وصلت البيت و بعد مسافه كدا ملاذ جات داخله و ملامح وشها كانت متغيره على الآخر و زي الكانت بتبكي ، فهمت إنو فارس اتكلم معاها و فهمها انو ما عندو حاجه ليها ...صراحة ما اتوقعتو يعمل كدا ، افتكرت انو مخطط يلعب عليها و ما كنت قايلاهو حيسمع كلامي و يمشي يتكلم معاها ...قلت ما مشكله الليله تبكي و بكرا ترجع زي زمان المهم إنها ما تضيع نفسها و تجري ورا سراب .... طبعاً نهاي ما حاولت اتكلم معاها لأنو العملتو بالجد بزعل ، ما صارحتها بالعملتو لأنو لو جبت ليها سيره حتقول إني الحرضت فارس عليها و غصبتو يقول ليها القالو ليها ، عشان كدا سكته ...المهم في اليوم البعدو طلعت الصباح بدري ، لمن وصلت فرن رأس الرجاء الصالح نفس البت بتاعة اليوم داك جاتني من الفرن و قالت لي هاك الورقه دي ، مسكتها من يدها و قلت ليها دا منو القاعد يرسلك ؟؟
قالت لي ما عارفاهو فكيني ياخ ! قلت ليها ما ح أفكك إلا تقولي لي دا منو ! قالت لي والله دا راجل مغطي وشو بديني ورقه و بقول لي اديها للبت ديك و بديني قروش كتيره ، قلت ليها وين هسي الراجل دا ؟؟
قالت لي مشى بالشارع داك ، فكيتها و بحذر مشيت بالطريق الوصفتو لي ، من بعيد شفت راجل ماشي على راحتو و لافي راسو ب قماش ، ما كنت مخططه أمشي اقول ليهو انت منو لأنو كدا ح أعرض نفسي للخطر ، فضلت أراقبو من بعيد و اعرف بمشي وين و هو منو و ما بعيده يكون ساكن هنا ، بقيت تابعاهو بس و فجأه لف و لمن لفيت بنفس اللفه ما لقيتو !! بقيت أتلفت يمين و شمال بس ما لقيت ليهو أثر !! و أنا واقفه و محتاره كدا حسيت بزول وراي ، إتلفت بسرعه و أنا مخلوعه بس هديت شويه لمن لقيت دا خليل ، قال لي مها ؟؟
إتلفت يمين و شمال و قال لي بتفتشي على منو إنتي ؟؟
قلت ليهو لا لا ماف حاجه ...طوالي إتذكرت البت ، بإستعجال رجعت بنفس طريقي و مشيت الفرن بس ما لقيتها !! خليل جا لاحقني و قال لي في شنو ؟؟
قلت ليهو هسي كان في بت هنا ما عارفه مشت وين !! قال لي بت منو هي و مالا ؟؟
طوالي إتذكرت الورقه الماسكاها في يدي ، فتحتها و لقيت مكتوب فيها : قايله انو الجبتيهم قعديهم جنب بيتكم ديل ح يمنعوني انط فيهو ؟؟
أنا لسه ما بديت دي ياداب لمحه بسيطه عن البدايه ، اصبري و انتظري الراجيك ، ما إنتي بس حتى أخواتك ، يعني لو اليوم ما رجعوا من المدرسه اعرفي إني غطست حجرهم ، و اخوك الصغير داك ، اسمو هيثم صح ؟ و بقرا في مدرسة () ؟ اليوم إذا ضربتو عربيه و هو قاطع الزلط ما تنخلعي و اختي الصغيره مآب ، الله عسل بس و أنا بحب البراعم الطاعمين ديل بس محتار ابدا ب ملاذ ولا مآب ولا الإتنين سوا !!؟..
