شايف مصطفى الايام دي كويس شديد معانا كلنا وخلى مرقاتو الكتيرة ديك وبقى اكتر وقتو في البيت ومع اولادو وزوجتو،
بيتنا بدت فيهو ملامح اي بيت عرس سوداني، لمة الأهل اليومية والمباركات وجملة "ربنا يتم على خير" ، واسمي الاتبدل بي لفظ "يا عريس" والفرحه ملت البيت بي كل أركانو وباقي اسبوع واااحد على اجتماعنا وعقد أرواحنا في حلالو♡، يوم طرحت عليها النقاب كنت جادي والله لانو ما حصل لاقيت آمنة وما لاحظت لي نظرات وابتسامات وهمسات الباقيين عليها وكيف يكون الكلام دا وهي بتخصني انا براي؟، فعشان كدا النقاب كان افضل حل، ستر ليها وبداية التزام لي روحها واطفاء غريزة الغيرة واطمئنان لي، ما عارف اذا ح تسمع كلامي وتاخدو على محمل الجد ولالا؟
ما ح اضغطها ايا كان ردة فعلها مع ان لو اتنقبت حبها ح يتضاعف اضعاف مضااعفه في قلبي وح اتبسط جدا جدا، المراسيل والمشاوير كترت وبي هنا تجهزيات العزومة وابوي المتحمس اكتر مني وح يجي قبل العقد بي يوم وكمان لازم احافظ على دوامي في الصيدلية وباقي اشغالي عشان اقدر اسدد قروش الصندوق وتجهيزي لي شهر العسل وحجز الشقة واهم شي طبعا تجهيز جلابية العقد والشال ، رغم الجوطة دي وطبعا دي احلا جوطة تمر علي ! كل ما اتذكر آمنة بتترتب ♡، في اليوم القبل العقد كنت مضغوط شديد الضيافة في البيت ومراسيل امي وكمان ابوي في المطار ودايرني اجيهو ، اول شي عملتو الظهر لما اذن صليت ومشيت لي أبوي في المطار وجبتو البيت وهو الشارع كلو شغال يقول لي عرسك بكره يا بيبي؟، الحمدلله ح نتفكى منك واقتصادنا ح يتصلح يا بيبي🤣 ، قلت ليهو ياا حاج عليك الله اي شي ولا كلمة يا بيبي دي!، قال لي كويس لكن عندي ليك وصايا كتيرة!، قلت ليهو والله دي ماف طريقة ليها الا بكره عبدالوهاب منتظرني وماش الزريبة للبهايم وبعدها داخل السوق والحمدلله ، ابوي قال لي ماهو انا داير اوريك الحياة بعدها ح تكون كيف احتمال تنط او تغير رأيك!، ضحكت وقلت ليهو مستحيل طبعا وانا عارف انو الحياة بالاتفاق والتفاهم من الطرفين ح تدوم!، ابوي ربت على كتفي وقال لي بسس اختصرت اي شي ، الحمدلله بعد دا انا وامك نموت مرتاحين!، قلت ليهو ربنا يبارك في عمركم وتشوفو زواج احفادكم كمان، ضحك ونزل مني لي جوا وانا كمان تابعت شغلي ..
لاقيت عبدالوهاب في السوق وجاب لي جلابية العقد وملحقاتها هدية شكرتو شديد وهو قال لي انت لفيت كتير وتعبت بعد دا والساعه ماشه لي ٥ ارجع البيت وخليك مع الضيوف بس وكان في اي حاجه وريني ، قلت ليهو تسلم تسلم مع انها مستحيلة اقعد ساي كدا ، شكرا ليك شديد يا عبد الوهابوقفت معاي كتير و..، قاطعني وقال لي امش امش ياخ نحن اخوان ما بيناتنا كلام زي دا!، فابتسمت ليهو ومشيت على البيت الاتملى وناس داخله ومارقه وكان في بهجة واضحة في البيت..
مصطفى واولادو عشان ما بحبو الجوطة اجر ليهم شقة قريبة لينا وبي كدا شقتي فضت ومشيت ليها الساعه ٢صباحاً اخدت لي نومة صغيرة مع اني كنت ما قادر!، انوم كيف وح يتم عقد قراني مع آمنة الحبيتها بي كل عضو وجزء فيني وبعد ساعات بسيييطة ح امسك يدها بالحلال❤ ما حتحس بغير طعم الفرح الحقيقي بالزواج الا وانت بتسعى عشان ترتبط بإنسان حاسي من جواك انو الحياة ما حتكمل بدونو...
