لو عاينت كويس لحياتك و راجعت المواقف و التفاصيل حتكتشف إنو في إنتصارت كتيره ليك ما أعلنتها و ما إحتفيت بيها و ماف زول هناك عليها لأنو انت نفسك ما كنت مديها أهميه و شايفها حاجه صغيره و عاديه ما بتتسمى إنتصارات حتى ، لكن هي حقيقة انتصارات ....كونك تتجاوز أزمه و مصيبه دا انتصار ....تجاهد نفسك عشان تبطل عاده سيئه دا انتصار ....تضع جدول و تمشي عليهو دا إنتصار ...حسمك لقرار و تجاوزك ليهو دا برضو انتصار ، حاجات كتيره و إنتصارات صغيره لو ركزنا معاها و فرحنا بيها حتكون لينا دافع عشان نواصل و نكمل و نقيف بإصرار و عزيمه بعد كل مره نقع فيها...
ل هنا أعزائي المستمعين نكون وصلنا لختام الحلقه ، ان شاء الله نكون قدمنا المفيد و الجديد و شكراً على حسن الإستماع و شاكره جداً لكل الناس التابعتنا و اتصلت و شاركتنا ، إلى جديد اللقاء كونوا في أمان الله و رعايته.....
بعد خلصت طلعت طوالي ما مشيت البيت لأنو ناس البيت كلهم مشوا بيت أبوي التاني ، لأنو اليوم سماية داليا ، المهم ركبت مواصلات بحري و وصلت بعد مسافه ، طبعاً البيت كان عامر بالأهل و كل مجموعه قاعده في ركن أو زاويه من البيت و بتتونس ، دخلت سلمت عليهم و طوالي دخلت جوه ل داليا لقيت معاها شجن .... طبعاً أحمد أخوي عرس شجن و هسي عندهم بت اسمها ليان ، لمن سلمت عليهم شجن قالت لي قايلنك ما حتجي والله ، قلت ليها بعد إتصالات داليا الكتيره دي لو ما جيت ح تصدع بي بالجد ....داليا قالت لي فعلاً المهم جديدك شنو ؟ بقيتي بعيده عننا و ما بنشوفك كتير و اخبارك ما بنعرفها إلا من مروه أو ملاذ !!...قلت ليها بس جاريه مع الشغل ...سكتت مسافه بعدها قالت لي انتي من يوم وفاة خليل اتغيرتي ! يعني انا ما فاهماك يا مها ! كنتي ما طايقاهو و ما عايزا الزواج دا و لمن اتوفى انتي لحد الآن زعلانه عليهو ! يعني كأنك كنتي بتحبيهو....
قلت ليها ما بحبو ولا كرهي ليهو وصل لدرجة اني اتمنى ليهو الموت ...ما بنكر إنو خليل زول كويس و من زمان كنت بقول عنو كدا ، يمكن إصرارو على انو يتزوجني و يتجاهل قراري دي الحاجه الوحيده الشوهت صورتو قدامي بس برضو ما لدرجة إني اتمناهو يموت ! يعني انا لحد اللحظه دي حاسه موتو دا حلم و انو هو حالياً لافي في إفريقيا ، وفاتو المرت عليها سنتين دي حاساها كانت أمبارح ....قالت لي مع إني ما إحتكيت بيهو كتير بس بكى الناس عليهو خاصة الأطفال وراني قدر شنو هو كان زول كويس و محبوب و سيرتو طيبه ، ربنا يرحمو و يوسع مرقدو ....قلت ليها آمين يا رب ، شجن قالت ليها والله موتو خلعنا كلنا ، أنا الما بعرفو كويس دي وفاتو وجعتني والله و ل هسي بتذكرو ....المهم قعدنا معاهم لحد المغرب و بعدها أحمد وصلنا البيت و رجع ، أمي قالت ل مآب و ملاذ امشوا جيبوا اللبن من الدكان و تعالوا ....ملاذ قالت ليها أنا عندي إمتحان بكرا و في كميه من الشيتات منتظراني ، طبعاً ملاذ امتحنت و جابت كم و ستين أمي قالت ليها تعيدي طوالي بس هي رفضت و قالت خلاص تقدم لأي حاجه مع انها من زمان عايزا تقرا تمريض ف أحمد أخوي قال ما تعيد و قدم ليها تمريض في الخاص و حالياً هي في السنه التانيه ، المهم قلت لأمي بمشي أنا و مآب و فعلاً مشينا دكان سعيد لأنو عوض من زمان خلى دكانو و مشى حته تانيه ، المهم لمن مشينا الدكان لقينا عثمان هناك ، سلمنا عليهو و إشترى لينا لبن و سكر و بسكويت ، قال ل سعيد ما عندك بسكويت رويال ؟؟ قال ليهو لا ماف ....قال دي مشكله دي ...قلت ليهو ما تشيل كابتن ماجد دا مالو حلو برضو ....