طبعاً ملامح وشي إتغيرت ! هبطت عديل و مخي شطب !!خليل شال مني الورقه و قراها ، قال لي دا شنو دا ؟؟ منو دا ؟؟؟
ما كنت قادره اتكلم و عقلي بقى يودي و يجيب ، قال لي مها بتكلم معاك أنا دا منو دا و ليه بهددك ؟؟
قلت ليهو ما عارفه يا خليل و قربت أبكي بس مسكت نفسي ، قال لي طيب الرساله دي وصلتك كيف ...في لحظه خوف و توتر حكيت ليهو الحاصل كلو مع اني ما قاعده أشارك مشاعري مع زول ، قال لي طيب ليه لحد اللحظه دي ساكته ليهو و مخلياهو يتمادى أكتر ؟؟ ليه ما كلمتي زول ؟ عارفه انك متهوره ولا لا ؟؟ هسي لو عمل ليك حاجه و انتي كل يوم بتطلعي من البيت براك و بترجعي براك !! و بعدين محتوى الفيديو شنو عشان يهددوك بيهو ؟؟
غمضت عيوني مسافه عشان أمنع دموعي و قلت ليهو فيديو إباحي يا خليل و عاملين فيهو صورتي 💔
قال لي نعم ؟؟
سكته ما إتكلمت ، قال لي دا كلو و انتي ساكته ؟؟ يعني منتظراهم يعملوا ليك حاجه أو لواحد من ناس بيتكم حتى تتكلمي ؟!
قبل ما أرد عليهو فارس جا ، عاين لي بإستغراب و رجع عاين ل خليل و قال ليهو في شنو ؟؟
خليل قال ليهو لا لا ماف حاجه ، طوالي فارس قعد يعاين لي بحده ، قلت ل خليل ح أرجع البيت و طوالي إتحركت من جنبهم ، جا لاحقني و قال لي هدي شويه ، كدا حتخلعي ناس بيتكم ساي ، دا شكلو عايز يلعب بأعصابك لأنو لو عايز يعمل حاجه كان عملها من زمان بس عايز يوترك و يعيشك في رعب ، أخوانك خليهم علي ، خليهم يمشوا مدارسهم و أنا ح أكون مراقب الوضع و بنفسي ح أرجعهم البيت ، فارس جا تاني و قال ليهو أخوانها مالم ؟؟
خطف الورقه الكانت عند خليل و قبل ما يقراها قال لي تاني رسلك رساله !! مسك الورقه و بعد ما قراها قال لي شكلو الزول دا مراقبك بكثافه و هو قريب منك لأنو فعلاً امبارح نحنا كنا قاعدين جنب بيتكم ، قلت ليهو بس هو منو أنا ما قادره اعرفو ، خليل قال ليهو دقيقه انت عارف ؟؟
فارس قال ليهو أيوه عارف 😊 خليل قال ليهو و لسه مربع يدينك و قاعد تتفرج !!....خليل شال منو الورقه و قال لي جيبي لي الورقه التانيه الرسلها ليك و اعملي اسكرين شوت للرسايل الرسلوها ليك و الفيديو و.....فارس قاطعوا و قال ليهو كل الحاجات دي تمت من زمان 😊☑️
خليل عاين لي و قال لي مش قلتي ما كلمتي زول ؟؟ ...أنا ذاتي كنت مستغربه زيو ، قلت ل فارس كيف يعني كل الحاجات دي تمت و أنا ما عملت أي إسكرين شوت ل رسايلهم !! قال لي بس انا عملت كدا و مشيت النيابه و فتحت بلاغ و أخدت المحضر و كملت كل الإجراءات و حالياً الشرطه بتفتش على البهددوك ديل ، قلت ليهو بإستغراب !! شنو ؟؟ متين دا ؟؟
قال لي ما مهم كيف و متين بس اليوم لازم نمشي النيابه لأنهم طالبنك !!
