يُدمى قلبي بغــيد#اكتملت

بـ ٥

دخلت غيد على منظر مغاني طايحه على الارض والدم مغطي وجهها ومعبي المكان وصوت نفسها المخنوق وواصل لعند الباب هذا غير انها كانت تون وتحاول تستنجد او تنادي ولكن من قو الضرب والتعب ماكانت قادره

نادت غيد على اححد يساعدها ويشيل معها مغاني للسياره وتوجهت وهي خايفه للمشفى كانت تشوف مغاني منهاره ولا حتى حاسه بالدنيا حولها من كثر ما انضربت ..

بعد ١٠ دقايق وصلت لأقرب مشفى ونزلت مغاني اللي حالتها تسوء وكل مالها تغفى وتغيب عن الوعي للطوارئ وهنا طلبوا من غيد تتم برا لحد ما يخلصون علاج وفحوصات كاملة خصوصًا عن النزيف

..........................

( بعد ٣ ساعات / قاعة انتظار المشفى )

الدكتور : مثل ما قلتلك سوينا كل الفحوصات والحمدالله مافي شيء خطير ولا نزيف ولكن الضرب كان مبرح وترك كدمات وجروح واضحه خيطنا بعضها والباقي بيروح مع الوقت
غيد : طيب وبخصوص التحقيق ؟
الدكتور : بلغنا بعد المعاينة على طول وصار مسؤولية الشرطه
غيد : طيب ومتى اقدر اخذها او شو الأنسب
الدكتور : تقدري تاخذيها لأن مافيه شيء نسويه خلاص كل شيء تمام اما وجع الضرب ف بيتم كم يوم وبيروح
غيد : طيب وفي كسور؟
الدكتور : للأسف عندها كسر فاليد اليسار ولكن شيء بسيط ما بتطول الجبيره الا اسبوعين او ثلاثه
غيد : يلا الحمدالله اهم شيء انها بخير
الدكتور : الحمدالله استاذنك - يروح -
المحقق يقاطع : السلام عليكم معاي غيد؟
غيد تطالعه : هيه تفضل ؟
المحقق : انا المحقق محمد وجيت عشان اخذ اقوالكم ممكن تقوليلي ايش صار وايش شفتي ؟
غيد : الصدق ماشفت الا كم طالبه طالعين من قاعة الانتظار ورحت اشوف شو كانوا يسون هناك لأن ماعندهم شغله ولا يجلسون هناك بالعاده ودخلت لقيتها على هالحال غشيانه ونفسها مختنق وكلها مدمات
المحقق : وليش شكيتي ؟ يعني ليش توقعتي ان الطالبات هذيل كانوا مسوين مصيبه فالمكان ؟
غيد : كان صاير فالكلاس موقف - تحكيلهم -
المحقق : تتوقعي انها نفذت تهديدها ولا !
غيد : مدري بس هذا اللي شككني ف سرت اشيك وشفت مغاني
المحقق : طيب وماشفتيهم وهم يضربوها؟
غيد: لا شفتهم لما طلعوا بس
المحقق : متى شيكتي!
غيد : ع طول طلعوا هم وانتظرت يدخلون المبنى وبعدها سرت يعني تقريبا بعد دقيقتين وشوي
المحقق : وليش ما رحتي على طول ؟
غيد : الصدق انا ومغاني متفقين انه مانبين صلة قرابتنا وغير كذا خفت لأن منظرهم وهم طالعين كان يشكك وايد وينفضون الغبار واوس كانت تمسح ايدينها بكلينكس فخفت يشوفوني
المحقق : وغير كذا ؟ صارت مواقف من قبل بينهم؟
غيد : اول كلاس لي مغاني جات متأخره ف وقفتها كعقاب وخليتها تكتب انها اسفه لحد ماوقفتها وبعدها لما طلعت اوس ذي كانت تضحك وتقول انها صفت حساباتها باللي صار
المحقق : يعني فيه بينهم عداوه او مشاكل سابقه
غيد : انا ماجيت الا من اسبوع وحوله فما اعرف شو طبيعة علاقتهم لكن على المواقف واللي شفته اكدتلي انه بينهم حساسيه
المحقق : وليش ما تبين توضحين صلة قرابتك بمغاني ؟
غيد : بيكون صعب الوضع فالأريح انه محد يعرف فمكان شغلي عني شيء
المحقق : مافي سبب ثاني
غيد : الا فيه بيننا موضوع عائلي غريب وانا رجعت لبيت جدتي وهي موجوده ف انت فاهم انه صعب حد يتقبل شخص جديد بهالشكل وبهالظروف الصعبه
المحقق : ايوه الله يعينكم
غيد : امين
المحقق : خلاص عيل شكرا غيد بروح لمغاني نشوف اقوالها ان شاءالله لو عرفتي شيء كلميني - يعطيها بطاقته -
غيد : تمام العفو