلت ليها ما تخافي ساي لمن تجي حتعرفي ، أول ما قفلت منها كدا دانيه اتصلت علي لمن رديت عليها قالت لي في شنو يا مها انتوا كويسين ؟؟ داليا خطفت منها التلفون و قالت لي أبوي و أحمد جوكم صح ؟؟ في شنو لأنهم طلعوا مستعجلين و ما فهمونا حاجه ، اتنهدت و بعدها حكيت ليها قالت لي وييييي ديل منو كمان !!؟
قلت ليها ما عارفه ، قالت لي بابا و أحمد عملوا شنو ، قلت ليها قالوا حيقعدوا معانا لحد ما يشوفوا نهاية الموضوع دا ، قالت لي أحسن شي و بكرا نحنا حنكون معاكم ، قلت ليها طيب المهم اول ما قفلت منها كدا و طلعت ليهم برا عمتي نوره جات داخله ، طبعاً ناس دانيه اتصلوا عليها عشان يسألوها عن الحاصل و هي جات تشوف في شنو ، المهم لمن حكوا ليها قالت ليهم ليه ما بتكلموني ناس بحري البعاد سمعوا و أنا الجنبكم ماف زول جاب لي سيره ! طبعاً جات هي و راجلها مصطفى ، راجلها قال لأبوي الناس ديل مستهدفنكم عشان كدا أحسن تفتح بلاغ ، أبوي قال ليهو دا الحيحصل ، عمتي قالت لأبوي بناتك ذاتو ما تخليهم يطلعوا براهم بعد دا ، بالذات مها و مروه لأنو أماكن شغلهم بعيده ، قلت ليها ما بتجينا حاجه ، قالت لي مالك ما بتجيك حاجه الناس ديل ضامناهم إنتي ؟؟ كدي اتصلوا على مروه دي و شوفوها وين و خلوها تجي ، قلت ليها قبل شويه كنت بتكلم معاها و هسي حتكون في الطريق ، قالت لينا تاني اتصلوا عليها ، أمي قالت لينا اي اتصلوا عليها ، فطوالي أبوي طلع تلفوني و اتصل عليها و سألها هي وين و قال ليها اعملي حسابك ، طبعاً ما فهمها الحاصل قال ليها بعد تجي البيت ، بعد قفل منها قال لينا أنها قالت في إفريقيا هسي بتجي ، بعد مسافه كدا تاني اتصلنا عليها قالت إنها جنب الرازي ، كدا ياداب إطمنا شويه و اتفرقنا المشى المطبخ مشى و الدخل جوه دخل و المشى الحمام مشى ، المهم بعد شويه كدا سامعه أبوي بصوت عالي شغال آلو آلو ....مروه يا بت بتكلم معاك أنا .... طبعاً كلنا قمنا جاريين على المظله ، أول ما وصلنا أبوي طوالي قام طالع و أحمد وراهو و نحنا جاريين وراهم لحد الباب خايفين و بنسأل في أبوي بس ما رد على زول فينا ، ركب مع أحمد و مشوا و خلونا وراهم ميتين من الخوف و أنا قلبي اتآكل من شدة الخوف و إحساس الندم 💔
أريد أن أغفو
بلا ذاكرة
بلا وجعٍ
بلا ألمٍ
بلا جفاف
أريد أن يتبخر حُزني مِن جلدي
لتنخفض حرارتي
و أن ينبض قلبي
دون إحباط . .💜
لكاتبه
يتبع......