طبعاً أنا و خليل بقينا نعاين لبعض ساي !!....خليل قال لي تمام أنا بمشي معاكم ، فارس قال ليهو لا ما من الصباح كدا ، حنمشي شغلنا و من هناك حنمشي النيابه ، خليل قال لي تعالوا أوصلكم ، قلت ليهو ما عايزا أعطلك عن شغلك ، قال لي لا لا ماف أي تعطيل ، المهم مشيت ركبت معاهو ، فارس ما جا ركب معانا رغم إنو خليل ناداهو بس ما اشتغل بيهو فقلت ليهو خليهو على راحتو ....المهم طول الطريق خليل كان بتكلم معاي في الموضوع و طوالي اتصل على نفر كدا ما بعرفهم بس وصف ليهم مدارس أخواني و بيتنا عشان يحموهم لمن وصلني جنب الإذاعه قال لي ما تشيلي هم ، كوني عاديه و واصلي شغلك و الموضوع دا محلول بإذن الله ، هزيت ليهو راسي بس ، لمن نزلت قال لي إذاعتكم جميله و برامجها هادفه و تقديمك موفق شديد ، قلت ليهو شكراً ليك ، سكت شويه كدا و تاني قال لي فارس دا كيف اشتغل في إذاعتكم ؟!!! قلت ليهو علمي علمك !!
قال لي المهم موفقه يا زوله ، أول ما إتلفت عشان أمشي ، قال لي مها!.....إتلفت و قلت ليهو أيوه !!؟ قال لي بعد ننهي الموضوع دا في موضوع تاني حابي أفاتحك فيهو لي فتره ، قلت ليهو بإستغراب : شنو هو ؟؟
قال لي ما هسي ، خلينا بعد نحل موضوعنا دا و ما تنسي أول ما تخلصي اتصلي علي ، قلت ليهو طيب تمام و طوالي دخلت الإذاعه و أنا بسأل خليل عايزني ل شنو؟؟ دا أي موضوع دا العايز يتكلم معاي فيهو ؟؟!!
المهم لمن دخلت لقيت الاء و معاها أ/ إبراهيم طبعاً دا مالك الإذاعه ، هو راجل كبير كدا و عليهو هيبه و وقار ، سامعاهو كان بسأل الاء عن فارس فقالت ليهو لسه ما جا ، قبل ما أصلهم هو مشى من جنبها ، لمن وصلتها سلمت عليها و قالت لي فارس ليه لسه ما جا ؟؟
قلت ليها ما عارفه ....قالت لي انتوا مش كنتوا مخطوبين ؟؟! قلت ليها ايوه كنا بس هسي لا !!...قالت لي ما بصدق يا مها !! ليه حصل شنو بيناتكم لأنو بالجد كان ظاهر انكم بتحبوا بعض ! قلت ليها الحب ما كفايه ، قالت لي واي صدمه بالجد !! بس هو شكلو لسه متمسك بيك يا مها ....نظراتو ليك لمن كنتوا بتقدموا الحلقه سوا بتدل إنو ما قنعان منك و لسه بحبك ....ضحكت على كلامها و قلت ليها المظاهر خداعه ، قالت لي بس العيون هي مرآة القلب و هو عيونو فاضحاهو و انتي استحاله ما تكوني شايفه عيوني بتقول شنو ! قلت ليها سجمي العيون بتتكلم كمان ؟!!
قالت لي ما تستهتري يا مها ، لو ضيعتي فارس دا ما حتلقي زيو تاني ... طبعاً قربت اقول ليها انو كذاب و الحصل كلو كان تمثيليه بس مسكت نفسي ، قالت لي نصيحه و اسمعيها مني ما تبقى قاسيه كدا و تنهي علاقتك بالناس من دون ما تديهم فرصه تانيه ...ايوه انا ما عارفه السبب الفرقكم شنو بس عارفاك كويس و عارفه انو أخلاقك ضيقه و انك ما بتتنازلي بسهوله و ما بتدي زول فرصه تانيه و حياتك قوانينك صارمه شديد لدرجة إنها كفيله بتنفير كل الناس منك بس مع ذلك فارس لسه متأمل فيك و متأكده انو عايزك تديهو فرصه بس و بالمناسبه هو جا هنا عشانك ....قلت ليها ما شاء الله عيونو الشماره قالت ليك دا كلو !!