قال لي منو اليفهم أختك و يقنعها !! مصره إلا اجيب ليها بسكويت رويال ! ضحكت و قلت ليهو وحمها كعب .... طبعاً مروه ولدت و جابت ولد اسمو عمر و حالياً حامل بالطفل التاني ، المهم نحنا مشينا و خليناهو لافي من دكان ل دكان عشان يشتري ليها البسكويت ...في السنتين ديل عثمان أثبت لي انو زول كويس و بالجد بحب مروه و بخاف عليها ، أما دانيه راجلها طلقها و هي السبب لأنها ما عايزاهو و دائماً بتطلب منو الطلاق و بتعمل معاهو مشاكل لأنها إنجبرت عليهو ، في النهايه طلقها و هي ما عندها ولد منو ...المهم لمن مشيت البيت كلمت أمي ، ضحكت و قالت لي أصلها أختك دي وحمها كعب كدي النمشي عليها....المهم هي طلعت و أنا فرشت السراير ل مآب و هيثم و خليتهم بحضرو برا في الحوش و دخلت جوه لقيت ملاذ بتتكلم بالتلفون بصوت واطي ، لمن شافتني إتخلعت و طوالي قفلتو ....ما عارفه ليه المره دي ما إنفعلت فيها و شاكلتها....مشيت عليها و قلت ليها قفلتيهو ليه ولا حاسه نفسك بتعملي في حاجه غلط ! عموماً أبوي لو عرفك نفس مصير دانيه حيكون مصيرك ، قلت كدا و قعدت في السرير التاني و فتحت الفيس ، تلفونها تاني رن ، إتوترت شديد و بقت تعاين لي و أنا حرف ما قلتو ليها ، طلعت برا و تاني جاتني راجعه و مدت لي التلفون ، قلت ليها دا منو ؟؟؟
قالت لي بس إتكلمي ...لمن قلت آلو جاني صوت بقول السلام عليكم ، قلت ليهو و عليكم السلام 😊
قال لي أنا غسان إبراهيم دكتور ملاذ في الجامعه ، قلت ليهو اهااا ، قال لي عشان ما تفهمي أختك غلط و تشاكليها أنا الإتصلت عليها و لي فتره طالب منها رقم أبوها بس كانت متردده و أنا والله ما زول لف و دوران و عايزها بسنة الله و رسوله ...قلت ليهو رقم أبوي أنا بديك ليهو و طوالي مليتو الرقم و في بالي انو زول مستهبل ساي ، لمن قفلت منو قلت ل ملاذ أشوفو لو حيتصل على أبوي ولا لا ، قالت لي والله هو زول جادي و محترم و أنا ما أديتو رقم أبوي لأني خفت أبوي يقول ليهو جبت الرقم من وين و يقعد يسألني دا منو و يشاكلني ، قلت ليها غريبه زمان كنتي مفتحه و شفته و بتعرفي تقلبي الطاوله هسي الإتغير شنو !😊ما ردت علي .....بس انا صراحة الكان محيرني إنو ملاذ شكلها مبسوطه و عايزاهو يتقدم ليها !! يعني هي بالبساطه دي نست فارس الكانت بتبكي عشانو ؟؟ سنتين بس خلوها تنسى فارس ؟؟؟ معقوله بس !!؟
المهم بعد 3 أيام من الكلام دا أبوي جانا و أنا نهاي ما إتوقعت إنو الدكتور داك يكون جادي ، أبوي نادانا أنا و أمي و ملاذ و قال ل ملاذ في زول متقدم ليك و إنتي عارفاهو صح و أديتيهو رقمي ؟😊قالت ليهو والله يا أبوي ما حصل طلعت معاهو أو اتصلت عليهو هو براهو الكان مصر إني أديهو رقمك بس انا أبيت أديهو ليهو و ذاتي ما عارفه جاب رقمي من وين ، قلت ليهو يا أبوي أنا الأديتو رقمك ....قال لي والله ما شاء الله يعني كلمكم انتوا بالأول بعدها فكر يجي و يتكلم معاي !...سكته ما رديت عليهو و أصلا علاقتي بيهو بعد الحصل بقت مهزوزه و ماف كلام بيناتنا ، أمي قالت ليهو مدام الولد طلع ود حلال و جايها بالباب انت زعلان مالك !!؟ ملاذ قالت ليهو عادي ترفضو يا أبوي ، اعمل العايزو ، قالت كدا و طوالي مشت و أنا مشيت وراها ، لقيتها قاعده على السرير و دموعها في طرف عينها ، قلت ليها بالجد حيرتيني معاك يا ملاذ !! يعني نفس دموعك دي في يوم كانت نازله عشان فارس و هسي عشان الدكتور دا !! تقريباً انتي كل سنه بتبكي عشان زول....ما ردت علي ، المهم بعد مسافه أمي جات داخله و قالت ل ملاذ مبدئياً كدا أبوك قال ما عندو مانع يقابلو بس ح يسأل عنو و لو لقاهو زول كويس ما ح يعترض .... طبعاً ملاذ إنبسطت و دموعها إختفت !!
