[Unicode]
♡" Lovingly divorced "♡
အပိုင်း (၂၃)
SH Group ပိုင် 'Stars House Hotel' ၌ ယနေ့ည ခုနှစ်နာရီအချိန်တွင် နာမည်ကြီးစူပါမော်ဒယ်သက်တံ့ရိပ်၏ အရေးကြီးပွဲအခမ်းအနားတစ်ခု ကျင်းပဖို့ ရှိနေသည်။
ထိုပွဲတွင် သက်တံ့ရိပ်က SH Group မှ ဦးသက္ကကျော်ပိုင်ဆိုင်တဲ့ ရှယ်ယာများအားလုံးကို သူမက ဝယ်ယူလိုက်ပြီဖြစ်ကြောင်း တရားဝင်ကြေညာသွားမည်ဖြစ်သည်။
ထို့ကြောင့် ဂုဏ်သရေရှိစီးပွားရေးလုပ်ငန်းရှင်များအပြင် နာမည်ကျော်အနုပညာရှင်ပေါင်းများစွာကလည်း တက်ရောက်လာကြမှာမှို့ သတင်းမီဒီယာများ၏ တိုက်ရိုက်ထုတ်လွှင့်မှု အစီအစဉ်များစွာလည်းရှိနေသည်။
ပွဲမစမီ နေ့လည်လောက်ကတည်းက ဟိုတယ်လ်တစ်ခုလုံးရှိ ဝန်ထမ်းများနှင့် ဧည့်သည်များမှာလည်း သွက်လက်မြူးကြွနေကြသည်။
ဒီညပွဲမှာ တခြားသော VIP ဧည့်သည်များစွာကိုလည်း ဖိတ်ကြားထား၍ လုံခြုံရေးပိုင်းကို အထူးကြပ်မက်ဆောင်ရွက်ထားသည်။
ထို့အပြင် လူအများ၏အထူးစိတ်ဝင်စားခြင်းခံနေရတာတော့ ဒီပွဲမှာ မင်းသမီးသက်တံ့ရိပ်က Moon Group ရဲ့ CEO သုသမိုင်းနဲ့အတူတွဲပြီး ပွဲတက်ရောက်လာခြင်း ရှိ/မရှိဆိုတာပင်။
ဒီကိစ္စနှင့်ပတ်သတ်ပြီး ပွဲလာကြသည့် ဧည့်သည်များအကြား တိုးတိုးကြိတ်ကြိတ် ဝေဖန်မှုများရှိနေသည်။
'SH Group' ဆိုတာက သုသမိုင်း၏ယောက္ခမဖြစ်သူ ဦးသက္ကကျော်ပိုင်ဆိုင်ကြောင်း တလောကလုံး သိထားပြီးသားဖြစ်၍ ယခုအခါ SH Group ရဲ့ရှယ်တွေကို သုသမိုင်းနှင့်ဘာလိုလိုသတင်းထွက်နေတဲ့ မင်းသမီးသက်တံ့ရိပ်က ဝယ်ယူလိုက်တာကြောင့် လူအများအကြား သို့လောသို့လော သတင်းများ ပျံ့နေသည်မှာလည်း အထူးအဆန်းတော့မဟုတ်ပေ။
လူတော်တော်များများကတော့ သုသမိုင်း၏တရားဝင်ဇနီးထိကရုန်းအတွက်သာ ဂရုဏာသက်မိနေကြသည်။ တချို့ကျတော့လည်း ဒါက ထိကရုန်းနဲ့သက်တံ့ရိပ်တို့ ထိပ်တိုက်တွေ့ရမယ့်ပွဲလို့ယူဆကြကာ စုတ်တသတ်သတ်ဖြင့် မချင့်မရဲဖြစ်နေကြသည်။ သုသမိုင်း၏လူမှုရေးဖောက်ပြန်နေမှုအပေါ်မှာလည်း ဝေဖန်မှုများစွာရှိလာကြသည်။