قالت لي على فكره محمد ولد أستاذ إبراهيم صاحب فارس و فارس اتكلم مع معاهو عشان يشتغل هنا و أستاذ إبراهيم وافق طوالي عليهو طوالي بعد ما محمد ولدو اتكلم معاهو من دون شهادات أو غيرها بس قالوا ليهو تعال و طوالي جا ، قلت ليها شايفاك مهتمه بأمرو شديد ، يعني لو عاجبك بكلمو ليك ، قالت لي ياريت والله بس شكلو ما شايف غيرك ، في وقفتنا دي فجأه فارس جا و كان بعاين لي بزهج و حده لحد ما دخل جوه و خالص ما سلم على الاء ، قالت لي شكلك مزهجاهو ، عاينت ليها بس و سكته بعديها دخلت جوه و بدينا حلقتنا و فارس طول الحلقه كان بتجاهل كلامي و بقاطعني لمن أكون بتكلم و استلم الحلقه هو و حسسني إني ما موجوده معاهو ، لمن خلصنا الحلقه جا أستاذ إبراهيم بنفسو و كان باين عليهو زهجان ، نادى فارس لمكتبو و هو طوالي مشى معاهو ، أنا من مكاني داك شلت شنطتي و طلعت برا مقر الإذاعه و إتصلت على خليل ، رد علي من أول جرس و قال لي ها خلصتي صح ؟؟ قلت ليهو أيوه ، قال لي طيب مسافة الطريق بس و أكون عندك قلت ليهو تمام ، رجعت تاني و دخلت حوش الإذاعة و قعدت تحت شجره ، شويه كدا تلفوني رن ! إفتكرتو خليل بس لمن قريت الإسم لقيتو فارس ، ما رديت عليهو ، كرر الإتصال أكتر من مره بس خالص ما رديت ، بعد شويه لمحتو طالع من مبنى الإذاعه بإستعجال و لمن شافني جنب الشجره جا علي و هو عايز ينفجر من الغضب ، أول ما وصلني اتزهج فيني و قال لي بنبره عاليه ليه ما بتردي على زفت التلفون دا ؟؟
قلت ليهو أولا إياك ترفع صوتك علي و تاني حاجه دا تلفوني و انا حره فيهو ، أرد أول لا دي ما شغلتك ، عاين لي مسافه و اتنهد و هدى نفسو ، قال لي تمام خلينا نمشي ، قلت ليهو لا أنا منتظره خليل ، قرن حواجبو و قال لي نعم ؟؟.
قلت ليهو عاين انت مالك ؟؟ عايز مني شنو و بعدين تعال هنا انت كيف عملت اسكرين شوت الدردشات الفي تلفوني أنا و استأذنت من منو لمن شلتهم و مشيت فتحت بلاغ نيابة عني ؟!!
قال لي عايزا شنو من خليل ؟؟ قلت ليهو سألتك جاوب ، قال لي سؤالي واضح !
سكته مسافه بعدها قلت ليهو اتصلت عليهو لأنو طلب مني كدا و حنمشي النيابه سوا ....قال لي بالله !! إتصلتي عليهو عشان طلب منك كدا ؟!! مخوفك ولا الحاصل شنو لمن انتي تسمعي كلامو ؟!!
قلت ليهو جوابتك و جا دورك جاوبني ! سكته ما رد علي بس عاين بعاين لي بنظرات مليانه غضب و عتاب و أنا ما فاهمه دا مالو !!!
بعد مسافه قال لي يعني عادي تقولي ل خليل بقصة الفيديو و لمن أنا أسألك تقولي لي ماف حاجه !!
قلت ليهو انت منو أساساً عشان أجي و أحكي ليك مشاكلي ! قال لي بنبره عاليه و خليل منو عشان تمشي و تحكي ليهو مشاكلك ؟؟!
مسحت وشي بيديني و قلت ليهو و بعدين معاك ! زهجتني ياخ !! انت مالك فهمني ليه حاشر نفسك في حياتي و مديني إحساس انك مسؤول عني أو في شي بيناتنا عشان أجي و أحكي ليك !! ما تنسى المسرحيه العملتها و ما تنسى إننا حالياً بنكره بعض شديد ، قال لي دا من جانبك انتي و بس !!