المهم بعد يومين الدكتور داك مشى قابل أبوي و إتكلم معاهو و أبوي سأل عنو و قال إنو اهلو طلعوا ناس كويسين و ليهم سمعه و مكانه بس إشترط عليهو إنو ملاذ تكمل قريتها ، يعني ينتظرها سنتين لحد ما تتخرج ، عمتي نوره قالت ليهو خليها تقرا في بيتها المشكله وين !! قال ليها دا شرطي 😊المهم الدكتور وافق على الشرط دا و قال ما عندو مانع بس عملنا ليهم خطوبه ، كنت قايلاهو حيكون كبير كدا بس طلع شاب ....المهم يوم و أنا راجعه من شغلي بالصدفه شفت خالتو إنصاف أم فارس !!
إتفاجأت طبعاً لأنها مشت سكنت مع أخوانها من زمان و بقيت ما قاعده اشوفها بس ناس أمي قالوا إنها كانت بتجي من شهر ل شهرين كدا تشوف بيتها و بترجع و زي السمعت انها عايزا تأجرو!!....لمن شافتني وقفت سلمت علي سلام شوق و محبه كدا لمن استغربت فيها !! ايوه صح أنا ما حصل قبل كدا اتشاكلت معاها بس بعرف أنها شكاله و بتاعة مواضيع ف مستغربه كيف سلمت علي بالطريقه دي ؟!!
وقفت سألتني عن أحوالي و قالت لي جديدك شنو يا بتي و أن شاء الله أهلك طيبين و و و كلام كتير ، بس ما عارفه ليه كنت منتظراها تجيب لي سيرة فارس !طول السنتين ديل ما عارفه عنو حاجه و شكلو حذف حسابو في الفيس ، قلت ليها نحنا كويسين و سألتها عن حاله و قلت ليها مفقوده والله ، قالت لي ما تفقدي عزيز ان شاء الله أنا ذاتي فقدت الحي دا و نسوانو السواطات و مشاكلو 😂ضحكنا الإتنين سوا و قلت ليها أتفضلي معاي البيت ، قالت لي بنضف البيت و بجيكم ، قلت ليها عايزا تأجريهو ولا شنو ؟ قالت لي كنت ناويه أأجرو لأنو ما بقدر اقعد فيهو براي بس لمن فارس ولدي قال إنو راجع خليت الفكره..... طبعاً لمن قالت إسمو قلبي عمل شحححح ، حسيت دقاق قلبي مسموعه و عيوني مليانه لمعه و حسيتهم فضحوني قدامها ، بلعت ريقي و قلت ليها ايواا كويس ، المهم هي مشت على بيتها و أنا على بيتنا و طول الطريق دقاق قلبي كانت بتتسارع و حسيت جسمي تلج عديل ....ياخ ديل سنتين ولا مية سنه يا فارس ؟!
يعني ما قادره استوعب إنو غاب المده دي كلها ، يا ربي مشى وين هو و هسي بعمل في شنو و حالتو كيف !....حقيقة الأسئلة دي ما حصل فارقت بالي خالص مع إني بحاول ألهي نفسي و أطوي صفحات الماضي و أنسى الحصل بس لحد اللحظه كل تفصيله حصلت قبل السنتين ديل أنا متذكراها لدرجة إني حاسه نفسي عايشه في الماضي أكتر من الحاضر ....ايوه مرت سنتين بس روحي لسه عالقه في زمن ما قبل السنتتين...
