في نفس اليوم الجا فيهو ابوي هاجر جرت جري رجعت بيتها لانو شكلو عوض مشى مع ابوي عرسو وهسي جا معاهو ، تاني يوم امي عملت الشاي وقالت لي امشي وديهو ليهم ووديتو وانا بعصر ليمونه على قلبي، ختيتو ليهم وانا طالعة ابوي قال لي نادي لي روان قلت ليهو حاضر ومشيت ناديتها ليهو، وقعدنا شربنا الشاي واحمد قال لي بي صوت خافت آمنة امس ناس المدرسة قالو عايزين القروش قبل يوم الخميس الجاي قلت ليهو بي نفس نبرتو امشي لي أبوي وريهو، قال لي ح يشاكلني! ، قلت ليهو ما تخاف ما بسألك امشي ليهو هسي بي هناك..
هز لي راسو وخلص كبايتو سرعه وقام مشى بهناك، وبعد دقايق جا والدموع مالية وشو وهو بجاهد ما ينزلها اكتر، قلت ليهو مالك؟، قال ليك شنو؟، قال لي بي صوت باكي ابوي قال لي ان شاء الله ما تمتحن ولا تقرا القرو لقو شنو؟، اتنهدت وقلت لا حول ولا قوة الا بالله، جانا كمال طالع وقال لي احمد ارح ولمن شافو جنبي وهو ببكي جا علينا وقال ليهو مالك؟، وقمنا حكينا ليهو الحصل، سكت مسافة وقال لي احمد خلاص بتتحل ارح وقامو مرقو على مدرستهم،
امي جاتني وقالت لي روان وين؟ قلت ليها ابوي من قبيل ناداها ومشت بهناك!، قالت لي اجي!، لي يعني؟، قلت ليها علمي علمك، قالت لي هوي يا آمنة انا كلامات زي دي ما بتنفع معاي ماشة اشوف البت دي، وشالت توبها ومشت ليهم بهناك وانا هنا لاول مرة لميت الورقة وما كرفستها ولا شرطتها بس لميتها في جيب بجامتي، طلعتها وبقيت اعاين ليها واقراها الف مرة ومرة لحدي ما حفظتها عديل!،
إياس خطو جميل جدا والنصوص دي سرقتني وخلتني احبها قلت لو اداني ليها تاني ح احتفظ بيها بس ما بديهو اي وش، شلت من اوراق واقلام كمال وبقيت بحاول اقلد خط إياس وكتبت النص كم مرة، في اللحظة دي امي جات داخله في هدوء وانا ما حسيت ابيها الا وهي بتشيل مني الورقة!!
اتخلعت شديد وخفت وهي بقت بتقرا في النص بعد انتهت عاينت لي ورفعت حاجبها وقالت لي دا شنو؟، الاداك الورقة دي منو؟، بقيت اتمتم وما عارفة اقول ليها شنو وما قادرة أكذب ابدا، فلمن لقتني ساكته واصلت وقالت لي اكيد ولد!، دا منو ولاقيتيهو وين يا آمنة؟؟!، اصريت على سكوتي جدا لانو لو اتكلمت يا اما ح اقول الحقيقة وامي دي اصعب من ابوي في حاجات زي دي او اكذب وامي كدا برضو ح تعرفني فالسكوت كان اسلم حل..
قالت لي كنت بخليك تمرقي عشان تجيبي لي ادوية وحاجات من السوق للبيت بس بالطريقة دي ح اشدد على عدم خروجك انتي بالذات!، امنة انتي ما قدر حاجات زي دي!، اولاد الزمن ديل ما مضمونين ولو جادي كان عرف درب بيتك بي وين!، احترمي تفسك وحافظي عليها ابوك لو عرف ما حيحصل خير والله! ، بحبك وبتحبني وهاك يا رسايل وهدايا وحاجات حلوة وكلام كتيير فاضي منو استهلاك مشاعر وماديات في الفاضي دا ما كلامنا نهائي، نحن ناس عقد طوالي فهمتي؟
ودي اول واخر مرة تتواصلي معاهو ايا كان!، انتي لسه صغيرة دا ما وقتو، طبعا كل الكلام دا من ناحية فهمي انا بس ابوك "اشرت لي على المخزن" دااااك فهمو ، يقعدك اسبوع اسبوعين وتموتي زي ا...، هنا قطعت كلامها وملامحها اتغيرت كأنها بتتزكر حاجه، قلت ليها زي منو؟!!، وعاينت ليها بي استغراب وهنا حسيت بالخوف الشديد منهم، المخزن؟، قالت لي ح اموت زي منو لكن؟؟!، قالت لي انسي انسي ، روان اختك لقيتها بتكنس الحوش لي مرة ابوها!، شفتي الكلام دا كيف؟، خلاص بدينا حركات الضرات ومشت وهي بطنطن..