سكته و بقيت أعاين ليهو بإستغراب ...قال لي ايوه انا غلط و إتصرفت بطيش لمن فكرت اعلقك فيني و بعدين أنسحب ، أنا غلطان و حيوان و فاشل و عاطل زي ما بتقولي و آسف شديد على الحصل رغم اني عارف انو إعتذاري ولا شي قصاد العملتو...... إذا ممكن بس تطوي صفحة الحصل و تخلينا نبدا صفحه جديده كأننا اول مره نعرف بعض ....قلت ليهو أكيد ما ممكن و ما عايزا أطوي أي صفحه و معرفتك ما بتشرفني....قال لي مها أنا.....فجأه تلفوني رن ....لقيتو دا خليل ، طوالي رديت عليهو و طلعت لمن قال لي انو واقف لي برا ، فارس جا طالع و بقى واقف جنب باب الإذاعه بس و بعاين لينا ، خليل نزل و مشى ليهو و اظنو قال ليهو لازم تمشي معانا ، المهم جا و ركب معانا ، أنا كنت راكبه قدام مع خليل و هو ورا ...خليل بعد يتكلم معاي و فارس ساكت بس و بسمعنا ، بعدها خليل وجه سؤالو ل فارس و قال ليهو انت كيف عملت إشكرين شوت لكل رسايلهم رغم أنها في تلفونها ؟!! فارس طنش سؤالو و عمل نفسو ما سمعو ف خليل سكت خلاهو ... كنت مستغربه شديد و عايزا افهم كيف فارس عمل إسكرين شوت من تلفوني من دون ما يشيلو !!
المهم لحد ما وصلنا النيابه فارس دا وشو كان حيقع منو !!لمن دخلنا هو كان ورانا بس فجأه ما لقيناهو ، خليل قال لي دا أصلو واحد مستهتر ساي و أصلو ما جادي ، خليل طلع تلفونو و عمل مكالمه بعدها جانا واحد كدا سلم عليهو سلام معرفه و سلم علي ، خليل قال لي خليك قاعده هنا هسي برجع ....قلت ليهو تمام ، قعدت و بقيت منتظراهو ، جاني بعد مسافه و قال لي ماف أي بلاغ انفتح بإسمك ضد البهددوك ديل و أساساً ماف أي زول جا و بلغ عنهم ، بمعنى إنو فارس كان بكذب علينا ..... طبعاً سكته مسافه و أنا بالجد مستغربه في الإنسان دا !!؟ قلت ليهو طيب بكذب علينا ليه ؟؟ ح يستفيد شنو يعني ؟؟
قال لي ما عارف ، المهم أفتحي لي تلفونك تحديداً الفيس ، فعلاً فتحت تلفوني و أديتو ليهو ، عمل إسكرين شوت لرسايلهم و الفيديو الرسلوهو لي .... طبعاً كنت محرجه شديد من خليل بسبب الفيديو دا ، قال لي محلوله هسي برجع ، فعلاً مشى و أنا عقلي بقى جايط شديد ، شويه كدا خليل جا و قال لي ماشي أطبع الإسكرينات دي و راجع ، أتحرك كدا تاني رجع و قال لي ولا اقول ليك احسن ترسليهم لي في الواتس ، قلت ليهو طيب ، و طوالي رسلتهم ليهو و بقيت قاعده متوتره و على أعصابي و خليل مشى ، جاني بعد مسافه و قال لي طبعتهم ، ح أمشي اقابل موظف العرائض عشان يكتب لي العريضه ، قلت ليهو عايز امشي معاك لأنو القعده بتوترني ، قال لي طيب فعلاً مشينا لموضف العرائض و شلنا العريضه بعدها كان مفروض تمشي بيها لوكيل النيابه بس للأسف ما كان موجود ، خليل نادى صحبو و اتكلم معاهو قال ليهو والله ماف طريقه إلا تقابلو الوكيل و هو حالياً ما موجود لكن تعال ليهو بكرا من الساعه 12 ظهراً لأنو بكون متواجد في الأوقات دي ، خليل قال ليهو تمام و طوالي طلعنا ، قلت ليهو تاني مفروض نعمل شنو ؟؟