المهم بعد حوالي ساعه كدا خالتو إنصاف جاتنا طبعاً سلمت على أمي بالأحضان و قعدوا يبكوا ، ايوه هي زوله لسانها طويل زيي و كانت عامله جوطه في الحي بس برضو غيابها فرق مع الناس ....حتى فارس ولدها الكنت بقول عنو عاطل الناس فقدتو و أصحابو أكتر ناس اتأثروا بغيابو حتى أنهم بطلوا قعاد في الشارع و بطلوا ضحك و تشغيلات ، يعني حينا بقى هادي و اتغيرت شديد في السنتين ديل 💔
المهم بعد تلات أيام من الكلام دا أمي قالت لي أرح معاي ناس ميمونه ديل قالوا عيانه ... طبعاً دي أم خليل و أنا والله ما اسمع اسمها ولا اسم زول من أهل خليل بتجيني رعشه ، بعد موتو كل الناس قالت أنا سبب و اتكلموا قدرتهم و أمو من الناس القالت لي انتي عارض و ولدي مات بسببك و لأنك ما عايزاهو عملتي ليهو عمل و كتلتيهو بيهو و أنا ما عافيه ليك ! كلامها دا أنا لحد اللحظه بتذكرو بالحرف الواحد أنا مع اني ما قاعده أسكت لزول أساء لي بس هي حرفياً ما قدرت أقول ليها حاجه لأنو الحاله الكانت فيها و الكنت أنا فيها ربطت لساني و ما قدرت أقول ليها شي و من الأيام الأولى للوفاة تاني ما شفتها و أصلا هم ساكنين في الشارع التاني و أنا تاني ما إتلاقيت معاها كتير و لو امي مشت ليهم أنا ما بمشي لأنو أبوي ذاتو منعني و هو طبعاً ما سكت لمن كل الناس قعدت تتهمني و تقول كلامها الفارغ داك ، هو ما رد عليها في نفس اليوم القالت لي فيهو الكلام داك ، كل الناس راعت ليها و ماف زول من أهلي اتجادل معاها ، أبوي ما مشى شاكلهم بسبب الموضوع دا إلا لمن مرت 3 شهور بعد وفاة خليل لمن كلام الناس كتر و كلهم مصرين إنو أنا عملت ليهو عمل 💔
المهم المره دي مشيت مع أمي مع انو شوفة أهلو بتوترني ، أختو فتحت لينا الباب ، سلمت علينا و فضلتنا ل جوه ، أمي قالت ليها أمك وين ؟؟
قالت ليها في الغرفه ديك و ودتنا ليها ، لمن دخلنا عليها لقيناها راقده في السرير و ملامح وشها باهته و شكلو المرض انتهى منها ! لمن شافتني بقت تعاين لي بس و هي ساكته لحد ما مديت ليها يدي بعد ما أمي سلمت عليها ، مدت ليها يدي من دون ما اتكلم و هي كمان عملت نفس الشي ، أمي بقت تتكلم معاها و تسألها عيانه عندك شنو و اذا مشت قابل الدكتور أول لا لحد ما بنها خلود جات داخله و ضيفتنا بمويه و عصير و قعدت معانا.....ما طولنا طوالي قلنا ليهم نمشي بعد دا لأنو الجو ذاتو كان متوتر ، أنا طلعت قبل أمي و مشيت وقفت ليها جنب الباب لحد ما جات مع خلود أمي ودعتها و طلعت و خلود قفلت الباب ، أمي قالت المره يا حليلها انتهت والله ربنا يديها الصحه و العافيه ، والله وفاة ولدها دي أثرتها و تعبتها ربنا يشفيها ، قلت ليها فعلاً ، أول ما إتحركنا من جنب الباب كدا خلود فتحت الباب و قالت لي يا مها....
إتلفتنا عليها أنا و أمي و أنا طبعاً إتخلعت قلت يمكن خالتو ميمونه ماتت لأنو شوفتها الهسي دي ما بتطمن قلب والله 💔
لا أنت بعيد فأنتظرك ؛ و لا أنت قريب فألقاك ؛ و لا أنت لي فيطمئن قلبي ... و لا أنا محرومة منك لأنساك ... أنت في منتصف كل شيء..! و ربما لم أستطِع وصفَ مَا بقلبي نحوك بِدِقَة، فهَل أخبرتك يوماً أن حَياتِي مِن دُونك تنقصهَا حَياة ؟ ♥️
يتبع........
💜
