[Unicode]
♡" Lovingly divorced "♡
အပိုင်း ( ၁၇ )
"နင်က မိုင်း!...မိုင်းမိုင်းလား ?"
" အွန်း..ဟုတ်တယ်.. မိုင်းမိုင်း.. မိုင်းမိုင်း "
မိုင်းက အရူးမကြီးကို ခပ်မြန်မြန်ပင်ခေါင်းပြလိုက်သည်။
" ငါ့...မိုင်းမိုင်းလေး!!...ဟီးဟီး...အဟား ဟား...ငါ့ မိုင်းမိုင်းလေး ရောက်လာပြီပေါ့ "
အရူးမကြီးက ရွှံ့တွေပေကျံနေသည့် သူမလက်ချောင်းများဖြင့် မိုင်းမျက်နှာကို ပွတ်သပ်နေသည်။ မိုင်းက ရယ်၍ အရူးမကြီးကျောပြင်ကို ပွတ်သပ်ချော့မြူလိုက်သည်။
" ထားထားအတွက် ကျွန်တော် မုန့်တွေအများကြီး ဝယ်လာတယ်...အစားများများစားရမယ်နော် "
" နင်ပြောတော့...ငါ့အတွက် ကစားဖော် ခေါ်လာပေးမယ်ဆို...ဘယ်မလဲ...ငါ့ကစားဖော် "
အရူးမကြီးက ထပ်မေးလိုက်တော့ မိုင်းက ခပ်ဖြည်းဖြည်းထရပ်လိုက်ကာ ရုန်းဘက်လှည့်ကြည့်လာသည်။ ထို့နောက်..
" ဟိုမှာ...ခေါ်လာတယ်ဗျာ...ထားထားအတွက် ကစားဖော်ကသူပဲ"
".........."
မိုင်းက ရယ်ကာ ရုန်းကို လက်ညှိုးထိုးပြလိုက်သည်။ သူ့အပြုအမူကြောင့် ရုန်းကြောင်အသွားခဲ့ရသည်။
" ......သုသမိုင်း...ရှင်!! "
ရုန်း ဒေါသဖြစ်စွာ အော်လိုက်ပေမယ့် ဘာဆက်ပြောရမှန်းမသိပေ။ မြေပြင်ပေါ် ဖင်ချထိုင်နေသည့် အရူးမကြီးက ရုန်းကို တောက်ပသည့် မျက်ဝန်းများဖြင့် ကြည့်လာပြီး....
" ငါ့ကစားဖော်လေး..လာ သွားကစားကြမယ်...လာ...လာခဲ့ "
ပြောပြီးသည်နှင့် အတင်းကုန်းထကာ ရုန်းအနားသို့ တိုးကပ်လာသည်။ ရုန်းခြေလှမ်းအနည်းငယ် ဆုတ်လိုက်မိသည်။ သူမငယ်စဉ်ကတည်းက အရူးတို့ စိတ်မနှံသူတို့ဆိုရင် အရမ်းကြောက်ခဲ့သည်။ အခုအရွယ်ထိလည်း မြင်သည်နှင့် ကြက်သည်းများထကာ ဝေးဝေးမှ ရှောင်သွားတတ်သည်။
" ထားထားနဲ့ ခဏလောက် အဖော်လုပ်ပေးလိုက် "
မိုင်းက ရုန်းကိုပြောလိုက်သည်။