قال لي بكرا بإذن الله ح اقابل وكيل النيابه عشان يكتب لي الوقائع في العريضه بعدها أرجعها لموظف العرائض عشان يختمها لي قلت ليهو و بعدها ؟؟
قال لي اشيل الأوراق دي كلها و امشي قسم الشرطه اقابل الضابط المسؤول عشان يأشر لي على العريضه دي و منو امشي ل موظف تسجيل البلاغات عشان نفتح بلاغ و بعدها حتمشي معاي للمتحري عشان ياخد أقوالك ....قلت ليهو ليه الإجراءات دي طويله و كتيره كدا !! قال لي لازم لازم
المهم وصلني لحد البيت ، لمن نزلت بالجد ما عرفت اقول ليهو شنو ، كلمة شكراً دي شويه و أنا للأسف ما بعرف أعبر بغيرها.....قلت ليهو بالجد يا خليل شكراً ليك كتير تعبتك معاي ، قال لي بزعل منك والله لو قلتي كدا تاني و أنا أصلا زعلان منك لأنك سكتي و ما حاولتي توقفيهم عند حدهم أو تكلمي زول غير المستهتر داك طبعاً عموماً نتقابل بكرا ...مع السلامه .... طبعاً لمن وصلنا وصلنا بعد صلاة المغرب و ناس البيت من قبيل اتصلوا علي كم مره لمن تلفوني كان مع خليل لمن رجعو لي و لقيت المكالمات اكتفيت بإني ارسل رساله ل مروه كتبت ليها فيها اني ح أتأخر اليوم ، المهم لمن دخلت لقيت أمي و مآب في وشي ، أمي قالت لي هاااا متأخره وين الليله ، قلت ليهم بس ما تقولوا لي انكم كنتوا طالعين تفتشوا علي !!؟ أمي قالت لي لو اتأخرتي أكتر كنا حنطلع نفتشك لكن هسي ماشين نجيب اللبن ، قلت ليها ليه ماشه انتي ؟؟ قالت لي البمشي منو عاد !! هيثم الليله من أصبحت مصدع و ملاذ قالت ما بتمشي و مروه جات قبل شويه و قالت تعبانه اها كما مشيت أنا يمشي منو !؟؟
قلت ليها جيبي البستله و القروش طيب بمشي أنا و مآب ، قالت لي انتي ذاتك فترانه خشي إرتاحي ساي ، قلت ليها لا لا بمشي ، أديتها شنطتي و شلت منها القروش و البستله و مشيت مع مآب ، قلت ليها مشيت المدرسه صح ؟؟
قال لي أكيد !! قلت ليها الحصل شنو ؟؟
قالت لي ولا شي !! أخدنا حصصنا و جينا !! بتسألي ليه ؟؟ قلت ليها ساي بس ، المهم لمن وصلنا دكان عوض لقيت فارس قاعد هناك و من شافني طوالي قام و طلع من الدكان !! شلت اللبن و مآب قالت عايزا بسكويت و شيبس ف إشتريتهم ليها ، المهم طلعنا من الدكان و أنا مستغربه في فارس دا و ما لاقيه أي مبرر لتصرفاتو دي ! بس صراحة أي كلمه أو تصرف منو أنا بحسو كذب و كلامو كلو بالنسبه لي مزيف حتى تصرفاتو ! ما بقدر اتعاطف معاهو أو اصدق كلامو مره تانيه بعد العملو شويه صورتو زياده قدامي و حالياً أنا ما عندي ذرة ثقه فيهو و أبدا ما ح أسامحو على العملو ....المهم وصلنا البيت ، بعد ما إرتحت شويه و صليت العشا و الصلوات الفاتوني أمي قالت لينا أنا و مروه الأخركم شنو ؟؟
مروه قالت ليها كان عندنا إجتماع لأولياء الأمور و لمن طلعت من المدرسه طلعت بعد العصر و الشوارع كانت زحمه و أمدرمان دي ذاتا بعيده .... طبعاً عاينت ليها بطرف عيني و عرفتها بتكذب لأنو هي لمن تكذب بتتكلم بسرعه ، أمي عاينت لي و قالت لي و إنتي ؟؟
قلت ليها اتأخرت لأنو كنت بسجل في حلقه مع واحد من الشخصيات المعروفه و عشان هو حيسافر بكرا اضطرينا نسجل الحلقه كامله معاهو في نفس اليوم ، قالت لي طيب ما شفتي مكالماتنا ؟و ليه ما بتتصلي و توري الناس انك حتتأخري ؟! قلت ليها كلمت مروه لأني قايلاها في البيت و حتكلمكم ، مروه قالت لي اتصلت و كلمتها ، أمي قالت لي المهم تاني لمن تكوني حتتأخري اتصلي و كلمي الناس ، قلت ليها طيب تمام ....المهم لمن دخلت الأوضه لقيت ملاذ راقده في السرير و بتعاين للسقف ، ما إتكلمت معاها ، فتحت الدولاب و شلت لي ملابس و مشيت غيرت و لمن جيت راجعه ما لقيتها بس كان في مروه ...مآب جابت الأكل لينا أنا و مروه ، أول ما بدينا نأكل كدا قلت ليها ليه كذبتي ؟؟ كنتي وين انتي ؟؟
قالت لي نعم ؟؟
لمن عاينت ليها جوه عيونها قالت لي عثمان اتصل علي و قال لي لازم نتقابل ، و مشيت قابلتو عشان أحسم موضوعنا ، قلت ليها و حسمتيهو ؟؟
قالت لي آي ....قلت ليها اها اتوصلتو ل شنو ؟؟ قالت لي اعتذر مني و قال إنو عشان كان مضغوط في شغلو عشان كدا كان بتجاهلني ، قلت ليها و انتي زي الشاطره صدقتيهو صح ؟؟ قالت لي اي مسكين كان مضغوط شديد في شغلو و هو براهو في الغربه فأكيد نفسياتو كانت زي الزفت ، المهم يعني اتصالحنا ، قلت ليها ما جاب ليك سيرة العرس ؟؟ حتكونوا مخطوبين كدا إلى ما لا نهايه ولا شنو ؟؟ ضحكت و قالت لي لا لا قريباً إن شا الله ، المهم هي رفعت الصينيه بعد ما أكلنا و قالت حتعمل شاي ، قلت ليها اعمليهو شاي لبن و كبي فيهو نعناع ، قالت لي طيب ...لمن طلعت قعدت افكر في موضوعها هي و عثمان !...مروه ساذجه و بريئه و ممكن تسامح بسهوله و ما بتركز كتير مع الباطن و بتكتفي بالظاهر ، إلا ما ألقى لي يوم عشان اتكلم فيهو مع عثمان .....المهم مسافه هي تعمل الشاي و تجيبو أنا فتحت تلفوني ، نزلت لي رسايل في الواتس كانت من خليل ، كاتب لي فيها : كيفك و آسف على الإزعاج بس أعرف بس إذا البهددوك ديلك رسلوا ليك تاني ، قلت ليهو لا لا ماف إزعاج+ ما عارفه لأني من اليوم داك ما فتحت الفيس تاني ....قال لي أنا بس عايز أعرف ديل منو و عايزين منك شنو ؟!!
قلت ليهو أنا ذاتي عايزا أعرف !!
قال لي أنا شاكي في زول و حاسس انو هو الورا الحاجه دي .....قلت ليهو منو ؟؟
قال لي فارس
أود اخبارك أن قلبي لا تتغير أحواله مهما تغيرت أحوال الدنيا، فأنا أحبك على كل حال، و أنا سعيد، وأنا مرهق، وأنا بائس، وأنا منكسر، وأنا منتصر، وأنا خائف، وأنا مطمئن، في عزتي، وفي هواني، في كل أحوالي لا يعرف قلبي سوى أن يحبك 💜."
لكاتبه
يتبع.......
